Ўзбекистон Республикаси Ҳукумати билан Туркманистон Ҳукумати,

даромадлар ва мол-мулкка икки томонлама солиқ солинишига йўл қўймаслик тўғрисида Битим тузиш ҳамда икки томонлама иқтисодий ҳамкорликни янада ривожлантиришга ёрдам бериш мақсадида,

қуйидагилар тўғрисида келишиб олдилар:

Мазкур Битим бир ёки иккала Аҳдлашувчи Давлат резиденти ҳисобланадиган шахсларга нисбатан татбиқ этилади.

1. Мазкур Битим ҳар бир Аҳдлашувчи Давлат номидан унинг маъмурий бўлинмалари ёки маҳаллий органлари томонидан ундириладиган фойда (даромад) ва мол-мулк солиғига, уларни ундириш усулидан қатъи назар, жорий қилинади.

2. Фойда (даромад) ва мол-мулк солиқларига умумий даромаддан ёки даромаднинг бир қисмидан, кўчадиган ва кўчмас мулкни бегоналаштиришда олинадиган фойда (даромад) солиғини ҳам қўшиб, иш ҳақи ёки тақдирлаш пуллари умумий суммасидан олинадиган солиқ, шунингдек мулк қийматининг ошишидан олинадиган солиқлар киритилади.

3. Мазкур Битим жорий этиладиган солиқлар қуйидагилар ҳисобланади:

Ўзбекистон Республикасида:

a) корхоналар, бирлашмалар ва ташкилотлар фойдаси (даромади)дан олинадиган солиқ;

b) Ўзбекистон Республикаси фуқароларидан, ажнабий фуқаролардан ва фуқаролиги бўлмаган шахслардан олинадиган даромад солиғи;

c) корхоналар мол-мулкидан олинадиган солиқ;

d) жисмоний шахслар мол-мулкидан олинадиган солиқ.

(бундан кейин «Ўзбекистон солиқлари» деб аталади)

Туркманистонда:

a) фойдаси (даромади) дан олинадиган солиқ;

b) жисмоний шахслардан олинадиган даромад солиғи;

c) ер ости бойликларидан фойдаланганлик учун олинадиган солиқ;

d) корхоналар мол-мулкидан олинадиган солиқ;

е) ер учун тўлов;

(бундан кейин «Туркманистон солиқлари» деб аталади)

4. Мазкур Битим Аҳдлашувчи Давлатлардан ҳар бирида мазкур Битим имзолангандан сўнг ушбу модда 3-бандида кўрсатилган солиқларга қўшимча ёки улар ўрнига ундириладиган ҳар қандай шундай ёки моҳиятига кўра шунга ўхшаш солиқларга жорий қилинади. Аҳдлашувчи Давлатларнинг ваколатли органлари ўз солиқ қонунчиликларидаги ҳар қандай муҳим ўзгартиришлар тўғрисида бир-бирларини хабардор қиладилар.

1. Мазкур Битим мақсадида, агар мазмундан бошқача маъно келиб чиқмаса:

a) «Ўзбекистон» атамаси Ўзбекистон Республикасини англатади ва ундан географик маънода қўлланилганда Ўзбекистон Республикаси халқаро ҳуқуқ нормаларига мувофиқ суверен ҳуқуқларни ва юрисдикцияни, ер ости бойликлари ва табиий ресурслардан фойдаланишни ҳам қўшиб амалга ошириши мумкин бўлган унинг ҳудудини, ички сувларини, само бўшлиғини англатади;

«Туркманистон» атамаси Туркманистонни англатади ва у географик маънода ишлатилганда халқаро ҳуқуқ ва Туркманистон қонунчилигига мувофиқ Туркманистон денгиз туби, ер ости бойликлари ва уларнинг табиий ресурсларига нисбатан ўз ҳуқуқларини амалга оширадиган ҳудудни англатади;

b) «Аҳдлашувчи Давлат» ва «бошқа Аҳдлашувчи Давлат» атамалари мазмунга кўра Ўзбекистон Республикасини ва Туркманистонни англатади;

c) «шахс» атамаси жисмоний шахсни, компанияни ва шахсларнинг бошқа ҳар қандай бирлашмасини ўз ичига олади;

d) «компания» атамаси солиқ солиш мақсадида корпоратив тузилма тарзида қараладиган ҳар қандай корпоратив тузилма ёки ҳар қандай бошқа ташкилотни англатади;

е) «бир Аҳдлашувчи Давлат корхонаси» ва «бошқа Аҳдлашувчи Давлат корхонаси» атамалари мувофиқ тарзда Аҳдлашувчи Давлат резиденти томонидан бошқарилаётган корхонани ва бошқа Аҳдлашувчи Давлат резидент томонидан бошқарилаётган корхонани англатади;

f) «халқаро ташишлар» атамаси Аҳдлашувчи Давлат корхонаси томонидан амалга оширилаётган денгиз, дарё ёки ҳаво кемасида, темир йўл ёки автомобиль транспортидаги ҳар қандай ташишларни англатади, бундан фақат бошқа Аҳдлашувчи Давлат ҳудудида жойлашган пунктлар ўртасида амалга оширилаётган бундай ташишлар мустаснодир;

h) «миллий шахс» атамаси:

I) Аҳдлашувчи Давлатлар фуқаролари ҳисобланадиган барча жисмоний шахсларни;

II) ўз мақомини Аҳдлашувчи Давлатларнинг амалдаги қонунчилигига мувофиқ олган барча юридик шахсларни, ширкатларни ёки уюшмаларни англатади;

g) «ваколатли орган» атамаси:

I) Ўзбекистон Республикасида — Ўзбекистон Республикаси Давлат солиқ қўмитасини;

II) Туркманистонда — Иқтисодиёт ва молия вазирлиги ва Давлат бош солиқ инспекцияси ёки уларнинг ваколатли вакилини англатади.

2. Аҳдлашувчи Давлат мазкур Битимни қўллаганда мазкур Битимда таъриф берилмаган ҳар қандай атамага шу Давлат қонунчилигида мазкур Битим жорий этиладиган солиқларга нисбатан қандай маъно касб этилса, агар мазмундан бошқача англанилмаса, ўша маънони англатади.

1. Мазкур Битим мақсадида «Аҳдлашувчи Давлат резиденти» атамаси шу Давлат қонунчилигига кўра унинг манзили, доимий истиқомат жойи, ҳақиқий раҳбарлик органи жойлашган жой ёки шундай тусдаги ҳар қандай бошқа мезон асосида солиқ солиниши лозим бўлган ҳар қандай шахсни англатади. Аммо бу атама шу Аҳдлашувчи Давлатда шу Давлатдаги манбалардан ёки мол-мулкдан даромад олаётганлиги учунгина солиқ солиниши лозим бўлган шахсни ўз ичига олмайди.

