Ўзбекистон Республикаси Президентининг «И.М. Губкин номидаги Россия давлат нефть ва газ университетининг Тошкент шаҳридаги филиали фаолиятини янада такомиллаштириш чора-тадбирлари тўғрисида» 2011 йил 6 июлдаги ПҚ-1569-сон қарори ижросини таъминлаш мақсадида Вазирлар Маҳкамаси қарор қилади:

1. Тошкент шаҳар ҳокимлиги томонидан Тошкент шаҳридаги И.М. Губкин номидаги Россия давлат нефть ва газ университети филиали қошидаги ихтисослаштирилган академик лицейнинг янги биноси ва талабаларнинг яшаши учун жойлар қуриш учун белгиланган тартибда қуйидаги манзилда умумий майдони 2,3 гектар ер участкаси ажратилганлиги маълумот учун қабул қилинсин: Тошкент шаҳри, Бектемир тумани, Оҳангарон шоссеси ва лойиҳалаштирилаётган Г-60 м.

2. «Ўзбекнефтгаз» МХК 2012 йил 1 августга қадар қуйидаги ишларни амалга оширсин:

Тошкент шаҳридаги И.М. Губкин номидаги Россия давлат нефть ва газ университети филиали қошидаги 360 ўқувчи ўринли ва 200 ўринли ўқувчилар турар жойи учун мўлжалланган ихтисослаштирилган академик лицейнинг (кейинги ўринларда — 1-объект) янги биносини қуриш ва фойдаланишга топшириш;

Тошкент шаҳри, Олимлар кўчаси, 64 а-уйдаги бинони (кейинги ўринларда — 2-объект деб аталади) реконструкция қилиш, бинода ўқув биноларини кенгайтириш ва И.М. Губкин номидаги Россия давлат нефть ва газ университетининг Тошкент шаҳридаги филиали талабалари учун қўшимча турар жойлари яратиш;

1 ва 2-сон объектларини зарур мебель, инвентарь, замонавий ўқув ва лаборатория асбоб-ускуналари, ташкилий техника билан жиҳозлаш.

3. Белгилансинки:

а) 1-сон объектини қуриш, 2-сон объектини лойиҳалаш ва реконструкция қилиш ишларининг буюртмачиси этиб — «Ўзтрансгаз» АКнинг «Трансгазинжиниринг» УКси;

б) 1 ва 2-объектлар бўйича бош лойиҳа ташкилоти этиб — «Ўзоғирсаноатлойиҳа» ОАЖ ;

в) бош пудрат ташкилоти томонидан:

1-объектни қуриш — «Ўзнефтгазқурилишинвест» АКнинг «Қашқадарёнефтгазсаноатқурилиш» ОАЖ;

2-объектни реконструкция қилиш — «Ўзнефтгазқурилишинвест» АКнинг «Тошнефтгазқурилиш» ОАЖ;

г) 1-объектни қуриш, 2-объектни лойиҳалаш ва реконструкция қилиш ҳамда уларни зарур мебель, инвентарь, замонавий ўқув ва лаборатория асбоб-ускуналари, ташкилий техника билан жиҳозлаш бўйича молиялаштириш манбалари — «Ўзтрансгаз» АКнинг ўз маблағлари.

4. Ўзбекистон Республикаси Давлат архитектура ва қурилиш қўмитаси 1 ва 2-сон объектларнинг лойиҳа-смета ҳужжатлари белгиланган тартибда экспертизадан ўтказишини таъминласин ҳамда қурилиш-монтаж ишлари сифати устидан архитектура-қурилиш назоратини ўрнатсин.

5. Белгилансинки:

Тошкент шаҳридаги И.М. Губкин номидаги Россия давлат нефть ва газ университети филиали қошидаги ихтисослаштирилган академик лицейи (кейинги ўринларда академик лицей деб аталади) фаолиятига ташкилий ва ўқув-методик раҳбарлик қилиш Ўрта махсус, касб-ҳунар таълими маркази ҳамда Тошкент шаҳридаги И.М. Губкин номидаги Россия давлат нефть ва газ университети филиали томонидан амалга оширилсин;

академик лицейда ўқитиш Ўзбекистон Республикасининг давлат таълим стандартлари, ўқув режалари ва ўрта махсус, касб-ҳунар таълими дастурларига мувофиқ ўтказилади;

академик лицейга ўқувчиларни қабул қилиш амалдаги қонун ҳужжатларида белгиланган тартибда ташкил этилади;

академик лицейнинг педагог ва маъмурий-хўжалик ходимлари меҳнатига ҳақ тўлаш, унинг иншоотлари комплексини сақлаш харажатлари таълим соҳасига ажратиладиган бюджет маблағлари доирасида Ўзбекистон Республикаси Давлат бюджети маблағлари ҳисобидан амалга оширилади;

И.М. Губкин номидаги Россия давлат нефть ва газ университетининг Тошкент шаҳридаги филиали академик лицейда ўқитишга юқори малакали, тажрибали ўқитувчиларни жалб этишга кўмаклашади.

6. Ўзбекистон Республикаси Вазирлар Маҳкамаси ҳузуридаги Давлат тест маркази Ўзбекистон Республикаси Олий ва ўрта махсус таълим вазирлиги билан биргаликда академик лицейда ўқув жараёнини ташкил этиш сифатини назорат қилиш, шунингдек, унинг ўқитувчилар таркибини белгиланган тартибда аттестациядан ўтказиш вазифалари юклатилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Г.И. Ибрагимов ва А.Н. Арипов зиммасига юклатилсин.