Балиқчилик тармоғида хусусийлаштириш ва хусусий мулкчиликни ривожлантириш жараёнларини чуқурлаштириш, балиқ овлаш ва балиқчилик корхоналари фаолиятини ташкил этишга бозор принциплари ва механизмларини жорий этиш, тармоқни янада монополиядан чиқариш ҳамда рақобат муҳитини шакллантириш, шунингдек балиқ овлашни, балиқ ва балиқ маҳсулотларини сотишни тартибга солиш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ўзбалиқ» акциядорлик компаниясининг фаолияти ташкил этилишини текшириш бўйича 2003 йил 18 мартдаги Ф-1728-сон фармойиши билан ташкил этилган Махсус комиссиянинг:

«Ўзбалиқ» акциядорлик компаниясини ва «Қорақалпоқбалиқ» уюшмасини тугатиш;

тугатилаётган «Ўзбалиқ» акциядорлик компанияси таркибига кирувчи балиқчилик тармоғининг балиқ овлаш ва балиқчилик корхоналарини тўлиқ хусусийлаштириш ва асосан хусусий мулкчиликка айлантириш тўғрисидаги таклифларига розилик берилсин.

2. Ўзбекистон Республикаси Қишлоқ ва сув хўжалиги вазирлиги марказий аппарати таркибида Чорвачилик, паррандачилик ва балиқчиликни ривожлантириш бош бошқармаси, вилоятлар қишлоқ ва сув хўжалиги бошқармаларида эса — чорвачилик, паррандачилик ва балиқчиликни ривожлантириш бўлимлари ташкил этилганлиги, уларга балиқчилик хўжалигини ривожлантириш функциялари юкланганлиги маълумот учун қабул қилинсин.

3. «Ўзбалиқ» акциядорлик компаниясининг фаолияти ташкил этилишини текшириш бўйича Махсус комиссия Ўзбекистон Республикаси Давлат мулки қўмитаси ҳамда манфаатдор вазирликлар ва идоралар билан биргаликда бир ой муддатда «Ўзбалиқ» акциядорлик компанияси, балиқчилик тармоғининг 1-иловага мувофиқ хусусийлаштирилган корхоналари устав жамғармаларидаги давлат улушлари ва акциялар пакетларини биржа ва биржадан ташқари бозорларда асосан жисмоний шахсларга ва хорижий инвесторларга сотишни назарда тутган ҳолда, белгиланган тартибда тугатилишини таъминласин.

4. Ўзбекистон Республикаси Қишлоқ ва сув хўжалиги вазирлиги ҳузуридаги Ўзбекистон Қишлоқ хўжалиги илмий-ишлаб чиқариш маркази таркибида «Аквакультура» илмий-тадқиқот институтини ва «Ихтиомарказ» корхонасини бирлаштириш ҳисобига Балиқчиликни ривожлантириш илмий-тадқиқот маркази ташкил этилсин.

Минтақавий давлат балиқ питомниги Балиқчиликни ривожлантириш илмий-тадқиқот марказига шўъба корхона сифатида берилсин.

Қуйидагилар Балиқчиликни ривожлантириш илмий-тадқиқот марказининг асосий вазифалари этиб белгилансин:

балиқчилик тармоғини ва унинг озуқа базасини ривожлантириш бўйича илмий ва методик тавсиялар ишлаб чиқиш;

селекция-наслчилик ишлари, балиқчилик хўжалиги мелиорацияси, балиқлар касалликларининг олдини олиш ва даволаш тадбирларини ривожлантириш бўйича илмий-тадқиқот ишларини ўтказиш, насл қолдирувчи балиқларнинг зот сифатларини яхшилаш ва балиқларнинг янги турларини иқлимга мослаштириш чора-тадбирларини амалга ошириш;

балиқ овлаш ва балиқчилик хўжаликларини сифатли селекция-наслчилик материали билан таъминлаш;

балиқчилик тармоғи учун кадрларни қайта тайёрлаш ва уларнинг малакасини оширишни ташкил этиш.

