Ўзбекистон Республикаси Ҳукумати ва Туркия Жумҳурияти Ҳукумати,

ҳар икки мамлакат ўртасида мавжуд дўстона муносабатларни эътиборга олиб,

Терроризмни тугатиш тўғрисида 1977 йил Европа Конвенциясига, шунингдек террористик хатти-ҳаракатларни тергов қилиш ва жазолашга оид халқаро ҳамкорлик тўғрисида 1982 йил 15 январда Европа Кенгашининг Вазирлар қўмитаси томонидан қабул қилинган ва Европа Кенгашининг аъзо давлатларга йўллаган тавсияномаларга мурожаат этиб,

шунингдек, наркотик воситалари ва психотроп моддаларнинг ғайриқонуний муомаласига қарши кураш ҳақида 1988 йил БМТ Конвенцияси, наркотик воситалари ҳақида 1961 йил Ягона Конвенцияси ва психотроп моддалари тўғрисида 1971 йил Конвенциясини инобатга олиб,

терроризмга қарши кураш тўғрисида Европада хавфсизлик ва хамкорлик Кенгашининг Вена Якунловчи ҳужжатларидаги қоидалардан келиб чиқиб,

демократия қадриятлари ва инсон ҳуқуқларини рад этадиган терроризмнинг давом этаётганлиги ҳақида ўзларининг чуқур ташвишларини изҳор этиб,

терроризм билан қурол-яроғ ва наркотикларни ғайриқонуний тарқатиш ўртасида яқин алоқаларнинг мавжудлигини эътиборга олиб,

наркотик воситалари ва психотроп моддаларини ғайриқонуний тарқатишга, шунингдек терроризмга қарши курашда ҳар икки Томон ўртасида мавжуд ҳамкорликни янада ривожлантириш ҳамда ҳуқуқни муҳофаза этувчи органлари ўртасида ҳамкорликни, алоқа воситаларини мустаҳкамлаш истагида,

бундай ҳамкорликнинг ҳар икки Томон учун жамоат хавфсизлиги соҳасида ўзаро фойдали эканлигини англаган ҳолда,

қуйидагилар ҳақида келишиб олдилар:

1) Аҳдлашувчи Томонлар ўз ҳудудларида террористик актларни ҳамда хавфсизликка, бошқа Томон фуқароларига қарши қаратилган фаолиятларни режалаштириш, уюштириш, амалга оширишнинг олдини олиш мақсадида самарали чора-тадбирлар кўрадилар. Аҳдлашучи Томонлар наркотик воситалари ва психотроп моддаларини, шунингдек уларнинг тарқатилишига қарши Конвенция иловасининг 1 ва 2-жадвалларида санаб ўтилганларни ноқонуний тайёрлашда ишлатиладиган моддаларни ғайриқонуний тарқатиш ҳаракатларини олдини олиш, тергов қилиш ва таъқиб этишда келгусида бирга ҳамкорлик қилишни ва бир-бирига кўмаклашишни ўз зиммаларига оладилар.

2) Аҳдлашувчи Томонлар ушбу Битимни қўллашда масъул бўладиган ваколатли идоралар ҳақида дипломатик воситалар орқали бир-бирларини ҳабардор қиладилар.

Мазкур идоралар томонидан тайинланадиган мутахассислардан ташкил бўладиган ўзбек-турк қўмитаси бир йил давомида камида бир марта ёки зарурат туғилганда, Томонлардан бирининг илтимосига биноан ҳар қандай вақтда навбати билан Тошкентда ёки Анқарада учрашиб турадилар.

Қўшма қўмита терроризмга қарши курашда ўз фаолиятини қуйидаги соҳаларда мувофиқлаштириш учун масъулдир:

а) турли хил террористик ташкилотларнинг фаолиятлари ва услублари ҳақида маълумотлар билан алмашиш ҳамда террористик таҳдидлар, айниқса икки давлат манфаатларига хавф солувчи таҳдидларга нисбатан бўлган маълумотларни доимий равишда янгилаб туриш;

б) террористлар томонидан қўлланиладиган янги террористик услубларга қарши жамоат транспорт воситалари, тайёрагоҳларни қўриқлаш учун кўрилган хавфсизлик чораларини уйғунлаштириш ва кучайтириш мақсадида маълумотлар ва тажриба алмашиш.

Жиноятчиликка қарши курашда ҳамкорлик, айниқса Аҳдлашувчи Томонларнинг манфаатларига бевосита таъсир кўрсатадиган маълумотларни янгилаш ва улар билан алмашишга қаратилади.

а) Ҳамкорлик асосан қуйидаги соҳалардаги курашни қамраб олади:

қурол-яроғ ва наркотиклар (шу жумладан, уларнинг таркибий қисмлари), портловчи моддалар, нақлиёт воситалари ҳамда санъат асарларини ғайриқонуний тарқатиш;

қуролли босқинчилик;

банкнотлар, ҳужжатлар ва қимматли қоғозларни қалбакилаштириш;

б) наркотиклар (жумладан, наркотик воситалари, психотроп моддалари ҳамда уларни тайёрлашда ишлатиладиган моддалар)ни ғайриқонуний тарқатишга қарши курашда маълумотлар билан алмашиш ва ҳамкорлик қилиш, шунингдек ҳар икки давлатда наркотиклар билан боғлиқ суиистеъмоллар ва уларга қарши кураш услубларини ҳам қамраб олади.

Ҳамкорлик сўнгги миллий қонунлар ҳақида маълумотлар айирбошлашни, халқаро конференциялар ёки учрашувларни, шунингдек Битимда қайд этилган соҳаларда икки мамлакатнинг ваколатли идоралари ўртасида тезкор ҳаракатларнинг ривожланишини ҳам қамраб олади.

