Ўзбекистон Республикасининг «Ўзбектуризм» миллий компанияси ва Испаниянинг Саноат, Туризм ва Савдо вазирлиги, бундан кейин «имзо чекувчи Томонлар» деб аталувчилар,

икки мамлакат ўртасида туризм соҳасидаги ҳамкорликни ўзаро тенг ҳуқуқлилик асосида ривожлантириш мақсадида,

Имзо чекувчи Томонлар ўз мамлакатлари иқтисодиётини кучайтириш ва миллий маданиятларини ўзаро тушуниш жараёнини яхшилаш мақсадида икки томонлама туризм соқасидаги алоқаларни ривожлантириш ва кенгайтиришга алоҳида эътибор қаратадилар. Бу соҳада амалга ошириладиган барча саъй-ҳаракатлар иккала мамлакат қонунчилиги ва амалдаги халқаро битимлари асосида бажарилиши лозим.

Имзо чекувчи Томонлар давлат ва хусусий туризм секторлари ўртасида ҳамкорликни кучайтирадилар ва туризм соҳасини ривожлантириш, маркетинг, режалаштириш ва дам олиш масканларини яхшилаш мақсадида уюштириладиган ўзаро мутахассислар ташрифларини рағбатлантириш имкониятларини ўрганиб чиқадилар.

Имзо чекувчи Томонлар туризм саноатида сифат, доимий ривожланиш ва технологик янгиликларга оид ўзаро маълумот ва тажриба алмашинувини рағбатлантирадилар.

Имзо чекувчи Томонлар ўз мамлакатлари хусусий секторлари ўртасида туризм соҳасига инвестициялар жалб қилишга қаратилган ҳамкорликни кучайтирадилар.

Шу мақсадда имзо чекувчи Томонлар ўз мамлакатларида амалга оширилаётган туризм соҳасини ривожлантиришга оид дастурлар ҳамда ушбу дастурлар билан боғлиқ миллий ва халқаро фондлар ва молиявий жараёнлар юзасидан ўзаро маълумот алмашадилар.

Имзо чекувчи Томонлар ўзаро мутахассислар ташрифларини уюштириш ва ўқув дастурларини ташкиллаштириш орқали ўзаро техник ёрдам бериш имкониятларини кўриб чиқадилар.

Бундан ташқари, имзо чекувчи Томонлар ўз мамлакатларида мавжуд туризмга оид грант дастурлари ҳамда бу соҳада малака ошириш бўйича ўқув курслари юзасидан маълумот алмашадилар. Бу каби дастурлар ва ўқув курсларида ҳар икки мамлакат вакилларининг иштирокини қўллаб-қувватлайдилар.

Шунингдек, имзо чекувчи Томонлар туризм соҳасини ривожлантириш мақсадида туризмни жадаллаштириш, атроф-муҳитни сақлаш, туризм соҳасига оид ташкилий масалаларни ҳал этиш ва тарихий обидаларни таъмирлашга қаратилган ўзаро мутахассислар ташрифини уюштириш имкониятларини кўриб чиқадилар.

Ўз мамлакатларига туристларни жалб қилиш мақсадида имзо чекувчи Томонларнинг ҳар бири иккала мамлакатда ўтказиладиган кўргазмалар, конгресс, савдо ярмаркалари, форумлар, семинарлар ва бошқа тарғибот анжуманларида ўз вакилларининг иштирокини рағбатлантирадилар.

Ушбу Англашув Меморандуми бошқа халқаро келишувларнинг ҳуқуқ ва мажбуриятларига таъсир кўрсатмайди.

Икки имзо чекувчи Томонлар розилиги билан ушбу Англашув Меморандумига қўшимча ҳужжатлар билан расмийлаштирилган ва мазкур Меморандумнинг ажралмас қисми ҳисобланадиган ўзгартириш ва қўшимчалар киритилиши мумкин.

Ушбу Англашув Меморандуми имзоланган санадан бошлаб кучга киради ва имзо чекувчи Томонларнинг бири Меморандумни вақтлироқ муддатда тугатиш истагини билдирмаса, беш йил давомида амал қилади. Агар имзо чекувчи Томонларнинг бири Меморандум муддати тугашидан олти ой олдин унинг фаолиятини бекор қилиш тўғрисидаги хабарномани тақдим этмаса, ушбу Меморандум муддати ўз-ўзидан кейинги беш йиллик муддатларга узайтирилади.

Тошкент шаҳрида 2009 йил 3 июлда икки асл нусхада, ҳар бири ўзбек ва испан тилларида тузилди.