Ўзбекистон Республикаси Қишлоқ ва сув хўжалиги вазирлиги бир ой муддатда Балиқчиликни ривожлантириш илмий-тадқиқот маркази тўғрисидаги низомни ва унинг тузилмасини ишлаб чиқсин ва белгиланган тартибда тасдиқласин.

5. Қуйидаги тартиб белгилансин, унга кўра:

табиий балиқчилик хўжалиги ҳавзалари балиқ овлаш корхоналарига танлов асосида ижара шартларида камида 10 йил муддатга бириктириб қўйилади;

табиий сув ҳавзалари участкаларидан фойдаланиш ҳуқуқини берувчи ижара шартномаси Қорақалпоғистон Республикаси Вазирлар Кенгаши, вилоятлар ҳокимликлари ва танлов ғолиби бўлган балиқ овлаш корхонаси ўртасида тузилади;

ижара шартномаси тузган балиқ овлаш корхоналари томонидан табиий сув ҳавзаларида балиқ овлаш мавжуд биологик ресурслардан ва вужудга келаётган талабдан ҳамда маҳсулдорликни сақлаб қолиш ва балиқ ресурсларини зарур даражада кўпайтиришдан келиб чиққан ҳолда квотасиз асосда амалга оширилади;

табиий сув ҳавзалари участкаларини ижарага олувчи балиқ овлаш корхоналари табиатни муҳофаза қилишга оид қонун ҳужжатларига, республика ҳудудида балиқ овлашнинг белгиланган қоидаларига қатъий риоя қилишлари, ҳар йили балиқларни ўстиришга қўйиб юбориш ва балиқ ресурслари сақланишини ва кўпайтирилишини таъминлаш бўйича бошқа чора-тадбирларни амалга оширишлари шарт.

Ижарачи балиқ овловчи корхоналар томонидан табиатни муҳофаза қилишга доир белгиланган қонун ҳужжатлари, балиқ овлаш қоидалари ва ижара шартномаси шартлари қўпол равишда ва мунтазам бузилган тақдирда ижара шартномаси Қорақалпоғистон Республикаси Вазирлар Кенгаши ва вилоятлар ҳокимликлари қарорига кўра муддатидан олдин, белгиланган тартибда бекор қилиниши мумкин.

6. Республика балиқчилик хўжалиги табиий сув ҳавзаларини бириктириб қўйиш ва улардан фойдаланиш тартиби тўғрисидаги низом 2-иловага мувофиқ тасдиқлансин.

7. Балиқчиликни ривожлантириш илмий-тадқиқот маркази ҳузурида илмий-тадқиқот ва селекция-наслчилик ишларини, озуқаларнинг замонавий рецептларини ишлаб чиқишни ва балиқчилик тармоғида замонавий технологияларни жорий этишга, балиқлар касалликларининг олдини олиш ва даволашга, тармоқни ривожлантириш бўйича инвестиция дастурларини шакллантиришга кўмаклашишни молиялаштириш учун бюджетдан ташқари Балиқчиликни ривожлантириш жамғармаси ташкил этилсин.

Ўзбекистон Республикаси Молия вазирлиги Қишлоқ ва сув хўжалиги вазирлиги билан биргаликда Балиқчиликни ривожлантириш илмий-тадқиқот маркази ҳузуридаги Балиқчиликни ривожлантириш жамғармаси маблағларини шакллантириш ва улардан фойдаланиш тартиби тўғрисидаги низомни бир ой муддатда ишлаб чиқсин ва белгиланган тартибда тасдиқласин.

9. Ўзбекистон Республикаси Молия вазирлиги Қишлоқ ва сув хўжалиги вазирлиги, Давлат табиатни муҳофаза қилиш қўмитаси, Қорақалпоғистон Республикаси Вазирлар Кенгаши, вилоятлар ҳокимликлари билан биргаликда республика балиқчилик хўжалиги табиий сув ҳавзаларининг балиқ овлаш корхоналарига ижара шартномаси шартларида бириктириб қўйилган участкаларидан фойдаланганлик учун ижара ҳақини ундириш тартиби ва миқдорлари тўғрисидаги низомни бир ой муддатда ишлаб чиқсин ва белгиланган тартибда тасдиқласин.

