Бундан кейин Томонлар деб аталаётган Ўзбекистон Республикаси Ҳукумати ва Грузия Ҳукумати,

дўстона муносабатларни келгусида ривожлантириш интилишига амал қилиб,

туризмнинг иқтисодий, ижтимоий ва маданий прогрессдаги муҳим ролини эътиборга олиб,

туризмни ривожлантириш ва иккала давлат ҳаёти билан яхшироқ танишиш учун қулай шароитлар яратиш мақсадида,

туризм соҳасида ҳамкорликни кенгайтиришнинг ўзаро манфаатларидан келиб чиқиб,

қуйидагилар тўғрисида келишиб олдилар:

Томонлар иккала давлат фуқароларини иқтисодий, ижтимоий ривожлантириш, маданият соҳасидаги ютуқлар, табиат ва диққатга сазовор жойлар, шунингдек иккала мамлакат халқларининг тарихий ёдгорликлари ва маданий анъаналари билан таништириш мақсадида туризм соҳасида тенг ҳуқуқли ва ўзаро фойдали ҳамкорликни ривожлантиришга кўмаклашадилар.

Томонлар тенг ҳуқуқлилик ва ўзаро фойда асосида хорижий туризмни ривожлантириш соҳасида ҳамкорлик қиладилар ва икки мамлакат ўртасида туризм ҳаракатини кучайтириш мақсадида маъмурий расмиятчиликларни соддалаштиришга кўмаклашадилар.

Томонлар хорижий ва ички туризмнинг барча соҳаларида тажриба алмашишга ёрдам берадилар, шунингдек туризм ва унинг ривожланиши масалалари билан шуғулланувчи бошқа ташкилотлар ва муассасалар ўртасидаги ҳамкорликка кўмаклашадилар.

Томонлар, шунингдек реклама материалларини нашр этиш, ахборот, нашрлар, кўргазмалар, фильмлар билан алмашиш ва турли симпозиум ва семинарлар ўтказиш йўли билан туристлар оқимини ҳам у, ҳам бу мамлакатга жалб этиш учун туристик ахборотни тарқатишга кўмаклашадилар.

Томонлар туристик комплексларнинг ходимларини ўқитишда ўзаро ёрдам кўрсатадилар ва туризм бўйича тегишли органлар мутахассисларининг алмашувига кўмаклашадилар, тегишли идора ва манфаатли ташкилотларга қўшма корхоналар ташкил этишда ва туризм соҳасидаги бошқа инвестиция лойиҳаларини амалга оширишда ёрдам берадилар.

Томонлар тегишли туристик органлар орқали халқаро туристик ташкилотлардаги фаолият бўйича ҳамкорлик, иш тажрибаси тўғрисида фикр алмашиб турадилар.

Томонлар туризм соҳасида янада самарали ҳамкорлик мақсадида мос равишда иккала мамлакатда туристик ваколатхоналар очиш имкониятига кўмаклашадилар ва уларнинг фаолиятида ҳар томонлама ёрдам берадилар.

Томонлар, зарурат бўлган ҳолда, ушбу Битимни амалга ошириш билан боғлиқ бўлган масалалар бўйича маслаҳатлашишлар ўтказадилар, ва шу мақсадда уни бажаришга қаратилган чораларни таклиф этадилар.

Томонларнинг ўзаро розилиги бўйича ушбу Битимга ўзгартиришлар ва қўшимчалар киритилиши мумкин, улар ушбу Битимнинг ажралмас қисм бўлган алоҳида протоколлар билан расмийлаштирилади.

Ушбу Битим Томонлар унинг кучга кириши учун зарур бўлган давлат ички расмиятчиликларини бажарганликлари тўғрисида бир-бирларига ёзма равишдаги сўнгги хабарномаси олинган кундан бошлаб кучга киради.

Ушбу Битим беш йил мобайнида амал қилади ва агар Томонлардан ҳеч бири унинг амал қилишини тўхтатиш нияти тўғрисида бошқа Томонни ёзма равишда тегишли муддат тугашидан камида олти ой илгари хабардор қилмаса, кейинги беш йилга ўз-ўзидан узайтирилади.

Тошкент шаҳрида 1997 йил 23 майда икки нусхада, ҳар бири ўзбек, грузин ва рус тилларида тузилди, бунда барча матнлар бир хил кучга эга.

Ушбу Битимни талқин қилишда рус тилидаги матн ишлатилади.