Ўзбекистон Республикасининг «Электр энергетикаси тўғрисида»ги Қонуни, Ўзбекистон Республикаси Вазирлар Маҳкамасининг 2009 йил 22 августдаги «Электр ва иссиқлик энергиясидан фойдаланиш қоидаларини тасдиқлаш тўғрисида»ги 245-сонли қарори талабларидан келиб чиқиб, истеъмолчиларни электр энергиясидан фойдаланишини тартибга солиш, тармоққа ўзбошимчалик билан уланиб олиш ва ноқонуний истеъмол қилиш :ҳолатларига барҳам бериш, ҳисоб-китоб қилиш механизми самарадорлигини ошириш, тўлов интизомини мустаҳкамлаш мақсадида ҳамда «Наманган электр тармоқлари» акциядорлик жамиятининг 2010 йил 1 майдаги 421/01-99-сонли хатини, вилоят Адлия бошқармасининг 2010 йил 14 июндаги 01-03-1442-сонли ва вилоят Монополиядан чиқариш ва рақобатни ривожлантириш Давлат қўмитаси ҳудудий бошқармасининг 2010 йил 24 июндаги АБ 03-12/472-сонли хулосаларини инобатга олиб қарор қиламан:

1. «Наманган электр тармоқлари» акциядорлик жамияти 2010-2011 йиллар давомида кўп қаватли ва якка тартибдаги уй-жойларда яшовчи маиший (аҳоли) истеъмолчиларини электр энергиясини электрон ҳисобга олиш приборлари (кейинги ўринларда «ҳисобга олиш приборлари» деб юритилади) билан белгиланган тартибда таъминласин.

2. Белгилансинки, 2010-2011 йиллар давомида Наманган шаҳар ва вилоятнинг барча туманларидаги:

кўп қаватли уй-жойларда яшовчи маиший (аҳоли) истеъмолчиларнинг ҳисобга олиш приборлари уйларнинг кириш йўлакларига чиқарилсин (ўрнатилсин);

якка тартибдаги уй-жойлардаги истеъмолчиларнинг ҳисобга олиш приборларини махсус шкафларга жойлаштирилиб, истеъмолчилар ва электр таъминоти корхоналари ўртасидаги чегара нуқтасига ўрнатилсин;

махсус шкафларда икки донадан калит бўлиб, кўп қаватли уйларда бир донаси йўлак бошида, якка тартибдаги уй-жойларда уй-жой мулкдорида, иккинчи донаси электр таъминоти корхонаси ходимида бўлиши таъминлансин;

«Наманган электр тармоқлари» акциядорлик жамияти маиший (аҳоли) истеъмолчилари учун ҳисобга олиш приборларини махсус шкафларга жойлаштириш ишларини индукцион ҳисобга олиш приборларини электрон ҳисобга олиш приборларига алмаштириш ишлари билан биргаликда олиб борсин.

3. Наманган шаҳар ва барча туманлардаги кўп қаватли уй-жойларда ва якка тартибда яшовчи маиший (аҳоли) истеъмолчилари учун ҳисобга олиш приборлари, махсус шкафлар ва шкаф учун калитлар «Наманган электр тармоқлари» акциядорлик жамияти маблағлари ҳисобидан олиб, ўрнатилсин ва Белгиланган тартибда хусусий уй-жой мулкдорлари ширкатлари ҳамда хонадон эгалари тасарруфига ўтказилсин.

Наманган шаҳар ва барча туманлардаги якка тартибдаги уй-жойларда яшовчи маиший (аҳоли) истеъмолчилари учун ҳисобга олиш приборларини махсус шкафларга жойлаштириш ва Истеъмолчилар ва электр таъминоти корхоналари ўртасидаги Чегара нуқтасига ўрнатиш «Наманган электр тармоқлари» акциядорлик жамияти ҳисобидан амалга оширилсин.

Наманган шаҳар ва барча туманлардаги улгуржи Истеъмолчиларнинг ҳисобга олиш приборларини электр таъминоти корхоналари билан чегара нуқтасига улгуржи истеъмолчилар ҳисобидан ўрнатилсин.

4. «Наманган электр тармоқлари» акциядорлик жамияти, вилоят давлат солиқ бошқармаси, Наманган шаҳар ва барча туманлар ҳокимликларига бир ҳафта муддатда:

барча турдаги истеъмолчиларнинг манзилли рўйхатини тузиш;

ушбу қарор талаблари тўғрисида барча турдаги истеъмолчиларни расман огоҳлантириш чора-тадбирларини кўриш вазифалари юклансин.

5. Мазкур қарор талабларини бажармаслик электр энергиясидан фойдаланиш қоидаларини бузиш деб ҳисоблансин ва қонунбузилиш ҳолатларига йўл қўйган шахсларни белгиланган тартибда жавобгарликка тортиш чора-тадбирлари кўрилсин.

6. Вилоят телерадиокомпанияси (М. Мақсудов), «Наманган ҳақиқати» (М. Парпиев) ва «Наманганская правда» (В Бичурин) газеталари ушбу қарорни расман оммавий ахборот воситаларида эълон қилсинлар.

7. Ушбу қарор Халқ депутатлари вилоят Кенгашининг навбатдаги сессияси тасдиғига киритилсин.

8. Мазкур қарорнинг ижросини назорат қилишни ўз зиммамда қолдираман.