Ўзбекистон Республикаси Ҳукумати ва Хитой Халқ Республикаси Ҳукумати, бундан кейин Томонлар деб аталувчилар,

атроф-муҳит муаммосининг минтақавий ва дунё миқёсидаги хусусиятини, халқаро ҳамкорлик орқали юқори самарали ва мустаҳкам ечимларни ахтаришни кечиктириб бўлмаслигини ва икки давлатнинг биргаликдаги ҳаракатларини мувофиқлаштиришнинг муҳимлигини тан олиб,

1992 йилдаги Атроф-муҳит ва ривожланиш тўғрисидаги Рио-де-Жанейро декларацияси томонидан белгиланган мақсад ва принципларга мувофиқ,

атроф-муҳитни муҳофаза қилиш соҳасидаги Томонлар ўртасидаги ҳамкорликни ўзаро фойдалигига ва икки давлат ўртасидаги дўстона муносабатларнинг янада ривожланишига кўмаклашишига ишонч ҳосил қилиб,

қуйидагилар ҳақида келишдилар:

Томонлар тенглик, ўзаро ҳаракат ва ўзаро фойда асосида атроф-муҳитни муҳофаза қилиш ва табиатдан оқилона фойдаланиш билан боғлиқ икки томонлама ҳамкорликни амалга оширадилар ва ривожлантирадилар.

Томонлар қуйидаги соҳаларда ҳамкорлик қиладилар:

1. Сув ва ҳавонинг ифлосланиши мониторинги технологиялари.

2. Табиатни муҳофаза қилиш илми ва технологиялари тадқиқотлари.

3. Экологик таълим, мутахассисларни тайёрлаш ва тарғибот.

4. Табиатни муҳофаза қилиш районларини бошқариш ва биологик турларни ҳимоя қилиш.

5. Экологик тоза ишлаб чиқариш технологияси.

6. Табиий ресурслар ва атроф-муҳитни муҳофаза қилиш соҳасидаги қонунлар, қонун-қоидалар, сиёсат ва стандартлар, шу жумладан саноат ишлаб чиқариши ва маҳсулотлари учун экологик стандартлар.

7. Томонлар келишиб олган атроф-муҳитни муҳофаза қилиш ва яхшилашга тааллуқли ҳамкорликнинг бошқа соҳалари.

Томонлар ўртасидаги ҳамкорлик қуйидаги шаклларга эгадир:

1. Мавжуд маълумот ва материаллар билан алмашиш.

2. Экспертлар, олимлар, делегация ва стажёрлар билан алмашиш.

3. Олим эксперт, ходимларни ва табиатни муҳофаза қилиш фаолияти билан машғул бошқа кишиларни жалб этган ҳолда семинар, симпозиум ёки бошқа учрашувларни ўзаро ташкил этиш.

4. Келишилган ҳамкорлик дастурлари, жумладан қўшма тадқиқотлар.

5. Томонлар келишган ҳамкорликнинг бошқа турлари.

Томонлар ушбу Битимни амалга ошириш учун табиатни муҳофаза қилиш агентликлари, атроф-муҳитни муҳофаза қилиш ишларига жалб этилган икки давлат ташкилот ва корхоналари ўртасида бевосита алоқа ва муносабатларнинг ўрнатилиши ва ривожланишини рағбатлантирадилар. Томонлар юқорида айтиб ўтилган ташкилотлар ўртасидаги битимлар бўйича масъул бўлмайдилар.

Ушбу Битим юзасидан амалга ошириш ва мувофиқлаштириш ишларини ташкил этиш учун қуйидаги ҳукумат ташкилотлари масъулдирлар:

Ўзбекистон томонидан — Ўзбекистон Республикаси Табиатни муҳофаза қилиш давлат қўмитаси;

Хитой томонидан — Хитой Халқ Республикаси Атроф-муҳитни муҳофаза қилиш давлат бошқармаси.

Ушбу Битим имзоланган кундан бошлаб олти ой мобайнида Битимнинг тегишли масалалари билан боғлиқ алоқаларни қўллаб-қувватлаш, ушбу Битимнинг бажарилишини назорат қилиш ва баҳолаш, белгиланган муддатга ҳамкорлик дастурларини аниқлаш ва, зарурият бўлган ҳолда ушбу Битим доирасида ҳамкорликни мустаҳкамлашнинг махсус методларини ўрнатиш учун Томонлар битта ёки ундан ортиқ мувофиқлаштирувчиларни тайинлайдилар.

Одатга кўра, мувофиқлаштирувчилар ҳар йиллик учрашувларни навбат билан Ўзбекистон Республикасида ва Хитой Халқ Республикасида доимий равишда ўтказадилар. Айтилган учрашувлар қатнашчиларининг халқаро транспорт ҳаракати харажатларини юбораётган Томон қоплайди. Учрашув бўйича харажатларни ўзаро келишув асосида қабул қилаётган Томон қоплайди.

Ушбу Битим доирасидаги ҳамкорликка тегишли жамғармалар ва бошқа ресурслардан фойдаланади, ҳар бир давлатнинг қонунлари ва ҳуқуқий қоидаларига асосланади.

Ушбу Битимдаги ҳеч нарса Томонларнинг бошқа халқаро битимларидан келиб чиқадиган ҳуқуқ ва мажбуриятларига таъсир этмайди.

Ушбу Битимга Томонларнинг ўзаро ёзма равишдаги розилиги бўйича ушбу Битимнинг ажралмас қисми бўлиб ҳисобланувчи Иловада расмийлаштирилган ўзгартиш ва қўшимчалар киритилиши мумкин.

Ушбу Битим имзоланган кундан бошлаб кучга киради ва беш йил мобайнида амал қилади. Агарда Томонлардан ҳеч бири ушбу Битимнинг амал қилиш муддати тугашидан камида олти ой илгари уни денонсация қилиш истаги тўғрисида ёзма равишда хабардор қилмаса, ушбу Битим кейинги беш йиллик даврга ўз-ўзидан узайтирилади.

Пекин шаҳрида, 1997 йил 11 декабрда икки нусхада ўзбек, хитой ва инглиз тилларида тузилди, барча матнлар бир хилдир. Матнлар ўртасида келишмовчиликлар бўлган ҳолда инглиз тилидаги матн устувор бўлади.