Белгилаб қўйилсинки, республика балиқчилик хўжалиги табиий сув ҳавзаларини ижарага олишдан тушадиган маблағларнинг:

60 фоизи — тегишли маҳаллий бюджетларга, шу жумладан балиқчилик тармоғини ривожлантириш тадбирларига;

25 фоизи — Балиқчиликни ривожлантириш илмий-тадқиқот маркази ҳузуридаги Балиқчиликни ривожлантириш жамғармасига;

15 фоизи — маблағларни балиқ ресурсларини муҳофаза қилиш ва улардан оқилона фойдаланиш тадбирларига мақсадли йўналтириш учун Ўзбекистон Республикаси Давлат табиатни муҳофаза қилиш қўмитасига йўналтирилади.

10. Ўзбекистон Республикаси Қишлоқ ва сув хўжалиги вазирлиги Иқтисодиёт вазирлиги, Давлат табиатни муҳофаза қилиш қўмитаси ва «Ўздонмаҳсулот» давлат-акциядорлик корпорацияси билан биргаликда 2004—2006 йилларда балиқчилик тармоғини ва унинг озуқа базасини ривожлантириш комплекс дастурини икки ой муддатда ишлаб чиқсин ва Вазирлар Маҳкамасига киритсин.

11. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

Ўзбекистон Республикаси Қишлоқ ва сув хўжалиги вазирлиги, балиқ овлаш ва балиқчилик корхоналари билан биргаликда балиқ ва балиқ маҳсулотларини сотиш бўйича чакана савдо шохобчаларини ривожлантириш учун зарур шарт-шароитлар яратсинлар;

Ўзбекистон Республикаси Қишлоқ ва сув хўжалиги вазирлиги, «Ўздонмаҳсулот» давлат-акциядорлик корпорацияси ҳамда бошқа манфаатдор идоралар билан биргаликда балиқчилик ва балиқ овлаш корхоналарига селекция-наслчилик материали, озуқа ва бошқа ресурслар билан таъминлашда кўмаклашсинлар;

Ўзбекистон Республикаси Ер ресурслари давлат қўмитаси билан биргаликда балиқчилик фаолиятини юритиш учун ажратилган кўллар ва бошқа ер майдонларидан мақсадли фойдаланилиши устидан қаттиқ назорат ўрнатсинлар.

12. Ўзбекистон Республикаси Давлат табиатни муҳофаза қилиш қўмитаси, Ички ишлар вазирлиги, Давлат солиқ қўмитаси табиий сув ҳавзаларида балиқ ресурслари муҳофаза қилиниши ва улардан оқилона фойдаланилиши, ғайриқонуний ов қилишга ҳамда балиқ ва балиқ маҳсулотларининг ноқонуний сотилишига қарши кураш устидан қаттиқ назорат ўрнатсинлар. Амалга оширилаётган ишлар тўғрисида ҳар чоракда Ўзбекистон Республикаси Вазирлар Маҳкамасига ахборот берилсин.

13. Қуйидагилар:

Вазирлар Маҳкамасининг «Балиқчилик тармоғини бошқариш тизимини такомиллаштириш тўғрисида» 2001 йил 6 июлдаги 289-сон қарори, 9-банддан ташқари;

Вазирлар Маҳкамасининг «Республика балиқчилик табиий сув ҳавзаларидан фойдаланишни яхшилаш ва балиқ ресурслари муҳофазасини кучайтириш чора-тадбирлари тўғрисида» 1998 йил 11 майдаги 198-сон қарори, 6-банддан ташқари;

Вазирлар Маҳкамасининг «Республика балиқчилик табиий сув ҳавзаларини бириктириб қўйиш ва улардан фойдаланиш тартибини тасдиқлаш тўғрисида» 1998 йил 2 июлдаги 277-сон қарори ўз кучини йўқотган деб ҳисоблансин.

