Ўзбекистон Республикаси Президенти И. Каримовнинг 2010 йил 26 январда Ўзбекистон Республикаси Олий Мажлиси Сенатининг биринчи мажлисида сўзлаган нутқи ва 2010 йил 27 январдаги Ўзбекистон Республикаси Олий Мажлиси Қонунчилик палатаси ва Сенатининг қўшма мажлисидаги «Мамлакатимизни модернизация қилиш ва кучли фуқаролик жамияти барпо этиш — устувор мақсадимиздир» деган маърузаси мамлакатимизнинг сиёсий ва ижтимоий ҳаётида ғоят муҳим воқеалар бўлди. Уларда катта интеллектуал кучга эга бўлган, мамлакатимизда ва халқаро майдонда кечаётган кўп қиррали ва мураккаб жараёнларни чуқур таҳлил қилишга асосланган қоида ва хулосалар белгилаб берилди. Мазкур қоида ва хулосалар Ўзбекистоннинг ижтимоий-сиёсий ва ижтимоий-иқтисодий тараққиётини англаб етиш, ислоҳотларнинг асосий натижаларини чуқур ва ҳар томонлама баҳолаш, олдимизда турган вазифаларни белгилаб олиш учун ғоят муҳим аҳамиятга эгадир.

Давлат ҳокимиятининг вакиллик органларига бўлиб ўтган сайловлар аҳолининг юксак ижтимоий-сиёсий маданиятини, унинг сиёсий ва фуқаролик онги даражаси ўсиб бораётганлигини, халқимиз мамлакатни ислоҳ этиш ва модернизация қилишни чуқурлаштириш йўлидан изчил илгарилаб бораётганимизни кенг қўллаб-қувватлаётганини намойиш этди.

Мамлакатимиз Президенти қайд этиб ўтганидек, Ўзбекистон олдида турган устувор вазифаларни ҳал қилишга парламент муҳим ҳисса қўшмоқда. Олдинги чақириқ Ўзбекистон Республикаси Олий Мажлиси иш олиб борган даврда мамлакатда амалга оширилаётган ижтимоий-сиёсий, ижтимоий-иқтисодий ислоҳотларни чуқурлаштиришда катта аҳамиятга эга бўлган 250 дан ортиқ қонун қабул қилинди. Иқтисодий ислоҳотларни қонунчилик жиҳатидан таъминлаш жаҳон молиявий-иқтисодий инқирозининг салбий оқибатларини камайтиришга қаратилган Инқирозга қарши чораларнинг 2009 — 2012 йилларга мўлжалланган дастури муваффақиятли амалга оширилиши учун зарур ҳуқуқий негизни яратишга ёрдам берди, бу эса Ўзбекистоннинг дунёдаги камдан-кам мамлакатлар қаторида барқарор иқтисодий ўсиш суръатларини ҳамда аҳоли реал даромадларининг ошишини таъминлашига имкон берди.

Айни вақтда, Ўзбекистон Республикаси Олий Мажлиси ва шу жумладан Ўзбекистон Республикаси Олий Мажлиси Сенати ишида жиддий хато ва камчиликлар мавжуд. Қабул қилинаётган қонунларнинг сифатини тубдан яхшилаш талаб қилинади. Уларда кўпинча ушбу қонун ҳужжатларининг амалга оширилишини таъминлайдиган процессуал механизмлар йўқ бўлиб, бу ҳол, ўз навбатида, уларни қўллашни анча қийинлаштириб қўймоқда, қонунларнинг ижро этилмаслигига ва ҳуқуқий нигилизмга, ҳуқуқни қўллаш амалиётининг самарадорлиги пасайишига олиб келмоқда. Ўзбекистон Республикаси Олий Мажлиси Сенати ва унинг қўмиталари қонунда назарда тутилган парламент назорати ва ҳуқуқни қўллаш амалиётини такомиллаштиришга таъсир кўрсатиш шаклларидан етарли даражада фойдаланмаётирлар. Сенаторларнинг сайловчилар ҳамда халқ депутатлари маҳаллий Кенгашлари, уларнинг доимий комиссиялари билан олиб бораётган ишини ҳам жиддий яхшилаш талаб қилинмоқда, бу эса уларга қабул қилинган қонунлар қандай ишлаётганлигини, ҳозирги кунда жамият ва давлатимиз учун қандай қонунлар кераклигини аниқлаш, Ўзбекистон Республикаси Олий Мажлиси Сенати томонидан қарорлар қабул қилиш чоғида умумдавлат манфаатлари билан минтақаларнинг манфаатларини янада уйғунлаштириш имконини берган бўлар эди.

