Ўзбекистон Республикаси ва Болгария Республикаси, бундан кейин «Аҳдлашувчи Томонлар» деб аталувчилар,

Бирлашган Миллатлар Ташкилоти Низоми, Хельсинки Якунловчи акти мақсадлари ва принципларига ва Европада хавфсизлик ва ҳамкорлик бўйича ташкилотнинг бошқа ҳужжатларига, шунингдек халқаро ҳуқуқнинг умум тан олинган принцип ва нормаларига амал қилиб,

умумий тинчлик, халқаро ҳамкорлик ва барқарорликнинг асоси бўлган озодлик ва демократия принципларига содиқликларини тасдиқлаб,

иккала мамлакат халқлари ўртасида дўстона муносабатларни мустаҳкамлашга жуда катта аҳамият бериб,

Ўзбекистон Республикаси ва Болгария Республикаси ўртасида кўп томонлама ва ўзаро фойдали ҳамкорликни ривожлантиришни истаб,

қуйидагилар тўғрисида аҳдлашиб олдилар:

Аҳдлашувчи Томонлар суверен, тенг ҳуқуқли ва дўстона давлатлар сифатида ўз муносабатларини давлат суверенитети ва мустақиллигини ўзаро ҳурмат қилиш, тенг ҳуқуқлилик ва бир-бирининг ички ишларига аралашмаслик, куч ишлатмаслик ёки куч билан таҳдид қилиш, уларнинг мавжуд чегараларининг бузилмаслиги, ҳудудий яхлитлик, баҳсларни тинч йўл билан ҳал этиш, инсон ҳуқуқлари ва асосий эркинликларини ҳурмат қилиш, ўзаро фойдали ҳамкорлик ва халқаро мажбуриятларни виждонан бажариш принциплари асосида ривожлантирадилар.

Аҳдлашувчи Томонлар Бирлашган Миллатлар Ташкилоти Низомига қатъий амал қиладилар ва БМТнинг обрў-эътиборини мустаҳкамлашга ҳамда роли ва самарадорлигини оширишга кўмаклашадилар.

Аҳдлашувчи Томонлар Европада хавфсизлик ва ҳамкорлик ташкилотининг тинчлик, барқарорлик ва хавфсизликни мустаҳкамлаш ишидаги ҳал қилувчи ролини тасдиқлаб, зиддиятларнинг олдини олиш воситаси, инсон ҳуқуқлари ва эркинликлари, демократия, қонун устуворлиги ва иқтисодий ҳамкорликни ривожлантириш кафили сифатида уни мустаҳкамлашга кўмаклашадилар.

Аҳдлашувчи Томонлар ҳам минтақавий, ҳам жаҳон миқёсида тинчлик, барқарорлик ва хавфсизликни мустаҳкамлаш учун биргаликда ҳаракат қиладилар.

Аҳдлашувчи Томонларнинг фикри бўйича, халқаро тинчлик ва хавфсизликка таҳдид қилувчи вазият юзага келган ҳолда, айниқса бундай вазият Аҳдлашувчи Томонлардан бирига тегишли бўлса, улар юзага келган муаммони Бирлашган Миллатлар Ташкилоти Низоми ва халқаро ҳуқуқнинг умум тан олинган нормаларига мувофиқ ҳал этиш учун имкониятлар топиш мақсадида тегишли маслаҳатлашишлар ўтказадилар.

Ҳар бир Аҳдлашувчи Томон ўз хавфсизлигини таъминлаш учун воситалар танлаш ҳуқуқидан келиб чиқиб, бошқа Аҳдлашувчи Томон хавфсизлиги манфаатларини ҳам ҳисобга олади.

Аҳдлашувчи Томонлар Евроатлантик шериклик кенгаши ва бошқа халқаро хавфсизлик тузилмалари доирасида ҳам икки томонлама, ҳам кўп томонлама асосда ҳамкорликни янада ривожлантиришга алоҳида эътибор берадилар.

Аҳдлашувчи Томонлар ҳам ядро қуроли соҳасида, ҳам ялпи қирғин қуроли ва уларни ташувчилар соҳасида, шунингдек оддий қурол-яроғлар соҳасида қуролсизланиш жараёнига қаратилган жаҳон ҳамжамиятининг саъй-ҳаракатлари доирасида ҳамкорлик қиладилар.

