Ўзбекистон Республикаси Ҳукумати ва Россия Федерацияси Ҳукумати, кейинги ўринларда «Томонлар» деб аталадилар,

наркотик моддалар ва психотроп моддалар (кейинги ўринларда наркотик моддалар деб аталади)нинг ноқонуний муомалада бўлиши, уларнинг суиистеъмол қилиниши Томонлар халқларининг соғлиғи ва фаровон турмушига жиддий хавф туғдиришини англаб,

наркотик моддаларнинг ноқонуний муомалада бўлишининг ўсганлиги ва уни суиистеъмол қилиш билан боғлиқ муаммоларнинг кучаяётганлигидан чуқур ташвишланиб,

наркотик моддаларнинг ноқонуний муомалада бўлиши ва уларни суиистеъмол қилиш билан курашда Томонларнинг ҳамкорлигини мустаҳкамлаш иккала давлат халқларининг туб манфаатларига жавоб беради деб ҳисоблаб,

1961 йилда қабул қилинган Наркотик моддалар тўғрисидаги Ягона конвенцияни, унга 1972 йилдаги баённомага мувофиқ киритилган тузатишларни, 1971 йилдаги Психотроп моддалар тўғрисидаги Конвенцияни, Бирлашган Миллатлар Ташкилотининг 1988 йилдаги Наркотик моддалар ва психотроп моддаларнинг ноқонуний муомалада бўлишига қарши кураш тўғрисидаги Конвенциясини, шунингдек Бирлашган Миллатлар Ташкилотининг тегишли органлари ва форумларининг бу масаладаги қарорларини эътиборга олиб,

халқаро ҳуқуқнинг умумий тан олинган принциплари ва меъёрларига амал қилиб.

Мустақил Давлатлар ҳамдўстлиги қатнашчилари бўлган давлатлар ҳудудларида уюшган жиноятчилик ва хавфли жиноятларнинг бошқа турлари билан курашнинг биргаликдаги чоралари юзасидан 2000 йилгача бўлган давр учун Давлатлараро дастуридаги вазифалардан келиб чиқиб,

Ўзбекистон Республикаси Ҳукумати билан Россия Федерацияси Ҳукумати 1995 йил 27 июлдаги жиноятчиликка қарши кураш тўғрисидаги Битимга асосан,

қуйидагилар тўғрисида келишиб олдилар:

Ушбу Битимда назарда тутилган ҳамкорлик Томонларнинг ваколатли органлари ўртасидаги тўғридан-тўғри алоқалар ва келишувлар йўли билан амалга оширилади.

Ўзбекистон Республикаси томонидан:

Ички ишлар вазирлиги;

Прокуратура;

Давлат солиқ қўмитасининг Бош божхона бошқармаси;

Соғлиқни сақлаш вазирлиги;

Миллий хавфсизлик хизмати ваколатли органлар бўлиб ҳисобланадилар.

Россия Федерацияси томонидан:

Ташқи ишлар вазирлиги;

Ички ишлар вазирлиги;

Соғлиқни сақлаш вазирлиги;

Бош прокуратура;

Федерал хавфсизлик хизмати;

Федерал чегара хизмати;

Давлат божхона қўмитаси;

Ташқи иқтисодий алоқалар вазирлиги ваколатли органлар бўлиб ҳисобланадилар.

Томонлар наркотик моддалар устидан назорат ўрнатиш масалалари бўйича ўз миллий сиёсатларини мувофиқлаштиришга ва халқаро форумларда ўзаро келишилган нуқтаи-назарлари билан чиқишга интиладилар.

Томонлардан ҳар бирининг ваколатли органлари, зарурат туғилганида, ўзаро манфаатларни ифодаловчи ўзларининг миллий қонунчиликларига мувофиқ:

1) наркотик моддаларнинг ноқонуний муомалага кириб қолиш манбаларини аниқлаш шакллари ва усуллари тўғрисида ҳамда улар тарқалишининг олдини олишда қўлланиладиган усуллар тўғрисида, истеъмолчиларни аниқлаш услублари ҳақидаги; наркотик моддаларни тайёрловчилар ва сотувчиларни аниқловчи тезкор-қидирув фаолиятини ташкил этиш тўғрисидаги;

