Ўзбекистон Республикаси Солиқ кодексига (Ўзбекистон Республикаси қонун ҳужжатлари тўплами, 2007 й., 52 (I)-сон), Ўзбекистон Республикаси «Давлат солиқ хизмати тўғрисида»ги Қонунининг (Ўзбекистон Республикаси Олий Мажлиси Ахборотномаси, 1997 й., 9-сон, 232-модда) 7-моддаси ва Ўзбекистон Республикаси Президентининг 2005 йил 11 апрелдаги ПФ-3594-сон «Тўғридан-тўғри хусусий хорижий инвестицияларни жалб этишни рағбатлантириш борасидаги қўшимча чора-тадбирлар тўғрисида»ги Фармонига (Ўзбекистон Республикаси қонун ҳужжатлари тўплами, 2005 йил, 15-16-сон, 109-модда) мувофиқ, Ўзбекистон Республикаси Молия вазирлиги, Давлат солиқ қўмитаси ва Иқтисодиёт вазирлиги қарор қиладилар:

1. Тўғридан-тўғри хусусий хорижий инвестицияларни жалб қилувчи корхоналар учун солиқ имтиёзларини қўллаш тартиби тўғрисидаги низом иловага мувофиқ тасдиқлансин.

2. Ўзбекистон Республикаси Молия вазирлиги, Давлат солиқ қўмитаси ва Иқтисодиёт вазирлигининг 2005 йил 3 августдаги 61, 2005-40 ва 60-сон «Тўғридан-тўғри хусусий хорижий инвестициялар учун солиқ имтиёзларини қўллаш тартиби тўғрисидаги низомни тасдиқлаш ҳақида»ги қарори (рўйхат рақами 1524, 2005 йил 28 ноябрь) (Ўзбекистон Республикаси қонун ҳужжатлари тўплами, 2005 й., 47-48-сон, 359-модда) ўз кучини йўқотган деб ҳисоблансин.

3. Ушбу қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

Мазкур Низом Ўзбекистон Республикаси Солиқ кодекси (Ўзбекистон Республикаси қонун ҳужжатлари тўплами, 2007 й., 52 (I)-сон) ва Ўзбекистон Республикаси Президентининг 2005 йил 11 апрелдаги ПФ-3594-сон «Тўғридан-тўғри хусусий хорижий инвестицияларни жалб этишни рағбатлантириш борасидаги қўшимча чора-тадбирлар тўғрисида»ги Фармонига (Ўзбекистон Республикаси қонун ҳужжатлари тўплами, 2005 йил, 15-16-сон, 109-модда) мувофиқ, тўғридан-тўғри хусусий хорижий инвестицияларни жалб этадиган корхоналар учун солиқлар ва Республика йўл жамғармасига мажбурий ажратмалар бўйича имтиёзларни қўллаш тартибини белгилайди.

1. Ўзбекистон Республикаси Солиқ кодексига мувофиқ, мазкур Низомнинг 1-иловасида кўрсатилган тармоққа мансублик тасниф кўрсаткичига (ХХТУТ коди) тааллуқли бўлган маҳсулот ишлаб чиқаришга ихтисослашган тўғридан-тўғри хусусий хорижий инвестицияларни жалб этувчи корхоналар қуйидагиларни тўлашдан озод этилади:

юридик шахслардан олинадиган фойда солиғини;

мол-мулк солиғини;

ободонлаштириш ва ижтимоий инфратузилмани ривожлантириш солиғини;

ягона солиқ тўловини;

Республика йўл жамғармасига мажбурий ажратмаларни.

2. Тармоққа мансублик тасниф кўрсаткичига (ХХТУТ коди) тааллуқли бўлган маҳсулот ишлаб чиқаришга ихтисослашган корхоналарга ҳисобот йили якунига кўра тармоққа мансублик тасниф кўрсаткичига (ХХТУТ коди) тааллуқли бўлган маҳсулот ишлаб чиқаришдан тушумнинг улуши реализациянинг умумий ҳажмида 60 фоиздан кам бўлмаган корхоналар киради.

3. Мазкур Низомнинг 1-бандида кўрсатилган имтиёзлар мазкур Низомнинг 1-иловасида кўрсатилган тармоққа мансублик тасниф кўрсаткичига (ХХТУТ коди) тааллуқли бўлган маҳсулот ишлаб чиқаришга ихтисослашган бутун корхонага татбиқ этилади.

