Ўзбекистон Республикаси Президенти ва Туркия Жумҳурияти Бош вазири,

суверенитет, тенглик, ўзаро ҳурмат ва ички ишларга аралашмаслик принципларига асосланган икки томонлама ҳамкорликнинг ривожланишини мамнуният билан қайд этиб,

иккала мамлакатнинг манбалари умумий тарих, маданият ва тил бўлган халқларини яқинлаштирувчи ўзига хос ришталарни алоҳида кўрсатиб,

икки мамлакат ўртасида тузилган икки томонлама битимларнинг муваффақиятли бажарилишини эътиборга олиб,

БМТ Низоми, Хельсинки Якунловчи Акти ва ЕХҲТнинг бошқа ҳужжатларида таъкидланган мақсад ва принципларга ўз содиқликларини тасдиқлаб,

дўстлик ва ҳамкорлик муносабатлари минтақалар ва бутун дунёдаги барқарорлик, тинчлик ва хавфсизлик ишига ҳисса қўшишини белгилаб,

Ўзбекистон, Туркия, Озарбайжон, Қозоғистон, Қирғизистон ва Туркманистон президентларининг Анқара ва Истанбулдаги учрашувларида қабул қилинган декларациялардаги қоидаларнинг муҳимлигини таъкидлаб,

икки мамлакат ўртасидаги ҳамкорликни янада юқори даражага кўтариш истагини билдириб,

ва 1991 йил 19 декабрда имзоланган Ўзбекистон Республикаси ва Туркия Жумҳурияти ўртасидаги муносабатларнинг асослари ва мақсадлари тўғрисидаги Битим қоидаларидан келиб чиқиб,

қуйидагилар тўғрисида аҳдлашиб олдилар:

1. Томонлар иккала мамлакатдаги мавжуд потенциални эътиборга олиб, улар ўртасидаги ҳамкорликни янада мустаҳкамлаш учун кенг имкониятлар борлигини тасдиқладилар ва шу мақсадларда зарур чораларни кўриш тўғрисида бир фикрга келдилар.

2. Томонлар икки мамлакат ўртасидаги иқтисодий ва савдо муносабатларида қисқа муддат ичида эришилган ютуқларни ва уларнинг келгуси ривожи учун потенциал мавжудлигини қайд этиб, бу муносабатларни бундан буён ҳам юқори даражада ривожлантириш истагини таъкидладилар.

Томонлар шу доираларда икки мамлакат ўртасидаги товар, хизмат ва капиталларнинг самарали ҳаракатига янада кўпроқ кўмаклашишга аҳдлашиб олдилар.

3. Томонлар турк ишбилармонларининг пудрат ишлари, саноат ва хизмат кўрсатиш соҳасидаги тажрибаларини эътиборга олиб, бу соҳадаги ҳамкорликни янада чуқурлаштиришга аҳдлашиб олдилар.

Томонлар иқтисодни ривожлантиришда кичик ва ўрта корхоналарнинг муҳим роль ўйнаётганини таъкидлаб, Ўзбекистонда ва Туркияда шу каби корхоналарнинг фаолиятига ўзаро кўмаклашишга аҳдлашиб олдилар.

4. Томонлар, қишлоқ хўжалиги ва чорвачилик соҳаларида ҳамкорликни мустаҳкамлашнинг муҳимлигини таъкидлаб, бу соҳада Ўзбекистон эга бўлган потенциални, шунингдек Туркиянинг бу соҳадаги тажрибаси ва имкониятларини эътиборга олиб, олимлар, мутахассислар, илмий-техник ахборот билан алмашишга, шунингдек манфаатдор бўлган давлат ва хусусий ташкилот ва фирмалар ўртасидаги ҳамкорликни ривожлантиришга кўмаклашишга аҳдлашиб олдилар.

5. Томонлар ҳамкорликнинг шартнома-ҳуқуқ базасини такомиллаштириш, имзоланган шартномаларни, биринчи навбатда савдо-иқтисодий алоқалар соҳасидаги, хусусан икки томонлама солиқ солишга йўл қўймаслик тўғрисидаги Битим ва бошқа ҳужжатларни яқин вақтда амалга татбиқ этиш тўғрисида аҳдлашиб олдилар.

6. Томонлар турли соҳаларда, хусусан, банк ишида, суғурта соҳасида, табиий ресурслар қазиб чиқариш ва қайта ишлаш соҳаларида иқтисодий алоқаларни янада ривожлантириш учун чоралар кўрадилар.

7. Томонлар иқтисодий муносабатларни ривожлантиришда коммуникация ва транспорт соҳасидаги ҳамкорликнинг муҳимлигини таъкидлаб, қуруқ йўл ва ҳаво йўли орқали юк ташишларни янада ривожлантиришга кўмаклашадилар.

8. Томонлар ўзаро иқтисодий алоқалар ва ҳамкорликни кенгайтириш учун яқин вақтда қўшма иқтисодий комиссиянинг мажлисини ўтказишга аҳдлашиб олдилар.

9. Томонлар улар ўртасида мавжуд бўлган алоҳида муносабатлар асосида маданият, санъат, телевидение, радио, туризм ва спорт соҳаларидаги муносабатларни бундан буён ҳам ривожлантиришга келишиб олдилар.

10. Томонлар икки мамлакат ўртасида таълим соҳасида, шу жумладан студентлар ва ўқувчилар билан алмашув соҳасидаги ҳамкорликнинг ривожланишидан мамнун эканликларини, шунингдек бу ҳамкорликни ривожлантиришни давом эттириш биродар ўзбек ва турк халқларининг яқинлашувига катта ҳисса қўшишини билдирдилар, яна шунингдек университетлар ўртасидаги ўзаро ҳамкорликнинг ривожланишига кўмаклашишга қарор қилдилар.

11. Томонлар парламентлараро алоқаларни ва ҳамкорликни ривожлантириш истагини билдирдилар.

12. Томонлар икки мамлакат ўртасидаги ҳамкорликни келгусида мустаҳкамлашда юқори даражадаги контакт ва учрашувларнинг муҳим аҳамиятини таъкидладилар ва тегишли вазирликлар ва ташкилотлар ўртасида контакт ва маслаҳатлашишларни кенгайтириш тўғрисида аҳдлашиб олдилар.

Ушбу Меморандум Тошкент шаҳрида 1995 йил 9 июлда ўзбек ва турк тилларида икки нусхада тузилди, иккала матн ҳам бир хил кучга эга.