14. Ўзбекистон Республикаси Адлия вазирлиги Қишлоқ ва сув хўжалиги вазирлиги, Ўзбекистон Республикаси Давлат табиатни муҳофаза қилиш қўмитаси, бошқа манфаатдор вазирликлар ва идоралар билан биргаликда амалдаги қонун ҳужжатларига мазкур қарордан келиб чиқувчи ўзгартириш ва қўшимчалар тўғрисида бир ой муддатда Вазирлар Маҳкамасига таклифлар киритсин.

15. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.

1. Мазкур Низом республика балиқчилик хўжалиги табиий сув ҳавзаларини ижарага бериш ва улардан фойдаланиш тартибини белгилайди.

2. Балиқ ва бошқа сув жониворларини овлаш ёки уларни кўпайтириш учун фойдаланилаётган ёки фойдаланилиши мумкин бўлган барча табиий сув ҳавзалари (денгиз, дарёлар, сув омборлари, кўллар ва уларга ёндош сув ҳавзалари — кўл хўжаликлари ва балиқ питомникларидан ташқари) балиқчилик хўжалиги сув ҳавзалари ҳисобланади.

Балиқ овланаётган ва овланиши мумкин бўлган балиқчилик хўжалиги табиий сув ҳавзалари ов қилинадиган сув ҳавзалари ҳисобланади. Балиқчилик хўжалиги сув ҳавзалари спорт – ишқивозлик туридаги балиқ овлаш учун ҳам фойдаланилиши мумкин.

3. Мазкур Низомга мувофиқ ижара шартномаси тузган юридик ва жисмоний шахслар (кейинги ўринларда балиқ овлаш корхоналари деб аталади) табиий сув ҳавзаларида балиқ овлаш ҳуқуқига эга бўладилар.

4. Балиқчилик табиий сув ҳавзалари ижарага, қоидага кўра, хусусий мулкчиликка асосланган балиқ овлаш корхоналарига танлов асосида ижара шартномасида белгиланган, лекин камида 10 йил муддатга Қорақалпоғистон Республикаси Вазирлар Кенгаши, вилоятлар ҳокимликлари томонидан берилади.

5. Балиқчилик табиий сув ҳавзаларини балиқ овлаш корхоналарига ижарага бериш масалаларини кўриб чиқиш учун Қорақалпоғистон Республикаси Вазирлар Кенгаши, вилоятлар ҳокимликлари ҳузурида тегишли равишда Қорақалпоғистон Республикаси Вазирлар Кенгаши Раисининг, вилоятлар ҳокимларининг биринчи ўринбосарлари бошчилик қиладиган махсус танлов комиссиялари тузилади. Комиссия таркибига «Давлатбионазорат» инспекцияси, ҳудудий молия ва солиқ органлари, вилоятлар қишлоқ ва сув хўжалиги бошқармалари, адлия ва ички ишлар органлари ва бошқа манфаатдор тузилмалар вакиллари киритилади.

6. Балиқчилик хўжалиги табиий сув ҳавзаларини ёки уларнинг участкаларини танловда ғолиб чиққан балиқ овлаш корхоналарига бириктириб қўйиш Қорақалпоғистон Республикаси Вазирлар Кенгаши, вилоятлар ҳокимликлари (ижарага берувчилар) ва балиқ овлаш корхоналари (ижарачилар) ўртасида ижара шартномаси тузиш асосида амалга оширилади.

Ижара шартномасига балиқчилик хўжалиги табиий сув ҳавзаси ёки унинг участкаси паспорти илова қилинади, унда сув ҳавзасининг номи, жойлашган жойи, сув ҳавзасининг ўлчамлари ва ердан фойдаланувчилар чегаралари кўрсатилган харита-схема илова қилинган чегаралари, бошқа зарур маълумотлар кўрсатилади.

