Ўзбекистон Республикаси Ҳукумати ва Молдова Республикаси Ҳукумати, бундан кейин Томонлар деб аталувчилар,

ишлаб чиқариш, инвестиция, тижорат ва молия-кредит фаолияти соҳасида ўзаро алоқаларнинг замонавий шаклларидан фойдаланишга муҳим аҳамият бериб,

иккала давлат манфаатлари йўлида иқтисодий ҳамкорликни янада чуқурлаштириш ва ривожлантириш зарурлигидан келиб чиқиб,

саноат ишлаб чиқаришини барқарорлаштириш ва юксалтириш учун зарур шароитларни яратиш, инвестиция соҳасидаги фаолликни ошириш ҳамда илмий-техника тараққиёти ютуқларидан самаралироқ фойдаланиш мақсадида,

иккала давлат корхоналари ва ташкилотлари ўртасидаги хўжалик, илмий-техник ҳамда ишлаб чиқариш-технологик алоқаларни сақлаш ва уларни янги асосларда амалга ошириш мақсадида,

қуйидагилар тўғрисида келишиб олдилар:

Томонлар Ўзбекистон Республикаси ва Молдова Республикаси хўжалик субъектлари базасида молия-саноат гуруҳларини ташкил этишда кўмаклашадилар.

Томонлар молия-саноат гуруҳи деганда ишлаб чиқариш фаолиятини биргаликда юритиш, илмий-технологик ва кооперация алоқаларини қарор топтириш ва ривожлантириш, фойда олиш, ижтимоий ва иқтисодий дастурлар ҳамда лойиҳаларни ишлаб чиқиш ва амалга ошириш мақсадида иштирокчиларнинг сармояларини бирлаштириш асосида ташкил этилган корхоналар, муассасалар, ташкилотлар, кредит-молия муассасалари ва инвестиция муассасалари гуруҳини тушунадилар.

Томонлар молия-саноат гуруҳлари хўжалик субъектлари томонидан муассисларнинг ўзаро келишуви бўйича ихтиёрийлик тартибида, иккала давлатдаги монополияга қарши қонунчилик талабларига мувофиқ, шунингдек ҳукуматлараро битимлар асосида ташкил этилишига розилик билдирдилар.

Томонлар молия-саноат гуруҳларини ихтиёрий тартибда шакллантириш қуйидаги йўллар билан амалга оширилишини белгилайдилар:

гуруҳлар қатнашчилари томонидан акционерлик жамияти таъсис этиш;

гуруҳлар қатнашчилари томонидан гуруҳ таркибига кирувчи корхоналар ва молия-кредит муассасаларининг ўзларига тегишли бўлган акциялар пакетларини гуруҳ қатнашчиларидан бирига (бош корхонага) ишончли бошқариш учун бериш;

гуруҳ қатнашчиларидан бири томонидан бошқа корхоналар, шунингдек гуруҳ қатнашчиси бўлаётган муассаса ва ташкилотлар акциялар пакетларини сотиб олиш.

Томонлар молия-саноат гуруҳларини ихтиёрий тартибда ташкил этишда ҳудудида гуруҳлар рўйхатга олинадиган давлатнинг амалдаги миллий қонунчилигида белгиланган чеклашларга риоя қиладилар.

Томонлар ҳукуматлараро битимлар асосида молия-саноат гуруҳларини ташкил этишда гуруҳлар рўйхатга олинадиган давлат ҳудудида давлатнинг ваколатли ташкилотлари шу гуруҳни ташкил этиш лойиҳасини экспертизадан ўтказишни ушбу давлатнинг миллий қонунчилигида белгиланган тартибда ва муддатларда амалга оширишидан келиб чиқадилар.

Томонлар молия-саноат гуруҳини ташкил этиш лойиҳасини тайёрлаш ва уни экспертизадан ўтказиш мақсадида гуруҳ қатнашчилари — хўжалик субъектлари тўғрисидаги зарур ахборотни олишда кўмаклашадилар.

Молия-саноат гуруҳини ҳукуматлараро битим асосида ташкил этишда ўзбекистонлик ва молдовалик қатнашчилар таркиби, қатнашиш шакллари, сармояларни бирлаштириш механизмларини Томонлардан ҳар бири ўз давлатининг миллий қонунчилигига мувофиқ белгилайди.

Томонлар молия-саноат гуруҳларини рўйхатдан ўтказиш таъсис ҳужжатларига мувофиқ ҳудудида гуруҳнинг бош корхонаси жойлашадиган давлат ваколатли органлари томонидан шу давлат қонунчилигида белгиланган тартибда амалга оширилишига келишиб олдилар.

Томонлар молия-саноат гуруҳларини ташкил этишни ва уларнинг фаолиятини рағбатлантириш мақсадида, зарурат бўлганда, ўз давлатларининг миллий қонунчилигига мувофиқ давлат кафолатлари ва имтиёзлар берадилар.

Томонлар пахтани қайта ишлаш, газ қазиб чиқариш, кимё, енгил саноат, мебель, электртехника, электрон ва нефтни қайта ишлаш саноати, энергетика, аграр сектор учун машинасозлик, транспорт ва алоқа, агросаноат комплекси, илмий ва лойиҳа-қидирув ишларида, табиатдан фойдаланиш ва атроф муҳитни муҳофаза қилиш соҳасида ҳамкорлик қилишни молия-саноат гуруҳларини ташкил этишнинг устувор йўналишлари деб ҳисоблайдилар.

Томонлар тегишли органларга Томонлардан ҳар бирининг давлати ҳудудида молия-саноат гуруҳларини ташкил этиш масалаларига оид қабул қилинаётган норматив ҳужжатлар тўғрисида мунтазам ахборот алмашишни амалга оширишни топширадилар.

Томонларнинг ўзаро розиликларига кўра ушбу Битимга ўзгартиришлар ва қўшимчалар киритилиши мумкин.

Ушбу Битим Томонлар унинг кучга кириши учун зарур бўлган ички давлат тартиб-қоидаларини бажарганликлари тўғрисидаги охирги ёзма билдиришнома санасидан бошлаб кучга киради.

Ушбу Битим беш йил муддатга тузилади. Агар Томонлардан бири уни бекор қилиш тўғрисидаги ўз ниятидан бошқа Томонни ушбу Битимнинг навбатдаги амалда бўлиш муддати туташидан кечи билан ўн икки ой олдин ёзма равишда хабардор қилмаса Битимнинг амалда бўлиши кейинги беш йиллик муддатларга ўз-ўзидан узаяверади.

Тошкент шаҳрида 1997 йил 24 майда икки нусхада, ҳар бири ўзбек, молдован ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилиш ёки қўллаш бўйича келишмовчиликлар юзага келган тақдирда Томонлар рус тилидаги матнни асос сифатида оладилар.