2) Томонлардан бирининг давлати ҳудудидан иккинчи Томон давлатининг ҳудудига наркотик моддаларнинг ноқонуний олиб ўтилиши ёки олиб ўтиш мақсадлари билан боғлиқ бўлган аниқ омиллар ва воқеалар ҳақидаги;

3) наркотик моддаларни олиб ўтишда яшириш йўллари ва наркотик моддаларни аниқлаш усуллари ҳақидаги;

4) наркотик моддаларни тайёрловчилар ва ташувчилар аниқланганлиги ҳақидаги, наркотик моддаларнинг ноқонуний муомалада бўлишига тааллуқлиликда гумон қилинаётган шахслар, ташкилотлар ва муассасалар, шунингдек уларнинг бошқа Томон давлати ҳудудидаги шубҳали алоқалари ҳақидаги;

5) наркотик моддаларни суиистеъмол қилишга ёки наркотик моддаларнинг ноқонуний муомалада бўлишига қарши кураш ҳақидаги қонунларни бузган шахсларга ёки шахслар гуруҳига нисбатан ишлар қўзғатилганлиги, тергови якунланганлиги ёки суд тўхтами ҳақидаги;

6) наркотик моддаларнинг ноқонуний муомалада бўлишидан олинган даромадларни қонунийлаштирувчи шахслар ёки гуруҳнинг фаолияти тўғрисидаги ўзаро бир-бирларини қизиқтириши мумкин бўлган ахборотларни айирбошлайдилар.

Томонларнинг миллий қонунчилигига биноан ваколат берилган органлари мақсадга мувофиқ деб ҳисоблаганларида ўзаро назоратли етказиб бериш ёки бошқа шу каби усулларни қўллайдилар.

Томонлар ўз давлатлари ҳудудида олинган наркотик моддаларнинг намуналарини уларнинг келиб чиқишини аниқлаш мақсадида таҳлил қилиш ва ўрганиш учун ўзларининг халқаро стандартларга мувофиқ ҳолда ишловчи лабораториялари ихтиёрига топширадилар. Шу тахлитда олинган маълумотларни Томонлар ўзаро бир-бирларига тақдим этадилар.

Томонларнинг ваколатли органлари ўзларининг миллий қонунчиликларига мувофиқ расмий сўровлар бўйича тезкор-қидирув тадбирларини амалга оширадилар.

Томонлар 1996 йилдаги Наркотик моддалар тўғрисидаги Ягона конвенция ва унга киритилган ўзгартиришлар талабларига хилоф равишда наркотик моддаларни ишлаб чиқариш учун етиштирилаётган наркотик моддалар далаларини ва экинларини аниқлаш ва назорат қилиш ишида ҳамкорлик қиладилар.

Томонлар ушбу Битимни амалга ошириш доирасида самарали ўзаро ҳамкорликни таъминлаш мақсадида ваколатли органлари ўртасида тўғридан-тўғри алоқалар ўрнатадилар.

Томонларнинг ваколатли органлари гиёҳвандликни даволаш, унинг олдини олиш ва гиёҳвандлик касалига мубтало бўлган шахсларни ижтимоий тиклашнинг янги усулларини ишлаб чиқиш ва амалга киритишда ўзаро ҳамкорлик қиладилар.

Томонлар бу соҳада ахборотларни айирбошлашга ёрдам қиладилар, уни рағбатлантирадилар, шунингдек мутахассислар делегацияларини айирбошлайдилар.

Томонлар ўзларининг ваколатли органлари орқали наркотик моддалар устидан назорат қилиш соҳасида тажриба алмашиш, ходимларни ўқитиш ва уларнинг малакасини ошириш. стажировкалар ҳамда маслаҳатлашувлар ўтказишда ҳамкорлик қиладилар.

1. Томонлар назоратда турган наркотик моддалар, психотроп ва бошқа моддаларнинг миллий Рўйхатларини айирбошлайдилар ва уларга киритилган ўзгаришлар ҳақида бир-бирларини хабардор қиладилар.

2. Томонлардан бири назоратда турган наркотик моддалар, руҳиятга таъсир этувчи ва бошқа моддаларнинг рўйхатини тўлдирса, иккинчи Томон ўзининг тегишли миллий Рўйхатларига худди шундай қўшимча киритиш имкониятини кўриб чиқади.

