Қишлоқ товар етиштирувчиларини пахта ва бошоқли дон экинларининг ўз сифат параметрлари бўйича жаҳон бозори талабларига жавоб берадиган тезпишар ва серҳосил навларини экишни кенгайтирганлик ва етиштиришни кўпайтирганлик, уларнинг ҳосилдорлиги ва сифатини оширганлик учун рағбатлантиришни кучайтириш, пахтачилик ва ғаллачилик хўжаликларининг молиявий аҳволини мустаҳкамлаш мақсадида Вазирлар Маҳкамаси қарор қилади:

1. Қуйидагилар:

2001 йил ҳосили пахта хом ашёси харид нархлари 1-иловага ва бошоқли экинлар дони харид нархлари 2-иловага мувофиқ;

пахта хом ашёси учун унинг сифат кўрсаткичларини ҳисобга олган ҳолда ҳисоб-китоб қилиш тартиби 3-иловага мувофиқ тасдиқлансин.

2. Белгилаб қўйилсинки, стандарт талабларига жавоб бермайдиган пахта хом ашёси учун ҳақ тўлаш ушбу қарорга 3-иловада белгиланган тартибда харид нархларидан чегиришлар билан амалга оширилади. «Микронейр» кўрсаткичи халқаро стандартлар билан белгиланган чегаралар (3,5 — 4,9)дан 0,5 пунктдан ортиқ фарқ қилган тақдирда биринчи нав пахта хом ашёси учун учинчи нав нархи бўйича, иккинчи нав пахта хом ашёси учун тўртинчи нав нархи бўйича ҳақ тўланади.

3. 2001 йил учун пахта толаси давлат харидлари ҳажми уни ишлаб чиқариш ҳажмининг 30 фоизи миқдорида, прейскурант нархлар бўйича давлат эҳтиёжлари учун бошоқли экинлар дони харид қилиш ҳажми эса уни етиштириш белгиланган ҳажмининг 25 фоизи миқдорида сақлаб қолинганлиги маълумот учун қабул қилинсин.

Белгилансинки, тасдиқланган давлат харидлари ҳажмидан ортиқча ишлаб чиқарилган пахта толаси, пахта хом ашёси тайёрлаш бўйича топшириқ бажарилган тақдирда, шунингдек белгиланган давлат харидлари ҳажмидан ортиқча харид қилинган бошоқли экинлар дони шартномавий нархларда сотилади.

4. Ғўзанинг энг истиқболли навлари майдонларини кенгайтирганлик учун рағбатлантириш мақсадида пахта хом ашёсининг 2001 йилда навларни жойлаштириш учун тасдиқланган барча селекция навлари 4-иловага мувофиқ уч гуруҳга бўлиниши белгилаб қўйилсин.

Белгилансинки, пахта хом ашёси учун ҳисоб-китоб қилишда ушбу қарор билан тасдиқланган харид нархларига I гуруҳга киритилган селекция навларига 1,01, II гуруҳга 1,0 ва III гуруҳга 0,96 миқдорида тузатиш коэффициентлари қўлланади.

Маркетинг ишларини, пахтанинг жаҳон бозорида талаб катта бўлган истиқболли навларини ривожлантиришни рағбатлантиришга доир таклифларни ишлаб чиқиш бўйича ишларни ташкил этиш учун 5-иловага мувофиқ таркибда Идоралараро мувофиқлаштирувчи кенгаш тузилсин.

5. Ўзбекистон Республикаси Молия вазирлиги, Қишлоқ ва сув хўжалиги вазирлиги, «Ўздавпахтасаноатсотиш» уюшмаси ҳамда «Ўздонмаҳсулот» давлат корпорацияси икки ҳафта муддатда ушбу қарор билан белгиланган харид нархлари даражаларини ва ҳисоб-китоб қилиш тартибини тасарруфларидаги таркибий тузилмаларга ҳамда пахта ва бошоқли экинлар дони етиштирувчиларга етказсинлар.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С. Азимов ва Т. Холтоев зиммасига юклансин.

1. Тасдиқланган нархлар қишлоқ хўжалиги кооперативлари (ширкатлари), фермер, деҳқон хўжаликлари, ижарачилар ва бошқа қишлоқ хўжалиги товар ишлаб чиқарувчилари томонидан сотиладиган РСТ Ўз 615-94 талабларига жавоб берадиган пахта хом ашёсига жорий этилади.

2. Пахта хом ашёсини харид қиладиган тайёрловчи ташкилотлар уни ташиш ва тушириш бўйича барча харажатларни тўлайдилар.

