Ўзбекистон Республикаси билан Тожикистон Республикаси, бундан кейин Олий Аҳдлашувчи Томонлар деб аталувчилар,

Олий Томонлар ўртасида биродарлик, дўстлик ва яхши қўшничилик муносабатларини барқарор қилиш иккала давлат халқларининг туб манфаатларига мос келади, тинчлик ва хавфсизлик ишига хизмат қилади деб ҳисоблаб,

ўзларининг БМТ Низоми, Хелсинки Якунловчи акти ҳамда ЕХҲТ ва Мустақил Давлатлар Ҳамдўстлиги доирасида қабул қилинган бошқа ҳужжатларнинг принциплари ва мақсадларига содиқ эканликларини тасдиқлаб,

халқаро майдонда баҳамжиҳат фаолият кўрсатиш ва ҳарбий-сиёсий соҳада қалин ҳамкорлик зарурлигини эътироф этиб,

иккала мамлакат иқтисодий ҳамкорлигини чуқурлаштириш, уни янада тараққий эттириш учун қулай шароитлар барпо этиш зарур деб топиб,

мавжуд ҳамкорлик муносабатларини ўзбек ва тожик халқларининг кўп асрлик тарихий илдизлар ҳамда маданият, тил ва урф-одатлар соҳасида муштаракликка эга бўлган анъанавий дўстлиги руҳида янада ривожлантириш ҳамда мустаҳкамлаш мақсадида,

халқаро тинчлик, минтақавий хавфсизлик ва барқарорликни тутиб туриш юзасидан биргаликда хатти-ҳаракатларни амалга ошириш муҳимлигини эътироф этиб,

қуйидагилар тўғрисида аҳдлашиб олдилар:

Олий Аҳдлашувчи Томонлар, биродар ва дўст давлатлар сифатида ўз муносабатларини бир-бирини тушуниш, ҳамкорлик ва ўзаро ишонч негизида барпо этадилар.

Олий Аҳдлашувчи Томонлар муносабатларни мустақилликни, суверенитетни, ҳудудий яхлитликни иккала давлат чегараларининг бузилмаслигини ҳурмат қилиш, бир-бирларининг ички ишларига аралашмаслик, тенг ҳуқуқлилик ва ўзаро манфаатдорлик принциплари асосида фаол ривожлантиришга қатъий аҳд қилганликларини тасдиқлайдилар.

Олий Аҳдлашувчи Томонлар ҳамкорликни энг аввало мустақиллик ва суверенитетга, ҳудудий яхлитликка таҳдид солинишининг олдини олиш масалаларида ҳар томонлама кўмаклашган ҳолда ривожлантирадилар.

Олий Аҳдлашувчи Томонлар тинчликни, халқаро барқарорлик ва минтақавий хавфсизликни мустаҳкамлаш, халқаро терроризмга, ноқонуний қуролли тузилмаларга, қурол-яроғ, гиёҳвандлик воситалари ва психотроп моддаларни ноқонуний юргизиш, диний ва бошқа шакллардаги экстремизмга қарши курашиш, шунингдек минтақавий можаролар ва Олий Томонларнинг манфаатларига дахлдор бошқа бўҳронли вазиятларни тартибга солиш механизмини такомиллаштириш мақсадида бир-бирларига кўмаклашадилар.

Олий Аҳдлашувчи Томонлар ҳарбий иттифоқларга кирмаслик, давлатларнинг қандайдир гуруҳларида, шунингдек бошқа Олий Аҳдлашувчи Томонга қарши қаратилган хатти-ҳаракатларда иштирок этмаслик мажбуриятини тасдиқлайдилар.

