Ўзбекистон Республикаси Ҳукумати билан Ҳиндистон Республикаси Ҳукумати (бундан кейин Томонлар деб аталувчилар),

ўзларининг дўстона муносабатларини таъкидлаб, ахборот технологиялари соҳасида икки томонлама ҳамкорликни янада мустаҳкамлаш истагида,

ушбу иборада, Тошкент шаҳрида «Ахборот технологиялари бўйича ўзбек-ҳинд маркази»ни тузиш орқали Ўзбекистонда ахборот технологияларини (бундан кейин АТ) ривожлантиришни қўллаб-қувватлаш тўғрисида Ҳиндистон Республикаси Ҳукуматининг таклифини қайд этиб,

шунингдек, Ҳиндистон Республикаси Ҳукумати Тошкентда «Ахборот технологиялари бўйича ўзбек-ҳинд маркази»ни тузиш орқали ахборот технологияларини ривожлантириш мақсадида Ўзбекистон Республикаси Ҳукуматига 30 миллион рупий миқдоридаги грантни тақдим этиш тўғрисидаги қарорини белгилаб ўтиб,

Томонлар қуйидагилар тўғрисида англашувга эришдилар:

Марказ фаолияти қуйидагиларга йўналтирилган:

мутахассислар учун билимлар базасини ташкил этиш ва ишга жойлашиш имкониятларини яратиш;

Ўзбекистонга инвестицияларни жалб қилиш ва экспортдан даромад олиш учун шарт-шароитларни яратиш мақсадида АТ соҳасида жаҳон талабларига жавоб берадиган профессионал мутахассисларни шакллантириш;

Ўзбекистонда электрон бошқарувини шакллантиришга кўмаклашиш.

дастурий компьютер таъминоти соҳасида қисқа муддатли ихтисослик курслари кўринишидаги тренингни таъминлаш;

Ўзбекистоннинг давлат хизматчиларини АТ маҳоратларига ўқитиш;

Ўзбекистон университетларининг профессор-ўқитувчилар таркибини АТ соҳасидаги малакасини ошириш;

дастурий дизайн ва дастурий маҳсулотларни ишлаб чиқиш соҳасидаги замонавий ўқитиш, лойиҳани амалга оширишнинг барча даври бўйича ўқитиш, яъни ускунани мижознинг талабига кўра лойиҳалаштириш, ривожлантириш, тест ўтказиш, синаш, созлаш, мослаш, фойдаланишга тушириш, хизмат кўрсатиш ва ҳоказолар.

Ҳиндистон Республикаси Ҳукумати ҳамкорликни қуйидагилар асосида таъминлайди, жумладан техник экспертиза; аппарат воситалари, дастурий таъминот ва тармоқ ускуналарини етказиб бериш; Ўзбекистон мутахассисларини Ҳиндистонда ўқитиш; Ҳиндистоннинг АТ бўйича экспертларини марказни тузиш ва асосий ишдан узилмаган ҳолда ўқитиш мақсадида юбориш; ва қуйидагиларга биноан ихтисослаштирилган ўқув адабиётларини тақдим этиш:

1. Илғор компьютер технологияларини ривожлантириш Маркази Ҳиндистон Ҳукумати номидан ижро этувчи орган этиб белгиланади (бундан кейин—ИКТРМ);

2. Марказда курсларни ташкил этиш учун талаб қилинадиган аппарат воситалари, зарур дастурий маҳсулотлар ва амалдаги тизимлар, тармоқ элементлари ҳамда ўқув синфлари учун ускуналар (проектор, электрон доскалар, нусха олиш машиналари ва ҳоказолар)ни етказиш;

3. Марказни ташкил этиш ва Ўзбекистон профессор-ўқитувчилар таркибининг асосий ишдан узилмаган ҳолда марказда тренинг ўтказиш мақсадида Ўзбекистонга АТ бўйича умумий миқдорда бир ойга 60 кишидан иборат ҳинд экспертларини юбориш;

4. Ўзбекистоннинг умумий миқдорда бир ойга 48 кишидан иборат мутахассисларини Ҳиндистонда ўқитиш.

Ўзбекистон Республикаси Ҳукумати ўз навбатида лойиҳани амалга оширишда қуйидагича кўмаклашади:

1. Ўзбекистон Ҳукумати номидан Ўзбекистон алоқа ва ахборотлаштириш агентлиги номидан Тошкент ахборот технологиялари университети ижро этувчи орган этиб белгиланади;

2. Тегишлича таъмирланган ва жиҳозланган (LAN локал тармоқ/телефон алоқаси/ISDN ва ҳоказо), электр энергияси, UPS/DGSet узлуксиз электр қуввати (қўшимча электр энергиясини таъминлаш), сув, иситиш, совутиш тизими ва ҳоказолар билан таъминланган талаб қилинадиган майдонга эга зарур бинони тақдим этиш;

3. Компьютер ва офис мебелларини таъминлаш, ходимлар, ўқув хоналари, кутубхона ҳамда кафедра хоналари учун тегишли ускуналарни таъминлаш;

4. Ҳиндистондан юборилган экспертларни бепул асосда мебель билан жиҳозланган яшаш жойи, транспорт, алоқа воситаси ва тиббий хизмат билан таъминлаш;

5. Ҳинд экспертларига офис учун жой, алоқа воситаси, виза олишда кўмаклашиш, меҳнат фаолиятини амалга оширишга рухсат бериш ва ҳоказолар;

6. Ҳамкорлик дастури доирасида товар ҳамда хизматларни Ўзбекистонда ундирилиши мумкин бўлган божхона божлари, ички солиқлар, шунингдек бошқа фискал тўловлардан озод қилиш;

7. Тошкент аэропортида бепул божхона тозаловини таъминлаш ва ускуналарни Марказга қисқа муддатда етказиш. Ушлаб қолинган ҳолда Ўзбекистон Ҳукумати масъулиятни ўз зиммасига олади;

8. Фойдаланишга киритиш ва ўқитишда, зарур асбоблар, ускуналар, ишчи кучи ва ҳоказо билан таъминлаш бўйича маҳаллий ишларни мувофиқлаштириш;

9. Марказни бошқариш учун Ўзбекистон ходимларини ишга ёллаш;

10. Марказни кундалик молиявий қўллаб-қувватлаш ва фаолиятини бошқаришда кўмаклашишни таъминлаш;

11. Марказнинг кундалик операцион харажатларини қоплаш;

12. Марказни очиш ва унинг фаолияти учун талаб қилинадиган рухсатномаларни ўрнатилган тартибда расмийлаштириш.

Лойиҳанинг тегишлича ижро этилиши бўйича мониторинг ўтказиш мақсадида ўзбек-ҳинд Қўшма ишчи гуруҳи тузилади.

Ушбу Англашув Меморандуми доирасидаги исталган модда ёки фаолияти билан боғлиқ ёхуд шунга мувофиқ интеллектуал мулкка эга бўлиш ҳуқуқлари (бундан кейин — ИМҲ), шунингдек бундай ҳуқуқларнинг тақсимланиши бўйича ҳар бир муайян ҳолатда маҳаллий мавжуд қонун ҳужжатлари ва халқаро принципларга мувофиқ кўриб чиқилади. Бироқ, ИКТРМ томонидан ҳар қандай компьютер дастурлари, аппарат воситалари, ўқув курслари материаллари, ўқитиш услубияти/усуллари лойиҳалаштирилса, ишлаб чиқилса, бундай ишларга нисбатан ИМҲ Ҳиндистон Ҳукумати ИКТРМ/Ахборот технологиялари департаменти (DIT)га тегишли бўлади.

Томонлар шуни тасдиқлайдиларки, Томонларнинг ҳеч бири ушбу Меморандум доирасидаги қўшма фаолият жараёнида бошқа томондан олинган ҳар қандай ахборотни исталган учинчи мамлакатга ошкор қилмайди ва тарқатмайди, бошқа Томоннинг ёзма розилиги олинган ёки суд жараёни билан боғлиқ ҳолатлар бундан мустасно. Жамоат мулки ҳисобланган ҳар қандай шу каби ахборот/маълумот/хабарга махфий ахборот сифатида кўрилмаслиги лозим.

Марказнинг ишчи тили— инглиз тили ҳисобланади ва барча дастурий таъминот, ўқув курслари материаллари, ўқитиш ва бошқалар инглиз тилида бўлади. Агар ўқув қўлланмалари фақат рус тилида бўлса, худди шундай шарт-шароитлар тақдим этилиши мумкин.

Мажбуриятларни бажаришда юзага келадиган барча масала ва келишмовчиликлар англашув асосида музокара ҳамда маслаҳатлашувлар орқали ҳал қилинади.

Ушбу Меморандумга ўзгартиш ва тўлдиришлар киритиш ушбу Меморандумнинг ажралмас қисми ҳисобланадиган алоҳида баённомалар билан расмийлаштирилади.

Ушбу Англашув Меморандуми Томонлар имзоланган санадан бошлаб кучга киради.

Ушбу Меморандумнинг амал қилиши Томонлар лойиҳанинг якунланганини тасдиқлаганларидан сўнг тўхтатилади.

Ушбу Англашув Меморандумини бажариш учун зарур бўлган лойиҳа бўйича харажатлар, унинг амалга оширилиши жадвали, аппарат воситалари, дастурий таъминоти, тармоқ ускуналари ва бошқа деталларнинг таснифланиши ҳар бир Томон тарафидан алоҳида белгилаб олинади. Ушбу Меморандумни амалга ошириш ва ривожлантириш мақсадида чоп этилган барча ҳужжатлар Меморандумнинг ажралмас қисми ҳисобланади.

Ушбуни тасдиқлаб, қуйида имзо чекувчи Томонлар вакиллари тегишли равишда ваколатланган ва ўзларининг қонунчиликларига мувофиқ ушбу Англашув Меморандумини имзоладилар.

Деҳли шаҳрида 2004 йил 29 октябрда, икки асл нусхада, ҳар бири ўзбек, ҳинд ва инглиз тилларида тузилди, бунда барча матнлар бир хилда аутентикдир. Талқин қилишда келишмовчиликлар юзага келган ҳолда инглиз тилидаги матн асосий ҳисобланади.