Ўзбекистон Республикаси Олий Мажлиси Сенатининг Кенгаши шуни қайд этадики, Марказий Осиё минтақасида ва бутун дунёда мураккаб геосиёсий шароит сақланиб қолмоқда, бинобарин мамлакатимиз парламенти минтақада тинчлик ва барқарорликни мустаҳкамлашга ўз ҳиссасини қўшмоғи керак. Мамлакатимиз хавфсизлигини таъминлаш, минтақада тинчлик ва барқарорликни сақлаш вазифаларини ҳал қилиш учун НАТО/СЕАП ташкилотининг 2008 йил апрель ойида бўлиб ўтган Бухарест саммитида Ўзбекистон Республикаси Президенти И. Каримов томонидан илгари сурилган, афғон муаммосини фақат ҳарбий воситалар билан ҳал қилиб бўлмаслиги ва кўп миллатли ҳамда кўп конфессияли Афғонистон халқининг миллий урф-одатлари, маданияти ва диний қадриятлари ҳурмат қилинишини таъминлаш зарурлиги ҳақидаги дастурий қоида биринчи маротаба асослаб берилган ташқи сиёсий ташаббусларни изчил амалга ошириш муҳим аҳамиятга эга. Мазкур саммитда «6+3» мулоқот гуруҳини тузиш ташаббуси илгари сурилган бўлиб, бу ташаббус халқаро ҳамжамиятда катта қизиқиш уйғотди.

Мамлакатимиз Президенти И. Каримов томонидан қўйилган вазифалар парламентдан ва ҳар бир сенатордан юксак ташаббускорликни, қонунчилик фаолиятининг самарадорлигини ошириш йўлларини тинимсиз излашни, қонунлар ижросини сифатли назорат қилишни, минтақаларни ривожлантириш масалаларини умумдавлат манфаатлари билан чамбарчас боғлаб ҳал қилиш учун аниқ ва таъсирчан чоралар кўришни талаб қилмоқда. Ушбу мақсадларга эришиш учун концептуал, стратегик ёндошувни, шунингдек олдини олувчи чоралар ва қонунлар қабул қилинишини таъминлаш зарур.

Ўзбекистон Республикаси Президенти И. Каримовнинг 2010 йил 26 январда Ўзбекистон Республикаси Олий Мажлиси Сенатининг биринчи мажлисида сўзлаган нутқининг ва 2010 йил 27 январдаги Ўзбекистон Республикаси Олий Мажлиси Қонунчилик палатаси ва Сенатининг қўшма мажлисидаги «Мамлакатимизни модернизация қилиш ва кучли фуқаролик жамияти барпо этиш — устувор мақсадимиздир» деган маърузасининг асосий қоидаларини рўёбга чиқариш, шунингдек Ўзбекистон Республикаси Олий Мажлиси Сенати қўмиталарининг 2010 йилга ҳамда истиқболдаги 2011 — 2014 йилларга мўлжалланган қонунчилик ва назорат фаолияти ҳамда амалга оширадиган тадбирлари режаларини белгилаш мақсадида Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенатининг энг муҳим вазифаси демократик ислоҳотларни чуқурлаштириш ва иқтисодиётни эркинлаштириш, кучли фуқаролик жамиятини барпо этишга қаратилган чора-тадбирлар мажмуини амалга оширишдан, иқтисодиётни ва ижтимоий соҳани ислоҳ қилиш жараёнлари билан ижтимоий-сиёсий ва суд-ҳуқуқ тизимларини доимий равишда янгилаб боришнинг аниқ ва теран ўзаро алоқасини таъминлашдан иборат деб ҳисоблансин.