Аҳдлашувчи Томонлар улар аъзо бўлган ёки аъзо бўладиган халқаро ташкилотлар доирасида ўзаро қизиқиш уйғотувчи масалалар бўйича маслаҳатлашишлар ўтказадилар ва ҳамкорлик қиладилар.

Аҳдлашувчи Томонлар дўстона муносабатлар ва ҳамкорликни янада ривожлантириш мақсадида ўзаро қизиқиш уйғотувчи масалаларни муҳокама қилиш учун турли даражаларда доимий алоқада бўладилар.

Улар, шунингдек жамоат ташкилотлари ва фуқаролар ўртасидаги алоқаларни ривожлантиришга кўмаклашадилар ҳамда иккала мамлакат ўлка ва шаҳарлари ўртасидаги ҳамкорликни рағбатлантирадилар.

Аҳдлашувчи Томонлар ўзаро фойдали ва тенг ҳуқуқли савдо-иқтисодий ва илмий-техникавий ҳамкорликни ривожлантиришга кўмаклашадилар, уларнинг давлатларида амалга оширилаётган иқтисодий ислоҳотларнинг бориши ва йўналишлари тўғрисида ахборот алмашишни амалга оширадилар.

Аҳдлашувчи Томонлар икки томонлама битимлар, ўз халқаро мажбуриятлари асосида ва ўз ички қонунларига мувофиқ ўз ҳудудида бошқа Томоннинг жисмоний ва юридик шахсларининг тадбиркорлик ва бошқа хўжалик фаолияти учун қулай ҳуқуқий, иқтисодий ва молиявий шароитларни таъминлайдилар. Шу мақсадларда Аҳдлашувчи Томонлар инвестицияларни ўзаро рағбатлантириш ва ҳимоя қилиш тўғрисида, икки томонлама солиқ солишнинг олдини олиш тўғрисида, савдо-иқтисодий алоқаларни ривожлантириш тўғрисида, туризм соҳасида ҳамкорлик тўғрисида алоҳида битимлар тузадилар.

Аҳдлашувчи Томонлар энергетика, енгил ва озиқ-овқат саноати, машинасозлик, қурилиш, телекоммуникациялар, фармацевтика ва кимё саноати, қишлоқ хўжалиги, табиий ресурслардан фойдаланиш соҳасида ва ўзаро қизиқишнинг бошқа соҳаларида янада яқинроқ ўзаро фойдали ҳамкорликни ривожлантиришга кўмаклашадилар.

Аҳдлашувчи Томонлар транспорт коммуникациялари соҳасида ҳамкорликни кенгайтирадилар ва ўз ҳудудида йўловчи ва юкларни автомобиль, ҳаво, темир йўл ва бошқа турдаги транспорт билан, жумладан транзит билан, ташиш учун қулай шароитларни таъминлайдилар.

Аҳдлашувчи Томонлар Евросиё транспорт йўлагини Қора денгиз, Каспий, Ўрта денгиз минтақалари ва Марказий Осиё минтақаси давлатлари ўртасида савдо-иқтисодий ҳамкорликни ривожлантиришнинг муҳим омили сифатида қараб, унинг барпо этилиши ва ишлаши бўйича аниқ чораларга алоҳида эътибор берадилар.

Аҳдлашувчи Томонлар ҳарбий-техникавий соҳада ва махсус ускуналарни ишлаб чиқаришда ҳамкорлик қиладилар.

Аҳдлашувчи Томонлар зарур ҳолда халқаро иқтисодий, молиявий ва бошқа халқаро ташкилотлар билан ҳамкорлик масалалари бўйича маслаҳатлашишлар ўтказадилар.

Аҳдлашувчи Томонлар илғор техника ва технологияларни, олимлар ва илмий-ишлаб чиқариш бирлашмаларининг бевосита алоқалари ва қўшма ташаббусларини ривожлантириш ва татбиқ этиш учун фундаментал ва амалий фанлар соҳасида самарали ҳамкорликка кўмаклашадилар, қўшма дастур ва лойиҳаларни амалга ошириш, қўшма корхоналарни ташкил этиш, олим ва мутахассислар билан алмашишни ва бу соҳадаги ҳамкорликнинг бошқа шаклларини рағбатлантирадилар.

