Ўзбекистон Республикаси Президентининг 2009 йил 6 майдаги «Тошкент шаҳрини йўловчи ташиш автобуслари билан таъминлаш бўйича қўшимча чора-тадбирлар тўғрисида»ги ПҚ-1109-сонли қарорига асосан Тошкент шаҳрига 2009 йил давомида 200 та «Меrcedes-Веnz Connecto Low Floor» русумли шаҳар йўловчи ташиш автобуслари келтирилиши муносабати билан йўналишлар тармоғини янада ривожлантириш, йўловчи ташиш ва йўл ҳаракати хавфсизлигини таъминлаш, оралиқ бекатларда микроавтобуслар тўпланишининг олдини олиш, шаҳарнинг марказий кўчаларида транспорт воситаларининг тирбандлигини камайтириш хамда йўловчиларнинг транспорт воситаларига бўлган эҳтиёжини тўла қондириш ва «Меrcedes-Веnz» русумли автобусларнинг Тошкент шаҳрининг барча туман ва мавзеларида тасарруф этилишини тўлиқ таъминлаш мақсадида қарор қиламан:

1. Ўзбекистон Республикаси Президентининг 2009 йил 6 майдаги «Тошкент шаҳрини йўловчи ташиш автобуслари билан таъминлаш бўйича қўшимча чора-тадбирлар тўғрисида»ги ПҚ-1109-сонли қарори ижро учун қабул қилинсин.

2. Мазкур қарорга асосан:

«Тошшаҳартрансхизмат» уюшмаси ва «ЭвоБус Гмбх» (Германия) ўртасида 2009 йил 7 апрелда 2009/1-сонли олди-сотди шартномаси тузилиб, унга асосан 2009 йил давомида 200 та «Меrcedes-Веnz Connecto Low Floor» русумли шаҳар йўловчи ташиш автобуслари харид қилиниши;

шартноманинг тўлиқ қийматини молиялаштириш Ўзбекистон Республикаси тараққиёт ва тикланиш жамғармасининг 3 йил имтиёзли даврни ҳисобга олган ҳолда 15 йил муддатга бериладиган кредит маблағлари ҳисобидан, йиллик 0,5 фоизли ставка ва қайта молиялаштирувчи «Ўзсаноатқурилишбанк»нинг йиллик 0,25 фоизли маржаси бўйича амалга оширилиши;

Ўзбекистон Республикаси тараққиёт ва тикланиш жамғармасининг асосий қарзини узиш, кредитга хизмат кўрсатиш бўйича фоизлар ва воситачилик ҳақини тўлаш «Тошшаҳартрансхизмат» уюшмаси маблағлари, шунингдек оладиган автобуслар миқдорига мутаносиб равишда «Тошавтобустранс» акциядорлик компанияси ва автобус паркларининг маблағлари ҳисобидан амалга оширилиши;

«Тошшаҳартрансхизмат» уюшмасининг «ЭвоБус Гмбх» компанияси билан тузилган шартномаси бўйича олиб келинадиган 200 та «Меrcedes-Веnz Connecto Low Floor» русумли шаҳар йўловчи ташиш автобуслар асбоб-ускуналар ва махсус жиҳозлар, шунингдек автобуслардан фойдаланишнинг кафолат муддати даврида ишдан чиққан қисмлари ўрнига етказиб бериладиган эҳтиёт қисмлар ҳамда материаллар божхона тўловларидан (божхона расмийлаштируви йиғимларидан ташқари) озод этилиши;

Ўзбекистон Республикаси тараққиёт ва тикланиш жамғармаси кредитига хизмат кўрсатишга йўналтириладиган маблағларни жамлаш учун «Тошшаҳартрансхизмат» уюшмаси томонидан «Ўзсаноатқурилишбанк»да махсус жамғариш ҳисоб рақами очилиши;

1994 — 1998 йилларда харид қилинган «Мерседес-Бенц О 405» русумли автобусларнинг 12 йилдан ортиқ ва 1,2 млн км дан кўп йўловчи ташиш фаолиятида ишлатилганлари бўйича белгиланган тартибда очиқ кимошди савдоларида сотилиши ва келиб тушган пул маблағлари мақсадли равишда Ўзбекистон Республикаси тараққиёт ва тикланиш жамғармасига 200 та «Меrcedes-Веnz Connecto Low Floor» русумли автобусларининг кредитларини тўлаш учун йўналтирилиши;