7. Балиқчилик хўжалиги табиий сув ҳавзаси ёки унинг участкасини ижарага олиш мақсадида танловда қатнашиш учун Қорақалпоғистон Республикаси Вазирлар Кенгашига ва вилоятлар ҳокимликларига қуйидаги ҳужжатлар тақдим этилади:

ариза;

балиқ овлаш корхонасининг юридик шахс сифатида ёки юридик шахс бўлмаган якка тартибдаги тадбиркорнинг давлат рўйхатидан ўтказилганлиги тўғрисидаги гувоҳноманинг нусхаси;

балиқ овлаш учун зарур моддий-техника ресурсларининг мавжудлиги тўғрисидаги маълумотлар.

8. Қорақалпоғистон Республикаси Вазирлар Кенгаши ва вилоятлар ҳокимликлари аризачилар томонидан ҳужжатлар берилган вақтдан бошлаб бир ой муддатда уларни кўриб чиқадилар, танлов комиссиясининг йиғилишини ўтказадилар ва танлов ғолибларига балиқчилик хўжалиги табиий сув ҳавзаси ёки унинг участкасини ижарага бериш тўғрисида қарор қабул қиладилар.

Қарор қабул қилингандан кейин 10 кун мобайнида танлов ғолиби билан ижара шартномаси тузилади ва ов фаолияти учун гувоҳнома (ов билети) берилади.

9. Танлов натижаларига кўра табиий сув ҳавзасини ижарага бериш рад этилган ариза берувчилар танлов комиссияси қарори юзасидан қонун ҳужжатларида белгиланган тартибда шикоят қилишга ҳақлидирлар.

10. Балиқчилик хўжалиги табиий сув ҳавзаси ёки уларнинг участкаларидан фойдаланиш ҳуқуқи учун ижара шартномаси тузган балиқ овлаш корхоналари қонун ҳужжатларида белгиланган миқдорда ва тартибда ижара ҳақи тўлайдилар.

11. Балиқчилик хўжалиги табиий сув ҳавзаси ёки унинг участкасини ижарага олиш шартномаси балиқ овлаш корхонасининг ўз хоҳишига кўра ёки балиқ овлаш корхонаси томонидан балиқ овлашнинг белгиланган қоидалари қўпол равишда ва мунтазам бузилиши, балиқ ресурсларини сақлаш ва кўпайтириш бўйича ўз зиммасига олинган мажбуриятларга риоя қилинмаслиги натижасида муддатидан олдин бекор қилиниши мумкин.

12. Ижарага берувчи сифатида Қорақалпоғистон Республикаси Вазирлар Кенгаши ва вилоятлар ҳокимликлари қуйидагиларга ҳақлидир:

амалдаги қонун ҳужжатлари, шартнома шартлари, айниқса ҳар йили балиқларни ўстиришга қўйиб юборишни, балиқчилик ресурсларини сақлаш ва кўпайтиришни таъминлаш бўйича шартлари бузилиши аниқланганда балиқ, бошқа сув жониворларини овлашни ва ўсимликлар тайёрлашни тўхтатиб қўйиш;

балиқ овловчи корхона — ижарачи томонидан табиатни муҳофаза қилиш қонунчилигининг, белгиланган балиқ овлаш қоидаларининг мунтазам ва қўпол равишда бузилиши аниқланганда тузилган шартномани табиатни муҳофаза қилиш органларининг тақдимномасига кўра қонун ҳужжатларида белгиланган тартибда муддатидан олдин бекор қилиш.

13. Ижарага берувчи қуйидагиларга мажбур:

табиий балиқчилик хўжалиги сув ҳавзасини ёки унинг участкасини ижарага олиш учун танловда қатнашиш истагини билдирган юридик ва жисмоний шахслардан ариза ҳамда бошқа ҳужжатларни кўриб чиқиш учун бепул асосда қабул қилиш;

берилган аризаларни кўриб чиқиш ва танловни ўтказишни ўз вақтида, қатъий белгиланган муддатларда амалга ошириш;

танлов қатнашчиларини унинг натижаларидан ўз вақтида хабардор қилиш;

танлов якунлари бўйича 10 кун мобайнида ғолиб билан табиий балиқчилик хўжалиги сув ҳавзасидан ёки унинг участкасидан фойдаланиш ҳуқуқини берувчи ижара шартномаси тузиш ва балиқ овлаш фаолияти билан шуғулланишга гувоҳнома бериш.

