Ишлаб чиқариш-техника буюмлари парчалари ва рангли металлар чиқиндилари ўғирланиши ҳамда ноқонуний олиб чиқиб кетилишининг олдини олиш, республиканинг иқтисодий манфаатларини ҳимоя қилиш, шунингдек қимматли хом ашё ресурсларидан оқилона фойдаланиш мақсадида:

1. Ўзбекистон Республикаси Президентининг 1999 йил 5 февралдаги ПФ-2212-сон Фармонига мувофиқ рангли металлар парчалари ва чиқиндиларини Ўзбекистон Республикасидан ташқарига олиб чиқиб кетиш тақиқланганлиги қайд этиб ўтилсин.

2. Ўзбекистон Республикаси Давлат божхона қўмитаси Ўзбекистон Республикаси Ички ишлар вазирлиги ва Давлат чегараларини ҳимоя қилувчи қўмита билан биргаликда ишлаб чиқариш-техника буюмлари парчалари ва рангли металлар чиқиндиларининг чегара яқинидаги темир йўллар ва Ўзбекистон Республикаси Давлат чегараси бўйлаб жойлашган автомобиль ўтиш ва айланиб ўтиш йўллари орқали қонунга зид равишда олиб чиқиб кетилишини бартараф этиш юзасидан қатъий тезкор чора-тадбирлар кўрсин.

3. Белгилансинки, фақат «Ўзбекистон лом, рангли металлар парчалари ва чиқиндиларини тайёрлаш ва қайта ишлаш заводи» АЖ Ўзбекистон Республикаси ҳудудида рангли металлар парчалари ва чиқиндиларини тайёрловчи ваколатли орган ҳисобланади.

4. Жисмоний шахсларга лом ва рангли металлар парчалари ва чиқиндиларини тайёрлаш тақиқлансин.

Белгилансинки, «Ўзиккиламчиранглиметал» АЖ ва унинг таркибий тузилмалари жисмоний шахслардан рангли металларнинг маиший ломини, шу жумладан, фойдаланиш учун мўлжалланган асбоблар ва ускуналар, шунингдек, Ҳукумат қарори билан тасдиқланган рўйхат бўйича лом ва рангли металлар парчалари ва чиқиндиларини махсус қабул пунктлари орқали қабул қилинишини амалга оширадилар.

5. Ўзбекистон Республикаси Иқтисодиёт вазирлиги ҳамда «Ўзбекистон лом, рангли металлар парчалари ва чиқиндиларини тайёрлаш ва қайта ишлаш заводи» АЖ иккиламчи алюминийни ҳамда рангли металлар парчалари ва чиқиндиларини тақсимлаш чоғида халқ истеъмол моллари ишлаб чиқарувчи кичик бизнесга тегишли қайта ишлаш корхоналари эҳтиёжларини белгиланган тартибда назарда тутсинлар.

«Ўзбекистон лом, рангли металлар парчалари ва чиқиндиларини тайёрлаш ва қайта ишлаш заводи» АЖ халқ ҳунармандчилиги ва амалий санъатни қўллаб-қувватлаш ҳамда ривожлантириш учун рангли металл парчалари ва чиқиндиларини сотишга рухсат этилсин.

6. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда рангли металлардан тайёрланган ишлаб чиқариш-техника буюмларини ўғирлаш, рангли металлар парчалари ва чиқиндиларини сотиб олиш ва ноқонуний равишда олиб чиқиб кетиш, ҳаво ва кабель линиялари ҳамда электрузаткичларга қасддан зарар етказганлик учун жиноий жавобгарликни кучайтириш тўғрисидаги таклифлар киритсин.

7. Ўзбекистон Республикаси Прокуратураси рангли металлар парчалари ва чиқиндиларини тўплаш, тайёрлаш, сақлаш ва сотиш юзасидан назоратни кучайтирсин, рангли металлар парчалари ва чиқиндилари билан муомала қилиш бўйича ҳар бир ноқонуний хатти-ҳаракат юзасидан батафсил текшириш ўтказиб, айбдор шахсларни қонунчиликка мувофиқ равишда жавобгарликка тортсин.

8. Ўзбекистон Телерадиокомпанияси, Ўзбекистон Миллий ахборот агентлиги, оммавий ахборот воситалари аҳоли ўртасида рангли металлар парчалари ва чиқиндилари билан ноқонуний муомала қилиш ва уларни республика ҳудудидан олиб чиқиб кетиш, ҳаво ва кабел алоқа линиялари ҳамда электрузаткичларга қасддан зарар етказиш учун жавобгарлик ҳақида кенг тушунтириш ишларини олиб борсин.