Ўзбекистон Республикаси Ҳукумати ва Грузия Республикаси Ҳукумати, бундан кейин Томонлар деб аталадилар,
алоқа соҳасида ўзаро фойдали ҳамкорликни ривожлантиришга, иккала давлатдаги электр ва почта алоқалари тармоқлари ва воситаларининг узлуксиз ишлаб туришини таъминлашга, шунингдек ушбу соҳадаги ҳуқуқий бошқаришни такомиллаштиришга интилиб,
Томонлар алоқа соҳасидаги ўз муносабатларини умумий қабул қилинган нормалар ва халқаро ҳуқуқ принципларига, Жаҳон Почта иттифоқи ҳужжатлари қоидаларига ва Халқаро электр алоқаси иттифоқининг тавсияномаларига мувофиқ ўрнатадилар.
Мазкур Битим, шунингдек Ўзбекистон Республикаси ва Грузия Республикаси қатнашчиси ҳисобланган халқаро битимлар билан тартибга солинмаган масалалар давлатлардан ҳар бирининг қонунчилигига мувофиқ икки томоннинг розилигига кўра ҳал этилади.
Томонлар ўз ваколатлари ва имкониятлари ҳажмида Ўзбекистон Республикаси ва Грузия Республикаси қонунчилиги талабларига мувофиқ ҳаракат қилиб, почта ва электр алоқаси соҳасидаги ҳамкорликни давом эттирадилар ва кенгайтирадилар.
Томонлар ўз давлатлари ҳудудларида эгаларига юбориладиган почта жўнатмаларини узлуксиз қабул қилишни, улар билан ишлашни, ташиш ва етказиб беришни таъминлайдилар, шунингдек, белгиланган тартибда рўйхатдан ўтган даврий нашрларни тарқатиш юзасидан ўзаро хизматларни тақдим этадилар.
Томонлар ўз давлатлари ҳудудлари орқали ўтадиган барча турдаги электр алоқалари, почта жўнатмалари ва махсус алоқалар телевидения ва радиоэшиттириш дастурларининг транзит масалаларини ўзаро фойдали шартларда ҳал қиладилар.
Мазкур Битимни бажаришдан келиб чиқадиган ҳисоб-китоблар ва тўловлар Томонларнинг Алоқа маъмуриятлари ўртасида амалда бўлган битимларга мувофиқ амалга оширилади.
Давлатлараро хабарлар ва ахборотларни узатишнинг технология жараёнларида Томонлар алоқа корхоналарида ягона ҳисобга олиш-ҳисобот вақтини — Москва вақтини қўлланадилар.
Томонлар амалдаги технология жараёнларига мувофиқ оператив-техник бошқариш тизимларининг ўзаро ҳаракат қилиши тўғрисида аҳдлашиб олдилар.
Томонлар фавқулодда ҳолатларда хабарларни алоқа воситалари орқали устун даражада узатишни таъминлайдилар.
Тиклаш ишларини олиб боришда ўзаро ҳамкорлик қилиш тартиби Томонларнинг алоқа маъмуриятлари томонидан ишлаб чиқилади ва тасдиқланади.
Томонлар учинчи давлатларда ва тегишли халқаро ташкилотларда Томонларнинг алоқа маъмуриятлари фаолиятига тўсқинлик қилувчи ёки уни қийинлаштирувчи камситадиган чораларни бир-бирларига нисбатан қўлламайдилар.
Томонлар шу ҳақда аҳдлашиб олдиларки, хизмат кўрсатишда қатнашувчи барча алоқа корхоналари ўз вақтида ва сифатли хизмат кўрсатилиши учун истеъмолчилар олдида баб-баравар жавоб берадилар ва халқаро алоқаларнинг сифатсиз иши юзасидан шикоятларни кўриб чиқиш тартиби Жаҳон Почта иттифоқи ва Халқаро электр алоқаси норматив ҳужжатларига мувофиқ белгиланиши зарурлигини тан олдилар.
Томонлар алоқа корхоналарининг телефончилари, телеграфчилари, техника ва почта ходимлари ўртасида хизмат ахборотларини айирбошлаш, шунингдек хизмат ҳужжатларини айирбошлаш учун рус тилидан фойдаланишни келишиб олдилар.
Томонларнинг давлатлари ўртасида юбориладиган почта жўнатмалари ва телеграммаларнинг манзиллари рус тилида расмийлаштирилади.
Томонлар шуни белгилаб қўйдиларки, агар Томонларнинг давлатлари ўртасидаги битимларда алоқа соҳасидаги муносабатларда пайдо бўладиган баҳсларни ҳал қилиш тартиби айтиб ўтилмаган бўлса, Томонларни алоқа маъмуриятлари ушбу тартибни ўзлари ўртасида тузилган шартномаларда мустақил равишда белгилайдилар.
Мазкур Битим Томонларнинг ўзлари томонидан тузилган бошқа халқаро шартномаларидан келиб чиқадиган ҳуқуқ ва мажбуриятларига дахл қилмайди.
Мазкур Битим имзоланган кундан бошлаб кучга киради ва Томонлардан бири унинг амалда бўлишини тўхтатиш ҳақида ўз ниятини ёзма ҳолда иккинчи Томонга билдирган кундан бошлаб 90 кун ўтганга қадар амалда бўлади.