Ўзбекистон Республикаси Ҳукумати ва Украина Ҳукумати, кейинги ўринларда «Аҳдлашувчи Томонлар» деб аталувчилар, ҳар томонлама иқтисодий, саноат, илмий-техник ҳамкорлик икки томонлама муносабатларни барқарор ва узоқ муддатли асосда ривожлантириш учун муҳим ва зарур элемент эканлигини англаб,

давлатларнинг ишлаб чиқариш ва илмий-технологик салоҳиятлари ўртасидаги мавжуд технологик муносабатларни ҳисобга олган ҳолда,

Бозор муносабатларига асосланган умумий иқтисодий маконни яратишда Аҳдлашувчи Томонлар давлатларининг хўжалик юритувчи субъектларининг бевосита ишлаб чиқариш соҳасидаги ўзаро муносабатларининг ҳал қилувчи ролини эътироф этган ҳолда,

корхона ва тармоқлар ўртасида саноат кооперациясини таъминлаш ва ўзаро манфаатли ривожлантириш учун қулай шарт-шароитлар яратишга интилиб,

икки мамлакат ўртасидаги иқтисодий ҳамкорликнинг даражасига таянган ҳолда,

кўп томонлама савдо тизимининг мустаҳкамланишига ҳамда Тарифлар ва савдо тўғрисидаги бош битимнинг асосий тамойилларига мувофиқ савдо муносабатларини ривожлантиришга ҳисса қўшишга бўлган интилишни таъкидлаб,

барқарор иқтисодий ўсишни таъминлаш, фуқароларининг ҳаёт сифатини яхшилаш, аҳоли бандлигини кенгайтириш, моддий ва инсон ресурсларидан самарали фойдаланиш ва атроф-муҳитни муҳофаза қилиш мақсадларидан келиб чиқиб,

қуйидагилар тўғрисида келишиб олдилар:

Аҳдлашувчи Томонлар мулкчиликнинг барча шаклларидаги корхоналар, саноат ва соҳалараро мажмуалар ўртасидаги ҳамкорликни уларнинг бевосита ишлаб чиқариш алоқалари асосида амалга ошириш ва ривожлантиришга кўмаклашадилар.

Аҳдлашувчи Томонлар халқаро ихтисослашув ва ишлаб чиқариш кооперациясини, уларни амалга ошириш шароитларини ривожлантириш, саноат тармоқларидаги устуворликларни аниқлаш, қўшма лойиҳа ва дастурларни ишлаб чиқиш ва амалга оширишга кўмаклашиш, ишлаб чиқаришни мувофиқлаштириш, шу жумладан мудофаа саноатини конверсия қилиш бўйича зарур чора-тадбирларни амалга оширадилар.

Томонлар қуйидагилар бўйича келишиб олдилар:

кооперация орқали товарларни етказиб бериш деганда технологик жиҳатдан ўзаро боғлиқ ва тайёр маҳсулотни ишлаб чиқариш учун керакли бўлган хомашё, материаллар, узеллар, деталлар, эҳтиёт қисмлар, тайёрламалар, яримфабрикатлар, бутловчи ҳамда бошқа тармоқ ва тармоқлараро қисмларни етказиш тушунилади;

хизмат кўрсатиш деганда лойиҳавий, таъмирлаш ишлари, техник хизмат кўрсатиш ва технологик жараёнлар тушунилади;

товарларни қайта ишлаш учун божхона режимлари доирасида етказиб бериш деганда Томонларнинг божхона қонунчилигида белгиланган шартларга мувофиқ товарлар етказиб бериш тушунилади, агар мазкур Битимда бошқача қоида белгиланмаган бўлса.

Аҳдлашувчи Томонлар саноат кооперацияси ва бевосита муносабатларнинг асосий бўғинини хўжалик юритувчи субъектлар томонидан тегишли тармоқлар ва тармоқлараро битимлар асосида тузиладиган шартномалар (контрактлар) деб ҳисоблайдилар.

Аҳдлашувчи Томонлар ўз вазирликлари ва идораларига ўзаро саноат кооперацияси бўйича битимлар тузишда кўмаклашадилар.

Аҳдлашувчи Томонлар саноат кооперацияси бўйича биринчи навбатда қуйидаги тармоқларда битимлар тузишни зарур деб ҳисоблайдилар:

ёқилғи-энергетика мажмуаси;

металлургия, кимё, нефть-кимё ва ёғочсозлик саноати;

машинасозлик ва мудофаа саноати;

енгил саноат;

транспорт;

тиббиёт ва фармакология саноати;

қишлоқ хўжалиги ва озиқ-овқат саноати.

Саноат кооперацияси бўйича тармоқлар ва тармоқлараро битимлар кооперацияда иштирок этувчи ва ишлаб чиқариш (хизмат кўрсатиш) ихтисослашувини сақловчи корхона ва ташкилотларнинг рўйхатларини, маҳсулот (хизмат кўрсатиш) таъминотининг номенклатураси ва ҳажмларини белгилаб беради.

