Ўзбекистон Республикаси Президенти И. А. Каримовнинг «Ўзбекистон иқтисодий сиёсатининг устувор йўналишлари тўғрисида»ги ахборотини тинглаб, Ўзбекистон Республикаси Олий Кенгаши қарор қилади:

1. Ўзбекистон Республикасида бозор иқтисодиётини босқичма-босқич жорий этиш йўлида амалга оширилаётган ишлар тўла маъқуллансин ва Ўзбекистон Республикаси Президенти И. А. Каримовнинг «Ўзбекистон иқтисодий сиёсатининг устувор йўналишлари тўғрисида»ги ахборотида баён этилган асосий қоидалар ҳамда хулосалар қўллаб-қувватлансин ва улар раҳбарлик ҳамда ижро этиш учун қабул қилинсин.

2. Ўзбекистон Республикаси Вазирлар Маҳкамаси, Қорақалпоғистон Республикаси Олий Кенгаши ва Вазирлар Кенгаши, вилоятлар, шаҳарлар ва туманларнинг ҳокимлари Ўзбекистон Республикаси Олий Кенгашининг ўн учинчи сессиясида Ўзбекистон Республикаси Президенти И. А. Каримов илгари сурган бош устуворликлар ва вазифаларга асосланган ҳолда иқтисодий ислоҳотни изчил чуқурлаштиришга, халқ хўжалигини янада барқарорлаштиришга, Ўзбекистоннинг иқтисодий мустақиллигига эришишга қаратилган аниқ чора-тадбирларни ишлаб чиқсинлар ва амалга оширилишини таъминласинлар.