2. Жисмоний шахс 1-банд қоидаларига мувофиқ ҳар иккала Аҳдлашувчи Давлат резиденти ҳисобланса, унинг мақоми қуйидаги тартибда аниқланади:

a) у ўзи яшаши учун доимий уй жойга эга бўлган ўша Давлат резиденти ҳисобланади: агар у ҳар иккала Аҳдлашувчи Давлатда ўзи учун қулай доимий уй жойга эга бўлса, у яқинроқ шахсий ва иқтисодий алоқалар (ҳаётий манфаатлар маркази)га эга бўлган ўша Аҳдлашувчи Давлат резиденти ҳисобланади;

b) агар шахс ҳаётий манфаатлар марказига эга бўлган Давлатни аниқлаш мумкин бўлмаса ёки бундай шахс Аҳдлашувчи Давлатларнинг ҳеч бирида доимий турар жойга эга бўлмаса, у одатда яшаб турган ўша Аҳдлашувчи Давлат резиденти ҳисобланади;

c) агар шахс одатда иккала Аҳдлашувчи Давлатда яшаса ёки одатда уларнинг бирортасида ҳам яшамаса, у миллий шахси бўлган ўша Аҳдлашувчи Давлат резиденти ҳисобланади;

d) агар Аҳдлашувчи Давлатлардан иккаласи ҳам уни ўз миллий шахси деб қараса ёки Аҳдлашувчи Давлатлардан ҳеч қайси бири уни бундай деб ҳисобламаса, Аҳдлашувчи Давлатларнинг ваколатли органлари мазкур масалани ўзаро келишувга кўра ҳал қиладилар.

3. Агар 1-банд қоидаларига мувофиқ жисмоний шахс бўлмаган шахс иккала Аҳдлашувчи Давлат резиденти ҳисобланса, у ўзининг ҳақиқий раҳбарлик қилувчи органи жойлашган ўша Аҳдлашувчи Давлат резиденти ҳисобланади.

1. Мазкур Битим мақсадида «доимий ваколатхона (муассаса)» атамаси Аҳдлашувчи Давлат корхонаси у орқали бошқа Аҳдлашувчи Давлатда тадбиркорлик фаолиятини амалга оширадиган доимий фаолият жойини англатади.

2. «Доимий ваколатхона (муассаса)» атамаси хусусан қуйидагиларни ўз ичига олади:

a) бошқариш жойи;

b) бўлинма (филиал);

c) идора (офис);

d) фабрика;

е) устахона;

f) шахта, нефть ёки газ қудуғи, кон ёки табиий ресурслар қазиб олинадиган бошқа ҳар қандай жой.

3. «Доимий ваколатхона (муассаса)» атамаси шу жумладан қуйидагиларни қамраб олади:

a) қурилиш майдони, қурилиш, монтаж ёки йиғув объекти ёки уларга дахлдор техник назорат фаолиятни, аммо бундай майдон, объект 12 ойдан ортиқ давр мобайнида мавжуд бўлган ёки фаолият амалга оширилаётган ҳолларда;

b) корхона томонидан корхона бу мақсадда махсус ёллаган хизматчилар ёки бошқа ходимлар орқали хизматлар, маслаҳат хизматлари ҳам кўрсатилганда, аммо бу турдаги фаолият (бир ёки бир неча объектлар учун) мамлакат ҳудудида ҳар қандай 12 ойлик давр мобайнида 183 кундан ортиқ давр ёки даврлар доирасида амалга оширилганда.

4. Мазкур модданинг юқоридаги қоидаларига қарамай «доимий ваколатхона (муассаса)» атамаси қуйидагиларни ўз ичига олмайди:

a) иншоотлардан фақат шу корхонага тегишли бўлган товарлар ёки буюмларни сақлаш, намойиш мақсадларида фойдаланишни;

b) фақат сақлаш ёки намойиш қилиш мақсадларида шу корхонага тегишли товарлар ёки буюмлар захираларини ушлаб туришни;

c) шу корхонага тегишли товарлар ёки буюмларни фақат уни бошқа корхона томонидан қайта ишланиши мақсадларида ушлаб туришни;

d) доимий фаолият жойини фақат товарлар ёки буюмлар харид қилиш ёки шу корхона учун ахборот тўплаш мақсадларида ушлаб туришни;

е) доимий фаолият жойини фақат шу корхона манфаатларидаги ҳар қандай бошқа тайёрлов ёки ёрдамчи тусдаги фаолиятни амалга ошириш мақсадида ушлаб туришни;

f) доимий фаолият жойини «а» — «е» кичик бандларида кўрсатиб ўтилган фаолият турларининг ҳар қандай комбинациясини амалга ошириш учунгина ушлаб туришни, бунда бундай доимий жойнинг ана шундай комбинация қилиш асосида юзага келган қўшма фаолияти тайёрлов ёки ёрдамчи тусда бўлса.

5. 1 ва 2-бандлар қоидаларига қарамай, агар шахс, 7-бандда айтиб ўтилган мустақил мақомга эга бўлган агент бўлмаса, Аҳдлашувчи Давлатда бошқа Аҳдлашувчи Давлат корхонаси номидан иш юритса, бундай корхона биринчи эслатилган Аҳдлашувчи Давлатда бу шахс корхона учун амалга оширадиган ҳар қандай фаолиятга нисбатан доимий ваколатхонага (муассасага) эга деб қаралади, агар бу шахс:

а) шу Давлатда корхона номидан контрактлар тузиш ваколатига эга бўлса ва ундан одатда фойдаланса, бундан мазкур шахснинг фаолияти 4-бандда кўрсатилганлар билан чекланса мустаснодир, яъни мазкур бандга кўра доимий фаолият жойи орқали амалга оширилсада, у бундан доимий фаолият ваколатхонаси (муассасаси) ташкил қилмайди;

b) ҳеч қандай ваколатга эга эмас, аммо одатда биринчи эслатилган Давлатда товарлар ёки маҳсулотлар захирасини сақлайди, ундан у корхонага мунтазам етказиб беради.

6. Мазкур модданинг олдинги қоидаларига қарамай Аҳдлашувчи Давлатнинг суғурта корхонаси, қайта суғурталаш ҳолатларидан ташқари, бошқа Аҳдлашувчи Давлатда доимий ваколатхона (муассаса)га эга деб ҳисобланади, агарда у шу бошқа Давлат ҳуқуқида суғурта пули йиғса ёки 7-банд тегишли бўлган мустақил мақомга эга бўлган агентдан фарқ қилувчи шахс воситасида ўша ерда содир бўлиши мумкин бўлган таваккалчиликдан суғурта қилса.

7. Бир Аҳдлашувчи Давлат корхонаси бошқа Аҳдлашувчи Давлатда брокер, воситачи ёки мустақил мақомга эга бўлган ҳар қандай бошқа агент орқали, агар бу шахслар ўзларининг одатий фаолияти доирасида иш юритсалар, тадбиркорлик фаолиятини амалга оширса, у шу бошқа Аҳдлашувчи Давлатда доимий ваколатхона (муассасага) эга деб қаралмайди.

8. Бир Аҳдлашувчи Давлат резиденти ҳисобланувчи компания бошқа Аҳдлашувчи Давлат резиденти ҳисобланувчи компанияни назорат қилиши ёки назорат қилиниши ёки шу бошқа Давлатда тадбиркорлик фаолиятини доимий ваколатхона (муассаса) ёки бошқача йўсинда) амалга оширишнинг ўзи мана шу компаниялардан бирини иккинчисининг доимий ваколатхонаси (муассасаси)га айлантирмайди.

1. Бир Аҳдлашувчи Давлат резиденти бошқа Аҳдлашувчи Давлатда бўлган кўчмас мулкдан (қишлоқ хўжалиги ва ўрмон хўжалигидан ҳам) олинадиган даромадларга фақат шу бошқа Давлатда солиқ солиниши мумкин.

