Ўзбекистон Республикаси Ҳукумати ва Грузия Республикаси Ҳукумати, бундан кейин «Томонлар» деб номланадилар,

маданият, таълим ва инсонпарварлик соҳасида иккала мамлакат ўртасидаги ҳамкорликни мустаҳкамлаш ва Ўзбекистон ҳамда Грузия халқлари ўртасидаги ҳамфикрликни ва дўстлик муносабатларини янада кенгайтиришга ёрдам бериш хоҳишини билдириб,

куйидагилар ҳақида аҳдлашиб олдилар:

Томонлар маданият ютуқлари билан яхши танишиш мақсадида маданият ва санъат соҳасида ижодий ҳамкорликни қуйидаги йўллар билан рағбатлантирадилар:

а) санъат арбоблари ва маданият муассасалари ижодий уюшмалари билан ҳамкорлик қилиш;

б) ижодий жамоалар ва ижрочилар гастролларини ташкил этиш, композиторлар, рассомлар бошқа маданият соҳаси билан банд бўлган шахслар ўртасида ишчанлик алоқаларини йўлга қўйиш;

в) фестиваллар ўтказиш, кўргазмалар ташкил этиш, концертлар ва театр томошалари кўрсатиш;

г) маърузалар ўқиш, семинарлар ва конференциялар ўтказиш;

д) маданият соҳасидаги нашрларни ўзаро алмашиш;

е) тарихий ва маданий меросни консервациялаш ва таъмирлаш соҳасида тажриба ва экспертларни ўзаро алмашиш.

Томонлардан ҳар бири ўз мамлакатида ўрнатилган тартибга мувофиқ иккинчи мамлакатнинг жисмоний ва юридик шахсларига кутубхоналар, музейлар, галереялар, архивлар ва бошқа маданий тусдаги муассасалардан илмий ишлар, ўқиш ва мазкур Битимга жавоб берувчи бошқа мақсадларда фойдаланиш учун имконият яратиб берадилар.

Томонлар иккала мамлакат маданият, таълим ва илм-фан муассасалари, уюшмалари ва ташкилотлари ўртасида ҳамкорлик қилишга, бевосита алмашувларни қарор топтиришга ҳамда Ўзбекистон Республикаси ва Грузия Республикаси минтақалари ва шаҳарлари ўртасида шериклик ва маданий алоқаларни ривожлантиришга кўмаклашадилар.

Томонлар иккала мамлакатнинг муаллифлик ҳуқуқи соҳасидаги ташкилотлар ўртасидаги ҳамкорликни ва ўз мамлакатида иккинчи мамлакатнинг адабий, мусиқий, бадиий ва илмий мазмундаги асарларининг таржима қилиниши, расмлардан нусха олиб кўпайтиришни ва нашр қилишни рағбатлантирадилар.

Томонлар китоб нашр қилиш соҳасидаги ҳамкорликни ривожлантиришга, шу жумладан, китоб кўргазмалари, бадиий адабиёт асарлари, даврий нашрларни ўзаро алмашишга, иккала мамлакат ёзувчилари ва нашриёт ташкилотлари ўртасида қўшма лойиҳалар ташкил этишга ёрдам кўрсатадилар.

Томонлар иккала мамлакат ўртасида қуйидаги йўллар билан кино соҳасида ҳамкорлик қилишга кўмаклашадилар:

а) ўзаро фестиваллар, декадалар, кино ва кино премьералари кунларини ўтказиш;

б) бадиий, ҳужжатли ва хроникал кинофильмларни тижорат ва нотижорат асосларда алмашиш;

в) биргаликда фильмлар ишлаб чиқариш:

г) бир Томоннинг иккинчи Томон давлати ҳудудида фильмлар яратишида ва киноматериаллар тайёрланаётганда ёрдам кўрсатиш;

д) делегациялар ва кинематография соҳасида ишловчи алоҳида мутахассисларни ўзаро алмашиш, бунда ёш кинематографчилар ўртасидаги алоқаларни ривожлантиришга алоҳида эътибор берилиши лозим;

е) бошқа мамлакатда ўтказилаётган халқаро кинофестивалларда қатнашиш;

ж) бир Томоннинг иккинчи Томон ўтказаётган (халқаро, минтақавий ва ҳудудий) кино бозорларида қатнашиш.

