Чиқиндиларни фуқаролар ҳаёти ва соғлиғига, атроф-муҳитга зарарли таъсирини олдини олиш, чиқиндилар ҳосил бўлишини камайтириш, шаҳар ҳудудини экологик ҳамда санитария ҳолатини, тозалигини таъминлаш мақсадида, Ўзбекистон Республикасининг 2002 йил 5 апрелдаги «Чиқиндилар тўғрисида»ги 362-II-сонли Қонунининг 11 — 16-моддалари, Ўзбекистон Республикаси Бош вазири томонидан 14.09.2012 йилда тасдиқланган Вазирлар Маҳкамасининг 194-сонли йиғилиш баёнига ва «Маҳаллий давлат ҳокимияти тўғрисида»ги Қонунининг 6, 25-моддаларига асосан қарор қиламан:

1. Шаҳар ҳудудидаги барча маҳалла фуқаролар йиғинларида фуқаролар томонидан чиқарилаётган маиший чиқиндиларни, кўп қаватли уйлар олдига қурилган вақтинчалик чиқинди йиғиш жойларидан ва маҳаллалардан «Сигнал» тартибида ташиб чиқиб кетиш ташкил этилсин.

2. Мулкчилик шаклидан қатьи назар, барча корхона, ташкилот, ўқув юртлари, мактаб ва мактабгача таълим муассасалари, бирлашмалар ҳамда маҳалла фуқаролар йиғинлари раисларига:

ўзларига бириктирилган ҳудудларни экологик шароити ҳамда санитария ҳолатини яхшилаш, чиқиндиларни ўз вақтида олиб чиқиб кетиш учун ўрнатилган тартиб асосида ҳақ тўлашни таъминлаш юзасидан шаҳар Коммунал фойдаланиш бошқармаси ва «Махсус автокорхона» МЧЖ билан шартнома тузиш, келгусида тўловларни вақтида тўлаб боришликни таъминлаш вазифаси юклатилсин.

3. Маиший чиқиндиларни тўплаб олиб кетиш хизматидан фойдаланганликлари учун аҳоли жон бошига ҳамда савдо, маиший хизмат шохобчалари, овқатланиш жойлари ва ҳоказоларга ҳақиқий харажатларидан келиб чиқиб белгиланган меъёрлар асосида тўлов миқдори белгилансин.

4. Шаҳар «Маҳалла» жамоат фонди (Р. Махаммеджонов) ва маҳалла фуқаролар йиғинлари раисларига:

маиший чиқиндиларни самарали ва ўз вақтида олиб чиқиб кетишни ташкил этиш ҳамда хизматлар учун тўловларни тартибга солиш мақсадида аҳоли учун янги квитанцияли тўлов тизими жорий этиш;

шаҳардаги барча маҳалла фуқаролар йиғинидан, маиший хизмат кўрсатиш шохобчаларидан, корхона ва ташкилотлардан чиқадиган маиший чиқиндиларни олиб чиқиб кетишни ташкил этиш ва хизматлар учун тўловни тартибга солиш қоидалари ишлаб чиқиш, марказий кўчаларга фуқаролар томонидан ахлат чиқиндиларини чиқармаслик чораларини кўриш;

кўп қаватли уйлар жойлашган маҳалла фуқаролар йиғинлари ҳудудларида шаҳар архитектураси ва қурилиш бошқармаси, ДСЭНМ билан келишилган ҳолда вақтинча ахлат йиғиш жойлари ташкил этиш;

маҳалла фаолларидан жамоатчи назоратчи гуруҳлар ташкил этилиб, улар ёрдамида маҳалланинг доимо тоза ва озода сақланиши, белгиланмаган жойларига ахлат ташланиши ва марказий шоҳ кўчаларига ахлат чиқиндиларини тўкиш ҳолатларига чек қўйиш вазифалари юклатилсин.

5. Коммунал фойдаланиш бошқармаси (Р. Абдуллаев) ва «Махсус автокорхона» МЧЖ ( И. Расулов)га:

маҳалла фуқаролар йиғинлари ҳудудларидан ахлат ва чиқиндиларни олиб кетилишини таъминлаш учун етарли транспорт воситаларини ўз вақтида етказиб бериш;

ахлат йиғиштириш бўйича харажат сметалари белгиланган тартибда қайта кўриб чиқиш;

кўрсатилган хизматлардан тушган маблағларни корхонани ривожлантириш, ёқилғи-мойлаш маҳсулотлари ва эҳтиёт қисмлар сотиб олиш, ишчи хизматчиларни рағбатлантириш учун сарфлаш;

барча хўжалик юритувчи субъектлардан «Зарарсиз чиқиндиларнинг вужудга келиши меъёрлари» асосида ҳисоб-китобларни юритиш вазифалари юклатилсин.

6. Шаҳар ИИБ (С. Сайидмусаев), Табиатни муҳофаза қилиш инспекцияси (Д. Орипов)ларга:

ахлат ва чиқиндиларни олиб чиқиб ташлаш тартибини бузган юридик ва жисмоний шахсларга нисбатан аниқланган ҳолатлар бўйича белгиланган тартибда тегишли ҳужжатлар расмийлаштирилиб маъмурий тартибда жавобгарликка тортиш чораларини кўрсинлар.

7. «Қўқон садоси» ва «Знамя труда» рўзномалари бирлашган таҳририяти, «Мулоқот» ТВ (Х. Шерматов)ларга:

мазкур қарорнинг ижроси юзасидан мақолалар чоп этиш, кўрсатувлар намойиш этиш вазифаси юклатилсин.

8. Мазкур қарорнинг қабул қилиниши муносабати билан шаҳар ҳокимининг 2005 йил 20 декабрдаги 430-сонли қарори бекор қилинсин.

9. Ушбу қарорнинг ижросини назорат қилиш шаҳар ҳокимининг ўринбосари Д.М. Мирзажонова зиммасига юклатилсин.