2. Мазкур Битимда «кўчмас мулк» атамаси кўриб чиқилаётган кўчмас мулк жойлашган Аҳдлашувчи Давлат қонунчилигида эга бўлган маънони англатади. Бу атама ҳар қандай ҳолатда ҳам кўчмас мулкка нисбатан ёрдамчи бўлган мулкни, қишлоқ хўжалиги ёки ўрмон хўжалигида ишлатиладиган чорва ва асбоб-ускунани, ерга эгалик муносабатида умумий ҳуқуқ қоидалари қўлланиладиган ҳуқуқни, кўчмас мулк узуфруктини ва табиий ресурсларни қазиб олиш ёки қазиб олиш ҳуқуқини берганлик учун компенсация сифатида тўланадиган ўзгарувчан ёки ўзгармас белгиланган тўловлар ҳуқуқини ўз ичига олади.

3. «Узуфрукт» атамаси мазкур моддада ишлатилганда бегона мулкдан ва ундан олинадиган даромадлардан умрбод фойдаланиш ҳуқуқини англатади.

4. 1-банд қоидалари кўчмас мулкдан бевосита фойдаланиш, ижара ёки кўчмас мулкдан ҳар қандай бошқача шаклда фойдаланишдан олинган даромадларга нисбатан қўлланади.

5. 1 ва 3-бандлар қоидалари корхоналар кўчмас мулкидан олинган даромадлар ва мустақил шахсий хизматлар кўрсатишда фойдаланиладиган кўчмас мулкдан олинадиган даромадларга ҳам қўлланилади.

1. Бир Аҳдлашувчи Давлатда бошқа Аҳдлашувчи Давлат корхонаси олган фойдага биринчи эслатилган Давлатда солиқ солинади,бунда бу фойда ўша ерда жойлашган доимий муассаса орқали олинган бўлса ва фақат шу доимий муассасага тегишли бўлган қисмига солиқ солинади.

2. 3-банд қоидаларини ҳисобга олиб, агар бир Аҳдлашувчи Давлат корхонаси бошқа Аҳдлашувчи Давлатда тадбиркорлик фаолиятини ўша ерда жойлашган доимий муассаса орқали амалга оширса, унда ҳар бир Аҳдлашувчи Давлатда, агар у худди шундай ёки шунга ўхшаш фаолиятни шундай ёки шунга ўхшаш шароитларда амалга оширадиган ва ўзи доимий ваколатхона (муассаса)си бўлган корхонадан тамоман мустақил тарзда фаолият юритувчи алоҳида ажралган ва мустақил корхона бўлган тақдирда олиши мумкин бўлган шундай доимий муассасага тегишли фойда деб қаралади.

3. Доимий муассаса фойдаси (даромади)ни аниқлашда мазкур доимий муассаса фаолият мақсадларини амалга ошириш учун қилинган ҳужжат билан тасдиқланган, бошқарув ва умуммаъмурият харажатлари ҳам, бу харажатлар доимий муассаса жойлашган Давлатда ёки унинг ташқарисида қилинганлигидан қатъи назар, чиқариб ташланиши керак.

Доимий муассасага унинг бош муассасаси (офиси)га ёки резидентининг ҳар қандай бошқа муассасаларига (офисларига) патентлар ёки бошқа ҳуқуқлардан фойдаланганлик учун роялти, йиғимлар ёки бошқа ўхшаш тўловлар тўлаш йўли билан ёки кўрсатилган муайян хизматлар ёки менежмент учун воситачилик тўловларини тўлаш ёки доимий муассасага қарзга берилган сумма учун фоизлар тўлаш йўли билан қилинган тўловларни чиқариб ташлашига йўл қўйилмайди.

4. Ҳеч қандай фойда Аҳдлашувчи Давлат резиденти доимий муассаса шу корхона учун товарлар ёки буюмлар харид қилинганлиги учунгина муассаса фойдаси деб қаралмайди.

5. Олдинги бандлар мақсадларида доимий муассасага тегишли бўлган фойда (даромад) ҳар йил айни бир хил методда, агарда уни алмаштириш учун асосли ва етарли сабаблар бўлмаса, аниқланади.

6. Агар фойда мазкур Битимнинг бошқа моддаларида алоҳида айтиб ўтиладиган даромад турларини ўз ичига олса, бу моддалар қоидаларига мазкур модда қоидалари дахл қилмайди.

1. Бир Аҳдлашувчи Давлат корхонасининг денгиз, дарё ва ҳаво кемалари, темир йўл ва автомобиль транспорт воситаларидан халқаро ташишларда фойдаланишдан олган фойдаси (даромади)га фақат мана шу Давлатда солиқ солинади.

2. Ички сувларда дарё кемаларидан фойдаланишдан олинган фойдага корхонанинг ҳақиқий бошқарув органи жойлашган ўша Аҳдлашувчи Давлатда солиқ солинади.

3. Мазкур Битим мақсадида денгиз, дарё ва ҳаво кемаларидан, темир йўл ва ёки автомобиль транспорт воситаларидан халқаро ташишларда олинган даромадлар транспорт воситаларидан бевосита фойдаланиш, уларни ижарага бериш ёки улардан ҳар қандай бошқа шаклда фойдаланишдан, контейнерлардан фойдаланиш, сақлаш ёки ижарага беришдан ҳам (бунга трейлерлар ва контейнерларни ташишдаги ёрдамчи асбоб-ускуналар ҳам киради) олинган даромадларни ўз ичига олади.

4. 1 ва 2-бандлар қоидалари пулда, қўшма корхонада ёки транспорт воситаларидан фойдаланиш бўйича халқаро ташкилотда қатнашишдан олинган фойдага ҳам қўлланади.

1. Куйидаги ҳолларда, яъни:

a) Аҳдлашувчи Давлат корхонаси бошқа Аҳдлашувчи Давлат корхонасини бошқаришда, назорат қилишда ёки капиталида бевосита ёки билвосита иштирок этса, ёки

b) айни бир шахсларнинг ўзи бир Аҳдлашувчи Давлат корхонасини ва бошқа Аҳдлашувчи Давлат корхонасини бошқаришда, назорат қилишда ёки капиталида бевосита ёки билвосита иштирок этсалар ҳар қандай ҳолатда ҳам корхоналар ўртасида уларнинг тижорат ва молиявий ўзаро муносабатларида шундай ҳолатлар юзага келадики ёки ўрнатиладики, улар мустақил корхоналар бўлганларида, фойда корхоналардан бирига ҳисобланган бўларди, аммо бундай муносабат бирлиги учун унга ҳисобланмаган фойда, шу корхона фойдасига (даромадига) киритилиши ва шунга кўра солиқ солиниши мумкин.

2. Агар 1-банд қоидаларига кўра бир Аҳдлашувчи Давлат томонидан шу Давлат корхонаси фойдасига киритилган фойда (даромад) сўнгра бошқа Аҳдлашувчи Давлат томонидан бошқа корхона фойдасига киритилса, биринчи Давлат бундай фойдадан биринчи корхонага ҳисобланган солиқ суммасига тегишли тузатишлар киритади. Бундай тўғрилашни белгилашда мазкур Битимнинг бошқа қоидалари ҳисобга олинади ва Аҳдлашувчи Давлатларнинг ваколатли органлари зарур бўлган ҳолларда бир-бирлари билан маслаҳатлашиб оладилар.

1. Бир Аҳдлашувчи Давлат резиденти бўлган компания томонидан бошқа Аҳдлашувчи Давлат резидентига тўланадиган дивидендларга шу бошқа Давлатда солиқ солиниши мумкин.