4. Мазкур Низомнинг 10, 14 ва 15-бандлари Ўзбекистон Республикаси Президенти ва Ўзбекистон Республикаси Вазирлар Маҳкамасининг алоҳида қарорлари билан Ўзбекистон Республикаси Президентининг 2005 йил 11 апрелдаги «Тўғридан-тўғри хусусий хорижий инвестицияларни жалб этишни рағбатлантириш борасидаги қўшимча чора-тадбирлар тўғрисида»ги ПФ-3594-сон Фармонининг 1-банди биринчи хатбошиси билан назарда тутилган имтиёзлар татбиқ этилган корхоналарга ҳам татбиқ этилади.

5. Мазкур Низомнинг 1-бандида кўрсатилган солиқ имтиёзлари:

а) тўғридан-тўғри хусусий хорижий инвестицияларнинг ҳажми қуйидагиларга тенг (эквивалент) бўлганда тақдим этилади:

300 минг АҚШ долларидан 3 миллион АҚШ долларигача — 3 йил муддатга;

3 миллиондан ортиқ АҚШ долларидан 10 миллион АҚШ долларигача — 5 йил муддатга;

10 миллион АҚШ долларидан ортиқ бўлганда — 7 йил муддатга;

б) қуйидаги шартлар асосида қўлланилади:

мазкур корхоналарни ортиқча ишчи кучи бўлган минтақалар — Қорақалпоғистон Республикаси, Жиззах, Қашқадарё, Сирдарё, Сурхондарё, Хоразм вилоятларида, шунингдек Навоий, Андижон, Наманган ва Фарғона вилоятларининг қишлоқ аҳоли пунктларида жойлаштириш;

хорижий инвесторлар томонидан тўғридан-тўғри хусусий хорижий инвестицияларни Ўзбекистон Республикасининг кафолати берилмаган ҳолда амалга ошириш;

корхонанинг устав капиталида хорижий иштирокчиларнинг улуши камида 50 фоизни ташкил этиши лозим;

корхоналар давлат рўйхатидан ўтказилгандан кейин тўғридан-тўғри хусусий хорижий инвестицияларни киритиш;

хорижий инвестицияларни эркин алмаштириладиган валюта ёки янги замонавий технологик ускуна тарзида қўйиш;

мазкур имтиёзларнинг қўлланилиши муддати давомида имтиёзлардан олинган даромадни корхонани янада ривожлантириш мақсадида қайта инвестициялашга йўналтириш;

в) кейинги қонун ҳужжатларида инвестициялаш шарт-шароитлари ёмонлашган тақдирда қанча муддатга берилган бўлса, ана шу муддат мобайнида амал қилади.

6. Мазкур Низомнинг 1-бандида кўрсатилган имтиёзларнинг тақдим этилиши учун белгиланган мезонларга мувофиқ келадиган корхоналар давлат рўйхатидан ўтказилган санадан бошлаб солиқлар ва Республика йўл жамғармасига мажбурий ажратмалар тўлашдан озод этилади.

Агар корхона мазкур Низомнинг 1-бандида кўрсатилган имтиёзларни тақдим этиш учун белгиланган мезонларга ушбу корхона барпо этилгандан (давлат рўйхатидан ўтказилганидан) кейинги даврларда мувофиқ келса, ушбу корхона имтиёзларни тақдим этиш учун белгиланган мезонларга мувофиқлигини тасдиқловчи ҳолатлар юзага келган санадан бошлаб имтиёзни қўллаш ҳуқуқига эга бўлади. Бунда, имтиёздан фойдаланиш муддатини ҳисоблаш имтиёзни қўллаш учун корхона белгиланган мезонларга мувофиқ келадиган ҳолатлар юзага келган санадан бошлаб бошланади, бироқ имтиёзларни қўллаш бошланган санадан бошлаб етти йилдан кўп бўлмаган муддатга.

7. Имтиёзга доир ҳуқуқ фақат қонун ҳужжатлари билан белгиланган муддатларда устав капиталларини (фондларни) шакллантирган корхоналарга тақдим этилади. Бунда корхона мазкур Низомнинг 1-бандида кўрсатилган имтиёзларни ўз устав капиталини (фондини) шакллантириши лозим бўлган қонун ҳужжатларида назарда тутилган давр учун қўллаш ҳуқуқига эга бўлади.

Ўз устав капиталларини (фондларини) қонун ҳужжатларида белгиланган муддатларда шакллантирмаган корхоналарда, қонун ҳужжатлари билан белгиланган муддатларда ўз устав капиталларини (жамғармаларини) шакллантирмаган, чет эл инвестициялари қатнашган корхоналардан солиқларни ундириш тартиби тўғрисидаги низомга (рўйхат рақами 1144, 2002 йил 27 май) (Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномаси, 2002 йил, 10-сон) мувофиқ имтиёзлар тақдим этилган солиқлар ва Республика йўл жамғармасига мажбурий ажратмаларни тўлиқ миқдорда ва фаолиятнинг бутун даври учун имтиёзларни қўлламасдан тўлаш бўйича мажбуриятлар юзага келади.