икки ой ичида очиқ кимошди савдоларида сотиладиган «Мерседес-Бенц О 405» русумли автобуслар сони ва баҳоланган қиймати аниқланиб, очиқ кимошди савдоларига қўйилиши ва сотилгандан сўнг тасарруфдан чиқарилиши;

«Тошшаҳартрансхизмат» уюшмаси таркибидаги корхоналарга бериладиган 200 та «Меrcedes-Веnz Connecto Low Floor» русумли шаҳар йўловчи ташиш автобуслари, уларнинг эҳтиёт қисмлари, «ЭвоБус Гмбх» фирмаси билан тузилган шартномага асосан кафолат муддати даврида ишдан чиққан қисмлари ўрнига етказиб бериладиган эҳтиёт қисмлар ҳамда очиқ кимошди савдоларида сотиладиган «Мерседес-Бенц О 405» русумли автобуслар қўшимча қиймат солиғи солинадиган объект ҳисобланмаслиги;

«Мерседес-Бенц О 405» русумли автобусларнинг очиқ кимошди савдоларида сотилишидан олинадиган даромадларга юридик шахсларнинг фойда солиғи солинмаслиги белгиланганлиги эътиборга олинсин.

3. «Тошшаҳартрансхизмат» уюшмаси (Ш. Муҳамеджонов), Тошкент шаҳар ҳокимлиги йўловчи транспортининг барча турлари ҳаракатини лицензиялаш ва мувофиқлаштириш департаменти (Ю. Арипджанов):

3.1. 2009 йил давомида келтириладиган 200 та «Меrcedes-Веnz Connecto Low Floor» русумли автобусларининг шаҳар ичи йўналишларида тасарруф этилиши муносабати билан қуйидагилар таъминлансин:

мавжуд шаҳар ичи йўналишларида оралиқ қатнов вақтини қисқартириш таъминлаган ҳолда мазкур йўналишларда ҳаракат жадваллари сони кўпайтирилсин;

кимошди савдоларига қўйиладиган «Мерседес-Бенц О 405» русумли автобусларнинг ўрнига «Меrcedes-Веnz Connecto Low Floor» русумли автобусларининг тасарруф этилиши таъминлансин;

мавжуд йўловчилар оқимини тўла таъминлай олмаётган йўналишли такси режимига фаолият кўрсатувчи микроавтобуслар йўналишларига параллель равишда янги автобус йўналишларининг очилиши таъминлансин.

3.2. Йўналишли такси режимида фаолият кўрсатувчи янги йўналишларнинг очилиши тўхтатилсин ва 2009 йил 1 июндан бошлаб алоҳида фармойиш бўлгунга қадар қуйидагиларнинг («Тошшаҳартрансхизмат» уюшмаси таркибига кирган корхоналардан ташқари) амалга оширилиши таъминлансин:

йўналишли такси режимида фаолият кўрсатувчи йўналишларнинг максимал сони 155 та этиб белгилансин;

йўналишли такси режимида фаолият кўрсатувчи 155 та йўналишларда ҳаракат жадвалларининг максимал сони 1330 та этиб белгилансин;

йўналишли такси режимида фаолият кўрсатиш ҳуқуқини берувчи лицензия карточкаларининг максимал сони 1670 та этиб белгилансин (паркдан фойдаланиш коэффициенти — 0,80 ҳисобидан);

ҳаракат таркибининг (микроавтобусларнинг) янгиланиши, йўналишларда ҳаракат жадваллари сонининг ўзгартирилиши, йўналишлар ҳаракат схемаларининг узайтирилиши, қисқартирилиши ва ўзгартирилиши белгиланган йўналишлар сони (155 та), ҳаракат жадваллари сони (1330 та) ва бириктирилган ҳаракат таркиблари сони (1670 та) ҳисобидан амалга оширилишига рухсат берилсин;

