Ўзбекистон Республикаси Ҳукумати билан Россия Федерацияси Ҳукумати, бундан кейин «Томонлар» деб аталувчилар,

ўз давлатлари сиёсий, иқтисодий ва ижтимоий ривожланиши учун алоқа соҳасидаги ўзаро фойдали ҳамкорликни ривожлантириш ва кенгайтиришга интилиб,

қуйидагилар тўғрисида келишиб олдилар:

Томонларнинг ушбу Битим доирасидаги ҳамкорлиги Томонлар давлатларининг қонунларига мувофиқ амалга оширилади.

Ушбу Битимда кўзда тутилмаган почта ва электр алоқани ташкил этиш ҳамда эксплуатация масалалари Жаҳон почта иттифоқининг почта жўнатмалари ҳақидаги Низом, Конвенция ва Битим қоидалари, шунингдек Халқаро электр алоқа иттифоқи Низоми, Конвенцияси, Маъмурий тартиблари ва Тавсиялари орқали бошқариб турилади.

Почта ва электр алоқа соҳасида ҳамкорликнинг конкрет йўналишлари ва шакллари Томонлар давлатларининг алоқа маъмуриятлари тарафидан улар ўртасида тузиладиган алоҳида битимлар билан аниқланади.

Томонлар зарур ҳолларда алоқа хизматларининг ҳамма турларини янада ривожлантириш бўйича ўзаро келишилган чора-тадбирларни амалга оширадилар.

Томонлар почта ва электр алоқа соҳасида тажриба хамда илмий-техник ахборот алмашиш йўли билан Томонларнинг давлат алоқа воситалари хамда ташкилотларининг ишлари билан танишиш учун алоқа маъмуриятлари, компаниялари ва мутахассислари ўртасидаги алоқаларини кенгайтиришга кўмаклашадилар.

Томонлар учинчи давлатларда ва тегишли халқаро ташкилотларда Томонлар давлатларининг алоқа маъмуриятлари фаолиятига тўсқинлик қиладиган ёки уни қийинлаштирадиган камситиш чораларини бир-бирларига қўлламайдилар.

Томонлар алоқа соҳасида давлатлараро қўшма лойиҳаларни ташкил этишга кўмаклашадилар ва янги алоқа технологияларини такомиллаштириш ҳамда ишлаб чиқиш мақсадида илмий-техник ҳамкорликни янада ривожлантириш чораларини кўрадилар.

Томонлар давлатларининг алоқа маъмуриятлари алоқа соҳасидаги либерализация дастурлари, шунингдек ўзаро қизиқиш уйғотиши мумкин бўлган инвестиция дастурлари ҳақида бир-бирларини хабардор қилиб турадилар.

Томонлар давлатларнинг алоқа маъмуриятлари фавқулодда вазиятларда алоқа тармоқлари ва воситалари орқали хабарларни устувор узатишни таъминлайдилар.

Давлатлараро алоқа тизимларида аварияларни бартараф этишда ва тиклаш ишларини ўтказишда ўзаро ёрдам кўрсатиш учун Томонлар ёки уларнинг тегишли муассасалари алоҳида битимлар тузадилар.

Почта ва электр алоқа хизматлари учун тариф ва йиғимлар Жаҳон почта иттифоқининг почта жўнатмалари тўғрисида Конвенция ва Битими, шунингдек Халқаро электр алоқа иттифоқининг Конвенцияси, Маъмурий тартиблари, тегишли холларда эса Тавсиялари қоидаларига мувофиқ ўрнатилади.

Бу масалалар Томонлар давлатларининг тегишли халқаро операторлари ўртасида тузилган битимларда белгиланади.

Почта ва электр алоқа хизмати тўловларини тузишда Жаҳон почта иттифоқи ва Халқаро электр алоқа иттифоқи конвенцияларида белгиланган «Махсус ўзлаштириш ҳуқуқи» бирлиги қўлланади.

Томонлар давлатларининг алоқа маъмуриятлари Жаҳон почта иттифоқининг почта жўнатмалари тўғрисида Конвенция ва Битими, шунингдек Халқаро электр алоқа иттифоқининг Конвенцияси, Маъмурий тартиблари, тегишли холларда эса Тавсиялари қоидаларига мувофиқ, почта ва электр алоқа хизматлари тўловларини мунтазамлаштиришга кўмаклашадилар.

Алоқа хизматларидан фойдаланиш борасидаги ҳамма ҳисоб-китоблар марказлаштирилган холда ваколатли банклар орқали Ўзбекистон Республикаси билан Россия Федерацияси ўртасида ўзаро ҳисоб-китоб ва банк операциялари масаласи бўйича тузилган битимларга мувофиқ амалга оширилади.

Томонлар давлатларининг маъмуриятлари ёки уларнинг тегишли идоралари зарур холларда Ўзбекистон Республикаси билан Россия Федерацияси ўртасидаги почта ва электр алоқасини амалга оширишда расмиятчиликларни соддалаштириш ва тарифларни камайтириш юзасидан чора-тадбирлар кўрадилар.

Давлатлараро хабарлар ва ахборот узатиш технологик жараёнларида алоқа корхоналарида қайд этиш-ҳисобот вақти сифатида Москва вақти қўлланилади.

Томонлар ёзма равишда ифодаланган ўзаро келишув бўйича ушбу Битимга қўшимча ёки ўзгартишлар киритишлари мумкин.

Битим моддаларини изоҳлашда ва қўллашда юзага келадиган баҳслар Томонлар ўртасидаги музокаралар йўли билан ҳал этилади.

Ушбу Битим имзоланган санадан бошлаб кучга киради ва Томонлардан бири иккинчи Томонга ўзининг ушбу Битимнинг амал қилишини тўхтатиш нияти тўғрисида ёзма равишда маълум қилмагунича ўз кучини сақлайди.

Бу ҳолда Битимнинг амал қилиши бундай билдиришнома олинган санадан сўнг олти ой ўтгач тўхтатилади.

Битим амал қилишини тўхтатилиши Томонларнинг ушбу Битимни амалга ошириш бўйича юзага келган ва унинг амал қилиши тўхтатилган дақиқагача бажарилмаган молиявий мажбуриятларига дахл қилмайди.

Тошкент шаҳрида 1998 йил 11 октябрда икки нусхада, ҳар бири ўзбек ва рус тилларида тузилди, иккала матн бир хил кучга эга.