Аҳдлашувчи Томонлар атроф-муҳитни ҳимоя қилиш ва аҳволини яхшилаш борасида экология, табиий офатларнинг олдини олиш ва оқибатларини камайтириш мақсадида уларни олдиндан айтиб бериш соҳасида, шунингдек бу борада ўзаро қизиқишнинг бошқа соҳаларида ҳамкорликни амалга оширадилар.

Аҳдлашувчи Томонлар маданият, фан, таълим ва оммавий ахборот воситалари соҳасида тегишли битим ва дастурлар асосида ўз халқлари ўртасидаги анъанавий маданий алоқаларни ривожлантиришга кўмаклашадилар.

Аҳдлашувчи Томонлар иккала давлатнинг маданият муассасалари ва ўқув юртлари ўртасидаги давлат ва минтақа даражасида алоқаларни рағбатлантирадилар, санъат арбоблари .ҳамда маданият ва таълим соҳасидаги мутахассисларнинг ўзаро ташрифларига кўмаклашадилар.

Аҳдлашувчи Томонлар ўз ички қонунларига мувофиқ ижтимоий таъминот ва соғлиқни сақлаш соҳасида ҳамкорликни ривожлантирадилар.

Аҳдлашувчи Томонлар, халқаро ҳуқуқнинг умум тан олинган принцип ва нормаларига ҳамда ички қонунларга мувофиқ, уюшган, жумладан халқаро жиноятчилик ва терроризмга, фуқаро авиацияси ва транспортнинг бошқа турларига қарши қаратилган ноқонуний ҳаракатларнинг олдини олиш учун, наркотиклар ва психотроп моддаларнинг ноқонуний оборотига, жиноий фаолиятдан олинган даромадларни қонунлаштиришга, маданий ва тарихий бойликларни ноқонуний олиб кириш ва олиб чиқишга ва ўта хавфли жиноятларнинг бошқа турларига қарши курашда икки томонлама ва кўп томонлама асосларда ҳамкорликни амалга оширадилар. Шу мақсадда Аҳдлашувчи Томонлар тажриба ва ахборот алмашадилар ҳамда биргаликда фаолият кўрсатадилар.

Аҳдлашувчи Томонлар ўзаро ҳуқуқий ёрдам кўрсатиш соҳасида ва консуллик муносабатлари соҳасида ҳамкорлик қиладилар.

Ушбу Шартнома Аҳдлашувчи Томонларнинг улар аъзо бўлган икки томонлама ва кўп томонлама шартномалардан келиб чиқадиган ҳуқуқ ва мажбуриятларига дахл қилмайди.

Ушбу Шартнома учинчи давлатларга қарши қаратилган эмас ва Аҳдлашувчи Томонларнинг улар билан муносабатларига таъсир қилмайди.

Аҳдлашувчи Томонлар ушбу Шартнома қоидаларини амалга ошириш учун зарур бўлган, шунингдек ўзаро қизиқиш уйғотувчи бошқа соҳаларда алоҳида битимлар тузадилар.

Аҳдлашувчи Томонлар ушбу Шартномани талқин қилиш ва қўллаш билан боғлиқ бўлган масалаларни маслаҳатлашишлар ва музокаралар йўли билан ҳал этадилар.

Ушбу Шартнома Аҳдлашувчи Томонлардан ҳар бирининг миллий қонунларига мувофиқ ратификация қилинади ва ратификация ёрлиқлари билан алмашилган куни кучга киради.

Ушбу Шартнома Бирлашган миллатлар Ташкилоти Низомининг 102-моддасига мувофиқ БМТ Котибиятида рўйхатдан ўтказилади.

Ушбу Шартнома ўн йиллик муддатга тузилади. Агар Аҳдлашувчи Томонлардан ҳеч бири амал қилишнинг тегишли муддати тугашидан камида олти ой илгари Шартномани денонсация қилиш нияти тўғрисида ёзма равишда баён қилмаса, унинг амал қилиши кейинги беш йиллик даврларга ўз-ўзидан узайтирилади.

София шаҳрида 1998 йил 24 июнда икки бир хил нусхада, ҳар бири ўзбек, болгар ва рус тилларида тузилди, барча матнлар бир хил кучга эга. Талқин қилишда фарқ бўлган ҳолда рус тилидаги матн асос қилиб олинади.