Тошкент шаҳрида ҳуқуқни муҳофаза қилиш идоралари томонидан жиноятчиликни олдини олиш, жамоат тартибини сақлаш борасида амалга оширилаётган ишларда мулкчилик шакли ва бўйсунувидан қатъи назар, корхона, ташкилот ва муассасалар, ўзини ўзи бошқариш идоралари ва фуқаролар иштирокини кенг жалб этиш, уларнинг тезкор-қидирув ишлардаги ўзаро ҳамкорлигини йўлга қўйиш ва шу орқали жамоатчилик назоратини ўрнатиб, унинг роли ва таъсирини ошириш, аҳоли хавфсизлигини таъминлашга қаратилган ишларни янада кучайтириш мақсадида қарор қиламан:

1. Туман ҳокимлари, Ички ишлар бош бошқармаси (А.Ибрагимов):

1.1. Тегишли мутасадди идоралар, шунингдек «Маҳалла» хайрия жамоат фонди шаҳар (Ж.Иноғомов) ва туман бўлимлари раҳбарлари билан биргаликда, шаҳар ҳудудида фаолият юритаётган мулкчилик шакли ва бўйсунувидан қатъи назар, корхона, ташкилот ва муассаса раҳбарларига, шунингдек жисмоний шахсларга уларга тегишли бўлган нотурар, объектларга ташқи видео-кузатув камера ускунасини ўрнатишни тавсия этиш ишлари ташкил этилсин.

1.2. Бу мақсадда, ҳудудда фаолият юритаётган мулкчилик шакли ва бўйсунувидан қатъи назар, корхона, ташкилот ва муассаса раҳбарларига, шунингдек жисмоний шахсларга ўз маблағлари ҳисобидан ўзларига тегишли бўлган нотурар объектларга ташқи видео-кузатув камера ускунасини ўрнатишни ташкил этиш юзасидан кенг тушунтириш ишлари олиб борилсин.

1.3. Видео-кузатув камераларининг жиноятлар (ўғрилик, талончилик, безорилик ва бошқа жиноятлар) кўп содир бўлаётган ва содир этилиши эҳтимоли катта бўлган ҳудудларга, мавзелар ичкарисига, кўчаларга, аҳоли гавжум жойларга қаратиб ўрнатилишига эътибор берилсин.

2. Бино-иншоотларга ўрнатилган видео-кузатув камералари ускуналари ёзув тасмаларидан заруратга қараб белгиланган тартибда, жамоат тартиби ва хавфсизлигини сақлаш мақсадида фойдаланиш мумкинлиги кўрсатиб ўтилсин.

3. Архитектура ва қурилиш бош бошқармаси (А.Таджиев), Архитектура ва қурилиш назорати инспекцияси (Т.Набиев), туман ҳокимлари:

Янги қурилаётган нотурар жой объектлари, шунингдек ўз ҳудудларида нотурар жой қайта қурилиш ишларини амалга ошираётган субъектларга меъморий лойиҳаларни ишлаб чиқишда ва қурилишни бошлашга рухсат олиш ҳамда топшириш жараёнида бино-иншоотларга ташқи видео-кузатув камераларини ўрнатишни тавсия этсинлар.

4. Ички ишлар бош бошқармаси (А.Ибрагимов):

Ҳудуд профилактика инспекторлари ҳамда фуқароларнинг ўзини ўзи бошқариш идоралари ёрдамида белгиланган тартибда шаҳар ҳудудида ташқи видео-кузатув камера ускуналари ўрнатилиши режалаштирилаётган ҳамда ўрнатилган объектлар ҳисоби юритилсин.

5. Мазкур қарор тасдиқлаш учун халқ депутатлари Тошкент шаҳар Кенгашининг навбатдаги сессиясига киритилсин.

6. Қарорнинг бажарилишини назорат қилиш Тошкент шаҳар ҳокимининг биринчи ўринбосари Б.Рахмонов ва Ички ишлар бош бошқармаси бошлиғи А.Ибрагимов зиммаларига юклатилсин.