Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг 2013 йил биринчи ярим йиллигидаги ижроси тўғрисидаги ҳисоботни кўриб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат бюджетининг 2013 йил биринчи ярим йиллигидаги ижроси тўғрисидаги ҳисобот тасдиқлансин.

Таъкидлаб ўтилсинки, 2013 йилнинг биринчи ярим йиллигида Давлат бюджети даромадлари унинг харажатларидан 68,7 млрд cўм миқдорида ортиқ бўлишига эришилди ёки Давлат бюджети ялпи ички маҳсулотга нисбатан 0,1 фоиз миқдорида профицит билан ижро этилди.

2. Ўзбекистон Республикаси Вазирлар Маҳкамаси мамлакатни ижтимоий-иқтисодий ривожлантиришнинг 2013 йилги дастурининг энг муҳим устувор вазифаларини амалга ошириш мақсадида:

белгиланган макроиқтисодий кўрсаткичларга эришиш, бозор ислоҳотлари ва иқтисодиётни либераллаштиришни янада чуқурлаштириш;

самарали инвестиция сиёсатини ўтказиш, ишлаб чиқаришни модернизация қилишга, техник ва технологик жиҳатдан янгилашга қаратилган стратегик аҳамиятга молик инвестиция лойиҳаларини амалга ошириш;

солиқ тушумлари механизмини мақбуллаштириш ва такомиллаштириш;

банк тизимининг ресурслар базасини кўпайтириш ва банкларнинг инвестициявий фаоллигини кучайтириш;

кичик бизнес ва хусусий тадбиркорликни ривожлантириш учун энг юқори даражада қулай ишчанлик муҳитини яратиш;

бюджет маблағларидан мақсадли фойдаланиш ҳамда бюджет интизомига риоя этиш устидан назоратни кучайтириш;

ижтимоий соҳа ва аҳолини ижтимоий қўллаб-қувватлаш учун харажатларни ўз вақтида молиялаштириш;

«Обод турмуш йили» Давлат дастурини амалга ошириш;

кичик бизнес ва хусусий тадбиркорликни янада ривожлантириш, касаначиликнинг турли шаклларини кенгайтириш ва оилавий тадбиркорликни ривожлантириш, шунингдек касб-ҳунар коллежлари ва академик лицейлар битирувчиларини ишга жойлаштириш ҳисобига 2013 йилда Иш ўринлари ташкил этиш ва аҳоли бандлигини таъминлаш дастурини бажариш бўйича зарур чора-тадбирларни кўрсин.

3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг эътибори иқтисодий ўсиш суръатларининг барқарорлигини таъминлашга ҳамда шу асосда тегишли бюджетларга солиқлар ва бошқа мажбурий тўловларнинг тўлиқ тушишига эришилишига, бюджет маблағларидан мақсадли ва самарали фойдаланилишига қаратилсин. Бюджет интизомига риоя этиш ва минтақаларнинг молиявий салоҳиятидан энг юқори даражада фойдаланиш юзасидан амалий чоралар кўриш устидан назорат кучайтирилсин.

4. Ушбу Қарор қабул қилинган кундан эътиборан кучга киради.