Наманган шаҳридаги маҳаллалар ҳудудларининг санитар тозалигини доимий равишда сақлаб туриш ва яхшилаш, маиший чиқиндиларни ўз вақтида ташиб чиқариш, транспорт воситаларидан самарали фойдаланиш бўйича бир қатор чоралар кўрилишига қарамасдан, аҳоли ва юридик шахслар томонидан бу борада белгиланган санитария ва шаҳарсозлик қоидаларига риоя этмаслик, белгилаб берилмаган жойларга чиқиндиларни чиқариб ташлаш, чиқиндиларни ташиб кетиш харажатлари учун маблағларни ўз вақтида тўламаслик ҳамда шартнома мажбуриятларини бажармаслик ҳолатларига йўл қўйилмоқда.

Бундан ташқари, шаҳар ҳудудида кенг қамровли қурилиш ишлари олиб борилаётганлиги, ҳудуд чегаралари кенгайиб бораётганлиги, аҳоли сони ва санитар тозалов ишларининг ҳажмлари кескин ортиб кетганлиги, натижада бу мақсадлар учун харажатлар ошиб бораётганлиги ва Наманган шаҳар ҳокимлиги «Ободонлаштириш» давлат унитар корхонаси томонидан қилинаётган харажатлар қопланмай келинаётганлиги кузатилмоқда.

Юқоридаги ҳолатларни эътиборга олиб, шаҳар ҳудудини санитар тозалигини доимий равишда талаб даражасида сақлаб туриш, тозалов хизматлари сифатини ошириш, қаттиқ ва маиший чиқиндиларни ташиб чиқариш бўйича шартномаларни ўз вақтида тузиш ва улардаги мажбуриятларни лозим даражада бажарилишини таъминлаш мақсадида ҳамда «Чиқиндилар тўғрисида»ги Ўзбекистон Республикаси Қонунининг 11-моддаси ва «Маҳаллий давлат ҳокимияти тўғрисида»ги Қонуннинг 25-моддасига мувофиқ қарор қиламан:

1. Наманган шаҳар ҳокимлиги «Ободонлаштириш» давлат унитар корхонаси томонидан қаттиқ ва маиший чиқиндиларни ташиб чиқариш бўйича 2013 йилнинг 1 январидан қуйидаги тарифлар белгилансин:

аҳолига 1 кишига 1 ойга 600 сўм, 2013 йил 1 июлдан 1 ойга 700 сўм;

бюджет тизимидаги ташкилот, муассасаларга 1 м³ қаттиқ ва маиший чиқиндиларни ташиб чиқариш учун 10000 сўм;

хўжалик ҳисобидаги ташкилотларга 1 м³ қаттиқ ва маиший чиқиндиларни ташиб чиқариш учун 11000 сўм.

2. Наманган шаҳар ҳокимлиги «Ободонлаштириш» давлат унитар корхонаси (А. Абдуллаев)га:

бир ой муддатда шаҳардаги барча маҳалла фуқаролар йиғинлари ва мулкчилик шаклидан қатъи назар, хўжалик фаолиятини юритаётган субъектлар билан шартномалар тузиш ҳамда кўрсатилган хизматлар тўловларини ундириш бўйича зарур чоралар кўрилишини таъминлаш топширилсин.

3. Шаҳар ҳудудида жойлашган барча маҳалла фуқаролар йиғинлари раислари ва мулкчилик шаклидан қатъии назар, ташкилот, корхона раҳбарлари:

15 кун муддат ичида аҳоли хонадонларидан, ташкилот, корхона ҳудудидан ҳосил бўлган қаттиқ ва маиший чиқиндиларни тасдиқланган тарифлар асосида ташиб чиқариш бўйича шаҳар ҳокимлиги «Ободонлаштириш» давлат унитар корхонаси билан шартнома тузилишини, шунингдек, кўрсатилган хизматлар бўйича тўловларни ўз вақтида ҳисоб-китоб қилиб борилишини таъминласинлар.

4. Маҳалла хайрия жамоат фонди шаҳар бўлинмаси (А. Мукаррамов), шаҳар давлат содиқ инспекцияси (Қ. Мирахмедов), шаҳар статистика бўлими (А. Хайдаров), шаҳар ДСНЭМ (Т. Алимов), шаҳар табиатни муҳофаза қилиш инспекцияси (К. Эргашев):

Наманган шаҳар ҳокимлиги «Ободонлаштириш» давлат унитар корхонасига шаҳардаги барча МФЙлар ҳамда ташкилот, корхоналар билан қаттиқ ва маиший чиқиндиларни ташиб чиқариш бўйича шартномаларни тузишда, кўрсатилган хизматлар учун ўз вақтида ҳисоб-китоб қилиб борилишида амалий ёрдам кўрсатиб борсинлар.

5. Барча тижорат банклар раҳбарларига банк мижозларидан қаттиқ ва маиший чиқинди ташиб чи қари ш бўйича шаҳар ҳокимлиги «Ободонлаштириш» давлат унитар корхонаси билан шартномалар тузилиши ва кўрсатилган хизматлар учун тўловларни ўз вақтида ҳисоб-китоб қилинишида амалий ёрдам кўрсатсинлар.

6. Шаҳар ҳокимлигининг молия бўлими (А. Джалолов), шаҳар маҳаллий бюджети ҳисобидаги ташкилот ва муассасалар 2013 йил харажатлар сметасига қаттиқ ва маиший чиқиндиларини ташиб чиқариш бўйича белгиланган нормативлар асосида зарур маблағларни киритиш ҳамда ушбу маблағларни ўз вақтида ажратилишини таъминласин.

7. Мазкур қарор «Наманган садоси» газетасида эълон қилинсин.

8. Наманган шаҳар ҳокимининг 2011 йил 31 декабрдаги 866-сонли қарори ўз кучини йўқотган деб ҳисоблансин.

9. Мазкур қарорнинг бажарилишини назорат қилиш шаҳар ҳокимининг биринчи ўринбосари С. Султанов зиммасига юклансин.