Саноат кооперацияси бўйича тармоқлар ва тармоқлараро битимлар улар асосида Аҳдлашувчи Томонлар давлатларининг корхоналари ўртасида тузиладиган ва маҳсулотларни божхона расмийлаштируви ҳамда Аҳдлашувчи Томонлар давлатларининг божхона чегарасидан ўтказиш учун асос бўладиган шартномалар (контрактлар) тузиш йўли билан амалга оширилади.

Ишлаб чиқариш кооперацияси доирасида етказиб бериладиган маҳсулотлар (хизматлар) декларацияси Аҳдлашувчи Томонлар давлатларининг божхона органларига уларнинг ҳисоб-китобини қиладиган қонун ҳужжатларига мувофиқ амалга оширилади.

Томонлар экспорт ва импорт божлари, солиқлар, аксиз солиғи ва кооперация йўли билан ва қайта ишлашнинг божхона режимлари доирасида етказиб бериладиган товарлар ҳамда кўрсатиладиган хизматлар бўйича миқдорий чекловларни қўлламасликни ўз зиммаларига оладилар.

Кўрсатилган маҳсулотларни (хизматлар) божхона расмийлаштирувидан ўтказиш учун йиғимлар Аҳдлашувчи Томонларнинг давлатлари қонун ва қоидаларига мувофиқ умумий шартлар асосида ундирилади.

Қайта ишлашга берилган хом ашёдан кооперация йўли билан ишлаб чиқарилган маҳсулотларни етказиб бериш Аҳдлашувчи Томонлар давлатларининг қайта ишлашга берилган хом ашё операциялари тўғрисидаги қонун ҳужжатларига мувофиқ амалга оширилади.

Ишлаб чиқариш кооперацияси доирасида етказиб бериладиган маҳсулотлар, шунингдек, хом ашё, материаллар ва бутловчи қисмлар ишлаб чиқариш кооперациясида иштирок этувчи давлатларнинг ваколатли органининг тегишли ёзма розилигисиз учинчи мамлакатларга, жумладан, хорижий жисмоний ва юридик шахсларга ёки халқаро ташкилотларга қайта экспорт қилинмайди.

Саноат соҳасидаги интеграцион жараёнларни ривожлантириш мақсадида Аҳдлашувчи Томонлар корхоналар ва тармоқлар ўртасидаги кооперацион алоқаларни тартибга солиш бўйича хўжалик юритувчи субъектларга нисбатан ўз мамлакатларининг миллий қонунчилиги нормаларини мувофиқлаштириш ва яқинлаштириш бўйича изчил ишларни амалга оширишга келишиб олдилар.

Аҳдлашувчи Томонлар, зарур ҳолларда, юқори технологияли соҳалар ва экспортга йўналтирилган тармоқлардаги ҳамкорликни ривожлантириш ҳамда импорт ўрнини босувчи маҳсулотлар ишлаб чиқаришни рағбатлантирувчи кредитлар ва инвестициялар бериш шартларини келишиб оладилар.

Аҳдлашувчи Томонлар қуйидаги муаммоларни биргаликда ўрганишни ташкил этади:

маркетинг, лизинг тадқиқотларини ўтказиш ва кўргазмалар ташкил этиш, хизматлар кўрсатиш;

давлатлари ўртасида ҳамкорлар топиш, шартномалар (контрактлар) тайёрлаш, тузиш ва ижро этишда ёрдам кўрсатадиган замонавий ахборот коммуникацияларини ривожлантириш;

мутахассислар тайёрлаш бўйича биргаликдаги фаолиятни амалга ошириш.

Мазкур Битим Аҳдлашувчи Томонлар ўртасида тузилган битим билан ўзгартирилиши ёки тўлдирилиши мумкин.

Мазкур Битимни шарҳлаш ва қўллаш билан боғлиқ низолар, аввало, Аҳдлашувчи Томонлар ўртасидаги маслаҳатлашув ва музокаралар орқали ҳал этилади.

Мазкур Битим Аҳдлашувчи Томонлар тарафидан Битим кучга кириши учун зарур бўлган давлат ички процедуралари бажарилганлиги ҳақида сўнгги ёзма хабарнома дипломатик каналлар орқали олинган санадан бошлаб кучга киради ва номуайян муддатда кучда қолади.

Мазкур Битимнинг амал қилиши Аҳдлашувчи Томонлардан бирининг бошқа Аҳдлашувчи Томонга Битим амал қилишини тугатиш нияти тўғрисидаги тегишли ёзма хабарномасининг олган санадан бошлаб 6 ойдан сўнг тугатилади.

1994 йил 6 сентабрда Тошкент шаҳрида ҳар бири украин, ўзбек, ва рус тилларида бўлган икки асл нусхада имзоланди ва бунда барча матнлар бир хил кучга эга.