Ўзбекистон Республикаси Ҳукумати билан Хитой Халқ Республикаси Ҳукумати, қуйида Аҳдлашувчи «Томонлар» деб аталувчилар,

иккала мамлакат фан ва техника ривожланиши манфаатларидан келиб чиқиб,

тенг ҳуқуқлилик ва ўзаро манфаат принципларига таяниб,

илмий-техникавий ҳамкорлик Ўзбекистон Республикаси ва Хитой Халқ Республикасининг иқтисодий ривожланишига кўмаклашувини эътиборга олиб,

мана шу ҳамкорликнинг ривожланиши учун узоқ муддатли асос яратиш зарурлигини ҳисобга олиб,

қуйидагилар ҳақида келишиб олдилар:

Аҳдлашувчи Томонлар иккала давлат ўртасида илмий-техникавий ҳамкорликнинг ривожланишига кўмаклашадилар ва шундай ҳамкорликнинг соҳалари ва йўналишларини белгилайдилар.

Ушбу Битимга мувофиқ Томонлар ўртасидаги ҳамкорлик қуйидагиларни ўз ичига олади:

1. Илмий ва техникавий делегациялар, алоҳида олимлар ва мутахассислар алмашуви;

2. Илмий-техникавий ахборот ва ҳужжатлар, материаллар ва ишлаб чиқарилган нарсаларнинг намуналари, «ноу-хау» ва лицензиялар алмашуви;

3. Илмий-техникавий симпозиумлар ва илмий конференциялар ташкил қилиш;

4. Ҳамкорликда тадқиқотлар ва илмий ишланмалар олиб бориш, шунингдек тадқиқотлар ва илмий ишланмаларнинг натижалари алмашуви;

5. Ўзаро келишиш мумкин бўлган илмий-техникавий ҳамкорликнинг бошқа шакллари.

Аҳдлашувчи Томонлар ушбу Битим доирасида тузилган шартномалар ёки битимларга мувофиқ, иккала мамлакатнинг тегишли ташкилотлари, корхоналари ва муассасаларига илмий-техникавий ҳамкорликда кўмаклашадилар.

Ушбу Битимни ижро этувчи органлар сифатида Ўзбекистон Республикаси Ҳукумати Ўзбекистон Республикаси фан ва техника давлат қўмитасини ва Хитой Халқ Республикаси Ҳукумати Хитой фан ва техника давлат қўмитасини тайинлайдилар.

Аҳдлашувчи Томонлар ҳамкорлик давомида юзага келадиган тижорат, молиявий ва юридик характерга эга бўлган масалалар иккала мамлакатнинг ҳаракатдаги қонунчилигига мувофиқ тузиладиган алоҳида протоколларга ва битимларга киритилиши керак, деб келишиб олдилар.

Аҳдлашувчи Томонлар улар ва уларнинг вакиллари томонидан олинган илмий-техникавий ахборот ва ҳужжатларни ана шу илмий-техникавий ахборот ва ҳужжатларни тақдим қилган Томоннинг расмий розилигисиз ҳар қандай учинчи томонга бериб юбормаслик мажбуриятини оладилар.

Ушбу Битим имзоланган кунидан эътиборан кучга киради ва беш йил давомида амал қилади. Башарти Аҳдлашувчи Томонлардан бири ушбу Битим муддати тугашидан камида олти ой олдин бошқа Аҳдлашувчи Томонга уни бекор қилиш истагини ёзма равишда баён этмаса, ҳар сафар унинг амал қилиш муддати ўз-ўзидан кейинги беш йиллик муддатларга узайтирилади.

1992 йил 13 март куни Пекин шаҳрида икки асл нусхада, ҳар бири ўзбек ва хитой тилларида имзоланди, ҳар иккала матн бир хил кучга эга. Илова қилинган русча матн ишчи нусхадир.