Ўзбекистон Республикаси Ҳукумати ва Корея Республикаси Ҳукумати (бундан кейин «Аҳдлашувчи Томонлар» деб аталувчилар),

Озиқ-овқат маҳсулотларини ишлаб чиқариш иккала мамлакат халқлари ва бутун инсоният учун муҳим аҳамиятга эга эканлигини ҳисобга олиб,

Қишлоқ хўжалигида ишлаб чиқариш, техника ва қишлоқ хўжалик маҳсулотларини қайта ишлаш соҳасидаги замонавий билим ва технологияни қишлоқ хўжалигидаги илмий-тадқиқот ва янгиликлар киритишга нисбатан кўллаш истагида,

Қишлоқ хўжалиги соҳасида ҳамкорликнинг ривожланиши икки мамлакат ўртасидаги дўстона алоқаларни янада яхшиланишига кўмаклашишга ишонган ҳолда,

Ўзбекистон Республикаси Ҳукумати ва Корея Республикаси Ҳукумати ўртасида илмий ва техникавий ҳамкорлик тўғрисидаги 1992 йил 17 июнда имзоланган Битимга мувофиқ,

Қуйидагилар тўғрисида келишиб олдилар:

Аҳдлашувчи Томонлар қишлоқ хўжалиги соҳасида ўзаро манфаат, тенглик ва баҳамжиҳатлик асосларида ҳамкорликни ривожлантирадилар ва амалга оширадилар.

Аҳдлашувчи Томонлар куйидаги йўналишлар бўйича ўзаро манфаатли ҳамкорликни ривожлантиришга кўмаклашадилар:

1. Асосий қишлоқ хўжалик маҳсулотларини ишлаб чиқаришни ва истеъмол қилишни режалаштириш ёки олдиндан мўлжаллаш.

2. Ўсимликшунослик, жумладан генетика, селекция, ўсимликлар муҳофазаси, қишлоқ хўжалиги экинларини етиштириш.

3. Чорвачилик ва паррандачилик, жумладан генетика, кўпайтириш, озиқлантириш физиологияси, наслчилик ишлари, касалликлардан ҳимоя қилиш, чорвачилик маҳсулотларини ишлаб чиқиш саноатининг усуллари ва қайта ишлаш.

4. Ерни текшириш ва ундан фойдаланиш, жумладан тупроқ эрозиясига қарши курашиш бўйича тадбирлар ва саноатни татбиқ қилиш туфайли бузилган ерларни рекультивация қилиш.

5. Қишлоқ хўжалигини механизациялаш, жумладан янги машиналарни татбиқ қилиш ва синаш хамда бу синовлар, асбоб-ускуна ва технологиялар ва шунингдек техник хизмат кўрсатиш ва таъмирлаш тўғрисида тўлиқ маълумотлар билан алмашиш.

6. Қишлоқ хўжалигига оид моддий ресурслардан, шу жумладан, ўғитлар, энергия (ёқилғи, нефт маҳсулотлари, электрэнергияси), қишлоқ хўжалигидаги кимёвий ўғитлардан фойдаланиш.

7. Қишлоқ хўжалиги маҳсулотларини қайта ишлаш, сақлаш ва консервалаш, жумладан озуқа ишлаб чиқиш технологияси.

8. Қишлоқ хўжалигида математик усуллар ва ЭХМни қўллаш, жумладан қишлоқ хўжалиги корхоналарини математик моделлаштириш.

9. Аҳдлашувчи Томонларнинг ўзаро келишувига мувофиқ ҳамкорликнинг бошқа йўналишлари.

Аҳдлашувчи Томонлар ўртасидаги ҳамкорлик қуйидаги шаклларда амалга оширилиши мумкин:

1. Олимлар, мутахассислар, талабалар, стажёрлар алмашуви.

2. Икки томонлама симпозиум ва конференцияларни ташкиллаштириш.

3. Илмий-техникавий ва иқтисодий ахборот билан алмашув.

4. Ўзаро манфаатли мавзулар бўйича қўшма лойиҳалар ва дастурларни режалаштириш, ишлаб чиқиш ва амалга ошириш.

5. Ўсимлик генофонди, уруғлар ва тирик ашёлар билан алмашиш.

