Ўзбекистон Республикаси Ҳукумати ва Ўмон Султонлиги Ҳукумати, бундан кейин «Аҳдлашувчи Томонлар» деб аталувчилар,

икки давлат ўртасида савдо ва иқтисодий ҳамкорликни ривожлантириш ва кенгайтириш истагида, тенг ҳуқуқлилик ва ўзаро манфаатдорлик тамойилларига асосланган ҳолда, икки мамлакатда амалда бўлган қонунларга мувофиқ,

қуйидагилар тўғрисида аҳдлашиб олдилар:

1. Аҳдлашувчи Томонлар, икки мамлакатда амалда бўлган қонунларга асосан, ўзаро савдо ва иқтисодий ҳамкорликни ривожлантиришга интиладилар.

2. Ҳамкорлик қуйидаги соҳаларда амалга оширилади:

(а) саноат;

(б) қишлоқ хўжалиги;

(в) транспорт;

(г) телекоммуникациялар, ва

(д) инвестициялар.

1. Аҳдлашувчи Томонлар Тарифлар ва Савдо бўйича Бош Битим ва Бутунжаҳон савдо ташкилотини ташкил этиш тўғрисида Битимда қайд этилганидек, бир-бирлари учун энг қулай режим яратадилар:

(а) божхона тўловлари ҳамда товарларнинг кўрсатилган қиймати ёхуд уларнинг импорти ёки экспорти билан боғлиқ бўлган ҳар қандай турдаги йиғимлар;

(б) божхона расмийлаштируви, транзит, омборда сақлаш, товарларни олиб ўтиш ва бошқа шу каби хизматлар;

(в) бевосита ёҳуд билвосита равишда белгиланган солиқлар ва бошқа ички йиғимлар;

(г) экспорт ва импорт қилинган товарлар, ишлар ва хизматлар, шунингдек тўловларни халқаро ўтказмалар учун тўловлар методлари;

(д) савдо, сотиб олиш, ташиш, тарқатиш, омборда сақлаш ва ички бозорда товарлардан фойдаланиш қоидалари.

2. Ҳар бир Аҳдлашувчи Томон агар Аҳдлашувчи Томоннинг миллий қонунчилиги билан талаб қилинмаган ҳолларда бошқа Аҳдлашувчи Томоннинг давлати ҳудудида ишлаб чиқарилган ёки импорт учун мўлжалланган товаларнинг импорти ва экспорти учун бериладиган рухсатномалар (сертификатлар, лицензиялар ва бошқалар)га нисбатан камситмаслик режимини қўллайдилар.

3. Энг қулай режим шартлари қуйидагиларга нисбатан қўлланилмаслиги лозим:

(а) Аҳдлашувчи Томонлардан бири чегара олди савдосини ва чегара бўйи ташувларни енгиллаштириш мақсадида қўшни давлатларга бераётган имтиёзларга;

(б) мавжуд эркин савдо зоналари ва божхона уюшмалари ва савдо ва иқтисодий ҳамкорликнинг бошқа кўринишларида Аҳдлашувчи Томонлардан бирининг ҳозирда ва келажакда иштироки билан боғлиқ кафолатланган махсус имтиёзларга ёҳуд божхона уюшмаси ёки эркин савдо зонаси барпо этиш мақсадида учинчи давлатга нисбатан имтиёзларга;

(в) Тарифлар ва Савдо бўйича Бош Битим (ГАТТ 1994), Бутунжаҳон савдо ташкилотини ташкил этиш тўғрисида Битим ва бошқа халқаро шартномаларга мувофиқ ривожланаётган ёки кам ривожланган мамлакатларга берилаётган имтиёзларга.

Аҳдлашувчи Томонлар икки мамлакат ўртасидаги савдо оқимини рағбатлантирадилар ва мазкур Битимда акс эттирилган ҳамкорликнинг соҳаларида хўжалик субъектлари томонидан лойиҳаларни амалга ошириш имкониятларини таъминлашга кўмак берадилар.

Аҳдлашувчи Томонлар хўжалик юритувчи субъектлар ўртасидаги мазкур Битим асосида имзолаган шартномалари доирасидаги барча тўловлар Аҳдлашувчи Томонларнинг миллий қонунчилигига мувофиқ эркин муомаладаги валютада амалга оширилади.

(1) Ҳар бир Аҳдлашувчи Томон ўз давлатлари ҳудудларида ўтказиладиган конференцияларда, семинарларда, савдо кўргазмаларида ва бошқа анжуманларда бошқа Аҳдлашувчи Томоннинг жисмоний ва юридик шахсларининг иштирок этишини рағбатлантиради.

(2) Ҳар бир Аҳдлашувчи Томон бошқа Аҳдлашувчи Томонга тижорат делегациялари алмашинувини амалга оширишда кўмаклашади.

(1) Аҳдлашувчи Томонлар қўшма лойиҳалар орқали икки томонлама иқтисодий ҳамкорликни амалга оширилишини қўллаб-қувватлайдилар.

(2) Мазкур Битимга асосан ҳар бир Аҳдлашувчи Томон икки давлатнинг юридик ва жисмоний шахслари ўртасидаги савдо ва техникавий ҳамкорликни ривожлантириш учун барча чора-тадбирларни, экспертлар, олимлар, техниклар, талабалар ва шу соҳа мутахассисларининг ўзаро алмашинувини амалга оширади, илмий изланиш ва бошқа ҳамкорлик соҳаларида ёрдам беради.