8. Солиқлар ва Республика йўл жамғармасига мажбурий ажратмалар бўйича имтиёзларни тақдим этиш натижасида олинган даромад, уларни қўллаш муддати мобайнида, корхонани янада ривожлантириш мақсадида такрорий инвестициялашга йўналтирилади. Бунда такрорий инвестициялаш деганда тақдим этилган имтиёзлар натижасида олинган даромадни муассислар ўртасида тақсимламасдан корхонани ривожлантиришга йўналтириш тушунилади. Тақдим этилган имтиёзлар натижасида олинган даромад деганда солиқ солишдан озод қилиш натижасида маблағларнинг бўшаши ҳисобига олинадиган иқтисодий наф (корхона тасарруфида қоладиган фойданинг кўпайиши) тушунилади.

9. Агар корхона ҳисобот йили якуни бўйича мазкур Низомнинг 1-иловасида кўрсатилган тармоққа мансублик тасниф кўрсаткичига (ХХТУТ коди) тааллуқли бўлган маҳсулот ишлаб чиқаришга ихтисослашмаса, у ушбу ҳисобот даври учун мазкур Низомда белгиланган имтиёзларни қўлламаган ҳолда солиқ ва бошқа мажбурий тўловларни тўлайди.

Корхона мазкур Низомнинг 1-бандида кўрсатилган имтиёзларни тақдим этиш учун белгиланган талабларига мос келмай қолиш фактлари аниқланганда, корхона белгиланган талабларга мос келмаган давр учун солиқлар ва мажбурий ажратмалар умумбелгиланган тартибда, амалдаги қонун ҳужжатларида назарда тутилган молиявий санкцияларни қўллаган ҳолда тўланади.

Бунда, агар мазкур Низомнинг 1-бандида кўрсатилган имтиёзлардан фойдаланувчи корхонада имтиёзларни қўллаш даврида киритилган тўғридан-тўғри хусусий инвестициялар суммаси камаймаган ҳолда хорижий инвесторнинг улуши корхонанинг устав фондида 50 фоиздан камайса, шунингдек Низомда белгиланган бошқа талабларга мувофиқлиги сақланса, бундай корхоналар учун имтиёзларнинг амал қилиши сақланади.

10. Корхоналарга тақдим этилган имтиёзларни расмийлаштириш ва бухгалтерия ҳисобида акс эттириш тартиби Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерлик ҳисобида акс эттириш тартиби тўғрисидаги низом (рўйхат рақами 1463, 2005 йил 2 апрель) (Ўзбекистон Республикаси қонун ҳужжатлари тўплами, 2005 йил, 14-сон, 105-модда) билан тартибга солинади.

11. Хорижий инвестор томонидан имтиёзларнинг амал қилиш муддати мобайнида фойдани репатриация қилиш ва капитални олиб чиқиб кетиш тўғрисида қарор қабул қилинган тақдирда фойдани репатриация қилиш ва капитални хорижий инвестор томонидан олиб чиқиб кетиш фақат фойдани репатриация қилиш ва хорижий инвестор томонидан капитални олиб чиқиб кетишдан олдинги давр учун тақдим қилинган имтиёзлар суммаси бюджетга қопланганидан кейингина амалга оширилади.

Имтиёзлар олган корхонанинг фаолияти улар тақдим этилган муддат тугашидан кейин бир йилдан камроқ вақтда тугатилган тақдирда фойдани репатриация қилиш ва хорижий инвесторнинг капиталини хорижга олиб чиқиб кетиш фақат бюджетга тақдим этилган имтиёзларнинг суммалари қопланганидан кейингина амалга оширилади.

12. Мазкур Низомнинг 1-бандида кўрсатилган имтиёзлардан фойдаланиш ҳуқуқини тасдиқлаш учун корхона рўйхатдан ўтказилган жойдаги давлат солиқ хизмати органини ёзма равишда имтиёзларни қўллаш санаси бошланиши ҳақида мазкур Низомнинг 2-иловасига мувофиқ шаклда қуйидаги ҳужжатларни илова қилган ҳолда хабардор қилади:

адлия органлари томонидан берилган, хорижий инвестициялар иштирокидаги корхонани давлат рўйхатидан ўтказиш тўғрисида гувоҳноманинг нусхаси;

инвестициялар Ўзбекистон Республикасининг кафолатини тақдим этмасдан амалга оширилаётганлиги тўғрисида Ўзбекистон Республикаси Молия вазирлигининг тасдиқномаси.

