Ўзбекистон Республикаси Ҳукумати билан Болгария Республикаси Ҳукумати, бундан кейин «Томонлар» деб аталувчилар,

Ўзбекистон Республикаси билан Болгария Республикаси орасидаги маданий алоқалар ва дўстона муносабатлар анъанасини эътиборга олиб,

иккала мамлакатнинг маданият ва санъат соҳасида дўстона алоқалар ва ҳамкорликни янада ривожлантиришга ҳамда мустаҳкамлашга интилишини ифодалаб,

маданият ва санъат соҳасидаги алоқалар иккала мамлакат халқларининг туб манфаатларига хизмат қилишига ҳамда дўстлик алоқалари ва ўзаро манфаатли ҳамкорликни янада тараққий эттиришига инониб,

қуйидагилар тўғрисида келишиб олдилар:

Томонлар Ўзбекистон ва Болгария халқларининг кўп асрлик маданий ва маънавий алоқаларига таянган ҳолда улар орасида маданият соҳасидаги ҳамкорликни тараққий эттиришга бундан кейин ҳам кўмаклашадилар.

Томонларнинг ҳар бири ўз давлатининг фуқаролари бошқа Томон маданияти ютуқларидан кенг баҳраманд бўлишини таъминлайди.

Томонлар давлат маданият муассасалари ва жамоат ташкилотлари орасида бевосита ҳамкорлик ҳамда тўғридан-тўғри алоқалар йўлга қўйилиши, кенгайиши ва теранлашишига, манфаатдор идоралар ўртасида тажриба алмашинишига кўмаклашадилар.

Томонлар иккала давлатнинг миллий қонунларига ҳамда Томонлар улар бўйича ўз зиммаларига халқаро мажбуриятлар олган халқаро битимларга ва маданий ҳамкорликнинг икки томонлама дастур ҳамда лойиҳаларига асосан бир республикадан иккинчисига профессионал ва ҳаваскор бадиий жамоаларни, гуруҳ, ансамбл, алоҳида ижрочиларни таклиф қилишга кўмаклашишга тайёр эканликларини изҳор қиладилар.

Томонлар ижрочилик санъати соҳасида фестиваллар, кўриклар, жамоа ва солистларнинг гастролларини ташкил этишда, ўзбек ҳамда болгар муаллифларининг мусиқавий ва драматик асарларини саҳналаштиришида бир-бирларига кўмаклашадилар.

Томонлар театр, эстрада, цирк ва кино санъати, тарихий-маданий обидаларни муҳофаза қилиш, халқ ҳаваскорлик ижоди, халқ ҳунармандчилиги соҳаларида ҳамкорлик қилиш учун қулай шарт-шароитларни яратиш мажбуриятини оладилар.

Томонлар маданий тадбирларни ташкил этадилар ва ўтказадилар, давлат ва жамоат бирлашмалари ўртасида маданият ва санъат соҳасидаги ҳамкорликни қўллаб-қувватлаш ва мувофиқлаштиришга йўналтирилган дастурлар, ишчи лойиҳаларини ишлаб чиқадилар ва амалга оширадилар.

Томонлар икки томонлама шартномалар асосида алмашишда иштирок этувчи кутубхоналар ўртасида китоб, каталог, бошқа ахборот материаллари, шунингдек кутубхоначилик иши соҳасидаги мутахассислар алмашиш орқали кутубхоначилик ишида ҳамкорлик қиладилар.

Томонлар маданият ва санъат ўқув юртларининг ўқитувчиларини, мутахассисларни, шунингдек санъатшунослик илмий-тадқиқот институтларининг докторантларини, олимларини алмашиб турадилар.

Томонлар музей ишлари соҳасида ҳамкорликни амалга оширадилар, давлат тўпламларида, коллекция ва фондларида сақланаётган тарихий-маданий қадриятлар тўғрисида иложи борича тўлиқ маълумот олишни таъминлайдилар. Томонлар музей иши соҳасидаги мутахассисларни алмашишни рағбатлантирадилар.

Томонлар ўз миллий қонунларининг, улардан бири маданий меросни ҳимоя қилишни ўз зиммасига олган халқаро шартномаларнинг ва бу соҳада халқаро ҳуқуқнинг умум эътироф этилган халқаро ҳуқуқ тамойилларига мувофиқ, маданият обидаларини консервация қилиш ва таъмирлаш соҳасида биргаликдаги фаолият юзасидан лойиҳаларни амалга оширишга кўмаклашадилар.

Томонлар декоратив-амалий санъат соҳасида кўргазмалар ташкил этиш ва ҳамкорлик қилишни рағбатлантирадилар.

Томонлар маданият соҳасидаги халқаро ҳукуматлараро ва ноҳукумат ташкилотлари доирасида халқаро ҳамкорликни амалга оширадилар.

Ушбу Битимни бажариш мақсадида Ўзбекистон Республикасининг Маданият ишлари вазирлиги билан Болгария Республикасининг Маданият вазирлиги ўртасида ҳамкорликнинг икки томонлама дастур ва ишчи режалари ишлаб чиқилади ва тайёрланади. Уларда муддатлар, алоқалар учун шахсларни танлаш механизми ва уларни амалга ошириш учун лозим бўлган молиявий шарт-шароитлар кўрсатилади.

Ушбу Битим имзоланган кундан бошлаб кучга киради ва беш йил давомида амал қилади.

Томонлардан ҳеч бири тегишли муддат тугашидан камида олти ой илгари унинг амал қилишини тўхтатиш нияти тўғрисида бошқа Томонни ёзма равишда хабардор қилмаса, ушбу Битимнинг амал қилиши келгуси беш йиллик даврларга ўз-ўзидан узайтирилади.

Агар Томонлар бошқача йўсинда келишиб олмасалар, ушбу Битимнинг бекор қилиниши Битим амал қилаётган даврда белгиланган дастур ва лойиҳаларнинг бажарилишига таъсир қилмайди.

София шаҳрида, 1998 йил 24 июнда икки нусхада, ҳар бири ўзбек, болгар ва рус тилларида тузилди, барча матнлар бир хил кучга эга.

Талқин қилишда келишмовчиликлар юзага келган ҳолда рус тилидаги матн асос қилиб олинади.