Томонлар наркотик моддаларнинг экспорт ва импорт савдосини наркотик моддаларни назорат қилиш соҳасидаги универсал конвенциялар бўйича ўзларининг мажбуриятларига мувофиқ равишда амалга оширадилар.

Томонлар наркотик моддаларни назорат қилиш соҳасидаги ўз давлатлари қонунчилиги ва амалиёти ҳақидаги ахборотни ўзаро алмашадилар.

Қонун ҳужжатларидан ташқари, ушбу Битимга асосланиб тақдим этилган ҳужжатлар ва ахборотлар хоҳ ёзма, хоҳ оғзаки бўлсин дахлсиз ҳисобланади ва фақатгина уларни тақдим этган ваколатли органнинг ёзма розилиги билангина илмий ва бошқа мақсадларда фойдаланилиши мумкин.

1. Ушбу Битим доирасида ахборотни тақдим этиш Томоннинг ўз ташаббусига кўра ёки иккинчи Томоннинг расмий сўрови асосида амалга оширилади.

2. Ахборотни олишга расмий сўров ёзма равишда ёки телетайп, факсимил ёхуд компьютер алоқа воситасида берилиши лозим.

Кечиктириб бўлмайдиган ҳолатларда, телефон алоқаси орқали берилган оғзаки расмий сўров қабул қилиниши мумкин, аммо бу сўров дарҳол ёзма равишда тасдиқланиши лозим.

3. Ахборот олишга расмий сўров:

сўровчи ваколатли органнинг номи;

сўралаётган ваколатли органнинг номи;

масала моҳиятининг баёни ва унинг асосланиши, шунингдек уни бажариш учун зарур бўлган бошқа маълумотларни ўз ичига олиши лозим.

1. Ушбу Битим доирасида сўралаётган Томон расмий сўровни бажариш ўз давлатининг суверенитети, хавфсизлиги ёки бошқа муҳим манфаатларига зарар етказади ёки унинг қонунчилигига ёхуд халқаро мажбуриятларига хилоф деб ҳисобласа, расмий сўровни бажаришни тўлиқ ёки қисман рад этиши мумкин.

2. Башарти сўровни бажаришни рад этиш хусусида қарор қабул қилинса, сўраётган Томон бунинг сабабларини кўрсатган ҳолда ёзма тарзда хабардор қилинади.

Наркотикларни назорат қилиш бўйича Ўзбекистон Республикаси Давлат комиссияси ва Россия Федерацияси Ташқи ишлар вазирлиги ўзаро келишган ҳолда ушбу Битимда назарда тутилган ҳамкорликни мувофиқлаштириш ва унинг самарадорлигини ошириш мақсадида маслаҳатлашувлар ўтказадилар.

Томонларнинг ваколатли органлари ушбу Битимни бажариш мақсадида ишчи гуруҳлари ташкил қилишлари, экспертларнинг учрашувларини ўтказишлари ва ўзаро битимлар тузишлари мумкин.

Ушбу Битимнинг қоидалари Томонларнинг наркотик моддалар устидан назорат қилиш масалаларида ҳамкорликнинг бошқа ўзаро мақбул шакллари ва услубларини белгилаш ёки қўллашни рағбатлантиришларига монелик қилмайди.

1. Ушбу Битим уни амалга киритиш учун Томонларнинг ички давлат тартибларининг бажарилганлиги ҳақидаги сўнгги ёзма хабарномаси олинган санадан бошлаб кучга киради.

2. Ушбу Битимга Томонларнинг ўзаро келишуви асосида дипломатик ноталар алмашиш йўли билан ўзгартиришлар ва қўшимчалар киритилиши мумкин. Бундай тузатишлар ушбу Битимнинг кучга кириши учун назарда тутилган тартибларга мувофиқ кучга киритилади.

Ушбу Битим беш йил муддатга тузилади, бундан кейин автоматик равишда бир йиллик муддатларга узайтирилиб борилади ва Томонлардан биронтаси унинг амалда бўлишини тугатиш мақсади юзасидан ёзма хабарнома юборганидан кейин 180 кун ўтгунига қадар амалда бўлади.

Москва шаҳрида 1997 йил 12 мартда ўзбек ва рус тилларида бўлган икки нусхада тузилди, бунда иккала матн бир хил кучга эгадир.