2. Ўзбекистон Республикаси Олий Мажлиси Сенати фаолиятининг устувор йўналиши амалга оширилаётган ижтимоий-иқтисодий ўзгаришлар, давлат қурилишини, ижтимоий-сиёсий ҳамда суд-ҳуқуқ тизимларини ислоҳ қилиш соҳасидаги, шунингдек фуқаролик жамияти институтлари, шу жумладан фуқаролар ўзини ўзи бошқариш органларининг жамият ва давлат қурилиши тизимидаги ҳуқуқлари, ваколатларини кенгайтиришга, оммавий ахборот воситаларининг ўрни ва ролини мустаҳкамлашга қаратилган қонунчиликни такомиллаштиришдан иборатлиги белгилаб қўйилсин.

3. Ўзбекистон Республикаси Президенти И. Каримовнинг 2010 йил 26 январда Ўзбекистон Республикаси Олий Мажлиси Сенатининг биринчи мажлисида сўзлаган нутқининг, 2010 йил 27 январдаги Ўзбекистон Республикаси Олий Мажлиси Қонунчилик палатаси ва Сенатининг қўшма мажлисидаги «Мамлакатимизни модернизация қилиш ва кучли фуқаролик жамияти барпо этиш — устувор мақсадимиздир» деган маърузасининг асосий қоидаларини рўёбга чиқариш ва уларнинг бажарилиши юзасидан 2010 — 2014 йилларга мўлжалланган чора-тадбирларни амалга ошириш бўйича Ўзбекистон Республикаси Олий Мажлиси Сенатининг Ҳаракат дастури маъқуллансин ва Ўзбекистон Республикаси Олий Мажлиси Сенатининг ялпи мажлиси муҳокамасига киритилсин.

4. Ўзбекистон Республикаси Олий Мажлиси Сенатининг Кенгаши ва қўмиталари:

Ўзбекистон Республикаси Президенти И. Каримовнинг 2010 йил 26 январда Ўзбекистон Республикаси Олий Мажлиси Сенатининг биринчи мажлисида сўзлаган нутқининг, 2010 йил 27 январдаги Ўзбекистон Республикаси Олий Мажлиси Қонунчилик палатаси ва Сенатининг қўшма мажлисидаги «Мамлакатимизни модернизация қилиш ва кучли фуқаролик жамияти барпо этиш — устувор мақсадимиздир» деган маърузасининг асосий қоидаларини рўёбга чиқариш ва уларнинг бажарилиши юзасидан 2010 — 2014 йилларга мўлжалланган чора-тадбирларни амалга ошириш бўйича Ўзбекистон Республикаси Олий Мажлиси Сенатининг Ҳаракат дастури ўз вақтида бажарилишини таъминласин;

қабул қилинган қонунларнинг марказда ва минтақаларда ижро этилиши устидан парламент, депутатлик назорати қатъият билан олиб борилишини халқ депутатлари маҳаллий Кенгашлари билан биргаликда таъминласин, парламент назоратининг парламент сўрови, парламент эшитувлари каби шаклларидан ҳамда парламент фаолиятининг қонунда назарда тутилган бошқа шаклларидан кенг фойдалансин;

минтақада ва бутун дунёда мамлакатимизнинг миллий манфаатларини ҳимоя қилиш ва илгари суришда, халқаро муносабатларнинг ҳуқуқий базасини шакллантиришда, ҳозирги замоннинг долзарб вазифаларини ҳал этишда парламентлараро мулоқотни фаоллаштиришда сенаторларнинг ролини ошириш бўйича зарур чораларни кўрсин.

5. Ушбу қарорнинг ижро этилишини назорат қилиш Ўзбекистон Республикаси Олий Мажлиси Сенати Раисининг ўринбосари М. Ражабова зиммасига юклатилсин.