Сўнгги кунларда Қирғизистон Республикасининг жанубида рўй бераётган фожиали воқеалардан бутун мамлакатимиз халқи каби Ўзбекистон Республикаси Олий Мажлиси Қонунчилик палатасининг депутатлари ҳам қаттиқ ташвиш чекмоқдалар, жиддий хавотирдалар.

Оммавий қотилликлар, ҳимоясиз қолган тинч аҳолига, шу жумладан болалар ва хотин-қизларга нисбатан қилинаётган ғайриинсоний, шафқатсиз зўравонлик, талон-тарож ва қирғинлар яхши қуролланган, усталик билан ташкил этилган, ҳеч нарсадан ҳайиқмай ҳаракат қилаётган босқинчи тўдалар томонидан содир этилаётганлиги нафрат уйғотмоқда.

Азал-азалдан Қирғизистон Республикасининг жанубида истиқомат қилиб келаётган ўзбек миллатига мансуб аҳолига нисбатан содир этилаётган қотилликлар, зўравонлик ва талон-тарож оммавий тус олганлиги ўта хавотирлик уйғотмоқда ва бунга тоқат қилиб бўлмайди.

Рўй бераётган воқеалар ортида зимдан иш олиб бораётган, қирғиз халқининг манфаатлари ўзи учун ёт бўлган кучлар турганлигига Ўзбекистон парламенти аъзоларининг ишончи комил. Бу қора кучлар миллатлар ўртасида низо қўзғатиш, Қирғизистон жанубидаги вазиятни беқарорлаштириш ниятида узоқни кўзлаб ҳаракат қилмоқдалар. Кенг кўламли бу иғвогарлик оқибатида қон тўкилмоқда, юзлаб одамлар ҳалок бўлди ва ҳалок бўлмоқда, минглаб кишилар ярадор бўлди, ўз бошпанасидан айрилди. Ўзбекистоннинг чегарадош туманларига ўз жонини сақлаб қолиш учун қочиб ўтган Қирғизистон фуқаролари сони 75 минг нафардан ошиб кетди.

Ўзбекистон Республикаси Олий Мажлиси Қонунчилик палатаси депутатлари Қирғизистоннинг тегишли тузилмаларини воқеаларнинг фожиали ривожланишига тўсиқ қўйиш, тартибни тиклаш, ҳаётни тинч ўзанга буриш борасида жадал ва тўла-тўкис чоралар кўришга, бунинг учун бор имкониятдан тўлиқ фойдаланишга даъват қиладилар.

Ўзбекистон парламенти аъзоларининг ишончи комилки, Қирғизистон халқидаги донишмандлик, кўп асрлардан буён турли миллат ва элатлар бир тан, бир жон бўлиб яшаб келаётган, елкама-елка туриб меҳнат қилаётган мамлакатнинг соғлом кучлари ҳозирги оғир кунларга, қотилликларга, бошбошдоқлик ва зўравонликка барҳам беришга, вазиятни барқарорлаштиришга, Қирғизистоннинг кўп миллатли халқи тинч-тотув яшашини таъминлашга қодир.

Олий Мажлис Қонунчилик палатаси депутатлари Ўзбекистон Республикаси Президенти И.А. Каримов раҳбарлигида Ўзбекистон олиб бораётган минтақада хавфсизлик ва барқарорликни таъминлашга қаратилган тинчликсевар ташқи сиёсатни, Қирғизистоннинг мусибатда қолган аҳолисига инсонпарварлик ёрдами кўрсатиш бўйича мамлакатимиз ҳукумати томонидан кўрилаётган чора-тадбирларни қўллаб-қувватлайдилар.

Қирғизистон Республикасининг жанубида рўй бераётган фожиали воқеаларни муҳокама қилиб ҳамда Тадбиркорлар ва ишбилармонлар ҳаракати — Ўзбекистон Либерал-демократик партияси ва Ўзбекистон «Миллий тикланиш» демократик партияси фракцияларининг ташаббусини эътиборга олиб, Ўзбекистон Республикаси Олий Мажлисининг Қонунчилик палатаси қарор қилади :

1. Ўзбекистон Республикаси Олий Мажлиси Қонунчилик палатасининг депутатлари халқ депутатлари маҳаллий Кенгашларининг депутатлари, жамоат бирлашмалари вакиллари билан яқин ҳамкорликда аҳоли, айниқса, ёшлар ўртасида Қирғизистоннинг жанубида юзага келаётган вазият бўйича, мамлакатда хавфсизлик ва барқарорликни таъминлашда фаол иштирок этиш тўғрисида кенг тушунтириш ишлари олиб борилишини таъминласин.

2. Ўзбекистон Республикаси Олий Мажлиси Қонунчилик палатасининг қўмиталари Ўзбекистон Республикаси Президенти И.А. Каримовнинг Ўзбекистон Республикаси Олий Мажлиси Қонунчилик палатаси ва Сенатининг 2010 йил 27 январь куни бўлиб ўтган қўшма мажлисида қилган «Мамлакатимизни модернизация қилиш ва кучли фуқаролик жамияти барпо этиш — устувор мақсадимиздир» мавзуидаги маърузасида белгилаб берилган устувор вазифаларга асосланган ҳолда мамлакатда тинчлик ва барқарорликни, фуқароларнинг ҳуқуқлари ва эркинликлари муҳофаза қилинишини таъминлашга қаратилган қонун ижодкорлиги фаолиятини фаоллаштирсин.

3. Сиёсий партиялар фракцияларининг, халқ депутатлари маҳаллий Кенгашларидаги депутатлар гуруҳларининг фуқаролар ижтимоий-сиёсий фаоллигини ошириш борасидаги, мамлакатда барча фуқаролар, миллатлар ўртасидаги тинч-тотувликни сақлашга, аҳоли хушёрлигини оширишга, тинчликни, Ўзбекистон барқарор ривожланишини, демократик, социал-иқтисодий, ижтимоий-сиёсий ислоҳотлар изчил амалга оширилишини таъминлаш ишида аҳоли иштирокини кучайтиришга қаратилган фаолияти қўллаб-қувватлансин.

4. Ушбу Қарор қабул қилинган пайтдан эътиборан кучга киради.