Давлат тасарруфидан чиқариш ва хусусийлаштиришдан тушадиган маблағлардан фойдаланиш самарадорлигини ошириш мақсадида Вазирлар Маҳкамаси қарор қилади:

1. Белгилаб қўйилсинки:

давлат тасарруфидан чиқариш ва хусусийлаштиришдан тушадиган маблағларни, шу жумладан сотиб олинадиган давлат активлари ҳақини бўлиб-бўлиб тўлашни назарда тутувчи шартномалар бўйича тушадиган маблағларни тақсимлаш Ўзбекистон Республикаси Давлат мулки қўмитаси томонидан ҳар ойда, қонун ҳужжатларида белгиланган нисбатларда амалга оширилади;

хусусийлаштирилаётган корхоналар ихтиёрида қолдириладиган маблағларни ўтказиш ушбу корхоналар томонидан махсус депозит ҳисоб рақамининг банк реквизитлари кўрсатилган ҳолда тақдим этилган ёзма сўровлар асосида амалга оширилади. Корхона томонидан сўров сотилаётган давлат активлари учун якуний ҳисоб-китоблар қилинган вақтдан бошлаб бир ой ўтгунгача тақдим этилмаган тақдирда кўрсатиб ўтилган маблағлар давлат бюджетига ўтказилади.

2. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.

3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.

1. Вазирлар Маҳкамасининг 1998 йил 22 августдаги 362-сон қарори билан тасдиқланган Давлат мулкини давлат тасарруфидан чиқариш, хусусийлаштиришдан тушган маблағларни ҳисобга олиш, тақсимлаш ва улардан фойдаланишни назорат қилиш тартибида:

а) 3-банд қуйидаги таҳрирда баён қилинсин:

«3. Давлат тасарруфидан чиқариш ва хусусийлаштиришдан тушадиган маблағларни, шу жумладан сотиб олинаётган давлат активлари ҳақини бўлиб-бўлиб тўлашни назарда тутувчи шартномалар бўйича тушадиган маблағларни тақсимлаш Ўзбекистон Республикаси Давлат мулки қўмитаси томонидан ҳар ойда қуйидаги нисбатда амалга оширилади:

40 фоизи — бюджет дефицитини қоплаш манбаи сифатида давлат бюджетига;

15 фоизи — Хусусий тадбиркорлик ва кичик бизнесни қўллаб-қувватлаш фондига («Бизнес-фондига);

15 фоизи — ижтимоий-иқтисодий ривожлантириш лойиҳаларини маблағ билан таъминлаш, бозор инфратузилмаси ташкилотларини шакллантириш учун Қорақалпоғистон Республикаси Вазирлар Кенгашига, вилоятлар ва Тошкент шаҳар хокимликларига;

3 фоизи — Ўзбекистон Республикаси Давлат мулки қўмитасининг Хусусийлаштириш, инвестиция ва бозор тузилмаларини яратиш ва ривожлантириш давлат дастурини амалга ошириш бўйича харажатларига;

2 фоизи — Давлат мулки қўмитасининг идора қилиш ва бошқариш функцияларини амалга ошириш билан боғлиқ харажатларини қоплашга ва Давлат мулкини хорижий инвесторга сотишда тендер савдолари ўтказиш бўйича Давлат комиссияси қарорларига кўра хусусийлаштириш дастурини ахборот билан таъминлашга тенг улушларда фойдаланилади;

25 фоизи — маблағлардан фақат техника билан қайта жиҳозлаш, ишлаб чиқаришни замонавийлаштиришда мақсадли фойдаланиш учун хусусийлаштирилаётган корхоналарнинг ёки мол-мулкнинг хусусийлаштирилаётган қисми балансида бўлган давлат корхоналари ихтиёрида қолдирилади. Корхоналар мулкий комплекслар тарзида тўлиқ сотилганда, шунингдек улар бўйича давлат улушини сақлаш назарда тутилмаган корхоналарнинг устав фондларидаги давлат активларини сотишда кўрсатиб ўтилган маблағлар давлат бюджетига ўтказилади».

б) 4-банд қуйидаги таҳрирда баён қилинсин:

«4. Давлат тасарруфидан чиқариш ва хусусийлаштиришдан хорижий валютада тушадиган маблағлар Ўзбекистон Республикаси Давлат мулки қўмитасининг Ўзбекистон Республикаси Марказий банкидаги махсус валюта ҳисоб рақамига ўтказилади, кейинчалик улар белгиланган тартибда тўлиқ ҳажмда Марказий банкка мажбурий равишда сотилади. Миллий валютада олинган тушумни тақсимлаш ушбу Тартибнинг 3-бандига мувофиқ амалга оширилади»;

в) VI бўлимга қуйидаги мазмундаги 28-1-банд қўшилсин:

«28-1. Хусусийлаштирилаётган корхоналар ёки мол-мулкнинг хусусийлаштирилаётган қисми балансида бўлган давлат корхоналари ихтиёрида қолдириладиган маблағларни ўтказиш ушбу корхоналар томонидан тақдим этилган махсус депозит ҳисоб рақамининг банк реквизитлари кўрсатилган ҳолдаги сўровнома — хатлар асосида амалга оширилади. Сотилган давлат активлари учун якуний ҳисоб-китоблар қилинган вақтдан бошлаб бир ой ўтгунгача корхоналар томонидан сўровнома-хат тақдим этилмаган тақдирда кўрсатиб ўтилган маблағлар давлат бюджетига ўтказилади».

2. Вазирлар Маҳкамасининг «Ўзбекистон Республикаси Вазирлар Маҳкамасининг 1998 йил 18 ноябрдаги 477-сон ва 1998 йил 17 декабрдаги 525-сон қарорларини бажариш юзасидан жавобгарликни кучайтириш чора-тадбирлари тўғрисида» 1999 йил 20 майдаги 258-сон қарорининг 10-банди ўз кучини йўқотган деб ҳисоблансин.

3. Ўзбекистон Республикаси Вазирлар Маҳкамасининг «2001-2002 йилларда хорижий инвесторларни жалб этган ҳолда корхоналарни давлат тасарруфидан чиқариш ва хусусийлаштириш бўйича келгусидаги чора-тадбирлар тўғрисида» 2001 йил 9 мартдаги 119-сон қарори (Ўзбекистон Республикаси ҚТ, 2001 й., 3-сон, 17-модда) 2-бандининг учинчи ва тўртинчи хатбошидаги «кейинчалик харажатларни объектларни (акцияларни) сотиш тушумларидан қоплаган ҳолда» сўзлари чиқариб ташлансин.