Ўзбекистон Республикаси Ҳукумати ва Кипр Республикаси Ҳукумати, бундан кейинги ўринларда «Томонлар» деб аталувчилар,

ҳар икки Томоннинг соғлиқни сақлаш ва тиббиёт фани соҳасидаги ўзаро фойдали ва тенг ҳуқуқли ҳамкорликдан манфаатдорлигини эътиборга олиб,

қуйидагилар тўғрисида келишиб олдилар:

Томонлар қуйидаги соҳаларда ўзаро самарали ҳамкорликни ривожлантиришга имконият яратадилар:

1) дастлабки тиббий-санитария ва ихтисослаштирилган тиббий ёрдам кўрсатиш;

2) она ва бола соғлиғини сақлаш;

3) профилактик тиббиёт ва атроф-муҳитни муҳофаза қилиш;

4) фармацевтика маҳсулотлари ва тиббий техника;

5) фавқулодда вазиятлар ва эпидемиологик аҳвол бўйича тезкор маълумотлар билан алмашиш;

6) илмий ва тиббий ходимларни ўқитиш;

7) талабалар, ўқитувчилар алмашинуви ва врачларнинг касбий малакасини ошириш;

8) шартнома асосида ишлайдиган врачлар алмашинуви.

Томонлар фавқулодда вазиятларда ўзаро бепул шошилинч тиббий-консультатив ёрдам, сурункали касалга чалинган (шошилинч бўлмаган) беморларга эса ўзаро мақбул шартларда ёки тижорат асосида ёрдам кўрсатадилар.

Томонлар соғлиқни сақлаш тизимини яхшилашда ҳамда мутахассислар билан алмашиш, конференциялар, симпозиумлар ва семинарлар ўтказиш шаклида тиббиёт бўлинмалари ва ташкилотлари ўртасида бевосита алоқаларни ташкил этишда ўзаро ёрдам кўрсатадилар.

Томонлар фармацевтика ва тиббиёт ускуналарини ишлаб чиқариш бўйича қўшма корхоналарни ташкил этиш, шунингдек уларни рўйхатдан ўтказиш ва ҳар томонлама қўллаб-қувватлаш учун имконият яратадилар.

Соғлиқни сақлаш соҳасидаги ҳамкорликнинг алоҳида шакллари ва муддати тегишли ваколатли давлат органлари ўртасидаги махсус битимлар билан тартибга солинади.

Томонлар зарур ҳолларда мазкур Битимни амалга ошириш ва унинг бажарилишини назорат қилиш, шунингдек ўзаро ҳамкорликни яхшилаш юзасидан тавсиялар тайёрлаш бўйича қўшма комиссиялар ташкил қилишлари мумкин.

Ушбу Битимга Томонларнинг ўзаро келишувига кўра унинг ажралмас қисмлари ҳисобланадиган алоҳида протоколлар билан расмийлаштириладиган ўзгартиш ва қўшимчалар киритилиши мумкин.

Мазкур Битимни талқин қилиш ёки қўллаш билан боғлиқ низолар юзага келган ҳолда Томонлар уларни маслаҳатлашувлар ва музокаралар ўтказиш йўли билан ҳал этадилар.

Томонлар мазкур Битимнинг кучга кириши учун миллий қонунчилик томонидан талаб этиладиган давлат ички процедураларининг бажарилганлиги ҳақида дипломатик каналлар орқали бир-бирларини хабардор қилишлари лозим.

Мазкур Битим Томонларнинг уни кучга киритиш учун зарур давлат ички процедураларининг бажарилганлиги тўғрисида ёзма равишда охирги билдиришнома олинган санадан бошлаб кучга киради ва беш йил давомида амал қилади ҳамда, агар Томонлардан ҳеч бири ўзининг унинг амал қилишини тўхтатиш мақсади тўғрисида тегишли муддатнинг тугашидан камида олти ой олдин бошқа Томонни ёзма шаклда хабардор қилмаса, кейинги беш йиллик муддатларга ўз-ўзидан узайтирилади.

2012 йил 5 апрелда Тошкент шаҳрида ҳар бири ўзбек, грек ва инглиз тилларида бўлган икки нусхада тузилди, бунда барча матнлар бир хил кучга эга. Матнлар бўйича келишмовчиликлар юзага келган ҳолда инглиз тилидаги матн устувор ҳисобланади.