Ўзбекистон Республикаси Ҳукумати ва Корея Республикаси Ҳукумати (бундан кейин «Аҳдлашувчи Томонлар» деб аталувчилар),

Телекоммуникация ва радиоэшиттиришнинг ривожланишини савдо ва техникавий алмашувга, шунингдек ҳар бир мамлакатнинг ижтимоий-иқтисодий ривожига ёрдам берувчи муҳим омил деб ҳисоблаб,

Иккала мамлакат ўртасида телекоммуникация ва радиоэшиттириш соҳаларида турли ҳамкорликнинг зарурлигини эътироф этиб,

Ўзбекистон Республикаси Ҳукумати билан Корея Республикаси Ҳукумати ўртасида илмий-техникавий ҳамкорлик тўғрисида 1992 йил 17 июнда имзоланган Битимга мувофиқ,

Халқаро ҳуқуқ нормалари, ички қонун-қоидалари асосида ва ўзаро фойдали шартларда телекоммуникация ва радиоэшиттириш соҳаларида ҳамкорликни ривожлантириш ва мустаҳкамлашни истаган ҳолда,

Қуйидагилар ҳақида келишиб олдилар:

Аҳдлашувчи Томонлар амалдаги Бутун дунё электр алоқа Конвенцияси, Халқаро электр алоқа иттифоқининг (ХЭАИ) радио ва телекоммуникация низомларига мувофиқ, шунингдек ушбу Меморандум қоидаларига мос равишда ўзлари ўртасидаги телекоммуникацион алоқани тартибга соладилар.

Аҳдлашувчи Томонлар ўз мамлакатлари ўртасида телекоммуникация ва радиоэшиттириш, шу жумладан алоқа хизмати ва жиҳозлаш соҳасида ҳамкорлик қиладилар ва бу соҳадаги ўзаро муносабатларини кенгайтириш ва яхшилаш бўйича барча зарур чораларни кўрадилар. Шу мақсадда Аҳдлашувчи Томонлар ҳукумат ташкилотлари, илмий-тадқиқот институтлари, корпорациялар ҳамда бошқа тегишли ташкилотлар ўртасидаги тўғридан-тўғри алоқаларни ва улар ўртасидаги ҳамкорликнинг ушбу Меморандум доирасидаги биргаликдаги фаолиятнинг тафсилотларига оид аниқ дастурларни тузишни рағбатлантирадилар. Бундай дастурлар икки мамлакат қонун ва қоидаларига мувофиқ тузилади.

Ўзбекистон Республикаси Алоқа вазирлиги ва Корея Республикаси Ахборот ва алоқа вазирлиги ушбу Меморандумнинг ижроси учун масъул асосий ташкилотлар бўладилар.

Аҳдлашувчи Томонлар ўзларининг тегишли ҳукумат ташкилотлари ва идораларига мазкур Меморандумнинг амалга оширилиш жараёнини мунтазам муҳокама қилиб туришни топширадилар ва ўзаро келишувга мувофиқ Аҳдлашувчи Томонлар манфаатлари йўлида телекоммуникация воситаларидан фойдаланишни яхшилаш бўйича зарур чоралар кўрадилар.

Аҳдлашувчи Томонлар ХЭАИ (Халқаро электр алоқа иттифоқининг) Низоми, ХЭАИ Конвенцияси, ХЭАИнинг Маъмурий Қоидалари ва Тавсияномаларида кўзда тутилган телекоммуникация хизматининг барча турлари ва тоифаларини қуйидагиларни ҳисобга олган ҳолда ташкил этишда яқиндан ҳамкорлик қиладилар:

– Аҳдлашувчи Томонларнинг иқтисодий манфаатлари;

– тегишли вазирлик ва идоралар ўртасида бевосита келишилган тадбирлар;

– Халқаро электр алоқа иттифоқи томонидан эълон қилинадиган бирон-бир чеклаш бўлмаса, унинг амалдаги қоидалари.

Аҳдлашувчи Томонлар ўзларининг телекоммуникация ва радиоэшиттириш йўлларини транзит қилиб учинчи мамлакатларга ўтказишда бошқа Аҳдлашувчи Томоннинг телекоммуникация ва радиоэшиттириш жиҳозларидан ҳамда техникавий воситаларидан фойдаланадилар. Улар бир-бирларини мавжуд транзит йўллар, шунингдек ўз давлатлари ичидаги амалдаги тарифлар бўйича маълумотлар билан мунтазам таъминлаб турадилар.

Аҳдлашувчи Томонлар ХЭАИнинг радиоалоқа бўйича Низомига мувофиқ ўз радиоалоқа хизматларини кўрсатаётганда икки томонлама тўсиқларни четлаб ўтиш учун частоталарни тегишлича тақсимлаш ва қўллаш бўйича бир-бирлари билан маслаҳатлашиб турадилар. Бундай маслаҳатлашувлар хатлар билан алмашиш ёки алоҳида ҳужжатларни имзолаш йўли билан амалга оширилади.