6. Ҳайвонлар, биологик материаллар, қишлоқ хўжалигидаги кимёвий ўғитлар, янги машиналарнинг намуналари, асбоб-ускуна ва илмий жиҳозлар билан алмашиш ва

7. Аҳдлашувчи Томонларнинг ўзаро келишувига мувофиқ ҳамкорликнинг бошқа шакллари.

1. Аҳдлашувчи Томонлар, мазкур Меморандумнинг бажарилишига кўмаклашиш мақсадида икки мамлакатнинг ҳукумат ва ноҳукумат муассасалари, илмий текшириш муассасалари хамда бошқа ташкилотлари ва фирмалари ўртасидаги ҳамкорликни ва тўғридан-тўғри алоқаларни тегишли тарзда рағбатлантирадилар ва ривожланишига ёрдамлашадилар, шунингдек, ушбу Меморандумга мувофиқ аниқ лойиҳалар ва дастурларни бажариш юзасидан керакли бўлган амалий битимлар ёки контрактлар тузадилар.

2. Ҳамкорликнинг самарали ривожланишини таъминлаш учун ҳар бир Томон ушбу Меморандум кўзда тутган биргаликдаги фаолиятни амалга ошириш билан боғлиқ бошқа Томоннинг муассасалари ва ташкилотларига олимлар ва мутахассисларнинг боришларига кўмаклашиш бўйича саъй-ҳаракат қилади.

3. Ушбу Меморандум доирасидаги ҳамкорлик ҳар бир Томоннинг қонунлари ва ҳуқуқий актларига мувофиқ амалга оширилади. Мазкур меморандумдаги ҳеч бир нарса Томонлар ўртасидаги амалдаги ҳар қандай битимларга хилоф ёки ўзгартиш сифатида талқин қилинмаслиги лозим.

1. Мазкур Меморандумни рўёбга чиқариш учун қишлоқ хўжалиги соҳасида ҳамкорлик қилиш бўйича ўзбек-корейс Қўшма Комиссияси тузилади. Қўшма Комиссия ўз йиғилишларини вақти ва кун тартибини олдиндан келишиб олиб навбати билан Ўзбекистон Республикаси ва Корея Республикасида ўтказиб туради.

2. Қўшма Комиссия ҳамкорликнинг лойиҳа ва дастурларини кўриб чиқади ва тасдиқлайди, уларни амалга ошириш тартибини ўрнатади, ҳамкорлик доирасида қўшма тадбирлар бажарилишига масъул тегишли муассасалар ва ташкилотларни белгилайди ва керак бўлганда, Томонлар учун тавсиялар тайёрлайди.

3. Ўзбекистон Республикаси томонидан Ўзбекистон Республикаси қишлоқ хўжалиги вазирлиги ва Ўзбекистон Қишлоқ хўжалиги фанлари академияси ва Корея Республикаси томонидан Қишлоқ хўжалиги, ўрмончилик ва балиқчилик вазирлиги қошидаги қишлоқ хўжалигини ривожлантириш бўйича бошқармаси ушбу Меморандумни бажариш юзасидан бош идоралар бўлиб ҳисобланади.

4. Тегишли мамлакатлардаги бош идоралар ушбу Меморандумга мувофиқ фаолиятни амалга ошириш билан боғлиқ талабларга мос равишда муассасалар ва ташкилотлар ўртасидаги ҳамкорликни мувофиқлаштирадилар ва унга ёрдам берадилар.

1. Ушбу Меморандум имзоланган кундан кучга киради ва беш (5) йил мобайнида амал қилади. Аҳдлашувчи Томонлардан бири ушбу муддат тугашидан олти (6) ой олдин уни тўхтатиш тўғрисидаги истагини бошқа Аҳдлашувчи Томонга билдирмаса, Меморандум муддати ўз-ўзидан келаси беш (5) йиллик муддатларга узаяверади.

2. Ушбу Меморандумга иккала Томоннинг ўзаро розилиги билан истаган вақтда ўзгартишлар киритилиши мумкин.

3. Ушбу Меморандум амал қилишининг тўхташи, унинг асосида тузилган амалий битимлар ва контрактларнинг амалда бўлишига таъсир қилмайди.

Сеул шаҳрида 1995 йил 16 февралда икки нусхада, ҳар бири ўзбек, корейс ва инглиз тилларида тузилди, бунда барча матнлар тенг кучга эга. Матнларни талқин этишда тафовут бўлганда инглиз тилидаги матн устуворлик қилади.