Олий Аҳдлашувчи Томонлар ўз ҳудудларидан, робита тизимлари ва бошқа инфратузилмаларидан учинчи давлатлар ёхуд ноқонуний ҳарбий тузилмаларнинг бошқа Олий Аҳдлашувчи Томонга қуролли тажовуз ёки ўзга душманона хатти-ҳаракатларга тайёрланиш ёинки амалга ошириш мақсадида фойдаланишига йўл қўймаслик мажбуриятини оладилар,

Учинчи давлатлар ёки ноқонуний қуролли тузилмалар тарафидан Олий Томонлардан бирига қуролли ҳужум қилиниши хавфи юзага келган ҳолларда Олий Аҳдлашувчи Томонлар дарҳол ўз фаолиятларини мувофиқлаштириш мақсадида маслаҳатлашув ўтказадилар. Тегишли Олий Аҳдлашувчи Томонга зарур ёрдам, жумладан ҳарбий-техникавий ёрдам берилади, шунингдек Томонлар ихтиёрида бўлган воситалар БМТ Низомининг 51 -моддасига мувофиқ жамоавий мудофаа ҳуқуқини амалга ошириш мақсадида тақдим этилиб, кўмаклашилади.

Олий Аҳдлашувчи Томонлар Марказий Осиёда тинчликни мустаҳкамлаш, барқарорлик ва хавфсизликни оширишда ўзаро кўмаклашадилар.

Олий Аҳдлашувчи Томонлар коллектив хавфсизликни мустаҳкамлаш, шунингдек БМТ, ЕХҲТнинг тинчликпарварлик ролини кучайтиришга ва минтақавий можаролар ҳамда Олий Аҳдлашувчи Томонларнинг манфаатларига дахлдор бўлган бошқа нохуш вазиятларни бартараф этиш механизми самарадорлигини оширишга кўмаклашадилар, зарур ҳолларда биргаликда ёинки мувофиқ хатти-ҳаракатларни амалга ошириш мақсадида ушбу соҳаларда ўз позицияларини мувофиқлаштирадилар.

Олий Аҳдлашувчи Томонлар мунтазам равишда ўзаро манфаатли масалаларда маслаҳатлашув ўтказиб турадилар.

Ҳар бир Олий Аҳдлашувчи Томон ўз ҳудудида яшаётган бошқа Олий Аҳдлашувчи Томоннинг фуқароларига, уларнинг миллати, дини ёки бошқа тафовутларидан қатъи назар, уларга инсон ҳуқуқлари тўғрисида халқаро нормаларга мувофиқ сиёсий, ижтимоий, иқтисодий ва маданий ҳуқуқ ва эркинликларни кафолатлайди.

Олий Аҳдлашувчи Томонлар Ўзбекистон Республикаси ҳудудида яшайдиган тожиклар ҳамда Тожикистон Республикаси ҳудудида яшайдиган ўзбекларнинг миллий маданияти ва тилининг сақланиш ҳамда ривожланиш ҳуқуқини кафолатлайдилар.

Олий Аҳдлашувчи Томонлар дарслар ўзбек ва тожик тилида олиб бориладиган барча турдаги таълим муассасалари учун зарур ўқув ва ўқув-методик адабиётларни алмашишга кўмаклашадилар. Бундай алмашув шартлари алоҳида аҳдномаларда белгиланади.

Олий Аҳдлашувчи Томонлар Марказий Осиёдаги ягона иқтисодий муҳитнинг, шунингдек узоқ муддатли истиқболни ҳисобга олган ҳолда ўзаро манфаатли асосларда икки тарафлама иқтисодий ҳамда савдо муносабатларининг, фан, маданият, таълим, технология, экология ва атроф муҳитни ҳимоя қилиш соҳасидаги алоқаларнинг ривожланиши ва мустаҳкамланишига кўмаклашадилар.

Олий Аҳдлашувчи Томонлар энг аввало саноат, қишлоқ хўжалиги, алоқа, телекоммуникациялар ва энергетика, молия ва банк фаолияти соҳасидаги ҳамкорликни мустаҳкамлайдилар.

