Ўзбекистон Республикаси Ҳукумати ва Қозоғистон Республикаси Ҳукумати, бундан кейин Томонлар деб аталувчилар,

иккала давлат ўртасидаги тарихан таркиб топган муносабатларни эътиборга олиб,

барқарор ва ишончли муносабатларни ривожлантириш учун саноат мулки объектларини ҳуқуқий муҳофаза қилиш зарурлигини англаб,

саноат мулки объектларида муҳофаза ҳужжатлари муаллифлари ва эгаларининг ҳуқуқларини муҳофаза қилиш ва фойдаланиш учун қулай шарт-шароитлар яратишнинг мақсадга мувофиқлигини тушуниб,

саноат мулкини муҳофаза қилиш соҳасида патент интеграциясининг фойдалилигини ва келишилган сиёсат ўтказишнинг мақсадга мувофиқлигини эътироф этиб,

қуйидагилар тўғрисида келишиб олдилар:

Томонлар ихтиролар, саноат намуналари, маҳсулот белгилари ва бошқа саноат мулки объектларига бўлган ҳуқуқларни муҳофаза қилиш ҳамда улардан фойдаланиш соҳасидаги ҳамкорликни ушбу Битимга ва бошқа ўзлари иштирокчи бўлган ёки бўладиган халқаро шартномаларга мувофиқ ўзаро манфаатдорлик ҳамда тенглик асосида амалга оширадилар ва ривожлантирадилар.

Томонларнинг ҳамкорлиги:

саноат мулки объектларига бўлган ҳуқуқларни муҳофаза қилиш ва улардан фойдаланиш билан боғлиқ масалаларни тартибга солишга;

саноат мулкини муҳофаза қилиш соҳасидаги миллий ҳуқуқий ҳужжатларни мувофиқлаштиришга;

Ўзбекистон Республикаси талабнома берувчилари учун Қозоғистон Республикасида ва Қозоғистон Республикаси талабнома берувчилари учун Ўзбекистон Республикасида муҳофаза ҳужжатлари бериш сўралган талабномаларни топшириш ва уларни кўриб чиқиш тартибини ўзаро соддалаштиришга;

саноат мулкини муҳофаза қилиш соҳасида ахборот, норматив ва бошқа ҳужжатлар, шунингдек, ўзаро тажриба ва мутахассислар алмашишга йўналтирилади.

Саноат мулки муҳофаза қилиш соҳасида бир давлатнинг жисмоний ва юридик шахслари иккинчи давлат ҳудудида ушбу иккинчи давлатнинг ҳуқуқий ҳужжатлари билан унинг ўз жисмоний ва юридик шахслари учун ҳозирги вақтда берилган ёки кейинчалик бериладиган ҳуқуқ ва имтиёзлардан ўз жисмоний ва юридик шахслари каби бир хил асослар ҳамда ҳажмларда ҳуқуқий муҳофаза воситаларидан фойдаланадилар.

Бунда ушбу Битим билан тартибга солинмаган масалалар бўйича Томонлар 1967 йил 14 июлда Стокгольмда қайта кўриб чиқилган Саноат мулкини муҳофаза қилиш тўғрисидаги Париж Конвенцияси қоидаларини кўллайдилар.

Томонлардан ҳар бири қуйидагиларни таъминловчи зарур чора-тадбирларни амалга оширадилар:

саноат мулки объектлари учун илгари берилган собиқ СССР муҳофаза ҳужжатларининг ўз ҳудудида ҳақиқийлигини эътироф этиш;

саноат намуналари учун собиқ СССР ихтиролари ва гувоҳномаларига собиқ СССР муаллифлик гувоҳномаларини қолган амалда бўлиш муддати учун миллий патентларга алмаштириш;

собиқ СССР муаллифлик гувоҳномалари ва гувоҳномалари билан муҳофаза қилинган ихтиролардан ва саноат намуналаридан фойдаланганлик учун мазкур фойдаланиш содир бўлган давлатнинг ҳуқуқий ҳужжатларига мувофиқ муаллифларга мукофот пулини тўлаш;

иккала давлатнинг аризачиларига ва уларнинг патент бўйича вакилларига миллий муҳофаза ҳужжатлари бериш учун талабномаларни ҳамда собиқ СССР муҳофаза ҳужжатларини миллий муҳофаза ҳужжатларига алмаштириш учун илтимосномани расмийлаштириш, шунингдек ушбу талабномалар ва илтимосномалар билан боғлиқ ёзишмаларни рус тилида олиб бериш ҳуқуқини бериш.

Ўзбекистон Республикаси ёки Қозоғистон Республикасининг ҳар қандай жисмоний ёки юридик шахси лицензия шартномаси тузмасдан ихтиро ёки саноат намунасидан фойдаланиш ҳуқуқини, башарти ушбу ихтиро ёки саноат намунасидан фойдаланиш бошқа шахслар томонидан собиқ СССР муаллифлик гувоҳномаси бериш учун талабнома илгари берилган ихтиро ёки саноат намунасига миллий патент бериш сўралган илтимоснома топширилган санадан олдин қонуний равишда бошланган бўлса, сақлаб қолади.

Бунда муаллифларга мукофот пулини тўлаш кўрсатилган ихтиро ёки саноат намунаси қайси давлат ҳудудида фойдаланилаётган бўлса ўша давлатнинг ҳуқуқий ҳужжатлари билан белгиланган тартибда амалга оширилади.

