Ўзбекистон Республикаси Ҳукумати ва Беларусь Республикаси Ҳукумати, кейинги ўринларда «Томонлар» деб аталадилар,

икки томонлама ўзаро манфаатли ҳамкорликни ривожлантириш истагига амал қилиб,

Томонларнинг иқтисодий, савдо ва бошқа соҳалардаги алоқаларни ривожлантиришда бир-бирига кўмаклашишга бўлган интилишини эътиборга олиб, қуйидагилар тўғрисида аҳдлашиб олдилар:

Томонлар, ҳар иккала давлатда амалда бўлган қонунчиликка мувофиқ ва ўзаро манфаатларга асосланиб, автомобиль транспорти ҳаракатини ривожлантиришда, Томонларнинг тўғридан-тўғри ва транзит юкларини дарё портлари, темир йўл чегара станцияларида жўнатишга тайёрлашда ҳамда уларни ҳар иккала давлат ҳудудида ташишни ташкил этишда имтиёзли шароит яратишда бир-бирларига кўмаклашиш бўйича барча зарур чора-тадбирларни кўрадилар.

Темир йўл, ҳаво ва автомобиль транспортида юк ташиш соҳасида ҳамкорлик қилиш иккала Томон қатнашчиси бўлган битимлар, икки ва кўп томонлама шартномалар билан тартибга солинади.

Томонлар Беларусь Республикаси ва Ўзбекистон Республикаси темир йўллари Томонлар давлатларига тегишли, ҳукуматлараро кредит, инсонпарварлик ёрдами йўли билан бошқа мамлакатлардан икки давлатнинг чегара станцияларига ҳамда юк ташиш ва ортиш пунктларига келган юкларни ҳамда бошқа ташқи савдо юкларини ташиш учун тўловлар амалга оширилган тақдирда ҳаракатдаги состав берилишини таъминлаши тўғрисида келишиб олдилар.

Томонлар бир-бирларига ҳар иккала давлат ҳудуди бўйича юкни эркин олиб ўтишни таъминлаш ва кафолатлаш мажбуриятини ўз зиммаларига оладилар.

Томонлар ўзларининг миллий қонунчилигига мувофиқ транспорт воситасининг кимга мансублиги, юкнинг келиб чиқишига (халқаро қоидалар ҳамда Томонларнинг миллий қонунчилиги билан ташилиши тақиқланганлардан ташқари), келиш-кетиш ёки бориш пунктида, агар улар бошқа Томонга тегишли бўлса, исталган бошқа вазиятларга асосланган бирор-бир фарқлашга йўл қўймайдилар.

Дарё портларида ва темир йўл станцияларида юкларни ташиш билан боғлиқ ишлар мажмуини бажарганлик учун ҳисоб-китоблар ҳар бир муайян ҳолатда тузиладиган икки томонлама шартномалар асосида, амалдаги тарифлар қўлланган ҳолда, амалга оширилади.

Чегара, божхона ва санитария назоратига нисбатан ташув турлари бўйича икки томонлама битимлар қоидалари қўлланилади.

Ушбу Битимнинг самарали амал қилишини таъминлаш ва савдо-иқтисодий ҳамкорликни фаоллаштириш мақсадида Томонлар транспорт инфраструктурасини ривожлантиришда, бу тармоқда қўшма корхоналар ва кооперациялашган ишлаб чиқаришлар ташкил этишда, илғор, экологик жиҳатдан хавфсиз технологияларни, тегишли илмий-техникавий ишланмалар ва тадқиқотларни жорий этишда бир-бирларига зарур ташкилий-техникавий, молиявий ва бошқа хил ёрдам кўрсатадилар.

Томонлар Битимда назарда тутилган соҳаларда ҳамкорликнинг зарур илмий-техникавий асосларини яратиш ва ривожлантириш бўйича фикр алмашиш, мунтазам консультациялар ўтказиб туришга келишдилар.

Томонларнинг ваколатли органлари бошқа Томоннинг транспорт воситалари ва экипажлари аъзолари аварияларга учраганда ёки улар билан бахтсиз ҳодисалар содир бўлганда зарур ёрдам кўрсатадилар, оғир авариялар ёки бахтсиз ҳодисалар юз берган тақдирда эса бу ҳақда транспорт воситаси рўйхатга олинган Томонни хабардор қилади ва текширув натижаларини унга маълум қилади.

Томонлар юк ташиш бўйича Аралаш комиссия ташкил этишга келишдилар. Комиссия ушбу Битим қоидаларининг амалга оширилишига, шунингдек, Томонларнинг транспорт ташкилотлари ўртасида тузилган шартномалар бўйича мажбуриятларнинг бажарилишини назорат қилиш ва мувофиқлаштиришга кўмаклашади.

Битимнинг амал қилиши масалаларини кўриб чиқиш учун Комиссия Томонлардан бирининг таклифига кўра навбат билан Тошкент ва Минскда тўпланади.

Мазкур Битимни қўллаш ҳамда талқин қилиш бўйича юзага келадиган барча баҳслар Аралаш комиссия доирасида ҳал этилади.

Томонлар тегишли халқаро транспорт ташкилотларида ҳамкорлик қиладилар ҳамда ҳамкорлик бўйича ўзаро консультациялар ўтказиб турадилар.

Ушбу Битимни бажариш давомида пайдо бўлиши мумкин бўлган барча баҳслар ва келишмовчиликларни Томонлар музокаралар йўли билан ҳал этадилар.

Мазкур Битимга ўзгартиришлар ва қўшимчалар Томонларнинг келишувига биноан киритилиши мумкин.

Ушбу Битим имзоланган кундан бошлаб кучга киради ва Томонлардан бири уни тўхтатиш тўғрисида иккинчи Томонни камида уч ой олдин огоҳлантиргунга қадар амал қилади.

1994 йил 22 декабрда Тошкент шаҳрида ўзбек, беларусь ва рус тилларида икки нусхада тузилди, барча матнлар бир хил кучга эгадир.

Мазкур Битимнинг у ёки бу моддасини талқин қилишда келишмовчиликлар пайдо бўлган тақдирда рус тилидаги матн асос ҳисобланади.