Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг 2014 йил тўққиз ойидаги ижроси тўғрисидаги ҳисоботни кўриб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат бюджетининг 2014 йил тўққиз ойидаги ижроси тўғрисидаги ҳисобот тасдиқлансин.

Ҳисобот даврида Давлат бюджети ялпи ички маҳсулотга нисбатан 0,1 фоиз миқдорида профицит билан ижро этилганлиги маълумот учун қабул қилинсин.

2. Ўзбекистон Республикаси Вазирлар Маҳкамаси саъй-ҳаракатларни 2014 йилги Ўзбекистон Республикаси Давлат бюджетининг асосий параметрларини сўзсиз ижро этишга, асосий макроиқтисодий кўрсаткичларни таъминлашга ҳамда иқтисодиётнинг барча соҳа ва тармоқларини янада мутаносиб ривожлантириш учун мустаҳкам асос яратишга йўналтирсин.

3. Қорақалпоғистон Республикаси Вазирлар Кенгашининг, вилоятлар ва Тошкент шаҳар ҳокимликларининг эътибори бюджет маблағларидан мақсадли ва самарали фойдаланиш, бюджет интизомига риоя этилиши устидан назоратни кучайтириш, тегишли маҳаллий бюджетларга солиқлар ва бошқа мажбурий тўловларнинг тўлиқ тушишини таъминлаш зарурлигига қаратилсин.

4. Ушбу Қарор қабул қилинган кундан эътиборан кучга киради.