Бундан кейин Томонлар деб аталаётган Ўзбекистон Республикаси Ҳукумати ва Грузия Ҳукумати,
Томонлар таълим тизимларининг тенг ҳуқуқлик, мустақиллик ва яхлитлик принципларидаги ўзаро манфаатли ҳамкорлигини янада мустаҳкамлаш ва ривожлантиришга ҳар икки томон интилишини изҳор этиб,
ўзларининг таълим сиёсатидаги ўзаро муносабатларда умуминсоний қадриятларнинг, Инсон ҳуқуқларининг умумий баённомасининг, Бола ҳуқуқлари тўғрисидаги конвенциянинг сўзсиз устуворлигини тан олиб ва уларнинг амалда бажарилишига интилиб,
таълим соҳасида илмийлик ва инсонпарварликни таъминлашга, иккала давлатда яшаётган халқларнинг маданий-таълим талабларини қондиришга муҳим аҳамият бериб,
ўз мамлакатлари халқлари ўртасидаги дўстлик ва ҳамкорлик муносабатларини бундан кейин ҳам ўзаро тенг ҳуқуқлилик ва ҳурмат асосида ривожлантириш ва мустаҳкамлашни хоҳлаб,
Томонлар, таълим сиёсатида сўзсиз мустақиллик бўлишини эътироф этиб, тараққиёт масалаларида ҳамкорлик қиладилар, педагогика фани ва таълим соҳасида тажриба ва ахборот алмашадилар, минтақавий бошқарув органлари, таълим муассасалари ва ташкилотларни йўлга қўйишга ҳар хил йўллар билан кўмаклашадилар.
Томонлар тегишли илмий-тадқиқот институтлари ва олий ўқув юртлари ўртасида бевосита шартномалар тузиш принципига амал қиладилар, бунда ҳамкорликнинг аниқ йўналишлари ва мавзулари, институтлар ва ўқув юртлари ўртасидаги квоталар ва молиявий шартлар тўғрисида келишиб олинади.
Томонлар талабалар билан ўзаро алмашишга кўмаклашадилар, бунинг учун биргаликда алоҳида битимлар тузиш орқали қабул қилиш, ўқитиш, квота ва молиявий шартлар тартибларини ишлаб чиқадилар. Бу тартиблар ҳар йили тегишли вазирликлар ўртасида аниқланиб туради.
Томонлар биргаликда меҳнат ва дам олишни ташкил этиш, фестиваллар, спартакиадалар, ижодий танловлар, мавзули олимпиадалар, бошқа тадбирлар ўтказиш йўли билан ўқувчи ва педагогларнинг туризм-экскурсиялар борасидаги алоқаларини кенгайтиришга кўмаклашадилар.
Томонлар умумий, ҳунар-техник, ўрта махсус ва олий маълумот тўғрисидаги ҳужжатларни, ва шунингдек фан номзодлари ва фан докторлари дипломларини ўзаро тан олиш ва тенг қийматлилигини белгилаш билан боғлиқ бўлган масалаларни кўриб чиқадилар.
Томонлар бошқа Томон давлатининг давлат тилини, адабиётини ва тарихини ўрганишни хоҳловчиларга мумкин бўлган ёрдамни кўрсатадилар.
Дарсликларда ва бошқа педагогик адабиётда тегишлича акс эттириш мақсадида Томонлар ўз мамлакатларининг тарих, географияси, сиёсий тараққиёти бўйича ахборот билан алмашиб турадилар.
Ушбу Битим қоидаларининг амалда бажарилишига оид молиявий масалалар Томонларнинг ёки уларнинг тегишли вазирликлари ва идораларининг ўзаро келишувига мувофиқ ҳал қилинади.
Ўзаро мувофиқлаштириш ва бирга ҳаракат қилишни таъминлаш, ахборот ва тажриба билан алмашиш ва шунингдек қўшма семинарлар ва бошқа тадбирларни ташкил қилиш учун Томонлар шу билан боғлиқ бўлган аниқ масалаларни уйғунлаштириш учун экспертлар ва делегациялар билан алмашиб турадилар.
Ушбу Битим ёки унинг айрим моддалари бажарилишининг боришини ўрганиш ва шунингдек ҳамкорликни янада кенгайтириш бўйича таклифлар тайёрлаш, унга қўшимча ва ўзгартишлар киритиш учун Томонлар зарурат туғилганда ва ўзаро келишган ҳолда қўшма комиссия тузишлари ёки алоқаларнинг бошқа шаклларидан фойдаланишлари мумкин.
Битим имзоланган вақтдан кучга киради ва 5 йиллик муддатга тузилади. Агар Томонлардан биттаси ушбу Битим амалини тўхтатиш хоҳиши борлиги тўғрисида тегишли муддат тамом бўлишидан камида 6 ой илгари бошқа Томонни ёзма равишда хабардор қилмаса, унинг амал қилиши кейинги беш йиллик даврларга чўзилади.