Оғир юк ташувчи автотранспорт воситаларини ишлаб чиқариш бўйича жаҳоннинг етакчи компаниялари билан ҳамкорликни янада кенгайтириш, республика автомобилсозлик саноатига оғир юк кўтарувчи автотранспортлар учун кабиналар ишлаб чиқариш бўйича замонавий технологияларни жорий этиш мақсадида Вазирлар Маҳкамаси қарор қилади:

1. «Ўзавтосаноат» АЖ «МAN Truck & Bus AG» компанияси билан биргаликда «JV MAN Auto-Uzbekistan» МЧЖ ҚК негизида «MAN» оғир юк автомобиллари учун кабиналар ишлаб чиқаришни ривожлантириш лойиҳасини амалга оширилиши маълумот учун қабул қилинсин.

2. «МAN» оғир юк машиналари учун кабиналар ишлаб чиқаришни ўзлаштириш лойиҳаси доирасида:

буюртмачи – «JV MAN Auto-Uzbekistan» МЧЖ ҚК;

лойиҳаолди ва лойиҳа-смета ҳужжатларини бош ишлаб чиқувчи – «Ўзогирсаноатлойиҳа» АЖ;

бош пудратчи қурилиш ташкилоти — «ТошИЭСкурилиш ШК» АЖ «Ўзбекгидроэнергоқурилиш» АЖ;

қурилиш сифати устидан техник назоратни амалга оширувчи ташкилот — «O’ZAVTOSANOAT-INJINIRING» МЧЖ ҳисоблансин.

3. «МAN Truck & Bus AG» компанияси оғир юк кўтарувчи «MAN» автомобиллари учун кабиналар ишлаб чиқариш технологияси ва ноу-хау эгаси эканлигини ҳамда технологик ускуналарнинг таркиби ва тузилиши аниқланганлигини ҳисобга олиб, истисно тариқасида:

оғир юк кўтарувчи «MAN» автомашиналари учун кабиналарни бир босқичда дастлабки техник-иқтисодий асослашсиз ишлаб чиқаришни ўзлаштириш лойиҳаси бўйича лойиҳаолди ҳужжатларни ишлаб чиқишга;

«МAN Truck & Bus AG» компанияси томонидан тавсия этилган ишлаб чиқарувчилар билан шартномалар тузиш йўли билан, тендер ўтказмасдан, оғир юк ташувчи МAN автомобиллари учун салонлар ишлаб чиқаришни ривожлантириш лойиҳасини амалга ошириш учун зарур бўлган асбоб-ускуналар ва аксессуарлар сотиб олишга рухсат берилсин.

4. «Ўзавтосаноат» АЖ «Ўзогирсаноатлойиҳа» АЖ билан биргаликда уч ой муддатда «MAN» русумли оғир юк кўтарувчи автомашиналар учун кабиналар ишлаб чиқаришни ривожлантириш лойиҳасининг техник-иқтисодий асосларини ишлаб чиқсин ва ваколатли экспертиза органлари билан келишилсин ва уни тасдиқлаш учун Ўзбекистон Республикаси Вазирлар Маҳкамасига тақдим этсин.

5. Ўзбекистон Республикаси Давлат архитектура ва қурилиш қўмитаси лойиҳа олди ва лойиҳа-смета ҳужжатларининг давлат экспертизасидан ўтказилишини таъминласин ҳамда қурилиш-монтаж ишлари сифати устидан давлат архитектура-қурилиш назоратини ўрнатсин.

7. «JV MAN Auto-Uzbekistan» МЧЖ ва «ТошИЭСҚурилиш ШК» АЖ «Ўзбекгидроэнергоқурилиш» акциядорлик жамияти томонидан Ўзбекистон Республикасида ишлаб чиқарилмайдиган оғир юк ташувчи « MAN» автотранспорт воситалари учун кабиналар ишлаб чиқаришни ривожлантириш лойиҳасини амалга ошириш учун олиб кириладиган товарлар белгиланган тартибда тузилаган рўйхатларга кўра божхона тўловларидан (қўшилган қиймат солиғи ва божхона расмийлаштируви йиғимларидан ташқари) озод этилади.

8. Мазкур қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклатилсин.