Ўзбекистон Республикаси Ҳукумати ва Туркманистон Ҳукумати, бундан кейин «Аҳдлашувчи Томонлар» деб аталувчилар,

иккала давлат халқлари ўртасидаги анъанавий дўстлик муносабатларини эътиборга олишиб,

Ўзбекистон Республикаси ва Туркманистон ўртасида таълим соҳасидаги ҳамкорликни бундан буён ҳам ривожлантириш ҳамда мустаҳкамлашга бўлган интилишни ифодалашиб,

қуйидагилар тўғрисида келишиб олдилар:

Аҳдлашувчи Томонлар иккала Томоннинг давлат таълимни бошқариш тегишли органлари ўртасида ҳамкорликни ривожлантиришга кўмаклашадилар.

Аҳдлашувчи Томонларнинг ҳар бири иккинчи Томоннинг фуқароларига таълим олишда ўз фуқаролари билан тенг ҳуқуқни ва унинг эркинлигини кафолатлайди, она тилида таълим олиш учун шарт-шароитлар яратишга кўмаклашади.

Аҳдлашувчи Томонлар таълим тизимини такомиллаштиришда Ўзбекистон Республикаси ҳудудида яшаётган туркман миллатидаги ва Туркманистон ҳудудида яшаётган ўзбек миллатидаги шахслар учун дарсликлар ва ўқув-услубий адабиётлар яратишда ўзаро ёрдам берадилар.

Аҳдлашувчи Томонлар таълим муассасалари ўртасида тўғридан-тўғри шериклик муносабатларини ривожлантиришга, мазкур соҳадаги ривожланиш масалалари бўйича ахборотлар алмашишга, шунингдек кадрлар тайёрлаш ишларида ҳамкорлик қилишга кўмаклашадилар.

Аҳдлашувчи Томонлар 1993 йилнинг 1 январигача берилган таълим, илмий даражалар ва унвонлар тўғрисидаги ҳужжатларнинг, малака шаҳодатномалари ва дипломларининг эквивалентлилигини тан оладилар ҳамда янгидан берилган ҳужжатларни ўзаро тан олиш бўйича низомлар ишлаб чиқадилар.

Таълим соҳасидаги ҳамкорликнинг аниқ шакл ва шартлари иккала Томоннинг давлат таълимни бошқариш тегишли органлари ўртасидаги алоҳида битимлар билан тартибга солиб борилади.

Аҳдлашувчи Томонлар, зарурат бўлганда, мазкур Битимни амалга ошириш ва Томонларнинг ҳамкорлик қилиши бўйича тавсиялар тайёрлаш учун қўшма комиссия тузишлари мумкин.

Мазкур Битим имзоланган кундан бошлаб кучга киради, беш йил давомида амал қилади ва тегишли муддат тугашидан камида олти ой муқаддам Аҳдлашувчи Томонлардан бирортаси ҳам Битимнинг амал қилишини тўхтатиш тўғрисидаги ўз ниятидан иккинчи Аҳдлашувчи Томонни ёзма равишда хабардор қилмаса, унинг амал қилиш муддати кейинги беш йиллик даврларга ўз-ўзидан узаяди.

1996 йил 16 январда,Чоржўй шаҳрида, икки нусхада, ҳар бири ўзбек,туркман ва рус тилларида тузилди, барча матнлар бир хил кучга эга. Битимни талқин қилишда келишмовчиликлар пайдо бўлган тақдирда рус тилидаги матн асосий ҳисобланади.