Телекоммуникация хизматлари учун тариф ва баҳолар ХЭАИ Конвенцияси, ХЭАИнинг Маъмурий Қоидалари ва Тавсияномаларининг мавжуд қоидалари асосида ўрнатилади. Бу масалалар бўйича икки мамлакатнинг тегишли халқаро операторлари алоҳида келишиб олишлари лозим бўлади. Аҳдлашувчи Томонлар икки мамлакат ўртасидаги тарифларнинг барча ўзгаришлари тўғрисида маълумот бериб турадилар.

Тариф ва баҳоларни ўрнатишда, шунингдек телекоммуникация хизматлари бўйича ҳисоб-китобни амалга оширишда ўзлаштиришнинг махсус ҳуқуқлари (СДР)дан фойдаланилади ёки ХЭАИ Конвенциясига мувофиқ ўзаро келишиб олиб, ҳар қандай пул бирлигидан фойдаланиш мумкин.

Аҳдлашувчи Томонлар ўз миллий қонунчиликларига мувофиқ телекоммуникация ва радиоэшиттиришларнинг ривожланиши учун фан ва техника соҳасидаги ҳамкорликка кўмаклашиш мақсадида бир-бирлари билан мунтазам маслаҳатлашиб турадилар ва ўзаро манфаатли телекоммуникация ва радиоэшиттириш соҳаларининг бошқариш, техникавий, иқтисодий ва илмий жиҳатлари бўйича ўзаро маълумотлар билан алмашиб турадилар.

Аҳдлашувчи Томонлар телекоммуникация ва радиоэшиттириш соҳаларидаги илмий-техникавий ҳамкорликни кенгайтириш учун махсус битимлар тузишлари мумкин.

Мазкур Меморандумнинг қоидаларига мувофиқ Аҳдлашувчи Томонлар кадрлар тайёрлаш соҳасида ҳамкорлик қиладилар ва мутахассисларнинг малакаларини ошириш мақсадида улар билан алмашувни амалга оширадилар.

Аҳдлашувчи Томонлар зарур бўлганда мазкур Меморандум қоидаларининг ижросини енгиллаштириш ва турли телекоммуникация хизматларини яхшилаш мақсадида оператив маълумотлар билан алмашиб турадилар. Оператив маълумотлар билан алмашув текинга ва иккала Аҳдлашувчи Томон келишиб олган тилда амалга оширилади. Олинган оператив маълумот ҳеч қандай шаклда Аҳдлашувчи Томонларнинг ёзма розилигисиз учинчи томонга берилиши мумкин эмас.

Аҳдлашувчи Томонлар ўзаро ҳамкорликнинг натижаси бўлган патент бериш ва бошқа ҳуқуқлар бўйича ҳар қандай маълумотни Аҳдлашувчи Томонлардан бирининг ёзма розилигисиз учинчи томонга, ташкилотга бермаслик мажбуриятини оладилар. Бундай патентлар ва бошқа ҳуқуқлар иккала Аҳдлашувчи Томонлар томонидан бу мамлакатларда амал қилувчи миллий қонунчиликка мувофиқ рўйхатга олинади.

Мазкур Меморандум талқинидаги ҳар қандай келишмовчиликлар Аҳдлашувчи Томонлар ёки уларнинг ваколатли органлари ўртасида ўзаро маслаҳатлашувлар йўли билан ҳал этилади. Агар Аҳдлашувчи Томонлар бир қарорга келмасалар, масала дипломаатик йўллар билан ҳал этилади.

Икки мамлакат ўртасида телекоммуникация ва радиоэшиттириш соҳаларида келгусида ҳамкорлик қилиш заруратидан келиб чиқиб, Аҳдлашувчи Томонлар мазкур Меморандумни ўзаро келишувга мувофиқ ноталар алмашиш йўли билан қайта кўриб чиқишлари ёки унинг қоидаларига ўзгартишлар киритишлари мумкин.

1. Меморандум имзоланган кундан бошлаб кучга киради ва беш йил мобайнида амалда бўлади, бундан кейин агар Аҳдлашувчи Томонлардан бири бу муддат тугашидан камида олти ой илгари мазкур Меморандумнинг амал қилишини тўхтатиш тўғрисида ёзма тарзда билдирмаса, у ўз-ўзидан навбатдаги беш йиллик муддатларга узайтирилаверади.

2. Ушбу Меморандумнинг мазкур Моддада қайд этилган қоидаси асосида амалда бўлишининг тўхтатилиши унинг доирасида тузилган биргаликдаги дастурлар ёки амалга оширилаётган фаолият битказилгунга қадар кучда қолади.

Сеул шаҳрида 1995 йил 16 февралда икки нусхада, ҳар бири ўзбек, корейс ва инглиз тилларида тузилди, бунда барча матнлар бир хил кучга эга.

Матннинг талқинида тафовутлар юзага келса, инглиз тилидаги матн устунликка эга бўлади.