Ҳар бир Олий Аҳдлашувчи Томон бошқа Олий Томонни унинг ҳуқуқи ва қонуний манфаатларига дахлдор бўладиган иқтисодий қарорлардан хабардор қилади ва савдо-иқтисодий ҳамкорликни сусайтирадиган тадбирларни амалга оширишдан ўзини тияди.

Олий Аҳдлашувчи Томонлар қулай ва ўзаро манфаатли шартларда транспорт коммуникациялари, товарларни транзит қилиш ва хизматлар соҳасида ҳамкорликни амалга оширадилар.

Ҳар бир Олий Томон ўз фуқароларига бошқа Олий Томоннинг тили, маданияти, санъат асарлари, адабиёти ва матбуотини ўрганишга, жумладан ўз ўқув муассасаларида, кенг йўл очиб беради. Олий Аҳдлашувчи Томонларнинг фуқаролари икки мамлакат ўқув муассасаларида таълим олишда амалдаги қонунлар асосида тенг ҳуқуққа эгадирлар.

Олий Томон бошқа Олий Томон мутахассисларига архив ҳамда тарихий ҳужжатларни ўрганиши ва тадқиқ этишлари учун имкон беради.

Олий Аҳдлашувчи Томонлар иккала мамлакат маданий ва маърифий муассасалари ўртасидаги алоқаларни, шунингдек мутахассислар алмашишни рағбатлантирадилар.

Ҳар бир Олий Томон ўз фуқароларига бошқа Олий Томоннинг тили, маданияти, санъат асарлари, адабиёти ва матбуотини ўрганишга, жумладан ўз ўқув муассасаларида, кенг йўл очиб беради. Олий Аҳдлашувчи Томонларнинг фуқаролари икки мамлакат ўқув муассасаларида таълим олишда амалдаги қонунлар асосида тенг ҳуқуққа эгадирлар.

Олий Томон бошқа Олий Томон мутахассисларига архив ҳамда тарихий ҳужжатларни ўрганиши ва тадқиқ этишлари учун имкон беради.

Олий Томонлар алоҳида битимлар асосида фан ва техника, фундаментал тадқиқотларни амалга ошириш, қўшма дастур ва ишланмаларни, жумладан космик дастур ва ишланмаларни ҳам, амалга ошириш соҳасидаги ҳамкорликни ривожлантирадилар, қўшма илмий-ишлаб чиқариш жамоаларини тузиш ҳамда уларнинг фаолият юритишига кўмаклашадилар.

Олий Томонлар аҳоли саломатлигини муҳофаза қилиш, тиббий фан ва амалиётни тараққий эттиришда қалин ҳамкорлик қиладилар.

Олий Томонлар экологик хавфсизлик соҳасидаги икки томонлама ва кўп томонлама шартномаларга мувофиқ фаолият юритиб, экологик хавфсизликка эришишга устувор аҳамият берадилар.

Олий Аҳдлашувчи Томонлар атроф муҳит ифлосланишининг олдини олиш ҳамда табиатдан оқилона фойдаланишни таъминлаш учун лозим чоралар кўрадилар.Улар экологик фалокатлар ва инсоннинг табиий муҳитга таъсири оқибатларига қарши, жумладан, трансҳудудий равишда, курашиш соҳасида ҳамкорликни ривожлантирадилар.

Олий Аҳдлашувчи Томонлар ҳамжиҳат равишда бир- бирларининг дипломатик, консуллик, савдо ваколатхоналари фаолиятини енгиллаштирадилар.

Олий Аҳдлашувчи Томонлар ўз ҳудудларида ишбилармон доиралар, матбуот вакиллари ҳамда қўшма лойиҳаларни амалга оширишда иштирок этаётган мутахассислар касбий фаолиятларини амалга оширишлари ва бўлиб туришлари учун лозим шароитларни муҳайё этадилар.