шаҳар йўловчи ташиш транспорти йўналишлари билан таъминланмаган янги кўчалар, мавзелар ва бошқа объектларни кўриш ва реконструкция қилиш ишлари амалга оширилган пайтда Тошкент шаҳар ҳокимлиги йўловчи транспортининг барча турлари ҳаракатини лицензиялаш ва мувофиқлаштириш Департаментига тендер комиссияси билан келишилган ҳолда қўшимча йўналишли такси йўналишларини очиш бўйича ваколат берилсин;

2010 йил 1 майга қадар, йўналишли такси режимида фаолият кўрсатаётган ва йўловчи ташиш хавфсизлигини таъминлаш талабларига жавоб бермайдиган «Дамас» русумли автомобиллар босқичма-босқич тасарруфдан чиқарилсин. Бир ойлик муддатда «Дамас» русумли автомобилларини босқичма-босқич» тасарруфдан чиқариш жадвали ишлаб чиқилсин ва тасдиқлаш учун киритилсин. «Дамас» русумли автомобиллар эгаларига мазкур транспорт воситаларини енгил такси режимида тасарруф этиш тавсия этилсин;

2010 йил 1 майдан бошлаб йўналишли такси режимида фақат йўловчи ташишга мўлжалланган, ҳайдовчи ўрнидан ташқари ўриндиқлар сони 8 (саккиз) тадан ортиқ бўлган микроавтобус тоифасига мансуб автотранспорт воситаларининг тасарруф этилиши таъминлансин;

йўловчилар оқими кўп бўлган йўналишли такси режимида фаолият кўрсатувчи микроавтобуслар йўналишларига параллель равишда янги келтириладиган 200 та «Меrcedes-Веnz Connecto Low Floor» русумли автобуслари ҳисобига шаҳар ичи автобус йўналишлари ташкил этилсин. Мазкур йўналишларга бириктирилган микроавтобуслар тасарруф этишдан четлаштирилган «Дамас» русумли автомобиллар тасарруф этилаётган йўналишлар ўрнига йўловчилар оқими ва транспорт йўналишлари сиғимига қараб бириктирилсин;

«Тошшаҳартрансхизмат» уюшмаси таркибига кирмаган юридик мақомга эга бўлган мавжуд шаҳар ичи автобус йўналишларида ойлик йўл чипталари билан фойдаланувчи ва Ўзбекистон Республикасининг 1996 йил 30 августдаги «Шаҳар йўловчилар транспортидан бепул фойдаланишни тартибга солиш тўғрисида»ги Қонунига биноан шаҳар йўловчилар транспортидан бепул фойдаланиш ҳуқуқига эга бўлган йўловчилар фойдаланмаётганликлари туфайли мазкур йўналишлар йўналишли такси режимига ўтказилсин;

2009 йил 1 июндан бошлаб, йўналишли такси режимида фаолият кўрсатувчи «Дамас» русумли автомобилларга ва хусусий давлат рақамига эга бўлган микроавтобусларга йўналишли такси режимида фаолият кўрсатиш ҳуқуқини берувчи лицензия карточкаларининг берилиши тўхтатилсин (ҳозирги кунда фаолият кўрсатаётган автотранспорт воситаларидан ташқари). Тендер комиссияси аъзоларига тендер ўтказилаётган пайтда давлат рақамли микроавтобусларга эга бўлган юридик корхоналарга устуворликнинг берилиши тавсия этилсин;

енгил такси сифатида ишлаш ҳуқуқини берувчи лицензия карточкаларининг берилиши фақат енгил такси автомобилларига қўйиладиган барча талабларнинг бажарилиши таъминлангандан сўнг амалга оширилсин.

4. Тошкент шаҳар Давлат солиқ бошқармаси (А. Йўлдошев), Тошкент шаҳар ИИББ ЙҲХБ (Х. Дадаходжаев), лицензиясиз, ноқонуний йўловчи ташиш фаолияти билан шуғулланувчи автотранспорт воситалари эгаларига нисбатан ўрнатилган тартибда тегишли чоралар кўрилиши таъминлансин.

5. Мазкур қарорнинг бажарилишини назорат этиш Тошкент шаҳар ҳокимининг биринчи ўринбосари Р. Усмонов ва Тошкент шаҳар ҳокимининг ўринбосари, «Тошшаҳартрансхизмат» уюшмаси раиси Ш. Муҳамеджонов зиммаларига юклатилсин