Телевидения ва радиоэшиттириш соҳасида иккала мамлакат ўртасидаги ҳамкорликни қуйидаги йўллар билан рағбатлантирадилар:

а) теле ва радиодастурларни ўзаро алмашиш;

б) теле ва радиоматериалларни биргаликда чиқариш;

в) бир Томоннинг иккинчи Томон томонидан телерадиоматиераллар яратишда кўмаклашуви:

г) телевидения ва радио соҳасида ишловчи мутахассисларни ўзаро алмашиш.

Томонлар иккала мамлакат журналистлари ташкилотлари ва матбуот ва ахборот органлари ўртасидаги ўзаро алоқаларни рағбатлантирадилар ва уларнинг касб мажбуриятларини, шу жумладан, ишчанлик алоқалари ўрнатишлари учун журналистларга имкониятлар яратиб берадилар.

Гуманитар ва табиий фанлар соҳасидаги ҳамкорликка катта аҳамият бериб, Томонлар илмий-тадқиқот ишлари олиб бориш, келишилган мавзу бўйича маърузалар ўқиш, иккала мамлакатнинг тегишли илмий муассасалари фаолияти ва ютуқлари билан танишиш учун олимлар, илмий жамиятлар вакилларини ва бошқа мутахассисларни ўзаро алмашишга, шунингдек, юқорида эслатиб ўтилган соҳалардаги илмий мақолалар ва нашрларни ўзаро алмашишга ҳар томонлама кўмаклашадилар

Томонлар олий, ўрта, ҳунар-техника таълими ва маориф соҳасидаги алоқаларни қуйидаги йўллар билан ривожлантиришни рағбатлантирадилар:

а) таълим ва ўқитишнинг қўйилиши билан танишиш учун, шунингдек, машғулотлар ва маърузалар ўқишни ўтказиш учун ўқитувчилар ва бошқа мутахассисларни ўзаро алмашиш;

б) ўқитиш, малака ошириш ва илмий тадқиқотлар учун гуманитар ва табиий фанлар соҳасидаги талабалар, аспирантлар ва бошқа илмий ходимларни ўзаро алмашиш;

в) мактаб ёшидаги болаларни, шунингдек, студентларни ўқитиш ва мутахассисларнинг малакасини ошириш учун стипендиялар бериш имкониятларини қидириб топиш;

г) иккала мамлакат тилини ва адабиётини ўрганишга кўмаклашиш;

д) ўқув ва услубий адабиётлар, ўқув ва кўргазмали қуролларни ўзаро алмашиш.

Томонлар таълим миллий тизимини ривожлантириш тўғрисида мунтазам равишда бир-бирларига ахборот бериб турадилар. Томонлар таълим муаммолари бўйича қўшма ахборот банки ташкил этишни мақсадга мувофиқ деб ҳисоблайдилар, унинг ташкилий принциплари махсус протоколда айтиб ўтилади.

Томонлар Ўзбекистон Республикаси ва Грузия Республикаси ёшлари ва ёшлар ташкилотлари ўртасидаги ҳамкорлик ва алоқаларни, ўзаро делегациялар алмашишни, талабалар кечалари ва спорт мусобақалари, болалар расмлари кўргазмаси, шунингдек, бошқа қўшма чора-тадбирлар ўтказишни рағбатлантирадилар.

Томонлар икки йилда камида бир марта навбати билан Ўзбекистон Республикасида ва Грузия Республикасида учрашиб турадиган ишчи Комиссиясини таъсис этадилар.

Комиссия мажбуриятига мазкур Битимнинг қандай бажарилаётганлигини кўриб чиқиш, ўзаро мақбуллик асосида Ўзбекистон Республикаси ва Грузия Республикаси ўртасида ҳамкорлик қилишнинг икки томонлама ҳукуматлараро дастурларини ишлаб чиқиш киради.

Мазкур Битим беш йил муддатга тузилади.

Агар Томонлардан бири ушбу Битим муддати тугагунга қадар олти ой олдин унинг амалда бўлишини тўхтатиш тўғрисида ўз хоҳишини ёзма ҳолда билдирмаса, Битимнинг амалда бўлиши кейинги беш йилликлар даврига ёки навбатдаги беш йиллик даврга ўз-ўзидан узаяверади.

Битим 1995 йил 4 сентябрда, Тошкент шаҳрида, икки нусхада, ўзбек, грузин ва рус тилларида тузилди, барча матнлар бир хил кучга эгадир. Битим қоидаларини талқин қилиш учун рус тилидаги матндан фойдаланилади.