Олий Аҳдлашувчи Томонлар уларнинг ҳокимият қонун чиқарувчи ва ижрочи тармоқлари ўртасидаги, жумладан шаҳарлар, вилоятлар, туманлар ҳамда бошқа маъмурий- ҳудудий бирликлар ўртасидаги ҳамкорликни рағбатлантирадилар.

Олий Томонлар терроризм, уюшган жиноятчилик, гиёҳвандлик воситалари ва психотроп моддаларни ноқонуний юргизиш, қурол-яроғни контрабанда қилиш, маданий бойликларни ноқонуний сотиш ва чегарадан ўтказиш, ғайриқонуний фаолият орқасида топилган даромадларни легализация қилиш, жиноятчиликнинг бошқа хавфли турлари, жумладан фуқаролик авиацияси ва бошқа транспорт турларининг хавфсизлигига таҳдид қиладиган жиноятларга қарши курашда ҳамкорлик қиладилар.

Олий Аҳдлашувчи Томонлар тегишли ваколатли органларга Томонларнинг қуролли кучлари қисмларини, ҳуқуқни ҳимоя қилиш органларининг махсус бўлинмаларини жалб этиб, уларнинг ҳудудида жиноий, террорчи гуруҳларни яксон қилиш ва йўқотиш, жиноятларнинг олдини олиш, очиб ташлаш ва тафтиш қилиш, жиноят қилганликда гумондор шахсларни тутиш, жиноятчиларни қидириш бўйича оператив-қидирув тадбирларини амалга оширишга имкон берадилар.

Ушбу Шартнома учинчи давлатларга қарши қаратилмаган ва Олий Томонларнинг бошқа давлатлар билан тузган икки томонлама ва кўп томонлама шартномаларидан келиб чиқадиган мажбуриятларига ҳеч бир дахл қилмайди.

БМТ Низомининг 102-моддасига мувофиқ ушбу Шартнома БМТ Котибиятида рўйхатга олиниши лозим.

Олий Томонлар ушбу Шартнома қоидаларини амалга ошириш мақсадида зарур ҳолларда алоҳида битимлар тузадилар.

Олий Томонларнинг вакиллари лозим ҳолларда ушбу Шартнома доирасидаги ҳамкорликни мустаҳкамлаш ва самарадорлигини ошириш масалаларини муҳокама қилиш мақсадида амалий учрашувлар, маслаҳатлашувлар ҳамда музокаралар ўтказадилар.

Ушбу Шартнома қоидаларини амалга ошириш чоғида юзага келиши мумкин бўлган баҳс ва низоларни Олий Томонлар музокара ва маслаҳатлашувлар ўтказиш орқали ҳал этадилар.

Олий Аҳдлашувчи Томонларнинг ўзаро келишувига биноан ушбу Шартномага ўзгартиш ва қўшимчалар киритилиши мумкин.

Улар алоҳида баённомалар тарзида расмийлаштирилади ва ратификация қилингач кучга киради ва ушбу Шартноманинг таркибий қисми ҳисобланади.

Ушбу Шартнома ратификация қилиниши лозим ва ратификация ёрлиқлари алмашинган кундан кучга киради.

Ушбу Шартнома чекланмаган муддатга тузилган. Бир Олий Аҳдлашувчи Томон иккинчи Олий Аҳдлашувчи Томонни унинг фаолиятини тўхтатиш нияти тўғрисида хабардор қилгунича кучда қолади. Бу ҳолда ушбу Шартнома бошқа Олий Аҳдлашувчи Томон ана шундай хабарномани олганидан кейин олти ой ўтгач амал қилишдан тўхтайди.

Душанба шаҳрида 2000 йил 15 июнда икки нусхада, ўзбек, тожик ва рус тилларида тузилди, бунда барча матнлар бир хил кучга эга.

Ушбу Шартнома қоидаларини талқин этишда Олий Аҳдлашувчи Томонлар рус тилидаги матндан фойдаланадилар.