Янги ташкил этилаётган корхона, юқорида айтилган ҳужжатларга қўшимча тарзда, йил мобайнида корхонани рўйхатдан ўтказган адлия органининг унинг тўлиқ шакллантирилган устав капитали (фонди) ва корхонанинг устав капиталида (фондида) хорижий инвесторнинг улуши тўғрисида тасдиқнома тақдим этади.

13. Давлат солиқ хизмати органлари тақдим этилган ҳужжатлар ўрганилгандан кейин мазкур Низомнинг 1-бандида кўрсатилган имтиёзлар татбиқ этиладиган корхонани имтиёзларга эга бўлган хўжалик юритувчи субъектлар реестрига киритиб, унда корхонанинг номи, имтиёзли давр муддати ва имтиёзлар суммасини кўрсатади.

14. Мазкур Низомнинг 1-бандида кўрсатилган имтиёзлар татбиқ этиладиган корхоналар, ҳисобот йили якуни бўйича солиқ ҳисоботини тақдим этиш билан бир вақтда, давлат солиқ хизмати органларига мазкур Низомнинг 3-иловасига мувофиқ шаклда Солиқлар ва Республика йўл жамғармасига мажбурий ажратмалар бўйича татбиқ этилган имтиёзлар суммаси тўғрисидаги маълумотномани тақдим этади.

15. Мазкур Низомнинг 1-бандида кўрсатилган имтиёзларни қўллаш ҳуқуқи йўқотилган тақдирда корхона солиқ даври мобайнида рўйхатдан ўтган жойдаги давлат солиқ хизмати органини мазкур Низомнинг 4-иловасига мувофиқ шаклда имтиёз ҳуқуқи йўқотилган сана тўғрисида ёзма равишда хабардор қилади.

16. Ўзбекистон Республикаси Давлат солиқ қўмитаси Имтиёзларга эга бўлган корхоналар йиғма реестрини юритади ва ҳар йили уни Ўзбекистон Республикаси Молия вазирлигига, ҳисобот йилидан кейинги йилнинг 15 апрелигача бўлган муддатда тақдим этади.

17. Солиқ тўловчилар тақдим этилган имтиёзларни ҳисобга олган ҳолда солиқлар ва бошқа мажбурий тўловларни тўғри ҳисоблаб чиқариш учун жавобгар бўлади.

18. Мазкур Низомда назарда тутилган имтиёзларнинг тўғри қўлланиши устидан назоратни давлат солиқ хизмати органлари қонун ҳужжатларига мувофиқ амалга оширади.

19. Мазкур Низом Ўзбекистон Республикаси Ташқи иқтисодий алоқалар, инвестициялар ва савдо вазирлиги, Ўзбекистон Республикаси Давлат статистика қўмитаси ҳамда Ўзбекистон Республикаси Савдо-саноат палатаси билан келишилган.

ХХТУТ:

14322 — электр ўлчов приборларини ишлаб чиқариш (электрон ўлчов приборлари қисмида);

14323 — радио ўлчов приборларини ишлаб чиқариш;

14331 — ҳисоблаш техникалари ва уларга эҳтиёт қисмларини ишлаб чиқариш;

14750 — радиосаноат;

14760 — алоқа воситалари саноати;

14771 — электроника саноати (махсус технологик ускуналарни ишлаб чиқариш кирмайди);

14772 — махсус технологик ускуналарини ишлаб чиқариш (назорат-синов ускуналари қўшилган ҳолда).

Тайёр ип газлама ва жун газламаларни ишлаб чиқариш.

ХХТУТ:

17116 — ип газлама саноати (қисман, чунки мазкур код йигирилган ип, иплар, момиқ, техник газламалар ишлаб чиқаришни ҳам ўз ичига олади);

17121 — жун саноати (аҳоли буюртмалари бўйича гиламлар ва гилам маҳсулотлари ишлаб чиқаришни қўшмаган ҳолда) — (қисман, чунки мазкур код йигирилган жун, адёл, гиламлар ва гилам буюмларини ишлаб чиқаришни ҳам ўз ичига олади).

Тайёр тикувчилик, трикотаж, пайпоқ маҳсулотлари ва тўқимачилик галантереясини ишлаб чиқариш.