Пахта хом ашёси ширкат, фермер, деҳқон хўжалиги, ижарачилар ва бошқа қишлоқ хўжалиги корхоналари, кооператив корхоналар ва ташкилотлар транспорти билан етказиб берилганда пахта хом ашёсини харид қиладиган тайёрловчи ташкилотлар хўжаликларнинг уни ташиш ва тушириш харажатларини шартнома тарифлари бўйича тўлайдилар. Пахта хом ашёсини харид қиладиган тайёрловчи ташкилотларнинг қўшимча талабларига риоя қилган ҳолда пахта хом ашёсини жўнатиш билан боғлиқ харажатлар мазкур тайёрловчи ташкилотлар ҳисобидан тўланади.

Пахта хом ашёсини норматив кўрсаткичларгача етказиб қуритиш ва тозалаш хизматларига ҳақ пахта топширувчи томонидан шартнома тарифлари бўйича қўшимча равишда тўланади.

3. I, II, III ва IV навларнинг 1 ва 2-класс пахта хом ашёсининг ҳақиқий намлиги РСТ Ўз-615-94 3-жадвалида белгиланган нормадан юқори, лекин 3-класс нормаларидан юқори бўлмаганда, бу пахта хом ашёси учун тегишли тип, нав, классдаги пахта хом ашёсининг харид нархидан нормадан ортиқ ҳар бир фоиз учун 0,5 фоиз миқдорида чегирма билан ҳақ тўланади.

Ифлосланганлик ёки намлик I, II, III ва IV навлар бўйича 3-класс учун белгиланган нормалардан ошиб кетганда пахта хом ашёси топширувчига қайтарилади ёки бу пахта хом ашёси учун бир нав паст пахта хом ашёсининг харид нархи бўйича ҳақ тўланади.

Ифлосланганлиги ёки намлиги 22 фоиз нормадан юқори бўлган V нав пахта хом ашёсини қабул қилиб олишда тегишли типнинг харид нархидан нормадан ортиқ ифлосланганлик ёки намликнинг ҳар бир фоизи учун 0,5 фоиз миқдорида чегириб қолинади.

Намлик ва ифлосланганлик нормативдан ортиқ бўлганда айни бир вақтда нархдан умумлаштирилган ҳолда чегириб қолинади.

4. I ва II нав пахта хом ашёсининг солиштирма узилиш қуввати белгиланган (РСТ Ўз 615-94 1-жадвалидаги) нормалардан паст бўлганда тегишли тип, нав, класс пахта хом ашёси харид нархидан чегириб қолинади, солиштирма узилиш қуввати базавий нормадан ортиқ бўлганда эса I нав учун харид нархига ҳар бир гс/текс. учун 0,5 фоиз миқдорида устама тўланади.

Ҳисоб-китоблар пахта хом ашёси қайта ишлангандан сўнг амалга оширилади.

5. Пахта хом ашёси «асал шудринг» касаллиги билан ҳар қандай даражада ёки бактериал-замбуруғ билан паст даражада касалланган бўлса унинг нархидан 3,5 фоиз миқдорида чегирган ҳолда ҳақ тўланади.

Бактериал-замбуруғ билан ўртача даражада касалланган пахта хом ашёси пасайтирилган навга ўтказилади ва унга пасайтирилган навнинг харид нархи бўйича ҳақ тўланади.

Пахта хом ашёси бактериал-замбуруғ билан кучли даражада касалланган бўлса унга шартномавий нарх бўйича ҳақ тўланади.

6. «Микронейр» кўрсаткичи белгиланган нормалардан юқори ёки паст (3,5 дан 4,9 гача) бўлган I-II нав пахта хом ашёсининг харид нархидан қуйидаги шкалага мувофиқ чегириб қолинади:

«Микронейр» кўрсаткичи 0,5 пунктдан ошиб кетганда I нав пахта хом ашёси учун III нав нархи бўйича, II нав пахта хом ашёси учун — IV нав нархи бўйича ҳақ тўланади.

Кўрсатиб ўтилган чегиришлар пахта хом ашёсини қайта ишлашнинг ҳақиқий натижалари бўйича узил-кесил ҳисоб-китоблар вақтида амалга оширилади.

7. Уруғлик чигит етиштирувчи илмий муассасалар ва хўжаликларга уруғликнинг унувчанлиги 1 классга мувофиқ бўлганда Ўзбекистон Республикаси Вазирлар Маҳкамасининг 1998 йил 25 ноябрдаги 491-сон қарорига мувофиқ харид нархига қуйидаги миқдорда устама ҳақ тўланади:

Уруғлик чигитлар унувчанлиги бўйича иккинчи классга мансуб бўлганда устама ҳақ тегишли равишда икки баравар камаяди.

Устама ҳақ тўлаш учун уруғлик чигит етиштирувчи хўжаликлар ва пахта заводлари рўйхати Ўзбекистон Республикаси Қишлоқ ва сув хўжалиги вазирлиги, «Ўздавпахтасаноатсотиш» уюшмаси ва Ўзбекистон Республикаси қишлоқ хўжалиги экинлари навларини синаш давлат комиссиясининг тақдимномасига кўра ҳар йили Ўзбекистон Республикаси Молия вазирлиги томонидан тасдиқланади.