Ўзбекистон Республикаси Бюджет кодексининг 27, 99-моддалари, Ўзбекистон Республикаси Олий Мажлиси Қонунчилик палатасининг 2014 йил 22 октябрдаги 991-II-сонли, Олий Мажлис Сенатининг 2014 йил 13 ноябрдаги «Ўзбекистон Республикасининг 2015 йилги Давлат бюджети, мақсадли давлат жамғармаларининг бюджетлари ҳамда солиқ ва бюджети, сиёсатнинг асосий йўналишлари тўғрисида»ги СҚ-453-II-сонли ва Ўзбекистон Республикаси Президентининг 2014 йил 4 декабрдаги ПҚ-2270-сонли «Ўзбекистон Республикасининг 2015 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги қарорлари ижросини таъминлаш мақсадида Мирзачўл туман маҳаллий бюджетининг 2014 йилги даромадлари ва харажатлари бўйича асосий кўрсаткичларидан кутилаётган ижроси ҳамда 2015 йилга белгиланган асосий маҳаллий бюджетини муҳокама қилиб, Ўзбекистон Республикасининг «Маҳаллий давлат ҳокимияти тўғрисида»ги Қонуни 24-моддасига биноан, халқ депутатлари туман Кенгаши қарор қилади:

1. Туман маҳаллий бюджетининг 2014 йилги даромадлар ва харажатлар бўйича асосий кўрсаткичларининг кутилаётган ижроси тўғрисидаги туман ҳокимининг ҳисоботи маълумот учун қабул қилинсин.

2. Туман маҳаллий бюджети 2015 йил асосий истиқбол кўрсаткичларининг даромадлар қисми 12 млрд 233,2 млн сўм, харажатлар қисми 26 млрд 566,6 млн сўм, мақсадли субвенция миқдори 14 млрд 333,4 млн сўм қилиб белгиланганлиги маъқуллансин.

3. Туман ҳокимининг ўринбосари в.б Б.Усмонов, туман Давлат солиқ инспекцияси (Ў.Достонов) ва туман молия бўлими (С.Бердиқулов) биргаликда туман маҳаллий бюджети даромадлар қисмини солиқ турлари бўйича белгиланган режаларини ошириб бажаришни таъминласин.

4. Туман ҳокимлиги молия бўлими (С.Бердиқулов)га:

2015 йилни «Кексаларни эъзозлаш йили» деб эълон қилиниши муносабати билан туман маҳаллий бюджетининг 2015 йил биринчи чораги, ярим йиллик ва тўққиз ойлик ижроси якунларига мувофиқ режадан ортиқча тушадиган даромадлар ва маҳаллий бюджет харажатларини мақбуллаштириш ҳисобидан туманда кексаларни ижтимоий ҳимоя қилишга қаратилган зарур тузатишлар киритиб бориш;

бюджет маблағларидан мақсадли фойдаланилиши ва уларнинг асоссиз сарфланишини бартараф этиш устидан ғазначилик ижроси тизими воситасида қатъий назорат қилинишини таъминлаш вазифалари юклатилсин.

5. Туман ҳокимининг ўринбосари вазифасини бажарувчи Б.Усмановга мутасадди ташкилотлар раҳбарлари билан биргаликда бюджет даромадларининг тасдиқланган кўрсаткичлари бажарилишини таъминлаш, минтақаларнинг солиқ солиш базаси кенгайтирилиши ва молиявий салоҳияти мустаҳкамланиши юзасидан зарурий чора-тадбирлар кўриш, бюджет маблағларидан мақсадли фойдаланиши устидан қатъий назорат ўрнатиш вазифалари топширилсин.

6. Мазкур қарор «Мирзачўл овози» газетасида эълон қилинсин.

7. Ушбу қарорнинг ижросини назорат қилиш халқ депутатлари туман Кенгашининг маҳаллий бюджетни шакллантириш ва ижро этиш, маҳаллий солиқлар ва йиғимларни белгилаш, иқтисодий ислоҳотларни амалга ошириш ва тадбиркорликни ривожлантириш масалалари доимий комиссияси зиммасига юклатилсин.

8. Ушбу қарор 2015 йил 1 январдан эътиборан кучга киради.