Ўзбекистон Республикаси Ҳукумати ва Молдова Республикаси Ҳукумати, бундан кейин «Томонлар» деб аталади,

Ўзбекистон Республикаси ва Молдова Республикаси халқлари ўртасидаги тенг ҳуқуқлилик ҳамда ўзаро манфаатли ҳамкорликка асосланган мавжуд алоқаларни ривожлантиришга интилишга амал қилишиб,

алоқа соҳасидаги икки томонлама муносабатлар Жаҳон почта иттифоқи ҳужжатлари қоидаларига ҳамда Халқаро электр алоқаси иттифоқи тавсияномаларига, шунингдек бошқа халқаро шартномаларга қатъий мувофиқ равишда қурилиши кераклигини эътиборга олишиб,

алоқа соҳасидаги ўзаро ишлар ва ҳамкорлик ўзаро ёрдам асосида ривожланиши керак, деб ҳисоблашиб,

Томонлар ўртасида алоқа воситаларининг узлуксиз ишлашини таъминлаш учун мустаҳкам ҳуқуқий, иқтисодий ва технологик муносабатлар ўрнатишни хоҳлашиб,

қуйидагилар тўғрисида келишиб олдилар:

Томонлар, ўз ваколатлари ва имкониятлари ҳажмида, Ўзбекистон Республикаси қонунчилиги ҳамда Молдова Республикаси қонунчилиги талабларига мувофиқ ҳаракат қилишиб, электр ва почта алоқаси соҳасидаги ҳамкорликни давом эттирадилар ва кенгайтирадилар.

Мазкур Битимни бажаришдан келиб чиқадиган ҳисоб-китоблар ва тўловлар Томонларнинг давлатлари ўртасида тўлов кунида амалда бўлган битимларга мувофиқ амалга оширилади.

Хизматлар кўрсатиш бўйича барча ўзаро ҳисоб-китоблар ўзаро ҳисоб-китоблар марказлари ва вакил қилинган банклар орқали марказлаштирилган тартибда амалга оширилади.

Почта ва электр алоқасини ташкил этишдаги, шунингдек алоқа хизматлари кўрсатганлик учун ўзаро ҳисоб-китоблар тартибидаги барча ўзгаришлар тўғрисида Томонлар бир-бирларини ушбу ўзгаришлар бошланишига доир тавсия этилаётган санадан 3 ой олдин хабардор қиладилар.

Томонлар барча турдаги почта жўнатмалари ва махсус алоқанинг, электр алоқаси тармоқлари бўйича хабарларнинг, телевидение ва радиоэшиттириш дастурларининг транзит эркинлигини кафолатлайдилар.

Электр алоқаси тармоқлари бўйича транзит хабарларни ўтказиш тартиби алоҳида битим билан белгиланади.

Томонлар учинчи давлатларда ва тегишли халқаро ташкилотларда Томонларнинг алоқа маъмуриятлари фаолиятига тўсқинлик қилувчи ёки уни қийинлаштирувчи камситадиган чораларни бир-бирига қўлламайдилар.

Томонлар ўз давлати ҳудудида бошқа Томоннинг радио ва телевизион дастурларини ҳамда обуна ва чакана савдо бўйича вақтли нашрларини Ҳукуматлар ёки Томонларнинг тегишли идоралари ўртасидаги шартнома ва битимлар билан белгиланган ҳажмларда тарқатишни ташкил этишда бир-бирларига кўмаклашадилар.

Томонлар шу ҳақда аҳдлашиб олдиларки, хизматлар кўрсатишда қатнашувчи барча алоқа корхоналари ўз вақтида ва сифатли хизмат кўрсатилиши учун истеъмолчилар олдида баравар жавоб берадилар. Халқаро алоқаларнинг сифатсиз иши юзасидан шикоятларни кўриб чиқиш тартиби Жаҳон почта иттифоқи ва Халқаро электр алоқаси иттифоқи Актлари билан белгиланади.

Томонлар алоқа корхоналарининг телефончилари, телеграфчилари, техника ва почта ходимлари ўртасида хизмат ахборотларини айирбошлаш, шунингдек хизмат харажатларини айирбошлаш учун рус тилидан фойдаланиш тўғрисида келишиб олдилар.

Томонларнинг мамлакатлари юборадиган почта жўнатмалари ва телеграммаларнинг манзилгоҳлари рус тилида расмийлаштирилади.

Телеграммалар лотин ҳарфларида қабул қилиниши ва узатилиши мумкин.

Давлатлараро хабарлар ва ахборотларни узатиш технологик жараёнларида Томонлар алоқа корхоналарида ягона ҳисобга олиш ҳисобот вақтини — Москва вақтини қўллашади.

Томонлар алоқани ташкил этиш ва халқаро телефон-телеграф ва почта айирбошлашни ишлаш, шунингдек фавқулодда вазиятларни ҳисобга олган ҳолда махсус ва фельдъегер алоқаси масалалари бўйича ўзаро кўмаклашадилар.

Томонлар давлатлараро аҳамиятга эга бўлган алоқа объектларини қуриш ҳамда ишлатиш норма ва қоидаларини мувофиқлаштириб боришга келишиб олдилар.

Томонлар шуни белгилаб қўйдиларки, агар Томонларнинг давлатлари ўртасидаги битимларда алоқа соҳасидаги муносабатларда келиб чиқадиган баҳсларни ечиш тартиби келишиб олинмаган бўлса, Томонларнинг алоқа корхоналари ушбу тартибни улар ўртасида тузилган шартномаларда мустақил равишда белгилайдилар.

Томонлар шу тўғрида келишиб олдиларки, зарурият бўлганда, ушбу Битимга иккала Томоннинг розилигига кўра ўзгартиришлар ва қўшимчалар киритилиши мумкин. Улар мазкур Битимнинг узвий қисми ҳисобланадиган протокол билан расмийлаштирилади.

Ушбу Битим имзоланган кундан бошлаб кучга киради.

Ушбу Битим Томонлардан бири бошқа Томонни ўзининг уни бекор қилиш истаги тўғрисида дипломатик йўл билан ёзма равишда хабардор қилмагунгача амал қилади. Мазкур Битимда қатнашишдан воз кечиш тўғрисидаги билдиришнома олингандан кейин уч ой ўтгач Битим ўз кучини йўқотади.

1995 йил 30 мартида Кишинеу шаҳрида ҳар бири ўзбек, молдован ва рус тилларида бўлган икки нусхада тузилди, барча матнлар бир хил кучга эгадир. Ушбу Битимнинг қоидаларини талқин қилишда ҳар қандай келишмовчиликлар пайдо бўлган тақдирда рус тилидаги матн асос қилиб олинади.