Ўзбекистон Республикаси Ҳукумати ва Италия Республикаси Ҳукумати (бундан кейин Аҳдлашувчи «Томонлар» деб аталадилар),

туризмнинг ҳам иқтисодий ривожланиш, ҳам уларнинг халқлари бир-бирини янада яхшироқ тушуниши учун муҳим ролини англаб,

туризм соҳасидаги фаол ҳамкорликни рағбатлантириш зарурлигига ишониб ва ўз потенциал имкониятларини эътиборга олиб,

иккала Томоннинг туризм соҳасидаги ҳамкорликдан манфаатдорлигини эътиборга олиб,

иккала Томоннинг туризм соҳасида узоқ ривожланишни кафолатлаш учун табиий ва маданий ресурсларни сақлаб қолиш мақсадида ҳаракат қилиш истагини ҳисобга олиб,

қуйидагилар тўғрисида аҳдлашиб олдилар:

Аҳдлашувчи Томонлар икки халқ тарихи ва маданиятини ўзаро ўрганишни яхшилаш мақсадида иккала мамлакат ўртасида туризм соҳасида муносабатларни ривожлантириш ва мустаҳкамлашга алоҳида эътибор берадилар.

Аҳдлашувчи Томонлар туризм соҳасини ривожлантиришга кўмаклашадиган ҳамкорликни мустаҳкамлашга интиладилар. Шу мақсадда улар туризмни ривожлантириш ва туризм бозорини ўрганиш, шунингдек мавжуд имкониятлардан фойдаланишни яхшилаш ва Томонларнинг амал қилаётган қонунларига мувофиқ туризм секторида сармояларни ривожлантириш бўйича ўқитиш ва тадқиқотлар ўтказиш соҳасидаги ҳамкорлик учун экспертлар билан алмашишни рағбатлантирадилар.

Аҳдлашувчи Томонлар қуйидагиларни рағбатлантирадилар:

а) туризмни ривожлантиришга кўмаклашувчи биргаликдаги ҳаракатлар учун тажриба алмашиш ва имкониятларни ўрганиш мақсадида туризмни ривожлантириш соҳасида технологик биргаликдаги ҳаракатни амалга ошириш;

b) нашрлар ва туристик реклама материаллари билан алмашиш;

с) иккала мамлакатда туристик ваколатхоналарни очиш (уларнинг ходимлари кириш ва бўлиш тартиби тўғрисидаги миллий қонунларга мувофиқ тайинланади);

d) туристик мақсадларда тарихий биноларни қўриқлаш бўйича ҳамкорликни ривожлантириш;

е) туризмга тааллуқли қонунлар соҳасида ҳамкорлик.

Аҳдлашувчи Томонлар касб бўйича ўқитиш соҳасидаги ҳамкорликни рағбатлантирадилар ва туризм соҳасида ўқитиш дастурлари тўғрисидаги ахборот алмашувига кўмаклашадилар. Улар ваколатли маъмурлар иштирокида туризм саноатини бошқариш соҳасида стажировка ўтувчи экспертларга ва бу соҳадаги бошқа экспертларга стипендиялар бериш учун имкониятларни излайдилар.

Аҳдлашувчи Томонлар ўқитиш масалалари ва унинг натижалари юзасидан ахборот алмашиш йўли билан туристик ва меҳмонхона хўжалиги бўйича ўзаро қизиқиш уйғотувчи туризм соҳасидаги ўқитиш дастурларини яратишга интиладилар.

Аҳдлашувчи Томонлар тегишли органлар ўртасида, шунингдек туризм соҳасида фаолият кўрсатувчи халқаро ташкилотлар доирасида ҳамкорликни янада ривожлантириш учун ҳаракат қиладилар ва бу соҳадаги тегишли ютуқлар тўғрисида ахборот алмашишни амалга оширадилар.

Ушбу Битимни бажариш мақсадида Аҳдлашувчи Томонлар, зарурият бўлган ҳолда, икки томонлама маслаҳатлашишлар ўтказишга кўмаклашадилар.

Аҳдлашувчи Томонлар Битимнинг кучга кириши учун миллий қонунлар талаб қиладиган процедураларнинг бажарилиши тўғрисида бир-бирларини дипломатик каналлар орқали хабардор қиладилар.

Ушбу Битим охирги хабарнома олинган вақтдан кучга киради.

Ушбу Битим беш йил мобайнида амал қилади ва Аҳдлашувчи Томонлардан бири Битим амал қилишининг муддати тугашидан уч ой илгари дипломатик каналлар орқали уни ёзма равишда денонсация қилгунига қадар ҳар йили ўз-ўзидан узайтирилади.

Ушбу Битимнинг денонсация қилиниши, агар Томонлар бошқа келишувга эришмасалар, Битимнинг амал қилиш даврида аниқланган дастур ва лойиҳаларнинг бажарилишига таъсир қилмайди.

Бунинг тасдиғи сифатида, қуйида имзо чекувчилар, ҳукуматларининг тегишли ваколатини олган вакиллари, ушбу Битимни Тошкент шаҳрида 1997 йил 3 майда икки нусхада, ҳар бири ўзбек, итальян ва инглиз тилларида имзоладилар, барча матнлар бир хил кучга эга. Талқин этишда келишмовчиликлар юзага келган ҳолда инглиз тилидаги матн устувор бўлади.