(1) Ҳар иккала Аҳдлашувчи Томонлар вакилларидан тузилган Қўшма савдо-иқтисодий қўмита икки давлат ўртасидаги савдо- иқтисодий ҳамкорликни ривожлантиради ва мувофиқлаштиради. Қўшма қўмита фаолиятининг асосий вазифалари қуйидагилардир:

(а) ушбу Битимда белгиланган соҳаларда маълум натижаларга эришиш.

(б) Аҳдлашувчи Томонлар ўртасида савдо, қишлоқ хўжалик ва саноат соҳаларидаги ҳамкорликни кенгайтириш мақсадида турли усуллар ва воситаларни татбиқ қилиш.

(в) ушбу Битимнинг қўлланиши ва талқин этилиши билан боғлиқ низоларни ҳал қилиш.

(г) ушбу Битимнинг татбиқ қилиниши юзасидан таклифлар бериш ва уларни қўллаш.

(д) ушбу Битимда белгиланган соҳаларда ёки Аҳдлашувчи Томонлар билан келишилган бошқа соҳаларда ҳамкорликни ривожлантириш.

(2) Қўшма қўмита Аҳдлашувчи Томонлардан бирининг ташаббуси ва иккинчи томоннинг розилиги билан Аҳдлашувчи Томонлар ҳудудида учрашадилар.

(3) Қўшма қўмита ўз иш фаолиятини ўзи мувофиқлаштиради.

(4) Аҳдлашувчи Томонларнинг розилиги билан уларнинг ишбилармонлар доираси вакиллари зарур ҳолда Қўшма қўмитанинг иш фаолиятида қатнашадилар.

(5) Қўшма қўмита ҳамраислари сифатида Ўзбекистон Республикаси томонига Ташқи иқтисодий алоқалар, инвестициялар ва савдо вазирлиги ва Ўмон Султонлиги томонига Миллий иқтисодиёт вазирлиги бошчилик қилади.

(6) Ушбу Битимда белгиланган соҳалардаги ҳамкорликни амалга ошириш учун Қўшма қўмитанинг таклифлари Аҳдлашувчи Томонларнинг ички қонунчилиги ва улар имзолаган халқаро шартномалар асосида амалга оширилади.

(1) Ушбу Битимга Ўзбекистон Республикаси ёки Ўмон Султонлиги томонидан учинчи давлат, минтақавий ёки халқаро иқтисодий ташкилотлар билан ўзаро имзоланган меморандум, шартнома ва битимлардан келиб чиқадиган ҳуқуқ ва мажбуриятлар таъсир қилмайди.

(2) Аҳдлашувчи Томонларнинг хўжалик фаолиятини юритувчи субъектлари ўртасида тузилган шартномаларга асосан, Аҳдлашувчи Томонлар уларнинг хўжалик юритувчи субъектлари томонидан имзоланган шартномалардан келиб чиқадиган мажбуриятлари бўйича жавобгар бўлмайдилар.

Ушбу Битим қоидаларини талқин қилиш ёки қўллаш бўйича келишмовчиликлар пайдо бўлган ҳолда Аҳдлашувчи Томонлар уларни ўзаро консультациялар ва музокаралар йўли билан ҳал этадилар.

Ушбу Битим Аҳдлашувчи Томонлардан бирининг дипломатик каналлар орқали бошқа Аҳдлашувчи Томоннинг ушбу Битимнинг кучга кириши учун зарур бўлган ички процедураларни бажарганлиги тўғрисида дипломатик каналлар орқали сўнгги ёзма хабарномани олган кундан бошлаб кучга киради.

(1) Мазкур Битим кучга киргандан сўнг беш (5) йил давомида амал қилади ва Томонлардан биронтаси ушбу Битимнинг амал қилишини тўхтатиш тўғрисидаги нияти ҳақида бошқа Томонни тегишли беш йиллик муддат тугашидан камида олти ой илгари ёзма равишда дипломатик каналлар орқали хабардор қилмаса, у ўз-ўзидан кейинги беш йиллик муддатга узайтирилади.

(2) Мазкур Битимнинг амал қилиши тўхтатилган ҳолда, унинг қоидалари Битим амалда бўлган даврда тузилган шартномалар ва улар бўйича мажбуриятлар бажарилган кейинги муддат давомида амал қилади.

Ушбу Битимга Аҳдлашувчи Томонларнинг ўзаро келишувига мувофиқ ўзгартиш ва қўшимчалар киритилиши мумкин, Аҳдлашувчи Томонлар бир-бирларига лозим бўлган давлат ички процедураларни бажарганликлари тўғрисида дипломатик каналлар орқали сўнгги ёзма хабарномани берганларидан сўнг ўзгартиш ва қўшимчалар кучга киради.

УШБУНИ ТАСДИҚЛАБ, қуйидаги вакиллар тегишлича ўз ҳукуматлари томонидан берилган ваколатга эга бўлган ҳолда мазкур Битимни имзоладилар.

Маскат шаҳрида 2009 йил 5 октябрда икки асл нусхада, ҳар бири ўзбек, араб ва инглиз тилларида тузилди, бунда барча матнлар бир хил кучга эга. Талқин қилишда келишмовчиликлар юзага келса, инглиз тилидаги матн устувор ҳисобланади.