Шахснинг баркамол камол топишига, ўсиб келаётган авлоднинг ижодий қобилиятларини аниқлаш ва ривожлантиришга, ўқувчиларга меҳнатсеварликни сингдиришга, шунингдек уларнинг бўш вақтдан оқилона фойдаланишига йўналтирилган мактабдан ташқари ишлар тизимини тубдан такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Халқ таълими вазирлиги, Иқтисодиёт вазирлиги ва Молия вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг фаолият кўрсатаётган мактабдан ташқари таълим муассасаларининг сонини ва тузилмасини такомиллаштириш ҳамда унинг асосида ҳар бир туман ва шаҳарда биттадан «Баркамол авлод» болалар марказини, шунингдек биттадан вилоят болалар марказини, Қорақалпоғистон Республикасида эса республика болалар марказини ва Тошкент шаҳрида — техник, бадиий ижодиёт, ўлкашунослик ва экология бўйича учта республика болалар марказларини — улар тегишли равишда туманлар, шаҳарлар ва вилоятлар ҳокимликларига бўйсундирилган ҳолда — ҳаммаси бўлиб 215 та болалар марказини шакллантириш тўғрисидаги таклифи қабул қилинсин.

2. «Баркамол авлод» туман (шаҳар) болалар марказлари, вилоят (Қорақалпоғистон Республикасида республика маркази) ва Тошкент шаҳар болалар марказларининг, шунингдек учта «Баркамол авлод» республика болалар марказларининг намунавий тузилмалари 1, 2 ва 3-иловаларга мувофиқ маъқуллансин.

3. Қуйидагилар «Баркамол авлод» болалар марказларининг асосий вазифалари этиб белгилансин:

болаларнинг эҳтиёжлари ва қизиқишларига мувофиқ уларнинг ижодий ва бадиий қобилиятларини ривожлантириш, уларнинг фойдали дам олишини ташкил этиш;

меҳнатсеварликни, касб тайёргарлигининг дастлабки уқув ва кўникмаларини сингдириш, фан ва техникани ривожлантиришнинг истиқболли йўналишларига мувофиқ техник воситалар ва компьютер технологиялари ишини ўрганишни ташкил этган ҳолда болалар техник ижодкорлигини ривожлантириш;

болалар томонидан жонажон ўлка тарихи, археологик ва маданий мерос чуқур ўрганилиши, мамлакатимизнинг табиий бойликлари билан таништириш ҳамда экология ва атроф муҳит муҳофазаси соҳасидаги асосий билимларни эгаллаб олиш;

мактабдан ташқари таълим тизимига илғор педагогик усуллар ва методлардан, замонавий ахборот-коммуникация технологияларидан фойдаланган ҳолда ўқитишнинг янги шаклларини кенг жорий этиш.

Ўзбекистон Республикаси Вазирлар Маҳкамаси бир ой муддатда «Баркамол авлод» марказлари тўғрисидаги низомни тасдиқласин.

4. Ўзбекистон Республикаси Президентининг 2010 йил 13 октябрдаги Ф-3509-сон фармойиши билан ташкил этилган ишчи гуруҳ томонидан ишлаб чиқилган, қуйидагиларни ўз ичига оладиган 2011 — 2014 йилларда «Баркамол авлод» болалар марказларини шакллантириш дастури тасдиқлансин:

2011 — 2014 йилларда «Баркамол авлод» болалар марказларини шакллантириш ва уларнинг моддий-техника базасини ривожлантириш бўйича комплекс тадбирлар 4-иловага мувофиқ;

2011 — 2014 йилларда «Баркамол авлод» болалар марказларини мукаммал таъмирлаш ва жиҳозлашнинг асосий параметрлари 5-иловага мувофиқ.

5. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

белгиланган жадвалга мувофиқ муддатларда умумтаълим мактаблари биноларининг алоҳида ўқув блокларида 78 та «Баркамол авлод» болалар маркази очилишини таъминласинлар, алоҳида кириш жойи мавжуд бўлишини ҳамда тўрттадан олтитагача тўгарак хоналарини ўқув жараёнига зарар етказмасдан зарур асбоб-ускуналар ва инвентарь билан тўлиқ жиҳозлашни назарда тутсинлар;

тўгарак машғулотларини ўтказишга асосан умумтаълим мактаблари, академик лицейлар ва касб-ҳунар коллежлари ўқитувчилари 0,5 ставка бўйича ҳисоб-китобдан келиб чиқиб контракт асосида жалб этилишини ташкил этсинлар;

Ўзбекистон Республикаси Меҳнат ва аҳолини ижтимоий муҳофаза қилиш вазирлиги билан биргаликда мактабдан ташқари таълим муассасаларининг бўшаб қоладиган ходимларини ишга жойлаштириш чора-тадбирларини кўрсинлар.

Белгилансинки, умумтаълим мактаблари биноларининг алоҳида ўқув блокларида ташкил этиладиган «Баркамол авлод» болалар марказларида электр энергиясини ҳисобга олишнинг алоҳида приборлари ўрнатилади, қолган коммунал харажатлар эса улар томонидан умумтаълим мактабларига молия органлари билан келишув бўйича қопланади.

6. Белгилаб қўйилсинки:

«Баркамол авлод» болалар марказларини мукаммал таъмирлаш, шунингдек уларни жиҳозлаш бўйича буюртмачи функцияси Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги ягона буюртмачи хизматига юкланади;

Дастурни амалга ошириш доирасида «Баркамол авлод» болалар марказларини мукаммал таъмирлаш ва жиҳозлаш бўйича ишларни молиялаштириш маҳаллий бюджетлар параметрларида кам самарали мактабдан ташқари таълим муассасаларини тугатиш ҳисобига бўшаб қоладиган мактабдан ташқари таълим муассасаларини молиялаштиришга назарда тутилган маблағлар ва ходимлар сонини мақбуллаштириш ҳисобига амалга оширилади.

7. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўзбекистон Республикаси Давлат архитектура ва қурилиш қўмитаси билан биргаликда:

«Баркамол авлод» болалар марказлари ташкил этиладиган бинолар ва иншоотларни мукаммал таъмирлаш учун лойиҳа-смета ҳужжатлари ўз вақтида ишлаб чиқилишини, таъмирлаш ишларини тўлиқ тугаллаш ва объектларни белгиланган муддатларда топшириш шартлари билан танлов (тендер) савдолари ўтказилишини таъминласинлар;

буюртмачи билан пудратчилар ўртасидаги шартнома мажбуриятлари бажарилиши ҳамда қурилиш нормалари ва қоидаларига мувофиқ таъмирлаш ишлари амалга оширилиши устидан доимий назорат ўрнатсинлар.

8. Ўзбекистон Республикаси Молия вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг «Баркамол авлод» болалар марказларида ўқиганлик учун вилоят марказлари, Нукус ва Тошкент шаҳарларида ойига энг кам ойлик иш ҳақининг 10 фоизи миқдорида ва республиканинг бошқа туманлари (шаҳарларида) 5 фоиз миқдорида ота-она тўлови жорий этилиши, тушган маблағлар тўгарак ишлари учун зарур бўлган материаллар ва хом ашё сотиб олишга мақсадли йўналтирилиши ҳақидаги таклифи маъқуллансин.

Ўзбекистон Республикаси Молия вазирлиги манфаатдор вазирликлар ва идоралар билан биргаликда бир ой муддатда «Баркамол авлод» болалар марказларида болалар ўқиганлиги учун ота-она тўловини ундириш ва ундан фойдаланиш тартибини ишлаб чиқсин ва тасдиқласин.

9. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда Вазирлар Маҳкамасига қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида таклиф киритсин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Н. Арипов зиммасига юклансин.