Томонлар иқтисодий, савдо, саноат, фан ва техника соҳасида ҳамкорлик тўғрисидаги икки томонлама битимларга саноат мулки объектларининг муҳофаза қилинишини таъминлашга доир қоидаларни киритиш мажбуриятини ўз зиммаларига оладилар.

Муҳофаза ҳужжатларини бериш сўралган талабномаларни топшириш, муҳофаза ҳужжатларини қабул қилиб олиш ва уларни ўз кучида сақлаб туришда иккала давлатнинг патент бўйича вакиллари ўзаро ҳамжиҳатлилик принципи асосида бевосита шу давлатларнинг патент идораси билан иш олиб боришлари мумкин бўлиб, бунда фақат миллий талабнома берувчиларнинг манфаатларини ифодалайдилар. Бир давлатнинг миллий талабнома берувчиларига, шунингдек, унинг ҳуқуқий ҳужжатлари билан белгиланган тартибда ўзаро ҳамжиҳатлилик принципи асосида муҳофаза ҳужжатларини олиш ва уларни ўз кучида сақлаб туриш борасида бевосита бошқа давлатнинг патент идораси билан иш олиб бориш ҳуқуқи берилади.

Бир давлатнинг мурожаат қилувчиси томонидан бошқа давлатнинг патент бўйича вакилига муҳофаза ҳужжати бериш учун бериладиган талабномалари миллий патент идорасига талабномалар бериш тўғрисида маълумотлар мавжуд бўлган тақдирда қабул қилинади.

Талабномалар топширганлик, муҳофаза ҳужжатлари берганлик, уларни ўз кучида сақлаб турганлик ва саноат мулкини муҳофаза қилиш ва ундан фойдаланиш билан боғлиқ бошқа юридик жиҳатдан аҳамиятли ишларни бажарганлик учун пошлиналар тўлаш, шунингдек, бошқа хизматлар кўрсатганлик учун тўлов, Ўзбекистон Республикаси ва Қозоғистон Республикасининг ваколатли органлари томонидан белгиланган курс бўйича миллий аризачиларнинг пошлиналари ва тўловларини тўлаш Ўзбекистон Республикаси ва Қозоғистон Республикасининг ҳуқуқий ҳужжатларида назарда тутилган валютада ва миқдорларда амалга оширилади.

Бир давлатнинг жисмоний ва юридик шахслари бошқа давлат ҳудудида саноат мулкига тегишли патент фондларидан, кутубхоналардан, банк маълумотларидан миллий жисмоний ва юридик шахслар фойдаланадиган шартларда фойдаланадилар.

Томонларнинг ушбу Битимни амалга ошириш давомида бир-бирларига йўллайдиган барча ҳужжатлари рус тилида тақдим этилади.

Томонларнинг қуйидаги патент идоралари ушбу Битимни амалга ошириш учун масъул ҳисобланадилар:

Ўзбекистон Республикаси учун — Ўзбекистон Республикаси Фан ва техника давлат қўмитасининг Давлат патент идораси,

Қозоғистон Республикаси учун — Қозоғистон Республикаси Иқтисодиёт ва савдо вазирлигининг Патент агентлиги (Қозоқпатент).

Иккала давлат патент идораларининг ҳамкорлик қилиш тартиби ва шартлари улар ўртасидаги махсус битимлар билан белгиланади.

Ушбу Битимдан келиб чиқадиган ёки унинг бажарилиши билан боғлиқ масалалар юзасидан англашилмовчиликлар пайдо бўлганда Томонларнинг вакиллари ушбу англашилмовчиликларни бартараф этиш учун тегишли маслаҳатлашувлар ўтказадилар ва ушбу англашилмовчиликларни ҳал этишга эришиш учун зарур бўлган куч-ғайратларини аямайдилар.

Ушбу Битим Томонларнинг бошқа давлатлар билан саноат мулкини муҳофаза қилиш соҳасида икки томонлама ва кўп томонлама ҳамкорликда иштирок этишига тўсқинлик қилмайди.

Ушбу Битимга Томонларнинг ўзаро розилигига кўра ўзгартиришлар ва қўшимчалар киритилиши мумкин.

Ушбу Битим имзоланган санадан бошлаб кучга киради.

Ушбу Битим беш йил мобайнида амал қилади. Агар Томонлардан бири унинг навбатдаги амал қилиш даври тугашидан камида олти ой олдин ушбу Битимнинг амал қилишини тўхтатиш бўйича ўз нияти тўғрисида иккинчи Томонни ёзма равишда хабардор қилмаса, унинг амал қилиши кейинги беш йиллик даврларга ўз-ўзидан узайтирилаверади.

Ушбу Битим амалда бўлишининг тўхтатилиши иккала давлат жисмоний ва юридик шахсларига ушбу Битимнинг амалда бўлиш даврида берилган талабномаларга биноан берилган ёки берилиши мумкин бўлган муҳофаза ҳужжатларининг амал қилишига дахл этмайди.

Алмати шаҳрида 1997 йил 2 июнда, икки асл нусхада, ҳар бири ўзбек, қозоқ ва рус тилларида тузилди, барча матнлар бир хил кучга эгадир.

Ушбу Битим қоидаларини талқин қилишда англашилмовчиликлар пайдо бўлган тақдирда рус тилидаги матнга амал қилинади.