2. Аммо бундай дивидендларга дивидендни тўлаётган компания резиденти ҳисобланган ўша Аҳдлашувчи Давлатда ва шу Давлат қонунларига мувофиқ солиқ солиниши мумкин, аммо агар дивидендларни олувчи ҳақиқатан уларни олиш ҳуқуқига эга бўлса, унда олинаётган солиқ дивидендлар ялпи суммасининг 10 фоизидан ортиқ бўлмаслиги керак.

Бу банд дивиденд тўланаётган фойдага солиқ солишга дахл қилмайди.

3. «Дивидендлар» атамаси мазкур моддада ишлатилганда қарз мажбуриятлари бўлмаган, фойдада иштирок этиш ҳуқуқини берадиган акциялар ва бошқа ҳуқуқлардан олинадиган даромадларни, шунингдек, фойдани тақсимловчи компания резиденти бўлган ўша Давлат қонунчилигига кўра акциялардан олинадиган даромад сингари солиқ билан тартибга солиниши лозим бўлган бошқа корпоратив ҳуқуқлардан олинадиган даромадларни ҳам англатади.

4. Мазкур модданинг 1 ва 2-бандлари, дивидендларни олиш ҳақиқий ҳуқуқига эга бўлган шахс Аҳдлашувчи Давлат резиденти бўла туриб, тадбиркорлик фаолиятини дивидендларни тўлаётган компания резиденти бўлган бошқа Аҳдлашувчи Давлатда унда жойлашган доимий муассаса орқали амалга оширса ёки ўша ерда жойлашган доимий базадан мустақил хизматлар кўрсатса ҳамда дивидендлар тўлашда асос бўлган холдинг асосида шундай доимий муассаса ёки доимий база билан боғлиқ бўлса, қўлланмайди. Бундай ҳолатда мазкур Битим 7-моддаси ёки 14-моддасининг қоидалари, вазиятга кўра қўлланилади.

5. Аҳдлашувчи Давлат резиденти ҳисобланадиган компания бошқа Аҳдлашувчи Давлатда фойда олса, бу бошқа Давлат шу компания тўлаётган дивидендларга солиқ солмаслиги мумкин, бундан бундай дивидендлар шу бошқа давлат резидентига тўланадиган ёки дивидендлар тўлашда асос бўлган холдинг ҳақиқатдан ҳам шу бошқа Давлатда жойлашган доимий муассаса ёки доимий база билан боғлиқ ҳолатлар истиснодир, шунингдек, компаниянинг тақсимланмаган фойдасига, ҳатто тўланаётган дивидендлар ёки тақсимланмаган фойда тўлиқ ёки қисман шу бошқа Аҳдлашувчи Давлатда юзага келувчи фойда ёки даромаддан иборат бўлса ҳам солиқ солмаслиги мумкин.

1. Бир Аҳдлашувчи Давлатда юзага келадиган ва бошқа Аҳдлашувчи Давлат резидентига тўланаётган фоизларга шу бошқа Давлатда солиқ солиниши мумкин.

2. Бироқ бундай фоизларга улар юзага келадиган ўша Аҳдлашувчи Давлатда ҳам шу Давлат қонунчилигига мувофиқ солиқ солиниши мумкин, аммо агар фоизларни олувчи фоизларнинг ҳақиқий эгаси бўлса, унда бу йўсинда ундирилаётган солиқ фоизлар ялпи суммасининг 10 фоизидан ортиқ бўлмаслиги керак.

3. 2-банд қоидаларидан қатъи назар, Аҳдлашувчи Давлатда ҳосил бўладиган фоиз шу Давлатда солиқдан озод этилади, агар:

a) фоизларнинг ҳақиқий олувчиси бошқа Аҳдлашувчи Давлат Ҳукумати ёки унинг маҳаллий ҳокимияти ёки шу Ҳукумат ёки маҳаллий ҳокимиятнинг ҳар қандай органи ҳисобланса;

b) Ўзбекистон Республикаси Марказий банки ёки Туркманистон Марказий банки (Аҳдлашувчи Давлатларнинг «банклар банки»), давлат экспорт ва импорт кредитларини кафолатлаш бўйича ташкилот ёки Аҳдлашувчи Давлатларнинг қонунчилигига мувофиқ тегишли ҳуқуқлар берилган шунга ўхшаш бошқа ташкилотлар ҳақиқий олувчи ҳисобланса.

4. Мазкур Битимдан фойдаланишда «фоизлар» атамаси ипотека таъминотидан ва фойдада қатнашиш ҳуқуқига эга бўлишдан қатъи назар ҳар қандай турдаги қарз талабларидан олинадиган даромадни, жумладан ҳукумат қимматли қоғозлари ва облигацияларидан ёки қарз мажбуриятларидан олинадиган даромадни англатади, ушбу қимматли қоғозлар ва қарз мажбуриятлари бўйича мукофотлар ва ютуқлар ҳам шу жумлага киради. Тўловлар ўз вақтида амалга оширилмаганлиги учун олинадиган жарималар ушбу модда мақсадлари учун фоизлар сифатида қаралмайди.

5. Башарти фоизларнинг ҳақиқий эгаси бир Аҳдлашувчи Давлатнинг резиденти бўлган ҳолда тадбиркорлик фаолиятини бошқа Аҳдлашувчи Давлатда амалга оширса 1 ва 2-бандларнинг қоидаси қўлланилмайди, бу Давлатда бунда жойлашган доимий муассаса орқали фоизлар пайдо бўлса, ёки мустақил шахсий хизматларни у ерда жойлашган доимий базалар орқали амалга оширса, ва улар асосида фоизлар тўланадиган қарз талаблари бўлса, бундай доимий муассаса ёки доимий базага ҳақиқатда тегишли бўлади. Бундай ҳолда вазиятга боғлиқ равишда мазкур Битимнинг 7-моддаси ёки 14-моддаси қоидаси қўлланилади.

6. Тўловчи Давлатнинг ўзи, маҳаллий ҳокимиятлар ёки ушбу Давлат резиденти бўлган тақдирда фоизлар Аҳдлашувчи Давлатларда пайдо бўлган деб ҳисобланади. Бироқ, фоизларни тўловчи шахс Аҳдлашувчи Давлатнинг резиденти бўлгани ҳолда ёки бўлмаган тақдирда, Аҳдлашувчи Давлатда доимий муассасага ёки доимий базага эга бўлса, шу муносабат билан қарзлар бўйича фоизлар тўланиши келиб чиқса, ушбу ҳолда фоизлар доимий муассаса ёки доимий база жойлашган Аҳдлашувчи Давлатда пайдо бўлган деб ҳисобланади.

7. Агар фоизларга ҳақиқатда ҳуқуқи бўлган тўловчилар ва шахслар ўртасидаги, ёки уларнинг бир-бири ўртасида ва бирор бир бошқа шахслар ўртасидаги алоҳида муносабатлар оқибатида улар тўлайдиган қарз талабига нисбатан тегишли бўлган фоизлар суммаси бунга ҳақиқатда ҳуқуқи бўлган тўловчи ва шахс ўртасида келишилган суммадан ортиқ бўлса, бундай муносабатлар мавжуд бўлмаса, мазкур модда қоидаси фақат охирги тилга олинган суммага нисбатан қўлланилади. Бундай ҳолда мазкур Битимнинг бошқа қоидаларини ҳисобга олган ҳолда ҳар бир Аҳдлашувчи Давлатнинг қонунчилигига мувофиқ тўловнинг ортиқча қисмидан солиқ олиниши давом этади.

