Ўзбекистон Республикаси Ҳукумати ва Қирғизистон Республикаси Ҳукумати, бундан кейин «Томонлар» деб аталадилар,

иккала давлат ўртасидаги тарихан таркиб топган муносабатларни эътиборга олиб,

савдо-иқтисодий ва илмий-техникавий ҳамкорликни ривожлантириш истагида,

саноат мулкини самарали ва монанд муҳофаза қилиш бундай ҳамкорликни ривожлантиришнинг зарурий шарти эканлигини эътироф этиб,

шу мақсадда саноат мулки муаллифлари ва эгаларининг ҳуқуқларини муҳофаза қилиш учун ўзаро кулай шарт-шароит яратиш зарурлигини англаган ҳолда,

қуйидагилар ҳақида келишиб олдилар:

Томонлар ихтиролар, саноат намуналари, маҳсулот белгилари ва бошқа саноат мулки объектларига бўлган ҳуқуқларни муҳофаза қилиш ҳамда улардан фойдаланиш соҳасидаги ҳамкорликни ушбу Битимга ва бошқа ўзлари иштирокчи бўлган ёки бўладиган халқаро шартномаларга мувофиқ ўзаро манфаатдорлик ҳамда тенглик асосида амалга оширадилар ва ривожлантирадилар.

Томонларнинг ҳамкорлиги:

саноат мулки объектларига бўлган ҳуқуқларни муҳофаза қилиш ва улардан фойдаланиш билан боғлиқ масалаларни тартибга солишга;

саноат мулкини муҳофаза қилиш соҳасидаги миллий ҳуқуқий ҳужжатларни мувофиқлаштиришга;

Ўзбекистон Республикаси талабнома берувчилари учун Қирғизистон Республикасида ва Қирғизистон Республикаси талабнома берувчилари учун Ўзбекистон Республикасида муҳофаза ҳужжатлари бериш сўралган талабномаларни топшириш ва уларни кўриб чиқиш тартибини ўзаро соддалаштиришга;

саноат мулкини муҳофаза қилиш соҳасида ахборот, норматив ва бошқа ҳужжатлар, шунингдек тажриба ва мутахассислар алмашишга йўналтирилади.

Саноат мулкини муҳофаза қилиш соҳасида бир давлатнинг жисмоний ва юридик шахслари иккинчи давлат ҳудудида мазкур иккинчи давлатнинг қонунчилиги билан унинг ўз жисмоний ва юридик шахслари учун ҳозирги вақтда берилган ёки кейинчалик бериладиган ҳуқуқ ва имтиёзлардан бир хил асослар ҳамда ҳажмларда ҳуқуқий муҳофаза воситаларидан фойдаланадилар.

Бунда ушбу Битим билан тартибга солинмаган масалалар бўйича Томонлар 1967 йил 14 июлда Стокгольмда қайта кўриб чиқилган Саноат мулкини муҳофаза қилиш тўғрисидаги Париж Конвенцияси қоидаларини қўллайдилар.

Томонлардан ҳар бири қуйидагиларни таъминловчи зарур чора-тадбирларни амалга оширадилар:

саноат мулки объектлари учун илгари берилган СССР муҳофаза ҳужжатларининг ўз ҳудудида амал қилишини эътироф этиш;

СССР муаллифлик гувоҳномалари ва гувоҳномалари билан муҳофаза қилинган ихтиролардан ва саноат намуналаридан фойдаланганлик учун мазкур фойдаланиш содир бўлган давлатнинг ҳуқуқий ҳужжатларига мувофиқ муаллифларга мукофот пулини тўлаш;

саноат намуналари учун СССР ихтиролари ва гувоҳномаларига СССР муаллифлик гувоҳномаларини қолган амалда бўлиш муддати учун миллий патентларга алмаштириш;

СССР муҳофаза ҳужжатлари бўйича саноат мулки объектларига берилган миллий муҳофаза ҳужжатларининг ҳар иккала давлатлар ҳудудида амалда бўлишини муҳофаза қилинаётган объектнинг ушбу объектга талабнома берилган санада амалда бўлган қонунчиликда назарда тутилган муҳофазага лаёқатлилик шартларига номувофиқлиги сабабли тўхтатиш;

ҳар иккала давлатларнинг мурожаат қилувчиларига ва уларнинг патент бўйича вакилларига миллий муҳофаза ҳужжатлари ҳамда СССР муҳофаза ҳужжатларини миллий муҳофаза ҳужжатларига алмаштириш бўйича тавсияномалар бериш ҳуқуқини бериш.

Томонлар эътироф этадиларки, Ўзбекистон Республикаси ва Қирғизистон Республикасининг ҳар қандай жисмоний ёки юридик шахси лицензия шартномаси тузмасдан ихтиро ёки саноат намунасидан фойдаланиш ҳуқуқини, башарти ушбу ихтиро ёки саноат намунасидан фойдаланиш бошқа шахслар томонидан СССР муаллифлик гувоҳномаси бериш учун талабнома илгари берилган ихтиро ёки саноат намунасига миллий патент бериш сўралган илтимоснома топширилган санадан олдин қонуний равишда бошланган бўлса, сақлаб қолади.