1. Ушбу Битимда қайд этилган соҳалардаги ҳамкорлик ҳар икки давлатнинг ўз қонунлари, шунингдек жиноий ишлар бўйича ўзаро ёрдам кўрсатиш ва жиноий таъқибда бўлган шахсларни топшириш тўғрисида Европа Конвенциясига мувофиқ амалга оширилади. Бундай хамкорлик Интерпол қоидалари ва амалиётига биноан татбиқ зтилади.

2. Наркотик воситаларини тарқатишга қарши кураш соҳасида ҳамкорлик, шунингдек наркотик воситалари ҳақида 1961 йил Ягона Конвенцияси, психотроп моддалари ҳақида 1971 йил Конвенцияси ҳамда наркотик воситалари ва психотроп моддаларини ғайриқонуний тарқатишга қарши 1988 йил БМТ Конвенцияси қоидаларига ҳам мувофиқ, ҳар икки Томон уларни тасдиқлаганда, амалга оширилади.

Битим қамраб оладиган соҳалардаги ҳамкорлик доирасида икки давлатнинг ваколатли идоралари ўртасида мутахассислар билан алмашилиши мумкин. Аҳдлашувчи Томонлардан ҳар бири бошқа Томон ҳудудидаги ўз дипломатик ёки консуллик ваколатхоналари қошида алоқа офицерларини тайинлаши мумкин.

1. Наркотик воситалари ва психотроп моддаларни ғайриқонуний тарқатишга қарши кураш соҳасидаги ҳамкорликни яхшилаш мақсадида, зарур ҳолларда, Аҳдлашувчи Томонлар маслаҳатлашувлар учун ўзаро ваколатли идораларининг мансабдор шахсларини таклиф этишлари мумкин.

2. Зарур ҳолларда Аҳдлашучи Томонлар бошқа Томон идоралари вакилларини ғайриқонуний тарқатиш бўйича алоҳида ишларнинг тергов қилинишида кўмаклашиш учун таклиф этадилар.

1. Аҳдлашувчи Томонларнинг ваколатли идоралари сўров бўйича ёки усиз наркотик воситалари ва психотроп моддаларини ғайриқонуний тарқатиш ҳоллари тўғрисида ҳамда шу каби жиноятга бевосита ёки билвосита алоқадорларнинг шахсини, наркотикларнинг тарқатилиш услубларини аниқлаш ва уларни ушлаш тўғрисида дарҳол батафсил маълумотлар билан алмашадилар.

2. Битимда назарда тутилган маълумотлар билан алмашиш унга илова этилган ҳужжат намунаси асосида инглиз тилида амалга оширилади. Ҳужжат намунаси тўлиқ ва атрофлича маълумотларни ўз ичига олиши лозим.

3. Тергов ҳаракатлари ҳужжатларининг нусхалари инглиз тилида бўлиши лозим. Зарур ҳолларда эса турк ва ўзбек тилидаги матнлар ҳам қабул қилиниши мумкин.

4. Ушбу Битим мақсадларига биноан алмашиладиган оғзаки ёки ёзма маълумот ва ҳужжатлар уларни тақдим этаётган Аҳдлашувчи Томоннинг талабига биноан маҳфий сақланиши лозим.

5. Ушбу Битим қоидаларига кўра алмашиладиган маълумот ва ҳужжатларни олувчи Томон бошқа Томоннинг ваколатли органи розилиги билангина ва ушбу Битимга мувофиқ улардан илмий ёки бошқа мақсадларда фойдаланиши мумкин.

6. Зарур ҳолларда ёрдам тўғрисида илтимоснома ёзма тарзда тақдим этилмаса, у кейинчалик ёзма равишда тасдиқланиши лозим.

Аҳдлашувчи Томонлар терроризмга ҳамда наркотик воситалари ва психотроп моддаларини ғайриқонуний тарқатишга қарши курашда самарали ҳамкорликни таъминлаш учун ўзларининг ваколатли органлари ўртасида телефон, телекс ва боғланишнинг бошқа воситалари бўйича тўғридан-тўғри алоқа ўрнатадилар.

Аҳдлашувчи Томонлар ўз ҳудудларида қўлга киритилган наркотик воситалари ва психотроп моддаларининг намуналарини уларнинг манбаи, шунингдек кимёвий таркиби ҳамда физик хоссаларини аниқлаши мумкин бўлган ўзларининг халқаро меъёрларга эга миллий ва ваколатли лабораториялари ихтиёрига тақдим этадилар. Шу тартибда олинган маълумот ва хулосалар сўровга мувофиқ ўзаро алмашилади.

Ушбу Битимнинг татбиқ этилишига оид тартиб-қоидалар ҳар икки Томоннинг ваколатли доиралари томонидан биргаликда ишлаб чиқилади.

Битим 1993 йил 5 апрелда Тошкент шаҳрида ўзбек ва турк тилларида, икки нусхада тайёрланди.

Ушбу Битим бир йил давомида амалда бўлади ва Аҳдлашувчи Томонлардан бири Битимнинг амалда бўлиш муддати тугашидан уч ой илгари уни тўхтатиш нияти ҳақида ёзма равишда бошқа Томонни хабардор қилмагунга қадар унинг амал қилиши худди шундай муддатга ўз-ўзидан узаяверади.

Ушбу Битим Ратификация ёрлиқлари билан алмашилган пайтдан бошлаб ўттиз кун ўтгач кучга киради.