1. Бир Аҳдлашувчи Давлатда пайдо бўладиган ва бошқа Аҳдлашувчи Давлатда резидентга тўланадиган роялти агар бу резидент ушбу роялтиларнинг ҳақиқий эгаси ҳисобланса, ушбу бошқа Давлатда унга солиқ солиниши мумкин.

2. Бироқ, бу роялтиларга улар пайдо бўладиган Аҳдлашувчи Давлатда ушбу Давлатнинг қонунчилигига мувофиқ солиқ солиниши мумкин, бироқ агар уларни олувчилар бенефициар (роялти эгаларидан фойда олувчилар) ҳисобланса, солиқ роялти ялпи суммасининг 10 фоизидан ошмаслиги керак. Аҳдлашувчи Давлатларнинг ваколатли органлари ўзаро келишувига кўра бундай чеклашларни қўллаш усулларини таъсис этадилар.

3. Мазкур моддада «роялти» атамасидан фойдаланиш исталган адабиёт, санъат ёки фан асаридан, шу жумладан кинофильмлар ва радиоэшиттириш ва телевидение ҳамда видеокассеталар учун ёзувлар, исталган патентлар, савдо маркалари, дизайн ёки модель режа, компьютер дастурлари, махфий формулалар ёки жараёнлар, ёки саноат, тижорат ёки илмий тажриба билан боғлиқ ахборот учун ва саноат, тижорат ёки илмий асбоб-ускуналардан фойдаланганлик ёки улардан фойдаланиш ҳуқуқини берганлик учун тўловларга фойдаланганлик ёки муаллифлик ҳуқуқлардан фойдаланиш ҳуқуқини берганлик учун қоплаш сифатида олинадиган исталган турдаги тўловларни ўз ичига олади.

4. Агар роялтининг ҳақиқий эгаси бир Аҳдлашувчи Давлатнинг резиденти бўлгани ҳолда тадбиркорлик фаолиятини бошқа Аҳдлашувчи Давлатда амалга оширса, бу давлатда унда жойлашган доимий муассаса ёки база орқали роялти пайдо бўлса, ва уларга нисбатан роялти тўланадиган ҳуқуқ ёки мол-мулк бўлса, бундай доимий муассаса ёки база билан ҳақиқатда боғланган бўлади. Бундай ҳолда вазиятга боғлиқ равишда мазкур Битимнинг 7-моддаси ёки 14-моддаси қоидаси қўлланади.

5. Агар тўловчи ушбу Давлатнинг резиденти ҳисобланса, роялти Аҳдлашувчи Давлатда пайдо бўлган деб ҳисобланади. Агар роялти тўловчи шахс Аҳдлашувчи Давлатнинг резиденти ҳисобланиши ёки йўқлигидан қатъи назар, Аҳдлашувчи Давлатда доимий муассаса ёки доимий базага эга бўлса, у бўйича роялти тўланадиган қарздорлик пайдо бўлиши муносабати билан, ушбу роялтиларни тўлаш бўйича харажатларни бундай доимий муассаса ёки доимий база тўласа, роялти доимий муассаса ёки доимий база жойлашган Давлатда пайдо бўлган деб ҳисобланади.

6. Агар фоизларга ҳақиқатда ҳуқуқи бўлган тўловчилар ва шахслар ўртасидаги, ёки уларнинг бир-бири ўртасида ва бирор бир шахс ўртасидаги алоҳида муносабатлар оқибатида тегишли бўлган фоизлар суммаси бунга ҳақиқатда ҳуқуқи бўлган тўловчи ва фойдаланишга, фойдаланиш ҳуқуқига ёки улар унинг учун ҳақ тўлаган ахборотга тегишли бўлган тўланган роялти суммаси тўловчи билан бунга ҳақиқатда ҳуқуқи бўлган шахс ўртасида келишилган суммадан ортиқ бўлса, бундай муносабатлар мавжуд бўлмаса, мазкур модда қоидаси фақат охирги тилга олинган суммага нисбатан қўлланилади. Бундай ҳолда мазкур Битимнинг бошқа қоидаларини ҳисобга олган ҳолда ҳар бир Аҳдлашувчи Давлатнинг қонунчилигига мувофиқ тўловнинг ортиқча қисмидан солиқ олиниши давом этади.

1. Бир Аҳдлашувчи Давлатнинг резиденти 6-моддада тилга олинган, бошқа Аҳдлашувчи Давлатдаги кўчмас мулк мусодара қилинишидан оладиган даромадларга ушбу бошқа Аҳдлашувчи Давлатда солиқ солиниши мумкин.

2. Бир Аҳдлашувчи Давлатнинг бошқа Аҳдлашувчи Давлатда эга бўлган корхонаси доимий муассасасининг ишбилармон мулкининг бир қисмини ташкил этувчи кўчадиган мулкни мусодара қилишдан олинган даромадларга, ёки доимий базага тегишли бўлган ҳамда бир Аҳдлашувчи Давлат резиденти мустақил шахсий хизматларни амалга ошириш мақсадида фойдаланадиган бошқа Аҳдлашувчи Давлатдаги кўчадиган мулкдан олинадиган даромадларга, бундай доимий муассасани (алоҳида ёки корхона билан биргаликда) ёки бундай доимий базани мусодара қилишдан олинадиган даромадлар ҳам шу жумлага киради, мана шу бошқа Аҳдлашувчи Давлатда солиқ солиниши мумкин.

3. Аҳдлашувчи Давлат корхонаси томонидан халқаро ташишларда фойдаланиладиган денгиз, дарё ёки ҳаво кемаларини, темир йўл ёки автомобиль транспорти воситаларини ёки ушбу транспорт воситаларидан фойдаланиш билан боғлиқ бўлган кўчадиган мулкни мусодара қилишдан олинадиган даромадларга фақат мана шу Аҳдлашувчи Давлатда солиқ солиниши керак.

4. Мол-мулкни асосан бевосита ёки билвосита Аҳдлашувчи Давлат ҳудудида бўлган кўчмас мулкдан иборат бўлган компаниянинг акционерлик сармояси акцияларини мусодара қилишдан олинадиган даромадларга мана шу Давлатда солиқ солиниши мумкин.

5. Аҳдлашувчи Давлат резиденти ҳисобланган компания сармоясида 15 фоиз миқдорда ва ундан юқори миқдорда тегишлича қатнашган акцияларни 4-бандда эслатиб ўтилганларидан ташқари, мусодара қилишдан олинган даромадларга, ушбу Давлатда солиқ солиниши мумкин.

1. Бир Аҳдлашувчи Давлат резиденти томонидан профессионал хизматлар кўрсатишдан ёки хусусиятидан қатъи назар, бошқа хизматлар кўрсатишдан олинадиган даромаддан фақат мана шу Давлатда солиқ солиниши мумкин. Бироқ бундай даромаддан иккинчи Аҳдлашувчи Давлатда ҳам солиқ олиниши мумкин, бироқ фақат:

а) жисмоний шахс ўз фаолиятини амалга ошириш мақсадлари учун бошқа Аҳдлашувчи Давлатда унинг учун фойдаланиш мумкин бўлган доимий базага эга бўлса, ёки

в) жисмоний шахс исталган 12 ойлик давр давомида умуман олганда 183 кундан ортиқ бўлган давр ёки даврлар мобайнида иккинчи Аҳдлашувчи Давлатда бўлса,

ва фақат бу иккинчи Давлатда кўрсатилган хизматларга тегишли бўлган қисмидан солиқ олинади.