Бунда муаллифларга мукофот пулини тўлаш кўрсатилган ихтиро ёки саноат намунаси қайси давлат ҳудудида фойдаланилаётган бўлса ўша давлатнинг қонунчилигида белгиланган тартибда амалга оширилади.

Муҳофаза ҳужжатларини бериш сўралган талабномаларни топшириш, муҳофаза ҳужжатларини қабул қилиб олиш ва уларни ўз кучида сақлаб туришда иккала давлатнинг патент бўйича вакиллари ўзаро ҳамжиҳатлилик принципи асосида бевосита шу давлатларнинг патент идораси билан иш олиб боришлари мумкин бўлиб, бунда фақат миллий талабнома берувчиларнинг манфаатларини ифодалайдилар. Бир давлатнинг миллий талабнома берувчиларига, шунингдек унинг ҳуқуқий ҳужжатлари билан белгиланган тартибда ўзаро ҳамжиҳатлилик принципи асосида муҳофаза ҳужжатларини олиш ва уларни ўз кучида сақлаб туриш борасида бевосита бошқа давлатнинг патент идораси билан иш олиб бориш ҳуқуқи берилади.

Бир давлатнинг мурожаат қилувчиси томонидан бошқа давлатнинг патент бўйича вакилига патент олиш учун бериладиган талабномалари миллий устуворлик тўғрисида маълумотлар мавжуд бўлган тақдирда қабул қилинади.

Томонлар бошқа Томоннинг мурожаат қилувчиси томонидан талабномалар беришда мурожаат қилувчининг саноат мулки объектларига чет мамлакат патенти бериш тартибига доир миллий қонунчилик талабларига амал қилишни тасдиқловчи ҳужжат тақдим қилинишини эътироф этадилар.

Талабномалар топширганлик, муҳофаза ҳужжатлари берганлик, уларни ўз кучида сақлаб турганлик ва саноат мулкини муҳофаза қилиш ва ундан фойдаланиш билан боғлиқ бошқа юридик жиҳатдан аҳамиятли ишларни бажарганлик учун пошлиналар тўлаш, шунингдек бошқа хизматлар кўрсатганлик учун тўлов Ўзбекистон Республикаси ва Қирғизистон Республикасининг қонунчилигида назарда тутилган валютада, миқдорларда ва тартибда амалга оширилади.

Томонлар иқтисодий, савдо, саноат, фан ва техника соҳасида ҳамкорлик тўғрисидаги икки томонлама битимларга саноат мулки объектларининг муҳофаза қилинишини таъминлашга доир қоидаларни киритиш мажбуриятини зиммаларига оладилар.

Томонларнинг ушбу Битимни амалга ошириш давомида бир-бирларига йўллайдиган барча ҳужжатлари рус тилида тақдим этилади.

Куйидагилар Томонларнинг ваколатли органлари ҳисобланадилар:

Ўзбекистон Республикаси учун — Ўзбекистон Республикаси Фан ва техника давлат қўмитасининг Давлат патент идораси;

Қирғизистон Республикаси учун — Қирғизистон Республикаси Ҳукумати ҳузуридаги интеллектуал мулк Давлат агентлиги.

Патент идораларининг ҳамкорлик қилиш тартиби ва шартлари улар ўртасидаги махсус битимлар билан аниқланади.

Ушбу Битимдан келиб чиқадиган ёки унинг бажарилиши билан боғлиқ масалалар юзасидан келишмовчиликлар пайдо бўлган тақдирда Томонларнинг вакиллари ушбу келишмовчиликларни бартараф этиш учун тегишли маслаҳатлашувлар ўтказадилар.

Ушбу Битим Томонларнинг бошқа давлатлар билан саноат мулкини муҳофаза қилиш соҳасида икки томонлама ва кўп томонлама ҳамкорликда иштирок этишига тўсқинлик қилмайди.

Ушбу Битимга Томонларнинг ўзаро келишувига биноан ўзгартиришлар ва қўшимчалар киритилиши мумкин.

Ушбу Битим имзоланган санадан бошлаб кучга киради ва беш йил мобайнида амал қилади. Агар Томонлардан бири унинг навбатдаги амал қилиш даври тугашидан камида олти ой олдин ушбу Битимнинг амал қилишини тўхтатиш бўйича ўз нияти тўғрисида иккинчи Томонни ёзма равишда хабардор қилмаса, унинг амал қилиши кейинги беш йиллик даврларга ўз-ўзидан узаяверади.

Ушбу Битим амалда бўлишининг тўхтатилиши иккала давлат жисмоний ва юридик шахсларига ушбу Битимнинг амалда бўлиш даврида берилган талабномаларга биноан берилган ёки берилиши мумкин бўлган муҳофаза ҳужжатларининг амал қилишига таъсир этмайди.

1996 йил 24 декабрда Тошкент шаҳрида икки нусхада, ҳар бири ўзбек, қирғиз ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилишда рус тилидаги матндан фойдаланилади.