ХХТУТ:

17141 — тўқимачилик атторлик молларини ишлаб чиқариш (аҳоли буюртмасини қўшмаган ҳолда);

17151 — трикотаж буюмларини ишлаб чиқариш (аҳоли буюртмасини қўшмаган ҳолда);

17210 — тикувчилик маҳсулотларини ишлаб чиқариш (аҳоли буюртмасини қўшмаган ҳолда).

Терини қайта ишлаш.

ХХТУТ:

17310 — табиий чарм ишлаб чиқариш.

Пойабзал ишлаб чиқариш.

ХХТУТ:

17371 — пойабзал ишлаб чиқариш (аҳоли буюртмасини қўшмаган ҳолда).

Тайёр чарм-галантерея буюмларини ишлаб чиқариш.

ХХТУТ:

17341 — табиий ва сунъий чармдан йўл учун ва галантерея (атторлик) буюмларини ишлаб чиқариш;

17361 — мўйналар ва мўйна буюмларини ишлаб чиқариш (аҳоли буюртмасини қўшмаган ҳолда) — (чармдан кийим-кечак ишлаб чиқариш қисмида).

Шойи газламалар ва ипакдан тайёр буюмлар ишлаб чиқариш.

ХХТУТ:

17131 — ипакчилик саноати (қисман, чунки мазкур код йигирилган ипак, шойи иплар ва ҳоказоларни ишлаб чиқаришни ҳам ўз ичига олади).

Бундан ташқари, мазкур гуруҳга 17141, 17151, 17210 кодлари шойи буюмлар қисмида киритилиши мумкин.

Ўзбекистон Республикаси Президентининг 2005 йил 24 мартдаги ПФ-3586-сон Фармони 1а-иловасида кўрсатилган янги турларни ишлаб чиқариш.

ХХТУТ:

12170 — ўтга чидамли маҳсулотлар ишлаб чиқариш (ўтга чидамли минерал толали плиталар қисмида);

13142 — полимер материаллардан плёнкалар, қувурлар ва листлар ишлаб чиқариш;

15230 — ёғоч-тахтадан ва ёғоч плиталардан қурилиш деталларини ишлаб чиқариш;

15250 — фанера ишлаб чиқариш;

16120 — асбоцемент буюмлари ишлаб чиқариш;

16162 — қурилишбоп сопол ишлаб чиқариш;

16170 — полимер хом ашёсидан қурилиш материаллари ва буюмлари ишлаб чиқариш;

16212 — табиий тошдан қопловчи материаллари ишлаб чиқариш;

16222 — сунъий ғовакли тўлдирувчилар ишлаб чиқариш ва табиийларини қайта ишлаш;

16232 — оҳак, гипс ва бошқа маҳаллий боғловчи материаллар ва улардан маҳсулотлар ишлаб чиқариш;

16240 — иссиқлик изоляцияси материаллари саноати;

16271 — товар бетон ва қурилиш қоришмасини ишлаб чиқариш;

16273 — бошқа қурилиш материалларини ишлаб чиқариш.

ХХТУТ:

21241 — тухум ишлаб чиқарувчи паррандачилик;

21242 — гўшт ишлаб чиқарувчи паррандачилик;

21243 — паррандачилик бирлашмалари (гўшт-тухум).

Маҳаллий хом ашёдан ишлаб чиқариладиган тайёр озиқ-овқат маҳсулоти қисмида.

ХХТУТ:

18111 — шакар саноати;

18113 — нон ишлаб чиқариш саноати;

18114 — қандолатчилик саноати;

18115 — макарон саноати;

18121 — ёғ-мой саноати (ювувчи воситаларини ишлаб чиқаришдан ташқари);

18151 — мева-сабзавот саноати (мева-сабзавот консерваларини ишлаб чиқаришларсиз);

18152 — мева-сабзавот консерваларини ишлаб чиқариш;

18191 — озиқ-овқат концентратларини ишлаб чиқариш (тайёр маҳсулот қисмида).

ХХТУТ:

18211 — гўшт саноати (елимжелатин саноатисиз);

18221 — ёғ-пишлоқ, пишлоқ ва сут саноати (сут консерваларини ишлаб чиқаришсиз);

18222 — сут консерваларини ишлаб чиқариш.

Дори-дармон воситаларини ишлаб чиқариш.

ХХТУТ:

19310 — кимё-дориворлик (фармацевтика) саноати.

Синтетик кир ювиш воситалари, маиший кимё товарларини ишлаб чиқариш.

ХХТУТ:

13190 — маиший кимё саноати;

18122 — совун ва ювувчи воситаларини ишлаб чиқариш (кимёвий модификацияланган маҳсулот қисмида).