2. «Мустақил шахсий хизматлар» атамаси, жумладан мустақил илмий, адабий, артистлик, таълим ёки ўқитувчилик фаолиятини, шунингдек врачлар, юристлар, муҳандислар, архитекторлар, стоматологлар ва бухгалтерларнинг мустақил шахсий фаолиятини ўз ичига олади.

1. Мазкур Битимнинг 16, 18 ва 19-моддалари қоидаларини ҳисобга олган ҳолда бир Аҳдлашувчи Давлатнинг резиденти томонидан ёлланма иш бўйича олинадиган иш ҳақи ва бошқа шунга ўхшаш тақдирлашлардан, агар бундай иш бошқа Аҳдлашувчи Давлатда амалга оширилмаса, фақат мана шу Давлатда солиқ олинади. Агар ёлланма иш шундай тартибда амалга оширилса, шу муносабат билан олинган тақдирлашга мана шу бошқа давлатда солиқ солиниши мумкин.

2. Бир Аҳдлашувчи Давлат резиденти томонидан иккинчи Аҳдлашувчи Давлатда амалга ошириладиган ёлланма иш учун олинадиган тақдирлашга 1-банд қоидасидан қатъи назар, агар:

а) тақдирлашни олувчи иккинчи Аҳдлашувчи Давлатда исталган 12 ойлик давр давомида жами 183 кундан ошмайдиган давр ёки даврлар мобайнида бўлса; ва

b) тақдирлаш иккинчи Аҳдлашувчи Давлатнинг резиденти ҳисобланмаган ёлловчи ёки ёлловчининг номидан тўланса; ва

с) тақдирлаш бўйича харажатларни ёлловчи иккинчи Давлатда эга бўлган доимий муассаса ёки доимий база тўламаса, фақат биринчи тилга олинган Давлатда солиқ солинади.

3. Мазкур модданинг 1 ва 2-бандлари қоидаларидан қатъи назар, бир Аҳдлашувчи Давлатнинг резиденти томонидан халқаро ташишларда фойдаланиладиган денгиз, дарё ёки ҳаво кемаси бортида, темир йўл ёки автомобиль транспорти воситасида амалга ошириладиган ёлланма иш учун олинадиган иш ҳақи ва бошқа шунга ўхшаш тақдирлашларга мана шу Давлатда солиқ солиниши мумкин.

Бир Аҳдлашувчи Давлатнинг резиденти томонидан директорлар кенгаши ёки компаниянинг шунга ўхшаш органи аъзоси сифатида ёки иккинчи Аҳдлашувчи Давлатнинг резиденти ҳисобланган исталган бошқа юридик шахс томонидан олинадиган гонорарлар ва бошқа шунга ўхшаш тўловлардан мана шу иккинчи Аҳдлашувчи Давлатда солиқ олиниши мумкин.

1. Мазкур Битимнинг 14 ва 15-моддалари қоидаларидан қатъи назар, бир Аҳдлашувчи Давлатнинг резиденти томонидан санъат ходими, театр, кино, радио ёки телевидение артисти, ёки мусиқачи, ёки спортчи сифатида унинг иккинчи Аҳдлашувчи Давлатда амалга ошириладиган шахсий фаолиятидан олинадиган даромадга мана шу иккинчи Давлатда солиқ солиниши мумкин.

2. Санъат ходими ёки спортчи томонидан унинг мана шу сифатида амалга ошириладиган шахсий фаолиятидан олинадиган даромад санъат ходими ёки спортчининг ўзига эмас, балки бошқа шахс ҳисобига ўтказилса, бу даромаддан мазкур Битимнинг 7, 14 ва 15-моддалари қоидаларига қатъи назар, санъат ходими ёки спорт фаолияти амалга ошириладиган Аҳдлашувчи Давлатда солиқ солиниши мумкин.

3. 1 ва 2-бандлар қоидалари Аҳдлашувчи Давлатда санъат ходимлари ёки спортчилар томонидан амалга ошириладиган фаолиятдан олинадиган даромадларга нисбатан, агар ушбу Давлатда бўлиш асосан иккинчи Аҳдлашувчи Давлат, унинг субъектлари ёки маҳаллий ҳокимиятлари томонидан маблағ билан таъминланса, қўлланилмайди. Бундай ҳолда бундай даромаддан ушбу санъат ходими ёки спортчи резиденти ҳисобланган Аҳдлашувчи Давлатдагина солиқ олинади.

1. 19-модданинг 2-банди қоидаларини ҳисобга олган ҳолда илгари ёлланма иш бўйича ишлаганлиги муносабати билан Аҳдлашувчи Давлатнинг резидентига тўланадиган пенсия ва шунга ўхшаш бошқа тақдирлашларга фақат мана шу Давлатда солиқ солинади.

2. «Аннуитетлар» атамаси жисмоний шахсга адекват ва тўлиқ компенсация ўрнига мажбурий тўлов бўйича (кўрсатиладиган хизматлардан фарқ қилган ҳолда) ҳаёти давомида ёки муайян вақт мобайнида вақти-вақти билан тўланадиган белгиланган суммани англатади.

3. Аҳдлашувчи Давлат резиденти фойдасига бериладиган алиментлар ёки бошқа шунга ўхшаш тўловлардан мана шу Аҳдлашувчи Давлатда солиқ олиниши мумкин.

1. Аҳдлашувчи Давлат, унинг ҳудудий бўлинмалари ёки маҳаллий ҳокимиятлари томонидан исталган жисмоний шахсга мана шу Давлат ёки маҳаллий ҳокимиятлар учун амалга ошириладиган хизмат учун тўланадиган тақдирлашдан, пенсиядан бошқа, фақат мана шу Давлатда солиқ олинади;

2. Бироқ, хизмат мана шу иккинчи Давлатда амалга оширилса, ва ана шу Давлатнинг резиденти ҳисобланган жисмоний шахс;

(I) шу Давлатнинг миллий шахси ҳисобланса; ёки

(II) фақат ана шундай хизматни амалга ошириш мақсадида шу Давлатнинг резиденти бўлмай қолса, фақат иккинчи Аҳдлашувчи Давлатда солиқ олинади.

1. Аҳдлашувчи Давлатга бевосита келиш олдидан иккинчи Аҳдлашувчи Давлат резиденти ҳисобланган ёки резиденти бўлган ҳамда биринчи тилга олинган Давлатда мутлақо маълумот олиш ёки практика ўтказиш мақсадида бўлган, талабалар, аспирантлар ёки практикантлар оладиган тўловлардан мана шу биринчи тилга олинган Давлатда солиқ солинмайди.

2. Аҳдлашувчи Давлатга бевосита келишдан олдин иккинчи Аҳдлашувчи Давлатнинг резиденти бўлган ва биринчи тилга олинган Давлатда асосан ўқитувчилик қилиш ёки тадқиқот ўтказиш мақсадида бўлиб турган ўқитувчи ёки илмий ходим томонидан олинадиган тақдирлаш мана шу тахлитда мана шу Давлатда икки йил давомида мана шундай ўқитувчилик қилиш ёки тадқиқот ўтказиш учун тақдирлашга нисбатан солиқдан озод қилинади.

1. Бир Аҳдлашувчи Давлат резидентининг мазкур Битимнинг бошқа моддаларида гапирилмайдиган даромадлари турларидан улар қаерда пайдо бўлишидан қатъи назар, фақат мана шу Аҳдлашувчи Давлатда солиқ олинади.

