Ўзбекистон Республикаси Ҳукумати ва Озарбайжон Республикаси Ҳукумати, бундан кейин Томонлар деб аталувчилар,

илмий даражалар ҳақидаги ҳужжатларни эътироф этиш ва тенглаштириш, илмий даражаларни қиёслаш принциплари тўғрисидаги келишувларга асосланиб;

илмий алоқаларни сақлаб қолиш ва ривожлантиришга интилиб;

юқори малакали илмий ва илмий-педагог ходимларни аттестациядан ўтказиш соҳасида ҳамкорликни давом эттиришга бўлган интилишни тасдиқлаб;

қуйидагилар тўғрисида келишиб олдилар:

Томонлар юқори малакали илмий ва илмий-педагог ходимларни аттестациядан ўтказиш тизимлари ва талабларини ривожлантиришнинг миллий концепцияларини ишлаб чиқишда ўзаро маслаҳатлашувлар ўтказадилар.

Томонлар илмий ходимларнинг ихтисосликлари миллий рўйхатларини (номенклатураларини) ишлаб чиқиш ва ўз давлатлари ҳудудида илмий даражалар берувчи кенгашлар тармоқларини ташкил этиш ҳақида бир-бирларини ўзаро хабардор қилиб турадилар.

Улар Томонларнинг юқори малакали илмий ва илмий-педагог ходимларини аттестациядан ўтказишнинг давлат тизимида илмий даражалар талабгорларига қўйиладиган асосий талабларнинг бир-бирига таққослаш имкониятини таъминлайдилар.

Томонлар юқори малакали илмий ва илмий-педагог ходимларни аттестациядан ўтказиш соҳасида ҳамкорликни қуйидаги йўллар билан ривожлантирадилар:

— бир Томоннинг илмий даражаларга талабгорларини бошқа Томоннинг давлати ҳудудидаги илмий даражалар берувчи кенгашларда диссертациялар ҳимоя қилишлари учун тенг шароитлар яратиш;

— Томонларнинг юқори малакали илмий ва илмий-педагог ходимларини аттестациядан ўтказиш давлат тизимларидаги ўзгаришлар ҳақида бир-бирларини ўз вақтида хабардор қилиб туриш, ушбу ходимлар аттестацияси бўйича тегишли норматив ҳужжатлар ва бошқа ҳужжатларни ўзаро айирбошлаш.

Томонлардан ҳар бири диссертация ишларини экспертиза қилиш сифатини ошириш учун:

ўз давлатининг етакчи олим ва мутахассисларининг бошқа Томон давлатининг илмий даражалар берувчи кенгашларининг ишида ҳамда диссертациялар ҳимоясида оппонентлар сифатида қатнашишларига:

ўз давлатининг илмий даражалар берувчи кенгашларида ҳимоя қилинган диссертацияларни бошқа Томон давлатининг илмий даражалар берувчи кенгашларида қўшимча экспертизадан ўтказишга ёрдам беради.

Томонлар ўз давлатлари ҳудудида бошқа Томоннинг тегишли давлат идораси томонидан илмий даражалар берилганлиги ҳақидаги давлат намунаси шаклидаги малака ҳужжатларини эътироф этадилар.

Берилган илмий даражалар ҳақидаги давлат намунаси шаклидаги ҳужжатларнинг эътироф этилиши шу ҳужжатлар эгаларига Томонларнинг ўз давлатлари ҳудудларида миллий давлат малака ҳужжатлари эгаларига бериладиган ҳуқуқлар ҳам муқаррар равишда татбиқ этилишини билдирмайди.

Илмий даражалар ҳақидаги давлат намунаси шаклидаги малака ҳужжатларининг бир-бирига тенглиги ҳужжат эгаларини қайта аттестациядан ўтказиш жараёнида белгиланади.

Қайта аттестация талабгор фуқароси бўлган ёки унинг ҳудудида доимий яшаб турган мамлакатнинг давлат аттестация органи томонидан ўтказилади.

Томонлар юқори малакали илмий ва илмий-педагог ходимларни малакани такомиллаштиришга йўналтирилган аттестациядан ўтказиш жараёнларини бошқариш тажрибасини алмашиш бўйича зарур қўшма тадбирлар ўтказиб турадилар.

Томонларнинг ушбу Битимда қатнашишлари уларнинг юқори малакали илмий ва илмий-педагог ходимларни аттестациядан ўтказиш соҳасидаги ҳамкорликнинг бошқа шаклларидан фойдаланиш ҳуқуқларини чекламайди ҳамда Томонларнинг илмий ва илмий-педагог ходимларни аттестациядан ўтказиш давлат тизимларининг мустақил ишлаб туришига тўсқинлик қилмайди.

Ушбу Битимнинг амалда татбиқ этилишига боғлиқ аниқ масалалар бўйича қўшимча битимлар ва протоколлар имзоланиши мумкин.

Ушбу Битим ёки унинг бажарилиши билан боғлиқ бўлган масалалар бўйича келишмовчиликлар вужудга келганда, уларни бартараф этиш учун Томонларнинг вакиллари ўзаро маслаҳатлашадилар.

Ушбу Битим бўйича:

Ўзбекистон Томонидан — Ўзбекистон Республикаси Вазирлар Маҳкамаси ҳузуридаги Олий аттестация комиссияси;

Озарбайжон Томонидан — Озарбайжон Республикаси Олий аттестация комиссияси ваколатли орган ҳисобланадилар.

Ушбу Битим Томонлар унинг кучга кириши учун зарур бўлган ички давлат тартиб-қоидаларини бажаргани тўғрисидаги охирги ёзма билдиришнома олинган кундан бошлаб кучга киради ва Томонлардан бири бошқа Томоннинг ушбу Битимнинг амал қилишини тўхтатиш нияти ҳақидаги ёзма билдиришномасини олган кундан эътиборан олти ойгача амалда бўлади.

Тошкент шаҳрида 1997 йил 18 июнда икки нусхада, ҳар бири ўзбек, озарбайжон ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилиш мақсадида рус тилидаги матндан фойдаланилади.