Ўзбекистон Республикаси Давлат божхона қўмитасининг қўшимча сафарбар қилинган ва ротация қилинган ходимлари учун муносиб турар-жой ва маиший шароитлар яратиш мақсадида Ўзбекистон Республикаси Вазирлар Маҳкамаси қарор қилади:

1. Ўзбекистон Республикаси Давлат божхона қўмитаси, Ўзбекистон Республикаси Давлат мулки қўмитаси ва Тошкент шаҳар ҳокимиятининг Тошкент шаҳар ҳокимияти «Ягона буюртмачи хизмати» ИК балансидаги Тошкент шаҳар, Мирабад тумани, Қўйлиқ-4 массивида жойлашган қурилиши тугалланмаган ётоқхона биноси (кейинги ўринларда — объект)ни тасарруф этиш ҳуқуқисиз, беғараз асосда Ўзбекистон Республикаси Давлат божхона қўмитаси балансига ўтказиш таклифига розилик берилсин.

2. Тошкент шаҳар ҳокимияти бир ҳафта муддатда объектни топширсин, Ўзбекистон Республикаси Давлат божхона қўмитаси эса уни белгиланган тартибда қабул қилсин.

3. Ўзбекистон Республикаси Давлат божхона қўмитаси:

бюджетдан ташқари маблағлари ҳисобидан объект қурилишини якунласин ва зарур техник жиҳозлар билан таъминласин, шунингдек туташ ҳудудни ободонлаштирсин;

қабул қилинган объектдан Ўзбекистон Республикаси Давлат божхона қўмитаси тизими ходимлари учун хизмат турар-жойи сифатида фойдаланишни таъминласин.

4. Қуйидагилар ўз кучини йўқотган деб ҳисоблансин:

Ўзбекистон Республикаси Вазирлар Маҳкамасининг «Тошкент шаҳар ҳокимияти муниципал мулк объектлари сотуви жараёнини тезлаштиришга оид қўшимча чора-тадбирлар тўғрисида» 2009 йил 30 августдаги 253-сон қарорига илованинг 19-қатори;

Ўзбекистон Республикаси Вазирлар Маҳкамасининг «Давлат активларини очиқ савдоларда сотишга доир қўшимча чора-тадбирлар тўғрисида» 2011 йил 18 июлдаги 207-сон қарорига 2-илованинг 59-қатори.

5. Ушбу қарор ижросини назорат қилиш Ўзбекистон Республикаси Бош вазирининг биринчи ўринбосари Р.С. Азимов ва Ўзбекистон Республикаси Бош вазири ўринбосари Б.И. Закиров зиммасига юклатилсин.