2. Агар 6-модданинг 2-бандида белгиланган кўчмас мулкдан олинадиган даромадлардан бошқа даромадларга нисбатан, агар бундай даромадларни олувчи бир Аҳдлашувчи Давлат резиденти ҳисобланса, тижорат фаолиятини бошқа Аҳдлашувчи Давлатда унда жойлашган доимий муассаса орқали амалга оширса ва бу бошқа Давлатда у ерда жойлашган доимий базадан мустақил шахсий хизматлар кўрсатса, ва улар муносабати билан даромад олинган ҳуқуқ ёки мол-мулк мана шундай доимий муассаса ёки доимий база билан ҳақиқатда боғлиқ бўлса, 1-банд қоидалари қўлланилмайди. Бундай ҳолда вазиятга боғлиқ равишда 7-модда ёки 14-модда қоидалари қўлланилади.

1. Бир Аҳдлашувчи Давлат резидентига тегишли бўлган ва бошқа Аҳдлашувчи Давлатдаги кўчмас мол-мулкдан ушбу бошқа Давлатда солиқ солиниши мумкин.

2. Бир Аҳдлашувчи Давлат корхонаси бошқа Аҳдлашувчи Давлатда эга бўлган доимий муассаса мол-мулкининг бир қисми (тадбиркорлик) ҳисобланган кўчадиган мол-мулкдан, ёки бошқа Аҳдлашувчи Давлатда Аҳдлашувчи Давлат резиденти мустақил шахсий хизматларни амалга ошириш мақсадларида фойдаланадиган доимий базага тегишли бўлган кўчадиган мол-мулк томонидан берилган кўчадиган мол-мулкдан ушбу иккинчи Давлатда солиқ олиниши мумкин.

3. Аҳдлашувчи Давлат корхонасининг мол-мулки бўлган ва халқаро ташкилотларда фойдаланиладиган денгиз, дарё ва ҳаво кемалари, темир йўл ва автомобиль транспортида, ва бундай транспорт воситаларидан фойдаланиш билан боғлиқ бўлган кўчадиган мол-мулк томонидан берилган мол-мулкдан ушбу Битимнинг 8-моддасида қайд этилганидан фақат мана шу Давлатда солиқ олинади.

4. Аҳдлашувчи Давлат резиденти мол-мулкининг бошқа барча элементларидан фақат ушбу Давлатда солиқ олинади.

1. Агар бир Аҳдлашувчи Давлат резиденти иккинчи Аҳдлашувчи Давлатда даромад олса ва бу даромаддан мазкур Битим қоидаларига мувофиқ иккинчи Аҳдлашувчи Давлатда солиқ олинса, ушбу даромаддан мана шу иккинчи Аҳдлашувчи Давлатда тўланиши керак бўлган солиқ суммаси бундай шахсдан даромад муносабати билан биринчи йилга олинган Давлатда ундириладиган солиқдан чиқариб ташланиши мумкин. Бироқ бундай чиқариб ташлаш кўрсатиб ўтилган даромадга биринчи Давлатнинг солиқ қонунчилиги ва қоидаларига мувофиқ ҳисоблаб чиқилган солиқ суммасидан ошмайди.

2. Мазкур Модданинг 1-банди мақсадлари учун Туркманистон ва Ўзбекистоннинг солиқ солишдан озод қилиш ёки имтиёзлар мавжуд бўлмаган тақдирда ушбу Давлатнинг солиқ сифатида тўланадиган исталган суммани ўз ичига олади, деб ҳисобланади, шу муносабат билан ушбу сумма ушбу Давлатнинг имтиёзли режим ҳақидаги қонунчилиги асосида тўланмайди.

3. Агар Битимнинг исталган қоидасига мувофиқ, бир Аҳдлашувчи Давлат резидентининг олинган даромади ушбу Давлатда солиқдан озод этилган бўлса, ушбу Давлат шунга қарамай ушбу резидент даромадининг қолган қисмининг солиқ суммасини ҳисоблаб чиқишда солиқдан озод этилган даромадни эътиборга олиш керак.

1. Бир Аҳдлашувчи Давлат миллатига мансуб шахслар иккинчи Аҳдлашувчи Давлатда айни бир вазиятда иккинчи Аҳдлашуви Давлат миллатига мансуб шахслар таъсир доирасига туширилган ёки туширилиши мумкин бўлган ҳар қандай солиқ солишга, ёки у билан боғлиқ мажбуриятларга, солиқ солиш ва у билан боғлиқ бошқа ва улардан оғир мажбуриятлар таъсирига туширилмайди.

2. Бир Аҳдлашувчи Давлат корхонаси иккинчи Аҳдлашувчи Давлатда эга бўлган доимий муассасасидан солиқ олиш ушбу иккинчи Аҳдлашувчи Давлатда ушбу иккинчи Давлатнинг мана шундай фаолиятни амалга оширувчи корхонасидан олинадиган солиқдан кам қулай бўлмайди. Ушбу қоида бир Аҳдлашувчи Давлатга иккинчи Аҳдлашувчи Давлат резидентларига бирор-бир шахсий имтиёзлар бериш, уларнинг фуқаролик ёки оилавий аҳволларига асосланиб улар ўз резидентларига берадиган солиқ солишдан озод қилиш ва чегирмалар бериш мажбуриятини юклаш сифатида талқин қилинмаслиги керак.

3. Мазкур Битимнинг 9, 11 ёки 12-моддалари қоидалари қўлланиладиган ҳоллардан ташқари Аҳдлашувчи Давлат корхонаси томонидан иккинчи Аҳдлашувчи Давлат резидентига тўланадиган фоизлар, роялтилар ва бошқа қоплашлар бундай корхонанинг солиқ солинадиган фойдасини аниқлаш мақсадида улар биринчи тилга олинган Давлатнинг резидентига тўланиши мумкин бўлган шартларда ҳисоблаб чиқилиши керак. Шунга ўхшаш, бир Аҳдлашувчи Давлат корхонасининг иккинчи Аҳдлашувчи Давлат резидентига нисбатан исталган қарзи ушбу корхонанинг солиқ солинадиган мол-мулкини аниқлаш мақсадида биринчи тилга олинган Давлат резидентининг қарзи билан бўлгандек шартларда ҳисоблаб чиқилиши керак.

4. Аҳдлашувчи Давлатнинг мол-мулки иккинчи Аҳдлашувчи Давлатнинг бир ёки бир неча резидентларига тўлиқ ёки қисман тегишли бўлган ёки улар томонидан бевосита ёки билвосита назорат қилинадиган корхонаси биринчи тилга олинган Давлатда биринчи тилга олинган Давлатнинг ана шундай корхоналари таъсир доирасига олинадиган исталган солиқ солишларга ёки у билан боғлиқ мажбуриятларга, солиқ солиш ва бу билан боғлиқ бошқа ёки оғирроқ мажбуриятларга тортилмайди.

1. Агар шахс бир ёки иккала Аҳдлашувчи Давлат хатти-ҳаракати унга ушбу Битимга мувофиқ бўлмаган солиқ солинишига олиб келади деб ҳисобланса, у, ушбу Давлатларнинг ички қонунчилигида назарда тутилган ҳимоя воситаларидан қатъи назар, ўз аризасини ўзи резиденти ҳисобланган Аҳдлашувчи Давлатнинг ваколатли органига, ёки, унинг вазияти 24-модданинг 1-банди амал қилиши таъсири доирасига тушса, ўзи миллий шахси ҳисобланган Аҳдлашувчи Давлатга тақдим этиши мумкин. Ариза ушбу Битим қоидаларига мувофиқ бўлмаган солиқ солишга олиб келувчи хатти-ҳаракатлар тўғрисида биринчи билдиришнома берилган пайтдан бошлаб уч йил давомида тақдим этилиши керак.