14. Балиқ овловчи корхона — ижарачи қуйидаги ҳуқуқларга эга:

ажратилган табиий балиқчилик хўжалиги сув ҳавзаси ёки унинг участкасидан тузилган ижара шартномасига мувофиқ фойдаланиш;

квотасиз миқдорда балиқ овлаш ва маҳсулотни ихтиёрий равишда сотиш;

озуқа ва асосий фаолият билан боғлиқ бўлган бошқа маҳсулотлар, шунингдек балиқчилик маҳсулотлари етиштириш учун сувни муҳофаза қилиш ҳудуди ташқарисида ёрдамчи хўжаликлар ташкил қилиш;

ўз овчилик-балиқчилик хўжалигини ташкил этиш;

қонун ҳужжатларига мувофиқ бошқа ҳуқуқларни амалга ошириш.

15. Балиқ овловчи корхона – ижарачи қуйидагиларга мажбур:

қонун ҳужжатларида белгиланган тартибга мувофиқ балиқ овлаш ва табиатни муҳофаза қилиш қонун ҳужжатлари бузилишига йўл қўймаслик;

биркитилган сув ҳавзасини субижарага бермаслик;

ҳар йили балиқларни ўстиришга қўйиб юбориш, балиқчилик мелиорацияси, балиқларнинг овланадиган турлари наслларини сақлаб қолиш ишларини ҳамда балиқчилик ресурсларини сақлаш ва кўпайтириш бўйича бошқа чора-тадбирларни амалга ошириш;

ҳар йили декабрь ойида Ўзбекистон Республикаси Давлат табиатни муҳофаза қилиш қўмитасига ва Балиқчиликни ривожлантириш илмий-тадқиқот марказига табиий сув ҳавзаларидаги балиқ захираларининг аҳволи ва уларни кўпайтириш бўйича зарур чора-тадбирлар тўғрисида ахборот тақдим этиш;

овланган балиқларнинг ҳаммасини намунавий ов дафтарида қайд этиш;

балиқларнинг товар-транспорт хати бўйича ташилишини амалга ошириш;

балиқ овлаш воситаларини белгиланган тартибда рўйхатдан ўтказиш ва балиқ овлашда хавфсизлик техникасига риоя қилиш;

тасдиқланган шакл бўйича статистик ҳисобот тақдим этиш;

табиий сув ҳавзаси ижара тўловини ўз вақтида амалга ошириш.

16. Балиқ ва бошқа сув жониворларини овлаш фақат ижара шартномасига илова қилинадиган бириктирилган табиий балиқчилик хўжалиги сув ҳавзаси ёки унинг участкаси паспортида кўрсатилган табиий сув ҳавзалари ёки уларнинг участкалари доирасида амалга оширилиши мумкин.

17. Балиқ овловчи корхона – ижарачи томонидан табиатни муҳофаза қилиш бўйича қонун ҳужжатлари, балиқ овлаш қоидалари ва ижара шартномаси шартлари қўпол равишда ва мунтазам бузилган тақдирда ижара шартномаси Қорақалпоғистон Республикаси Вазирлар Кенгаши ва вилоятлар ҳокимликлари томонидан муддатидан олдин бекор қилиниши мумкин.

18. Ижара шартномаси шартлари ижарага берувчилар ва ижарачилар томонидан бузилганда томонлар қонун ҳужжатларида белгиланган тартибда жавоб берадилар.

19. Юридик ва жисмоний шахслар томонидан балиқ, балиқ маҳсулотлари, бошқа сув жониворларини сотиш фақат белгиланган тартибда шаҳар ва туманлар ҳокимликлари томонидан белгиланган жойларда, маҳсулотнинг қонуний овланганлигини ёки олинганлигини тасдиқловчи ҳужжатлар ҳамда маҳсулот учун сифат сертификати мавжуд бўлган тақдирда амалга оширилади.