Ўзбекистон Республикаси Қишлоқ ва сув хўжалиги вазирлиги ва Корея Республикаси Миллий карантин хизмати, кейинчалик «Томонлар» деб аталувчилар, ўсимликлар карантини соҳасида икки томонлама ҳамкорликни мустаҳкамлаш мақсадида

қуйидагилар ҳақида келишиб олдилар:

Ўзбекистон Республикаси билан Корея Республикаси ўртасидаги ушбу Англашув Меморандумининг мувофиқлаштириш ва ижросини таъминлашга масъул ташкилотлар:

Ўзбекистон Республикаси Қишлоқ ва сув хўжалиги вазирлиги ҳузуридаги Ўсимликлар карантини Бош давлат инспекцияси;

Корея Республикаси Озиқ-овқат саноати, қишлоқ, ўрмон ва балиқчилик хўжалиги вазирлигининг Миллий карантин хизмати.

Мазкур Англашув Меморандумининг мақсадларида қуйидаги атамалар қўлланилади:

«Хавфли карантин организмлари» — давлатлар ҳудудларида мавжуд бўлмаган ёки чекланган миқдорда тарқалган, ўсимликларга зарар келтирувчи расмий назоратда бўлган зараркунандалар, ўсимликлар касалликларини қўзғатувчилар ва бегона ўтлар;

«карантин остидаги материаллар» — халқаро юк ташишга тааллуқли ўсимликлар, ўсимлик маҳсулотлари, қадоқлаш материаллари, тара, транспорт воситалари, контейнерлар, тупроқ ва бошқа тирик организмлар, фитосанитар чоралар талаб этиладиган материаллар ва маҳсулотлар.

Ўсимликлар карантини соҳасида ҳамкорликни ривожлантириш мақсадида Томонлар хавфли карантин организмларининг тарқалишига тааллуқли маълумотлар, фитосанитар қоидалар, йўриқномалар, технологиялар ҳамда хавфли карантин организмларини аниқлаш ва классификациялаш билан алмашиш, карантин услубларини ўзаро ўргатиш.

Томонлар бир давлат ҳудудидан иккинчи томон ҳудудига карантин остидаги материалларни импорт, экспорт ва транзит қилишда хавфли карантин организмларнинг ўтиб қолишининг олдини олиш мақсадида зарур чора-тадбирларини кўрадилар.

Томонлар хавфли карантин организмларининг жойини аниқлаш, назорат қилиш ва уларни бартараф этиш чораларини кўришда ўзаро илмий, техник ва маслаҳат ёрдамларини кўрсатадилар.

Томонлар ўсимликлар карантини соҳасидаги муаммоларни таҳлил этиш ва эришилган ютуқларни ўрганишда ҳамда чегара масканларида ўсимликлар карантини билан боғлиқ масалаларни ҳал этишда тегишли чоралар кўрадилар.

Карантин остидаги материалларни импорт ва экспорт қилишда Томонлар ўз давлатларининг миллий қонунларига амал қилиб, ҳар бир Томон карантин назорати ишларини ўз чегараларида бажарадилар.

Томонлар иккинчи Томонга экспорт қилинаётган карантин остидаги материалларнинг ҳар бир партиясини импорт қилувчи Томоннинг фитосанитар талабларига мувофиқлигини тасдиқловчи фитосанитар сертификати билан биргаликда жўнатилишини таъминлайдилар. Фитосанитар сертификати инглиз тилида расмийлаштирилади.

Импорт қилувчи Томон карантин назорати вақтида қандайдир хавфли карантин организмларининг мавжудлигини аниқлаган ҳолда, карантин остидаги материаллар партияси импорт қилувчи Томонидан ички қоидалар, йўриқномалари асосида зарарсизлантирилади (ишлов берилади), қайтариб юборилади ёки йўқотилади. Қоидалар қўпол равишда бузилган тақдирда, бошқа Томонга халқаро тажрибага асосан хабар берилади.

Бир Томон учун карантин аҳамиятига эга бўлган хавфли карантин организмларининг рўйхати, иккинчи Томон талаби асосида тақдим этилиши мумкин.

Томонлар ўзаро келишувга асосан Ушбу Англашув Меморандуми мақсадларининг ижросини таъминлаш учун учрашувлар ўтказишлари мумкин.

Томонлар ушбу Англашув Меморандумига оид масалаларни талқин ва жорий қилишдаги барча мунозараларни ўзаро келишув асосида музокаралар ва маслаҳатлашувлар орқали ҳал этадилар.

Мазкур Англашув Меморандуми Томонлар иштирокчиси бўлган халқаро шартномалардан келиб чиқадиган уларнинг ҳуқуқ ва мажбуриятларига дахлдор бўлмайди.

Томонларнинг ўзаро келишувига кўра мазкур Англашув Меморандумига ўзгартиришлар ва қўшимчалар киритилиши мумкин, улар мазкур Англашув Меморандумининг ажралмас қисми ҳисобланган алоҳида баённомалар билан расмийлаштирилади.

Мазкур Англашув Меморандуми икки Томон имзолаган пайтдан бошлаб кучга киради ва беш (5) йил муддатга тузилади.

Мазкур Англашув Меморандумининг амал қилиши ўз-ўзидан кейинги беш (5) йиллик муддатларга узаяверади.

Ҳар бир Томон бошқа Томонга мазкур Англашув Меморандумининг амал қилиши тўхтатилиши ҳақида ёзма равишдаги хабарномани юбориб, мазкур Англашув Меморандумининг амал қилишини тўхтатиши мумкин.

Бошқа Томондан ёзма равишдаги хабарнома олинган кундан олти (6) ой ўтганидан сўнг Англашув Меморандумининг амал қилиши тўхтатилади.

Сеул шаҳрида 2010 йил 10 февралда икки нусхада, ҳар бири ўзбек, корейс ва инглиз тилларида тузилди ва бунда барча матнлар бир хил кучга эга.

Мазкур Англашув Меморандуми қоидаларини талқин қилиш мақсадида инглиз тилидаги матндан фойдаланилади.