2. Ваколатли орган, агар у аризани асосли деб ҳисобласа ва агар унинг ўзи қониқарли қарор қабул қила олмаса, Битимга мувофиқ бўлмаган солиқ солишга йўл қўймаслик мақсадида иккинчи Аҳдлашувчи Давлатнинг ваколатли органи билан ўзаро келишув бўйича масалани ҳал этишга интилади. Исталган эришилган аҳдлашув Аҳдлашувчи Давлатлар миллий қонунчиликларида назарда тутилган бирор-бир вақтинчалик чеклашлардан қатъи назар бажарилади.

3. Аҳдлашувчи Давлатларнинг ваколатли органлари Битимни талқин қилиш ёки қўллаш пайтида пайдо бўладиган исталган масалаларни ўзаро келишиб ҳал этишга интиладилар. Улар шунингдек ушбу Битим билан назарда тутилмаган ҳолларда икки томонлама солиқ солишни бартараф этиш мақсадида бир-бирлари билан маслаҳатлашишлари ҳам мумкин.

4. Аҳдлашувчи Давлатларнинг ваколатли органлари олдинги бандларни тушунишда келишувга эришиш мақсадида бир-бирлари билан тўғридан-тўғри алоқага киришишлари мумкин. Агар келишувга эришиш учун оғзаки фикрлашишни ташкил этиш мақсадга мувофиқ бўлса, бундай фикр алмашиш комиссия мажлиси доирасида Аҳдлашувчи Давлатларнинг ваколатли органлари вакилларидан иборат тартибда бўлиб ўтиши мумкин.

1. Аҳдлашувчи Давлатларнинг ваколатли органлари мазкур Битим ёки Аҳдлашувчи Давлатларнинг ички қонунчилиги қоидаларини қўллаш учун Битим солиқ солиш ушбу қонунчилик бўйича мазкур Битимга зид бўлмаган даражада жорий этиладиган солиқларга тегишли ахборотни ўзаро айирбошлайдилар. Аҳдлашувчи Давлат томонидан олинган исталган ахборот махфий ҳисобланади ҳамда фақат ушбу Битим жорий этиладиган солиқларга нисбатан баҳолаш, ундириш, мажбурий ундириш, суд таъқиби ёки аппеляцияни кўриб чиқиш билан боғлиқ бўлган шахслар ёки органлар, шу жумладан судлар ва маъмурий органлар томонидан маълум қилиниши мумкин. Бундай шахслар ёки органлар ушбу ахборотдан фақат мана шу мақсадларда фойдаланадилар. Бу ахборот очиқ суд мажлиси давомида ёки суд қарори қабул қилингач ошкор этилиши мумкин.

2. Ҳеч бир ҳолда мазкур модданинг 1-банди қоидаси Аҳдлашувчи Давлатлардан исталган бирининг ваколатли органига:

а) Аҳдлашувчи Давлатларнинг қонунчилигига ёки маъмурий амалиётига зид бўлган маъмурий чоралар кўриш;

в) қонунчиликка кўра ёки Аҳдлашувчи Томонлардан бирининг оддий маъмурий амалиёти давомида олиниши мумкин бўлмаган ахборотни бериш;

с) бирор-бир савдо, тадбиркорлик, саноат, тижорат ёки профессионал сирни ёки савдо жараёнини ошкор этиши мумкин бўлган ахборотни ёки ошкор этилиши давлат манфаатларига зид бўлиши мумкин бўлган ахборотни бериш мажбуриятини юклаш сифатида талқин этилмайди.

1. Аҳдлашувчи Давлатларнинг ваколати органлари солиқ йиғишда бир-бирларига ёрдам берадилар, бунда ушбу қоида мазкур Битимнинг моддаси қоидалари билан чекланмайди.

2. Ушбу моддадаги ҳеч бир нарса Аҳдлашувчи Давлатга унинг ўз солиқларини йиғишда фойдаланадиганлардан фарқ қиладиган ёки унинг одатдаги амалиётига зид бўлган маъмурий тусдаги чораларни қўллаш мажбуриятини юклаш сифатида талқин қилинмайди.

3. Ушбу моддани қўллашга доир амалий хатти-ҳаракатлар Ўзбекистон Республикаси Ҳукумати билан Туркманистон Ҳукумати ўртасидаги солиқ қонунчилигига риоя қилиш масалалари бўйича ҳамкорлик қилиш ва ўзаро ёрдам бериш тўғрисидаги Битим қоидалари билан белгиланади.

Мазкур Битимнинг ҳеч бир қоидаси халқаро ҳуқуқнинг умумий нормалари билан ёки махсус битимлар қоидаларига мувофиқ дипломатик ваколатхоналар ходимлари ва консуллик муассасалари ходимларига берилган солиқ имтиёзларига дахл қилмайди.

Мазкур Битим ратификация қилиниши ва ратификация ерликлари айирбошланган пайтдан бошлаб кучга кириши керак, бунда унинг қоидалари:

а) Битим кучга кирган ойдан кейинги учинчи ойнинг биринчи ёки биринчи кунидан кейин тўланадиган ёки ҳисобланадиган суммадан манбадан ундириладиган солиқларга нисбатан уч ойдан кейин;

в) бошқа солиқларга нисбатан — Битим кучга кирадиган йилдан кейинги календарь йилнинг биринчи январидан ёки биринчи январдан кейин бошланадиган солиқ солинадиган даврлар учун уч ойдан кейин; ва

с) 26 ва 27-моддалар мақсадлари учун Битим кучга кирган кундан бошлаб амал қилади.

Мазкур Битим Аҳдлашувчи Давлатлар унинг амал қилишини тўхтатмагунларига қадар кучда бўлади. Ҳар бир Аҳдлашувчи Давлат Битим кучга кирган санадан бошлаб 5 йиллик муддат тамом бўлгандан кейин бошланадиган исталган календарь йил тамом бўлишидан камида олти ой олдин унинг амал қилишини тўхтатиш тўғрисида дипломатик йўллар орқали билдиришнома бериш йўли билан Битимнинг амал қилишини тўхтатиши мумкин. Бундай ҳолда Битим:

а) билдиришнома берилган йилдан кейинги календарь йилнинг биринчи январида ёки биринчи январидан кейин тўланадиган ёки ҳисобланган суммадан манбадан ундириладиган солиқларга нисбатан биринчи январдан бошлаб;

в) билдиришнома берилган йилдан кейинги календарь йилнинг биринчи январидан ёки биринчи январидан кейин бошланадиган солиқ даврлари учун — даромадлар ёки мол-мулкка бошқа солиқларга нисбатан биринчи январдан бошлаб; ва

с) 26 ва 27-моддалар мақсадлари учун — билдиришнома берилган йилдан кейинги календарь йилнинг биринчи январидан кейин биринчи январдан бошлаб амал қилишини тўхтатади.

1996 йил 16 январда, Чоржўй шаҳрида, ҳар бири ўзбек, туркман ва рус тилларида бўлган икки нусхада тузилди, барча матнлар бир кучга эгадир.

Мазкур Битимни талқин қилиш учун рус тилидаги матндан фойдаланилади.